Read Navajo II SAMUEL 16 Bible Online

II SAMUEL 16 - Navajo bible

II SAMUEL 16

¹Nít'éé' David éí dziłghą́ą́'góó haz'ánígíí bighá jooyáago t'ah nít'éé' Miifíbosheth bá naal'a'í Záíba hadááh níyá; télii naaki bik'i dah aznilgo bááh naakidi neeznádiingo áádóó ch'il na'atł'o'ii bineest'ą' nááltseii neeznádiin shijool bíighahgo áádóó aneest'ą' shį́įgo nídant'į́hígíí neeznádiingo índa tó abid bii' wáin hadeezbingo hadááh yiníyį́.

²Aláahgo naat'áanii éí Záíba áyidííniid, Díísh ha'át'íí biniyé? Áádóó Záíba ádííniid, Díí télii éí aláahgo naat'áanii ba'áłchíní nidabiyée doo biniyé áádóó bááh áádóó shį́įgo daneest'ánígíí éí tsíłkéí danilíinii deiyą́ą doo biniyé índa wáin éí díí honoojíidi ch'ééh dadeeskaigo bąąh nidahazkaadígíí deidoodlį́į́ł biniyé ádaat'é.

³Nít'éé' aláahgo naat'áanii ábidííniid, Háájíshą' ninanit'a'í yę́ę biye'? Áádóó Záíba éí aláahgo naat'áanii áyidííniid, Shoo, Jerúsalem kin haal'áadi sidá, háálá kóní, Díí jį́ Ízrel dine'é shizhé'é aláahgo yee bóhólnííh yę́ę shaa nídeididoo'ááł nisin.

⁴Áko aláahgo naat'áanii éí Záíba áyidííniid, Shoo, Miifíbosheth bíhígíí t'áá át'é ni doo. Áádóó Záíba ádííniid, A'ohgo ádííníszingo, nánooshkąąh, ajooba' bee shich'oninéego shąąh tsídíkees, bóhonishníihii aláahgo naat'áanii nílíinii.

⁵Áádóó aláahgo naat'áanii David éí Bahúrim haz'áníjį' níyáago, shoo, Saul yę́ę ba'áłchíní bik'éí ła' ch'íníyá; éí Gííra biye' Shímiyai wolyéii aadę́ę́' yigáałgo hódziihgo yigááł.

⁶Áko David índa aláahgo naat'áanii David bá nidaal'a'í t'áá ałtso tsé yee yółne', áádóó diné t'áá ałtso índa diné ayóó ádaat'éii hanish'náájí áádóó hanishtł'ají deíkáahii tsé yee yółne'.

⁷Nít'éé' Shímiyai hódziihgo ání, Akǫ́ǫ́ yówehjį', yówehjį', diné dił bits'ádaazlį́įgo neiłtseedii nílíinii, diné doo yá'áshóonii yee' nílį́.

⁸Bóhólníihii éí Saul yę́ę ba'áłchíní t'áá ałtso bidił bits'ádaazlį́įgo íinilaaígíí biniinaa k'ééndiidlaa; éí bitsásk'ehgi nanít'áá nít'éé', nidi Bóhólníihii éí aláahgo bee níhólníihgo nił haz'ánígíí niye' Ábsalam yílák'eidíí'ą́; shoo, nidooya' nít'éé' yę́ę k'ééndiidlaa, háálá diné dił bits'ádaazlį́įgo neiłtseedii nílį́.

⁹Áko Zerowáíyah biyáázh Abísheiyai éí aláahgo naat'áanii áyidííniid, Ha'át'éegoshą' nigháí łééchąą'í daaztsáanii nahalinii bóhonishníihii aláahgo naat'áanii niyé'é'įįh? Shíni'dii ákǫ́ǫ́ dishááh, baa nánooshkąąh, shíni'dii bitsiits'iin nahgóó aheshxan.

¹⁰Áádóó aláahgo naat'áanii ádííniid, Zerowáíyah biyáázhké nohłíinii, ha'át'éegoshą' nihíínísts'ą́ą' doogo áshidohní? Bíni'dii ódziih, háálá Bóhólníihii ábíłní, David yínídziih. Háishą' kódidooniił, Ha'át'íí biniyé kwíínít'įįd?

¹¹Áko David éí Abísheiyai áádóó bá nidaal'a'í t'áá ałtso áyidííniid, Shoo, shiye' shits'ą́ą́dóó hazlį́į'ii, she'iina' niidoołt'ihgo yiniyé hát'į́; t'ah biláhídi át'éego díí Bénjamin dine'é nilíinii kót'éego yaa naaghá. Bíni'dii t'áadoo baa nídaot'íní, bíni'dii ódziih, háálá Bóhólníihii ákóbíłníigo át'į́.

¹²Díí jį́ Bóhólníihii éí shich' į' nahwii'náago shaa ákonízin dooleełgo da'át'é, áádóó Bóhólníihii éí shi'dódziihii yá'át'éehii nídoodleełígíí shá íidoolíiłgo da'át'é.

¹³Áádóó David índa diné bił nijikaígíí atiingóó jookahgo, Shímiyai éí hanaashii yílk'id binániijí yigáałgo hódziihgo tsé yee hółne' índa łeezh hach'į' yidighas.

¹⁴Áko aláahgo naat'áanii áádóó diné bił naakaígíí t'áá ałtso nídínéeskaigo t'áá ákǫ́ǫ́ háádaasyį́į́'.

¹⁵Nít'éé' Ábsalam áádóó Ízrel dine'é t'áá ałtso yił Jerúsalem kin haal'áajį' níná; Ahíthofel ałdó' yił níná.

¹⁶Ákódzaadóó Árkadóó dine'é Húshai éí David bik'is nilíinii Ábsalam yaa níyáago, áko Húshai éí Ábsalam áyidííniid, Aláahgo naat'áanii as'ahgóó hináa le'; aláahgo naat'áanii nízaadgóó hináa le'.

¹⁷Áko Ábsalam éí Húshai áyidííniid, Kót'éegoósh nik'is baa jiiníba'? Ha'át'éegoshą' nik'is t'áadoo bił dah dini'áazh da?

¹⁸Áádóó Húshai éí Ábsalam ábijiní, Dooda, Bóhólníihii áádóó díí dine'é índa Ízrel dine'é t'áá ałtso nideideez'áanii éí bíí' nishłį́į doo, áádóó bił kééhasht'į́į doo.

¹⁹Áádóó náá'áłdó', háísh bá naash'a' doo? Jó, biye' t'éiyá binááł naash'a' dooleeł. T'áá nizhé'é bá naash'a' yę́ęgi át'éego ná naash'a' doo nisin.

²⁰Nít'éé' Ábsalam éí Ahíthofel ííłní, Kót'éego diníigo baa nidiikahii bee handziih.

²¹Áádóó Ahíthofel éí Ábsalam ííłní, Nílááh, nizhé'é ba'ákéí yíł'íní hooghan yaa ádahalyą́ą dooleeł biniyé niinínilii bił yah aninááh, áko Ízrel dine'é t'áá ałtso nizhé'é bich'į' t'óó naa'ihgo ádi'nilyaaígíí deididoots'į́į́ł, áko diné nił naakaígíí t'áá ałtso dabidziilgo chánah ádíílííł.

²²Áko kin bighą́ą'di Ábsalam bá níbaal dah deisbaal áádóó Ízrel dine'é t'áá ałtso binááł Ábsalam hazhé'é ba'ákéí yíł'íní bił yah aníjídááh.

²³Íídą́ą́' Ahíthofel kót' é níinii, éí, Kót'ée doo, ní yę́ę diné ła' Diyin God bizaad yína'ídíłkidígi át'éego Ahíthofel kót'é nínígíí t'áá ałtso David áádóó Ábsalam bił nilį́į́ nít'éé'.