Read Navajo GENESIS 5 Bible Online

GENESIS 5 - Navajo bible

GENESIS 5

¹Ádam ba'áłchíní náás da'ahílchíihii díí naaltsoos bii' baa hane'. Diyin God éí diné ájiilaadą́ą́' t'áá honáłt'éego ájiilaa.

²Biką'ii áyiilaa áádóó bi'áadii ałdó' áyiilaago yik'ijisdli', áko áho'diilyaa bijį́į́dą́ą́' Ádam yee hóózhi'.

³Ádam jiináago neeznádiindóó ba'aan tádiin honááhaigo haye' nááhásdlį́į́'; t'áá honáłt'éego índa t'áá ájít'éhígi át'éego há náánázhchį́; éí Seth bee jíízhi'.

⁴Ádam hwíiníłkánígíí éí Seth há yizhchį́į́dóó bik'ijį' tseebíidi neeznádiin honináánááhaígíí biyi' haye'ké índa hatsi'ké há niheezhchį́.

⁵Áko Ádam hwíídíiską́ą́dóó jiináago náhást'éidi neeznádiindóó ba'aan tádiin honááhaigo dadziztsą́.

⁶Seth jiináago neeznádiindóó ba'aan ashdla' honááhaigo Íínas há yizhchį́.

⁷Seth jiináago Íínas há yizhchį́į́dóó bik'ijį' tseebíidi neeznádiindóó ba'aan tsosts'id honínáánááhaígíí biyi' haye'ké índa hatsi'ké há niheezhchį́.

⁸Áko Seth hwíídíiską́ą́dóó náhást'éidi neeznádiindóó ba'aan naakits'áadah honááhaigo dadziztsą́.

⁹Íínas jiináago náhást'édiin honááhaigo Kéínan há yizhchį́.

¹⁰Íínas jiináago Kéínan há yizhchį́į́dóó bik'ijį' tseebíidi neeznádiindóó ba'aan ashdla'áadah honínáánááhaígíí biyi' haye'ké índa hatsi'ké há niheezhchį́.

¹¹Áko hwíídíiską́ą́dóó náhást'éidi neeznádiindóó ba'aan ashdla' honááhaigo dadziztsą́.

¹²Kéínan jiináago tsosts'idiin honááhaigo Mahéílalíyel há yizhchį́.

¹³Kéínan jiináago Mahéílalíyel há yizhchį́į́dóó bik'ijį' tseebíidi neeznádiindóó ba'aan dízdiin honínáánááhaígíí biyi' haye'ké índa hatsi'ké há niheezhchį́.

¹⁴Áko Kéínan hwíídíiską́ą́dóó náhást'éidi neeznádiindóó ba'aan neeznáá honááhaigo dadziztsą́.

¹⁵Mahéílalíyel jiináago hastą́diindóó ba'aan ashdla' honááhaigo Jííred há yizhchį́.

¹⁶Mahéílalíyel jiináago Jííred há yizhchį́į́dóó bik'ijį' tseebíidi neeznádiindóó ba'aan tádiin honínáánááhaígíí biyi' haye'ké índa hatsi'ké há niheezhchį́.

¹⁷Áko Mahéílalíyel hwíídíiską́ą́dóó tseebíidi neeznádiindóó ba'aan náhást'édiindóó ba'aan ashdla' honááhaigo dadziztsą́.

¹⁸Jííred jiináago neeznádiindóó ba'aan hastą́diindóó ba'aan naaki honááhaigo Íínak há yizhchį́.

¹⁹Jííred jiináago Íínak há yizhchį́į́dóó bik'ijį' tseebíidi neeznádiin honínáánááhaígíí biyi' haye'ké índa hatsi'ké há niheezhchį́.

²⁰Áko Jííred hwíídíiską́ą́dóó náhást'éidi neeznádiindóó ba'aan hastą́diindóó ba'aan naaki honááhaigo dadziztsą́.

²¹Íínak jiináago hastą́diindóó ba'aan ashdla' honááhaigo Miithúzelah há yizhchį́.

²²Íínak jiináago Miithúzelah há yizhchį́į́dóó bik'ijį' Diyin God bił joo'ashgo táadi neeznádiin honínáánááhaígíí biyi' haye'ké índa hatsi'ké há niheezhchį́.

²³Íínak hwíídíiską́ą́dóó táadi neeznádiindóó ba'aan hastą́diindóó ba'aan ashdla' honááhai.

²⁴Áko Íínak t'áá Diyin God bił joo'ashgo nihokáa'gi doo hwééhoozin da, háálá Diyin God nááhodiidlá.

²⁵Miithúzelah jiináago neeznádiindóó ba'aan tseebídiindóó ba'aan tsosts'id honááhaigo Léímek há yizhchį́.

²⁶Miithúzelah jiináago Léímek há yizhchį́į́dóó bik'ijį' tsosts'idi neeznádiindóó ba'aan tseebídiindóó ba'aan naaki honínáánááhaígíí biyi' haye'ké índa hatsi'ké há niheezhchį́.

²⁷Miithúzelah hwíídíiską́ą́dóó náhást'éidi neeznádiindóó ba'aan hastą́diindóó ba'aan náhást'éí honááhaigo dadziztsą́.

²⁸Léímek jiináago neeznádiindóó ba'aan tseebídiindóó ba'aan naaki honááhaigo haye' há yizhchį́.

²⁹Éí Nóah bee jíízhi'go ázhdííniid, Díí lą́ą nideiilnishgo índa nihíla' bee yéego nideiilnishgo nihik'i hałta'go ánihidoolííł, háálá Bóhólníihii éí ni' hóyée'go yá haadzíí'.

³⁰Léímek jiináago Nóah há yizhchį́į́dóó bik'ijį' ashdladi neeznádiindóó ba'aan náhást'édiindóó ba'aan ashdla' honínáánááhaígíí biyi' haye'ké índa hatsi'ké há niheezhchį́.

³¹Léímek hwíídíiską́ą́dóó tsosts'idi neeznádiindóó ba'aan tsosts'idiindóó ba'aan tsosts'id honááhaigo dadziztsą́.

³²Nóah éí ashdladi neeznádiin honááhai. Áko Shem áádóó Ham índa Jéífeth há niheezhchį́.