Read Navajo GENESIS 7 Bible Online

GENESIS 7 - Navajo bible

GENESIS 7

¹Ákohgo Bóhólníihii éí Nóah áyidííniid, Ni áádóó bił dah yíkahii t'áá ánółtso k'ad tsinaa'eeł biih wohkááh, háálá t'áá ákogi ánít'éego díí oochíłígíí bitahgi nééhonisin.

²Naaldlooshii daadą́ą dooleełii t'áá ałtso bitahdóó biką'ii índa bi'áadii tsosts'id níjaa'go bił yah ahidííkah; naaldlooshii doo daadą́ą da dooleełii éí biką'ii índa bi'áadii naaki níláago bił yah ahidííkah.

³Nidaat'a'ii biką'ii índa bi'áadii ałdó' tsosts'id níjaa'go bił yah ahidííkah; nahasdzáán bikáá'góó t'áá át'éé nít'éé' dahináanii ał'ąą ádaat'éii t'áá da'ahílchíih doo biniyé baa áhólyą́ą doo.

⁴Áko tsosts'id yiską́ągo shizaad k'ehgo dízdiin jį́ áádóó dízdiin tł'éé' nahałtin doo, áko t'áá ałtso dahináanii ádaashłaaígíí nahasdzáán bikáa'gi ádeeshdįįł.

⁵Áko Nóah éí Bóhólníihii hach'į' yee haadzíi'ii t'áá ałtso bi'jiilaa.

⁶Nóah éí hastą́ądi neeznádiin binááhaigo nahasdzáán bikáa'gi tó yíląąd.

⁷Tó dooląąłígíí biniinaa Nóah áádóó haye'ké áádóó hwe'asdzą́ą́ índa haye'ké bida'asdzą́ą́ t'áá ádzíłtso tsinaa'eeł biih jookai.

⁸Naaldlooshii daadą́ą dooleełii áádóó naaldlooshii doo daadą́ą da dooleełii áádóó nidaat'a'ii índa nihokáa'gi nidaa'na'ii t'áá ałtso

⁹biką'ii índa bi'áadii naaki níláago Nóah yich'į' tsinaa'eeł yii' yah aheeskai; Diyin God éí Nóah yich'į' haadzíi'ii yik'eh ádaadzaa.

¹⁰Áádóó ákódzaago tsosts'id yiską́ą́dóó bik'ijį' nahasdzáán bikáa'gi tó bi'niiląąd.

¹¹Áko Nóah hastą́ądi neeznádiin binááhaigo áádóó naaki nídízííd binih tsosts'idts'áadahgóó yoołkáałgo ts'ídá éí bijį́į́dą́ą́' tónteel bii'dę́ę́' tó hadadziisxaal, áádóó yá ąą ádaadzaago tó dadeeshchxosh.

¹²Áko nahasdzáán bikáa'gi nahałtingo dízdiin jį́ índa dízdiin tł'éé' azlį́į́'.

¹³Nihihoníłtą́ bijį́į́dą́ą́' Nóah áádóó haye'ké Shem áádóó Ham índa Jéífeth áádóó Nóah be'asdzą́ą́ áádóó haye'ké bida'asdzą́ą́ tált'éego tsinaa'eeł biih jookai.

¹⁴T'áá ádzíłtso áádóó naaldlooshii ał'ąą ádaat'éii áádóó alį́į́' ał'ąą ádaat'éii áádóó nihokáá' nidaa'na'ii ał'ąą ádaat'éii índa nidaat'a'ii ał'ąą ádaat'éii

¹⁵bits'íís dahináago nídadidzihii nináneel'ą́ąjį' naaki níláago Nóah yich'į' tsinaa'eeł yii' yah aheeskai.

¹⁶Diyin God éí Nóah yich'į' haadzíi'ii bik'ehgo yah adahaaskaígíí éí bits'íís dahólóonii ał'ąą ádaat'éii t'áá ałtso bitahdóó biką'ii índa bi'áadii yah aakaii t'áá yił Bóhólníihii hadádi'níłkaal.

¹⁷Dízdiin jį́ nahasdzáán bikáá'góó tó de anool'ąął, áko tó t'áá íiyisí de adínées'ąądgo tsinaa'eeł dah naa'eeł silį́į́'.

¹⁸Áádóó t'ah biláhígo ayóó át'éego tó de náádí'nées'ąądgo nahasdzáán ałtso yik'i diilkǫ', áko tsinaa'eeł táłkáá' dah dii'éél.

¹⁹Tó alááh nool'ąądgo nahasdzáán ałtso yik'i diilkǫ' áádóó dził aghádaaz'á yę́ę yá biyaagi t'áá níłtéél nít'éé' ałtso tó bik'i dadiilkǫ'.

²⁰Naadiin naakidóó náá'áłníí' ké silá ánízáádgóó tó néés'ąądgo dził ałtso yik'i diilkǫ'.

²¹Áko nahasdzáán bikáa'gi bits'íís hólǫ́ǫgo naaldeehii t'áá ałtso: éí nidaat'a'ii áádóó alį́į́' áádóó naaldlooshii áádóó nihokáá'góó nidaa'na'ii índa diné ałdó' ts'ídá ałtso tó ábísdįįd;

²²nídídzihii nináneel'ą́ąjį' nihokáá'góó naasdee' yę́ę ts'ídá ałtso tó ábísdįįd.

²³Áko ni' bikáa'gi dahináanii ałtso tó ábísdįįd: diné áádóó naaldlooshii áádóó nidaa'na'ii índa nidaat'a'ii éí nahasdzáán bikáa'gi ábi'disdįįd, áko tsinaa'eeł biyi' góne' Nóah hoł hólónígíí t'éiyá t'áá bił dzoodzíí'.

²⁴Tó éí nahasdzáán t'áá yik'i dilkǫǫhgo neeznádiindóó ba'aan ashdladiin yiską́.