Read Navajo II SAMUEL 11 Bible Online

II SAMUEL 11 - Navajo bible

II SAMUEL 11

¹Áádóó dąąjį' ch'íhoolzhiizhgo aláahgo naat'áanii danilíinii anaa' ádeidoolííł yiniyé ch'ínááhákáahgo, David éí Jó'ab áádóó bá nidaal'a'í t'áá bił Ízrel dine'é t'áá ałtso anaa' ádeidoolíiłgo bi'jiisnii', áko Áman dine'é ádeisdįįdgo Rábah kin haal'áhígíí yizénáshzhiizh. Nidi David éí t'áá Jerúsalemdi naagháá nít'éé'.

²Áádóó ákódzaago hííłch'į'go David bitsásk'ehdóó nídii'na'go aláahgo naat'áanii bikin bighą́ą'di haayáago áadi tádíghááh nít'éé'; áádę́ę́' asdzání ła' naabéego yiyiiłtsą́. Éí asdzání ayóó ánóolningo níl'į́.

³Áádóó David dah adiił'a'go asdzání yína'ídééłkid. Nít'éé' ła' áháłní, Díí Iiláíyam bitsi' Bath-shííba át'į́. Het dine'é nilíinii Yuráíyah ye'asdzą́ą́ nilį́.

⁴Áádóó David bá nidaal'a'í hach'į' ayííł'a'go hoł nídaaskai áádóó bił yah ajííyáago hoł biiską́. Jó, ąądii bits'ą́ą́dóó ho'díídee', áádóó haghangóó anídzoodzá.

⁵Nít'éé' éí asdzání i'niiltsąądgo David yich'į' hane' áyiilaago ání, I'niistsąąd.

⁶Áádóó David éí Jó'ab yich'į' i'ííł'a', Het dine'é Yuráíyah shaa níł'á. Áko David yich'į' Jó'ab éí Yuráíyah ayííł'a'.

⁷Nít'éé' Yuráíyah éí David yaa níyáago David nahódééłkidgo ání, Jó'ab haash yit'éego naaghá áádóó Ízrel dine'é bił haa hoot'é índa anaa'di éí haa dahat'į́?

⁸Áádóó David éí Yuráíyah áyidííniid, Nighangóó nídídáahgo nikee' táánígis. Áko Yuráíyah éí aláahgo naat'áanii bighandóó dah nízdiidzáago, aláahgo naat'áanii ch'iyáán hainínilígíí hakéé' eejaa'.

⁹Nidi Yuráíyah binanit'a'í bá nidaal'a'í t'áá ałtso bił aláahgo naat'áanii bich'éédą́ą'gi da'iiłhaazhgo t'áadoo bighangóó anáádzáa da.

¹⁰Áko David yił dahoolne'go ádaaní, Yuráíyah t'áadoo bighangóó ninásdzáa da. Áko David éí Yuráíyah áyidííniid, Nízaadę́ę́' néínídzáago ha'át'éegoshą' t'áadoo nighangóó nídínídzáa da?

¹¹Nít'éé' Yuráíyah éí David áyidííniid, Jó, níbaal biyi'di tsits'aa' dílzinii si'ą́ áádóó Ízrel dine'é índa Júdah dine'é níbaal yii' nidaháaztą́, áádóó bóhonishníihii Jó'ab índa shinanit'a'í bá nidaal'a'í éí t'áá halgaigi nidahaazná. Ákoósh shí t'óó shighangóó nídeeshdáałgo áadi t'óó ashą́ągo áádóó t'óó ashdlą́ągo she'asdzą́ą́ bił shiiłkáah doo? Ts'ídá t'áá aaníí hiníná áádóó nii' sizíinii hiná; shí ałdó' ts'ídá t'áá aaníí doo ákódeeshníił da.

¹²Áádóó David éí Yuráíyah áyidííniid, Díí jį́ ałdó' t'áá kǫ́ǫ́ nanináago yiską́ągo nílááhgóó néé'deeshnih. Áko Yuráíyah éí Jerúsalem kin haal'áagi bee i'íí'ą́, náábiiskání ałdó' t'áá ákǫ́ǫ́ bee anáá'oot'ą́.

¹³Áko David hágo hodííniidgo binááł ajííyą́ą́' áádóó ajoodlą́ą́', índa ho'iiłdlą́ągo hoł honiidoi, áádóó bóhojółníihii bá nidaal'a'í daneezhjée'gi hó ałdó' hatsásk'eh bikáá' ajiiłhaazh, nidi haghangóó t'áadoo nízdeesdzáa da.

¹⁴Ákódzaadóó hoos'įįdgo David éí Jó'ab yich'į' naaltsoos áyiilaago Yuráíyah yeiníłtsoozgo Jó'ab yich'į' yił anáyííł'a'.

¹⁵Naaltsoos áyiilaaígíí biyi' kóníigo bee ak'e'ashchį́, Anaa'di alą́ąjį' ts'ídá yéego da'ahijigą́ą'jį' Yuráíyah bi'dííłnihgo ni éí áádę́ę́' nídíídááł, áko bíni'dii atíbi'dilnéehgo dadootsaał.

¹⁶Ákódzaadóó Jó'ab kin haal'áhígíí hazhó'ó hayíísidgo doo nídanilyéésgóó nidaabaahígíí bitahjį' Yuráíyah bizhníłnii'.

¹⁷Áko kin haal'áhídóó siláo ch'íkaigo siláo éí Jó'ab yił nidaabaahígíí yił da'ahoogą́ą'go David bá nidaal'a'ídóó siláo ła' dabi'doogą́ą́' índa Het dine'é Yuráíyah ałdó' bi'diisyį́.

¹⁸Nít'éé' Jó'ab éí David yich'į' i'ííł'a'go anaa'gi ádahóót'įįdígíí t'áá ałtso yee yił hoolne'.

¹⁹Áádóó kóníigo hane' yideez'ánígíí bich'į' hadzoodzíí', Anaa'gi áhóót'įįdígíí aláahgo naat'áanii ałtso bee bił hwíínílne'go,

²⁰éí yik'ee aláahgo naat'áanii báhóóchįįd ládą́ą́' kóni'didoolnííł, Ha'át'éegoshą' kin haal'áii bit'ááh woojée'go bił da'ahoohgą́ą́'? Da' díísh doo nihił béédahózin da? Shą́ą́', kin haal'á binaa ahéé'ítł'inígíí bighą́ą́'dę́ę́' da'diłt'oh ni'.

²¹Háishą' Jeróbesheth biye' Abímelek yiyiisxį́? Shą́ą́', kin haal'á binaa ahéé'ítł'inígíí bighą́ą́'dę́ę́' asdzání léi' tsé daashjéé' hak'ijį' hadah ayiyííłhango Thííbez kin haal'áadi dadziztsą́. Ha'át'éegoshą' kin haal'á binaa ahéé'ítł'inígíí bit'ááh woojéé'? Áko ábididííniił, Ná naal'a'í Het dine'é Yuráíyah ałdó' daaztsą́.

²²Áko hane' yideez'ánígíí dah diiyáago Jó'ab hane' yił biníł'a'ígíí t'áá át'é David yee yił hoolne'.

²³Áádóó hane' yiní'ánígíí David áyidííniid, T'áá aaníí diné nihik'eh dadeesdlį́į́'; kin haal'áádę́ę́' halgaijį' nihich'į' ch'ídahaazhjéé', áádóó kin haal'á bił yah a'atiinjį' t'ą́ą́' anídaniilkaad.

²⁴Nít'éé' da'diłt'ohii kin haal'á binaa ahéé'ítł'inígíí bighą́ą́'dę́ę́' ná nidaal'a'í dayółt'óohgo aláahgo naat'áanii bá nidaal'a'í ła' nidabi'diztseed. Áádóó índa ná naal'a'í Het dine'é Yuráíyah joolyéhígíí ałdó' ho'diisyį́.

²⁵Áko David hane' yiní'ánígíí áyidííniid, Jó'ab kóbididííniił, Díí áhóót'įįdígíí t'áadoo ni'diił'áhí; jó, diltłish bee ła' ho'diilyééh áádóó náádaała' nidabi'ditsi'. Kin haal'áhígíí bik'ijį' hózhǫ́ yéego anaa' ádaahłéehgo bik'eh dadohdleeh. Áádóó Jó'ab chánah ádíílííł.

²⁶Nít'éé' Yuráíyah be'asdzą́ą́ éí bahastiin Yuráíyah daaztsą́ągo yaa hodiizts'ą́ą'go bahastiin yę́ę yaa atínídindleeh.

²⁷Áádóó yínííł ałtso hwiih haaldogo David háká i'ííł'a'go bighanjį' baa ho'deedlóóz, áko be'asdzą́ą́ dzizlį́į́', áádóó ashkii bá jishchį́. Nidi David kójíít'įįdígíí bee Bóhólníihii doo bił hojííshǫǫd da.