Read Navajo II SAMUEL 1 Bible Online

II SAMUEL 1 - Navajo bible

II SAMUEL 1

¹Ákódzaago Saul daaztsą́ą́dóó bik'ijį' David éí Ámalek dine'é yiyííghą́ą́'dę́ę́' nádzáago áádóó David éí Zíklag kin haal'áagi naaki biiską́ągo,

²táá' yiłkaah góne', jó, diné léi' Saul bisiláo yił dah yinééłdę́ę́' níyáago bi'éé' ák'iniyiisdǫ́ǫ́z lá, índa łeezhígíí bitsiits'iin yik'íyiizhjaa' lá, áko David yaa níyáago tsé'yaa neeshjoolgo a'ohgo í'diilyaa.

³Áádóó David ábidííniid, Háádę́ę́' yínááł? Áádóó áhodííniid, Ízrel bisiláo yił dah yinéełii yits'ą́ąjį' yisdánííchą́ą́'.

⁴Áko David áhodííniid, Haa dahóót'įįd? Baa nánooshkąąh, shił hólne'. Áádóó ání, Anaa' bits'ą́ąjį' diné yóó'adahineezhchą́ą́'; diné lą'í tídadiidzaago nidabi'diztseed, áádóó Saul bi'diisyį́ índa biye' Jánathan ałdó' bi'diisyį́.

⁵Áádóó David éí dinééh bił halne'ígíí ííłní, Haash yit'éego nił bééhózingo éí Saul biye' Jánathan bił nabi'diztseedgo baa hólne'?

⁶Áádóó dinééh bił halne'ígíí ání, Ha'át'íí lá t'áadoo le'égi át'é Dził Gilbówadi yisháałgo, shoo, Saul bitsiidétáán bíyah nii'áago sizį́; tsindaabąąs bijáád naakiígíí índa łį́į́' yee nidaabaahii áhánídę́ę́' t'áá bizááká hak' ijį' yinéełgo yiiłtsą́.

⁷Áádóó t'ą́ą́' nídéét'į́į'go shiiłtsą́ągo shich'į' hadoolghaazh. Áko ábidííniid, Kǫ́ǫ́ sézį́.

⁸Áshidííniid, Háísh ánít'į́? Áádóó ábidííniid, Ámalek dine'é ásht'į́.

⁹Áádóó ánááshidoo'niid, Shik'ijį' yiizįįh, baa nánooshkąąh; shiyíłhé, háálá yéego ti'hooshníihgo t'ahdii hinishná.

¹⁰Áko hak'ijį' yiizį'go hoséłhį́; jó, haa ákoniizį́į'go doo náájii'náa le' át'éégóó naa'ajíígo'. Áádóó hanaat'á ch'ah hak'i dí'ą́ yę́ę hak'i díí'ą́ągo índa látsíní hálátsíín sitą́ yę́ę haadiitą́ągo shinanit'a'í baa nínil.

¹¹Áko David bi'éé' ák'iniyiisdǫ́ǫ́z; t'áá ákót'éego diné yił naakaígíí t'áá ałtso ák'inda'iisdǫ́ǫ́z.

¹²Áádóó atínídazhdindleehgo dajíícha índa t'áadoo da'jiyání i'íí'ą́; jó, Saul áádóó biye' Jánathan índa Bóhólníihii bidine'é éí Ízrel dine'é baa dajicha, háálá diltłish bee ádabi'disdįįd.

¹³David éí dinééh bił hoolne'ígíí ííłní, Háísh ánít'į́? Áko ání, Łahdę́ę́' dine'é nilíinii biye' nishłį́įgo Ámalek dine'é nishłį́.

¹⁴Áádóó David áhodííniid, Ha'át'éegoshą' doo náníldzidgóó Bóhólníihii ak'ah yik'i yayiiziidgo yiyíísį́į'ii bich'į' k'ídíínílchidgo síníłhį́?

¹⁵Nít'éé' David dinééh ła' hágo yidííniidgo ííłní, Áháníjį' bich'į' dah diilyeedgo síłhé.

¹⁶Áádóó David áhodííniid, Nidił nik'ijį' nídoodleeł, háálá t'áá ni nizaad bee ádaa hwíínílne' kódíníigo, Bóhólníihii ak'ah yik'i yayiiziidgo yiyíísį́į'ii séłhį́.

¹⁷Áko David atínídindleehgo díí atínáhodindleeh bee Saul yę́ę áádóó biye' Jánathan yę́ę yá hóótáál:

¹⁸(áádóó ałdó' Júdah ba'áłchíní ałtį́į́' biyiin bee nidazhnitin doogo yee haadzíí'; jó, Jásher binaaltsoos biyi' bee bik'e'ashchį́:)

¹⁹Ízrel nílíinii, ni'agháhóó'áadi nahaz'ą́ągi nihinanit'a'í nabi'diztseed; dooládó' ayóó ádaat'éii yę́ę bikéé' ádahasdįįd da!

²⁰Gath kin haal'áagi t'áadoo baa dahołne'í; Áshkelan kin haal'áagi kintaa da'aztiingóó t'áadoo bee nidahodołdlaadí, áko Filístiya dine'é bitsi'ké doo yaa bił nidahoozhǫǫh da doo, áádóó doo bąąh nídahineeshgizhii bitsi'ké ak'eh dadeesdlį́į'go doo yee dah danéet'aah da doo.

²¹Dził Gilbówa nohłíinii, dahtoo' nąąh nááhódle' lágo índa nik'i ninááhółtą́ą́' lágo, doodaii' nidáda'ak'ehdóó daneest'áanii nááhániihii nínááhódle' lágo, háálá ákwe'é ayóó át'éii yę́ę binaage' t'óó baa'ih ályaago yóó'ahoolghan; Saul binaage' ak'ah doo bąąh ályaa da.

²²Nidabi'diztseedii bidił índa ayóó ádaat'éii yę́ę bik'ah bits'ą́ą́dóó Jánathan be'ełtį́į́' yee doo niseedáa da nít'éé' índa Saul bidiltłish yee ak'idiyaa nilį́į́ nít'éé'.

²³Saul áádóó Jánathan ayóó'ábidó'ní áádóó baa hózhǫ́ǫgo hináá nít'éé', índa t'áá ahąąh nabi'diztseed; atsá biláahgo doo nidilna' da nít'éé'; náshdóítsoh bitsiijį' daditł'ooígíí yilááh ábóodziil nít'éé'.

²⁴Ízrel dine'é bich'é'é danohłíinii, Saul baa daohcha; éí éé' łichxíi'go da'ílíinii yee hadanihidiilaa; óola bee ił dah nátį́hí nidaashch'ąą'go ályaaii nihąąh dah deiznil.

²⁵Dooládó' ayóó ádaat'éii yę́ę da'ahijigą́ądi nidaaztseed da! Jánathan, nihi'agháhóó'áadi nahaz'ą́ągi bi'diisyį́.

²⁶Shik'is nílíinii, Jánathan, dooládó' nąąh shíni' da. Dooládó' nizhónígi ánít'éego shich'į' ná'áhwiinít'į́'í da nít'éé'; ayóó'áshííní'níigo dooládó' ayóó ánoolnin da nít'éé'; asdzání ayóó'áda'ó'níinii biláahgo įįh shííní'níí nít'éé'.

²⁷Dooládó' ayóó ádaat'éii yę́ę nidaaztseed da; ana'al'į́ yee danilį́ yę́ę bi'doogą́ą' da!