Read Navajo II SAMUEL 15 Bible Online

II SAMUEL 15 - Navajo bible

II SAMUEL 15

¹Áádóó bik'ijį' Ábsalam éí tsinaabąąs bijáád naakiígíí áádóó łį́į́' índa diné ashdladiin yilt'éego halą́ąjį' naajeeh doo biniyé ádá nizhní'nil.

²Nít'éé' Ábsalam t'ah abíínídą́ą́' náádii'nahgo kin haal'á yah a'atiinígi dáń'dítį́hígíí bíighahgóó naazį' łeh, áko diné ła'da ałgha'dit'áahgo éí aláahgo naat'áanii shá yaa nídóot'įįł nízinígíí hágo yiłniihgo ííłniih, Háí kin haal'áhídóoshą' naniná? Áádóó ábíłniih, Ná naal'a'í nishłį́įgo Ízrel dine'é ła' ásht'į́.

³Áko Ábsalam ábíłniih, Shoo, biniyé nanináhígíí éí nizhónígi índa t'áá ákǫ́ǫ́ ánít'į́, nidi aláahgo naat'áanii éí níídóołts'įįłii doo ła' niiníłtį́į da.

⁴Áádóó Ábsalam ání, Kéyah t'áá náhwiist'ą́ą́ nít'éé' bá ánihwii'aahii áshi'diilyaa laanaa. Áko diné t'ááłá'í nítínígo t'áadoo le'é shá baa náhódóot'įįł nízinii, doodaii' yiniyé shaa hakáhígíí t'áadoo haadayit'éhí bá beinísht'į́į dooleeł.

⁵Ákohgo diné ła'da áhánídóó hach'į' nehekáahgo nitsidahidigeehgo bich'į' k'íhizhdilnííh áádóó dadziiłtsoodgo dadziits'ǫs.

⁶Ábsalam kóhóół'įįd: éí Ízrel dine'é t'áá ałtso aláahgo naat'áanii t'áadoo le'é shá yaa nídóot'įįł danízingo yich'į' nehekáahii éí Ábsalam t'áá bí Ízrel dine'é ayóó'ádabó'níi doogo niyiiłnééh.

⁷Dį́į́' nááhaidóó bik'ijį' Ábsalam éí aláahgo naat'áanii áyidííniid, Nánooshkąąh, shíni'dii shi'níłníihgo ádee haasdzí'ígíí bik'eh ádeeshnííł; éí Bóhólníihii bich'į' ádee haasdzí'ígíí Hííbran kin haal'áhígi bi'deeshłííł.

⁸Jó, ná naal'a'í nishłíinii ádee haasdzíí'; éí Gíísher kin haal'áadi Síriya kéyahgi naashá yę́ędą́ą́' ádíshní, Bóhólníihii t'áá aaníí Jerúsalem kin haal'áajį' shił nát'áazhgo índa Bóhólníihii bá naash'a' doo.

⁹Nít'éé' aláahgo naat'áanii áháłní, Nílááh, nił hózhǫ́ǫgo yínááł. Áádóó dashdiiyáago Hííbran kin haal'áágóó jiníyá.

¹⁰Nidi Ábsalam éí Ízrel dine'é t'áá ałtso bitahgóó naalchi'í tajoos'a'go ájíní, Deenásts'aa' bidee' bee í'dílzoołí dasidoots'ą́ą'go díigi ádadidoohniił, Ábsalam éí Hííbran kin haal'áagi nant'á silį́į́'.

¹¹Ábsalam éí Jerúsalem kin haal'áádóó diné naakidi neeznádiingo hágo yidííniidígíí ákǫ́ǫ́ yił dah diikai; t'áadoo át'éhígóó índa t'áadoo baa ákodaznízinígóó yił yíkai.

¹²Áádóó Ábsalam éí Gáílo dine'é Ahíthofel yíká i'ííł'a'; éí David yá bił ééhózinii nilį́įgo bikin haal'áádę́ę́' t'áá éí Gáílo hoolyéédę́ę́' shaazhdoogááł hó'ní; íídą́ą́' nááhidoonihii náájiiłniihgo baa nijighá. Áko nahont'ingo ihodeest'áanii t'áá íiyisí bidziil silį́į́' índa diné éí Ábsalam yich'ijí danilíinii áłahjį' lą'í k'ee'ąą yilzhish.

¹³Nít'éé' David hane' baa yít'ą́ągo kóhodoo'niid, Ízrel dine'é éí Ábsalam yikéé' nidookahgo ádiih tsídaazkééz.

¹⁴Áádóó David bá nidaal'a'í t'áá ałtso Jerúsalem kin haal'áagi bił dah yikahígíí áyidííniid, Nídoohjeehgo yóó'adii'nééł, ákódeiidzaago t'éí Ábsalam doo nihidoołnéeł da; doo hodíína' tsxį́į łgo dah didii'nééł; t'áadoo hooyání nihik'iidoojahgoda, doo yá'át'éhígi ádanihidoolííł índa kin haal'áagi diltłish yee nidanihidoołtsiłgoda át'é.

¹⁵Nít'éé' aláahgo naat'áanii bá nidaal'a'í aláahgo naat'áanii ádeidííniid, Shoo, ná naal'a'í daniidlíinii, bídahwííníilníihii aláahgo naat'áanii nílíinii, t'áá ánihidiníígóó ádeiit'į́į doogo hasht'e'ádadíníilzin.

¹⁶Áko aláahgo naat'áanii dah diiyá áádóó bighandóó danilíinii t'áá ałtso bikéé' deínééh, nidi aláahgo naat'áanii éí asdzání neeznált'éego ba'ákéí yíł'ínígíí t'áá ákǫ́ǫ́ hooghan yaa ádahalyą́ągo áyiilaa.

¹⁷Áko aláahgo naat'áanii dah diiyá áádóó diné t'áá ałtso bikéé' deínééh índa nízaadgóó adadziizná.

¹⁸Áko bá nidaal'a'í t'áá ałtso bíighah ch'ídahaazná. Áádóó Kéreth dine'é t'áá ałtso, Pííleth dine'é t'áá ał tso índa Gathdóó dine'é t'áá ałtso éí diné hastą́ądi neeznádiingo Gath kin haal'áádóó hakéé' naakaígíí aláahgo naat'áanii yilą́ąjį' niníná.

¹⁹Nít'éé' aláahgo naat'áanii éí Gathdóó dine'é éí Ítayai wolyéii áyidííniid, Ha'át'íísh biniyé ni ałdó' nihił yíkah? Nighangóó nídídáahgo áadi aláahgo naat'áanii bił síníké, háálá dé'éyóní nílį́ áádóó yóó'adabi'diis'a'ígíí nílį́.

²⁰Adą́ą́dą́ą́' índa yíníyáago da' ákoósh díí jį́ nihitah tádínáahgo áníshłéeh doo? Dííyee' doo bééhózingóó tádíshááh, nílááh, nik'isóó bił nídíkááh; aa a'ááh hasin índa t'áá aaníinii nił hólǫ́ǫ doo.

²¹Áádóó Ítayai éí aláahgo naat'áanii ánéidoo'niidgo ání, Ts'ídá t'áá aaníí Bóhólníihii hiná áádóó bóhonishníihii aláahgo naat'áanii hiná; ákót'éego ts'ídá t'áá aaníí bóhonishníihii aláahgo naat'áanii t'áá tádígháahgi, dadootsaałgi, doodaii' hináagi, ákwii ałdó' ná naal'a'í nishłíinii honishłǫ́ǫ doo.

²²Nít'éé' David éí Ítayai áyidííniid, Áko lą́ą, tį' yiikah. Áko Gathdóó dine'é Ítayai dah diináago diné bił naakaígíí t'áá ałtso áádóó ba'áłchíní bił naakaígíí t'áá ałtso yił nihiníná.

²³Áádóó kéyahgi kéédahojit'ínígíí t'áá ádzíłtso ayóó íits'a'go dajíícha, áko diné t'áá ádzíłtso ha'naagóó dah diiná, áádóó aláahgo naat'áanii t'áá bí ałdó' Kídran tó nílínígíí ha'naa niníná índa diné t'áá ałtso hoł yinéłígíí ha'naa bił nizhnínáago honoojíijigo bił dashdiiná.

²⁴Ákohgo Zéídak ałdó' índa Líívai dine'é bił naakaígíí éí Diyin God bitsits'aa' bee aha'deet'áanii deí'aah, áádóó Diyin God bitsits'aa' dílzinii ni' nideiz'ą́, áko Abáíyathar áajį' níyá; diné t'áá ałtso kin haal'áádóó ałtso ch'ídahaaznáajį'.

²⁵Áko aláahgo naat'áanii éí Zéídak áyidííniid, Nílááh, Diyin God bitsits'aa' dílzinii kin haal'áágóó nídóh'aah. Shich'oha'néego Bóhólníihii shąąh tsídeezkéezgo shił nihéédoot'ash, áko bitsits'aa' dílzinii índa bí hólǫ́ǫgi shił ííshjání íidoolííł.

²⁶Nidi, Doo naa shił hózhǫ́ǫ da, shiłníigo, shoo, kǫ́ǫ́ naashá, bíni'dii t'áá bił yá'át'éhígi áshílééh.

²⁷Nít'éé' aláahgo naat'áanii éí náá'iiłniihii Zéídak ałdó' ííłní, Náasdi áhodoonííł yaa halne'iísh nílį́? Nílááh, kin haal'áagi hózhǫ́ǫgo haz'ą́ą́góó nídídááh; niye' nidilt'éego éí Ahímeiyaz niye' nilíinii áádóó Abáíyathar biye' Jánathan bił nídíkááh.

²⁸Shoo, honoojíidi dah nídzílgaígi ádeeshníłígíí bee shił hodíílnihígíí biba' ánísht'ée doo.

²⁹Éí bąą Zéídak áádóó Abáíyathar éí Diyin God bitsits'aa' dílzinii Jerúsalem kin haal'áágóó t'ą́ą́' názhní'ą́ągo áadi dzizkéé nít'éé'.

³⁰Nít'éé' David éí Dził Álivz wolyéii bíjiiyá áádóó jichago ákóde joogáałgo hatsii' bik'é'ésti'go áádóó hakee' t'áágééd, áádóó t'áá ałtso diné hoł naakaígíí bitsii' bik'ída'asti'go daachago hoł híikai.

³¹Áko ła' David bił hojoolne'go ájíní, Ahíthofel éí t'áá nahont'inee indaha'áii yitaagháago Ábsalam yił nindaha'á. Áádóó David ázhdííniid, Bóhólníihii nílíinii, nánooshkąąh, Ahíthofel kót'é níinii doo áháyą' nídoodleeł.

³²Ákódzaadóó David éí dziłghą́ą'jį' hajiyáago Diyin God bich'į' nináhádlaahídi nahojiłáá nít'éé', shoo, Árkadóó dine'é Húshai bi'éé' neheesdǫ́ǫzgo áádóó bitsii'jį' łeezh bąąhgo haa níyá.

³³Áko David ábíłní, Shił dah dini'áazhgo nahontł'aaígi shits'ą́ą́' ánít'ée doo.

³⁴Nidi kin haal'áágóó t'ą́ą́' nídínídzáago Ábsalam ábididííniił, Aláahgo naat'áanii nílíinii, ná naal'a'í nishłį́į doo; t'áá nizhé'é yá naal'a'í nishłį́ yę́ęgi át'éego k'ad ni ałdó' ná naal'a'í nishłį́į doo. Ákohgo Ahíthofel kót'é nínígíí doo idééłníi da shá ádíílííł.

³⁵Da' doósh Zéídak áádóó Abáíyathar náá'iiłniihii nilíinii áadi nił hólǫ́ǫ da doo? Éí bąą t'áá ha'át'íhída aláahgo naat'áanii bighandóó nídiits'į́hígíí éí náá'iiłniihii Zéídak áádóó Abáiyathar bił ch'íhí'aah doo.

³⁶Shoo, áadi biye'ké bi ł naakai; Zéídak biye' Ahímeiyaz áádóó Abáíyathar biye' Jánathan áadi naa'aash; éí t'áá ha'át'íhída nídiits'į́hígíí shich'į' bił béé'íłnih doo.

³⁷Áko Húshai éí David bik'is nilíinii kin haal'áajį' yah ííyá, áádóó Ábsalam éí Jerúsalem kin haal'áajį' yah ííyá.