Read Navajo GENESIS 9 Bible Online

GENESIS 9 - Navajo bible

GENESIS 9

¹Áko Diyin God éí Nóah áádóó biye'ké yik'ijisdli'go áyidííniid, Náásgóó niha'áłchíní náhoodleeł doo; k'ee'ąą dínóht'įįhgo nahasdzáán bikáá' nihináánółt'eeh.

²Nahasdzáán bikáa'gi naaldlooshii t'áá ałtso áádóó nidaat'a'ii t'áá ałtso áádóó nahasdzáán bikáá' naaldeehii t'áá ałtso índa táyi' naaldeehii t'áá ałtso ałdó' nihéédaaldzid doo, índa nihik'ee biyandahalyiz doo, áko bee nihídahólníih dooleeł.

³Naaldeehii nináneel'ą́ąjį' nihich'iyą' doo, nanise' daadáanii nihaa diní'ánígi át'éego nihaa dinish'aah.

⁴Nidi atsį' éí dił t'áá bii' hólǫ́ǫgo doo dadoohsį́įł da, ats'íís éí dił yee hiná.

⁵Nihidił bee dahinohnáanii nihits'ádaazlį́įgo ánihiilaii ts'ídá t'áá k'ééhodideeshdlíłí; naaldlooshii éí diné yiyiisxį́įgo éí diyoolyéełgo bee hwiideesh'aał, doodaii' diné dziisxį́įgo hodi'yoolyéełgo bee hwiideesh'aał; t'áá háiida hak'is dziisxį́įgo hodi'yoolyéełgo bee hwiideesh'aał.

⁶T'áá háiida diné bidił bits'ánílį́ ájiilaii daaztsą́ągo hó ałdó' hadił hats'ánílį́ áhodi'doolníiłgo dazdootsaał, háálá Diyin God éí diné t'áá bináłt'éego áyiilaa.

⁷Áádóó nihí niha'áłchíní nídahoodleełgo k'ee'ąą nooht'į́įł le', índa nahasdzáán bikáa'gi k'ee'ąą dínóht'įįhgo bilááh nááhdleeł le'.

⁸Áko Diyin God kóníigo Nóah áádóó biye'ké yich'į' haadzíi'go ání,

⁹Shoo, shí lą́ą t'áá shí, nihí áádóó nihada'áłchíní náás da'ahílchíihii t'áá bił bohoníłdzilgo nihił ałha'dinisht'aah.

¹⁰Áádóó hináanii nináneel'ą́ąjį' éí nidaat'a'ii áádóó alį́į́' índa nihokáá' naaldeehii t'áá ałtso éí tsinaa'eeł biyi'dę́ę́' bił ch'ííníkaígíí t'áá ałtso ałdó' bił ałha'dinisht'aah.

¹¹Áko bohoníłdzilgo nihił ałha'dideesht'ááł; bits'íís dahólóonii t'áá ałtso éí doo tó bee ánáádooldįįł da; doo nidi nahasdzáán bikáa'gi tó ánáábidoołdįįł da.

¹²Áádóó Diyin God ádííniid, Ni áádóó dahináanii nináneel'ą́ąjį' índa náásgóó da'ahílchíihii t'áá ałtso nihił ałha'dinisht'aah; díí bee ééhózin doo;

¹³éí k'os biyi' shinááts'íílid ninílá, áko shí áádóó nahasdzáán bił nihita'gi aha'deet'ą́ągo bee bééhózin doo.

¹⁴Ííshją́ą́ kót'ée doo, nahasdzáán bikáa'gi k'os ánásh'įįhgo biyi' nááts'íílid néiltséeh dooleeł,

¹⁵áko shí lá índa ni lá áádóó bits'íís dahináanii nináneel'ą́ąjį' nihił ahada'di'nisht'áanii bénáshniih doo, áko tó nídaadląąhgo bits'íís dahólóonii t'áá ałtso doo tó áńdabiłdįįh da doo.

¹⁶K'os biyi' nááts'íílid ninádiłgo nánísh'įįh doo, áko Diyin God áádóó nahasdzáán bikáa'gi bits'íís dahináanii nináneel'ą́ąjį' hool'áágóó bił ahadi'nisht'ą́ągo bénáshniih doo.

¹⁷Áádóó Diyin God éí Nóah ánéídoo'niid, Díidí shí áádóó nahasdzáán bikáa'gi bits'íís dahináanii t'áá ałtso nihita'gi bił ahadi'nisht'ą́ągo bee bééhózinii át'é.

¹⁸Nóah biye'ké éí tsinaa'eeł biyi'dę́ę́' ch'ékaígíí éí Shem áádóó Ham índa Jéífeth ádaat'į́. Áko Ham éí Kéínan bizhé'é jílį́.

¹⁹Díí tált'éego Nóah biye'ké danilį́; éí bits'ą́ą́dóó nahasdzáán bikáá'góó t'áá át'éé nít'éé' diné k'ee'ąą náádínéest'ą́.

²⁰Nóah éí k'éédídléehii dzizlį́į́', áko ch'il na'atł'o'ii k'izhdíílá.

²¹Áko wáin joodlą́ą'go hoł honiiłdoi, áko haníbaal góne' ha'éé' hazhdiiltsoozgo t'áá jilchí'ígo dziztį́.

²²Nít'éé' Ham éí Kéínan bizhé'é jílíinii hazhé'é t'áá łichí'ígo sitį́įgo dziiłtsą́, áko tł'óo'di hak'isóó bił hojoolne'.

²³Áko Shem índa Jéífeth beeldléí hata'gi hawosjį' naníbaalgo t'ą́ąjigo yah ajíí'áázh, áko hazhé'é t'áá łichí'ígo sitį́įgo bik'ídzísti', áko bits'ą́ąjį' hanii'go hazhé'é t'áá łichí'ígo sitínígíí t'áadoo jinééł'į́į' da.

²⁴Áko Nóah bił énáhoosdzingo haye' akéédę́'ígíí áhóół'įįdígíí hoł bééhoozingo

²⁵ázhdííniid, Kéínan hóyée'go há ha'oodzíí'; hak'isóó binaalte' jílį́į doo.

²⁶Áádóó ánáázhdoo'niid, Shem biDiyin God Bóhólníihii baa ha'niih; háni'dii Kéínan hanaalte' doo.

²⁷Diyin God éí Jéífeth agháago ayóó át'é íidoolííł, áko Shem dabiníbaal góne' kééhojit'į́į doo; Kéínan éí hanaalte' doo.

²⁸Tó nahwéskaidóó bik'ijį' Nóah táadi neeznádiindóó ba'aan ashdladiin binínáánááhai.

²⁹Áko Nóah bíídíiską́ą́dóó náhást'éidi neeznádiindóó ba'aan ashdladiin binááhaigo daaztsą́.