Read Navajo II SAMUEL 19 Bible Online

II SAMUEL 19 - Navajo bible

II SAMUEL 19

¹Jó'ab bił hóóne'go áhodoo'niid, Shoo, aláahgo naat'áanii éí Ábsalam yaa yicha áádóó yaa yínííł naaghá.

²Áko íídą́ą́' ak'eh hodeesdlį́'ígíí diné t'áá ałtso atínídadindleehgo áyiilaa, háálá íídą́ą́' kwáhá'níigo deidiizts'ą́ą́', aláahgo naat'áanii biye' t'áá íiyisí yaa ch'ééná nilį́įgo naagháá nít'éé'.

³Áádóó íídą́ą́' diné éí kin haal'áá góne' yah anídahineest'į́į́'; éí anaa'dę́ę́' yóó'anídahaazhjé'ígíí t'óó ádaa yádandzingo ninádahineest'į́'ígíigi át'éego ninádahineest'į́į́'.

⁴Azhą́ ákót'ée nidi aláahgo naat'áanii binii' yik'é'ésti' áádóó aláahgo naat'áanii kóníigo ayóó íits'a'go yicha, Aháláane', shiye' Ábsalam! Aháláane' shiye', shiye' Ábsalam!

⁵Áko Jó'ab éí aláahgo naat'áanii yighangi yił yah ííyáago áyidííniid, Ná nidaal'a'í t'áá ałtso díí jį́ t'óó baa yáhásinígi ádaadzaa nahalingo íinilaa; éíyee' díí jį́ yisdádanistį́ áádóó niye'ké áádóó nitsi'ké áádóó nida'asdzą́ą́ índa na'ákéí daníł'íní yisdádeiznil;

⁶éí ni'ana'í danilíinii ayóó'ííní'ní índa nik'is danilíinii éí jiiníłá; jó, díí jį́ díí bee ííshją́ą́ ádi'nilyaa: naat'áanii danilíinii áádóó nidaal'a'í danilíinii t'áadoo danilínígóó baa nitsíníkees. Jó, díí jį́ kót'éego naa ákoniizį́į́': Ábsalam hináago áádóó nihí éí díí jį́ ałtso nanihi'diztseedgo ákót'éego t'éiyá nił bik'e'ehwiih doo nít'éé' lá.

⁷Éí bąą k'ad nídiidáahgo dah diináahgo ná nidaal'a'í yee hada'íídóolniiłii bee bich'į' handziih, háálá Bóhólníihii bízhi' bee nich'į' ádee hadideesdzih, t'áadoo dah diniyáágóó díí tł'éé' diné doo ła' nił hólǫ́ǫ da doo, áko éí t'óó tsé'édin nich'į' áhodooníłígíí tsíłkéí nílį́ yę́ędóó doo yá'áshóonii nik'i deit'i'ígíí biláahgo nich'į' áhodoonííł.

⁸Nít'éé' aláahgo naat'áanii dah diiyáago yah a'atiingi neezdá, áko diné t'áá ałtso ahił dahalne'go ádaaní, Shoo, aláahgo naat'áanii yah a'atiingi sidá, áádóó diné t'áá ałtso aláahgo naat'áanii yaa haaskai; jó, Ízrel dine'é t'ááłá'í nítínígo biníbaal naaznilgóó anídahineezhchą́ą́' nít' éé'.

⁹Nít'éé' diné t'áá ałtso éí Ízrel dine'é bitahgóó saad ahídeit'ááh kódaaníigo, Aláahgo naat'áanii éí nihi'ana'í danilíinii áádóó Filístiya dine'é bits'ą́ąjį' yisdánihíínil, áko k'ad éí Ábsalam biniinaa kéyahdóó nihits'áníyá.

¹⁰Áádóó Ábsalam éí nihinant'áa doo biniyé ak'ah bik'i yadeidziidgo deilzį́į́' yę́ę anaa' hólǫ́ǫdi bi'diisyį́; éí bąą k'ad haash yit'éego aláahgo naat'áanii bił ní'dooldahgi doo bee hadaahdziih da?

¹¹Nít'éé' aláahgo naat'áanii David éí náá'iiłniihii Zéídak áádóó Abáíyathar yich'į' i'ííł'a'go kóní, Júdah dine'é aląąjį' naazíinii bich'į' haohdziihgo kódóhní, Haash yit'éego nihí éí aláahgo naat'áanii bighan yę́ęjį' nídoodáłígíí akée'di bainóht'į́? Jó, ákót'éego Ízrel dine'é t'áá ałtso yaa yádaałti'go aláahgo naat'áanii bighanjį' hane' ádeił'į́.

¹²Nihíyee' shik'isóó danohłį́, nihíyee' shits'in áádóó shitsį' danohłį́; ákoshą' ha'át'éego nihí akée'di índída aláahgo naat'áanii bił nídadoohkahgo nidahoh'á?

¹³Áko Améísa shá kóbidohní, Doósh shits'in áádóó shitsį' nílį́į da? Bíni'dii Diyin God atíshidoolííł áádóó t'ah nááyówehgo atíshidoolííł; éí shinááł náás hoolzhishgóó Jó'ab bits'ásk'ehgi doo siláo binanit'a'í nileehgóogo ákóshidoolííł.

¹⁴Áádóó Júdah dine'é t'áá ałtso hach'į' bił da'ílį́įgo diné t'ááłá'í yee nitsídaakeesígi át'éego ájiilaa. Áko aláahgo naat'áanii yich'į' díí hane' ádayiilaa; ni áádóó ná nidaal'a'í t'áá bił nání'nééh.

¹⁵Áko aláahgo naat'áanii náádáałgo Jórdan toohjį' níyá. Nít'éé' Júdah dine'é éí Gílgal haz'ánígi jíkai; aláahgo naat'áanii bidááshdookah áádóó aláahgo naat'áanii éí Jórdan tooh ha'naa bił nizhdookah biniyé jíkai.

¹⁶Nít'éé' Gííra biye' Shímiyai éí Bénjamin dine'é ła' Bahúrim haz'ánídóó naagháhígíí t'áá tsį́łígo níyá; éí aláahgo naat'áanii David bidááhgóó Júdah dine'é bił deeshkah nízin.

¹⁷Áko Bénjamin dine'é t'ááłáhídi mííl yilt'éego hoł yíkai, áádóó Saul yę́ę ba'áłchíní yá naal'a'í Záíba áádóó biye'ké ashdla'áadahgo índa bá nidaal'a'í naadiingo bił aláahgo naat'áanii yidááh dookah biniyé Jórdan tooh ha'naa niikai.

¹⁸Áádóó aláahgo naat'áanii ba'áłchíní índa bindaalye'é éí tsinaa'eeł bee bá ha'naa nidajiizhjaa' áádóó ha'át'íhída bá yá'át'éehgo yaa nitsíkeesígíí bá ádajiilaa; nít'éé' Gííra biye' Shímiyai éí aláahgo naat'áanii Jórdan tooh ha'naa niníyáago yidáahjį' yaa ádzaago tsé'yaa neeshjool.

¹⁹Áko aláahgo naat'áanii áyidííniid, Bóhonishníihii haa'íyee' doo ákwii át'éii t'áadoo shik'ijį' síníł'ání doo, doodaii' bóhonishníihii aláahgo naat'áanii Jerúsalem kin haal'áádóó dah diiyá yę́ędą́ą́' ná naal'a'í nishłíinii doo yá'áshónígi ániishłaa yę́ę t'ááká béénílniih yíila', áko éí aláahgo naat'áanii t'áadoo bi'diił'áhí da le'.

²⁰Jó, ná naal'a'í nishłíinii shił bééhózingo ádił asisziih; éí bąą, shoo, Jóseph ba'áłchíní ahoolchíiłii t'áá ałtso bitahdóó diné nishłį́įgo, bóhonishníihii aláahgo naat'áanii nílíinii, shí átsé wóyahdi nidááh níyá.

²¹Nidi Zerowáíyah biyáázh Abísheiyai hanáánáádzíi'go ádííniid, Da' doósh díí biniinaa Shímiyai bidi'yoolyéeł da? Háálá Bóhólníihii ak'ah yik'i yayiiziidgo yiyíísį́į'ii jódziih nít'éé'.

²²Nít'éé' David ádííniid, Zerowáíyah biyáázh nohłíinii, ha'át'éegoshą' nihíínísts'ą́ą doogo áshidohní? Jó, shi'ana'í ídół'į́. Ízrel dine'é bitahgiísh díí jį́ diné ła' bidi'yoolyééł? Jó, díí jį́ Ízrel dine'é aláahgo binanit'a'í yee' nishłį́įgo shił bééhózin.

²³Éí bąą aláahgo naat'áanii Shímiyai áyidííniid, Doo nidi'yoolyéeł da. Áko aláahgo naat'áanii Shímiyai yich'į' ádee hadoodzíí'.

²⁴Nít'éé' Saul yę́ę binálí Miifíbosheth éí aláahgo naat'áanii bidááshníyá; éí hakee' t'áadoo baa áhojilyání áádóó hadághaa' t'áadoo níjíshéhí índa ha'éé' t'áadoo nídziigisí aláahgo naat'áanii dah diiyá yę́ędóó hózhǫ́ǫgo nádzáajį' ákójít'éé nít'éé'.

²⁵Ákódzaadóó aláahgo naat'áanii bidáásh doogááł biniyé Jerúsalem kin haal'áajį' jiníyáago aláahgo naat'áanii áhodííniid, Ha'át'éegoshą' t'áadoo ha'naagóó shił yíní'áazh da, Miifíbosheth?

²⁶Áádóó hanáánáádzíi'go ádííniid, Bóhonishníihii aláahgo naat'áanii nílíinii, shá naal'a'í shiníí'aa'; jó, ná naal'a'í nishłíinii ádíshní, Télii shá bik'i dah asínííł, áko aláahgo naat'áanii bił dí'áázhgóó shił dooldlosh, bidííniid, háálá ná naal'a'í nishłíinii na'niłhodii nishłį́.

²⁷Áádóó ná naal'a'í nishłíinii, bóhonishníihii aláahgo naat'áanii nílíinii, nich'į'go náshiiłba'. Nidi bóhonishníihii aláahgo naat'áanii éí Diyin God bidiyingo naal'a'ígi át'é; éí bąągo yá'át'éehgo baa nitsíníkeesii ánílééh.

²⁸Jó, shizhé'é yę́ę ba'áłchíní ahoolchíiłii t'áá ałtso bóhonishníihii aláahgo naat'áanii binááł diné daneeznáanii nidahoniidlin nít'éé'. Azhą́ ákót'ée nidi ná naal'a'í nishłíinii nibikáá' adání yich'į' dah nídinibįįhgo nída'adį́įhii bitahgi ná'áshdį́įh doogo nishííníłtį́. Éí bąą ha'át'íí t'áá ákóne' át'éii shį́įshą' náánáła' aláahgo naat'áanii baa nínáánáoshkąąh dooleeł?

²⁹Áádóó aláahgo naat'áanii áhodííniid, T'áadoo ha'át'éegoda baa niyánááhíłtéhí. Shą́ą́', Záíba bił kéyah ahá'dízóóh nidííniid ni'.

³⁰Nít'éé' Miifíbosheth éí aláahgo naat'áanii áyidííniid, T'áá aaníí háni'dii t'áá át'é náhodii'aah, háálá bóhonishníihii aláahgo naat'áanii hózhǫ́ǫgo t'áá bí bighangi nádzá.

³¹Nít'éé' Gíliyad kéyahdóó diné Barziléíyai wolyéii Rógiilim kin shijaa'dę́ę́' níyá, áádóó Jórdan tooh ha'naa aláahgo naat'áanii yił nidoo'ash yiniyé níyá.

³²Barziléíyai t'áá íiyisí hadzistih; tseebídiin honááhai éí aláahgo naat'áanii banídzíltso'go Meihanéíyimdi naagháá nít'éé', háálá hastiin at'íinii jílį́.

³³Áádóó aláahgo naat'áanii éí Barziléíyai áyidííniid, Wónaanígóó shił díí'ash, áko Jerúsalem kin haal'áadi shits'ą́ą́' ííyą́ą doo.

³⁴Nít'éé' Barziléíyai éí aláahgo naat'áanii áyidííniid, Haa danízahgóósh nááhinishná; t'áadoo biniyéhígóó aláahgo naat'áanii Jerúsalem kin haal'áágóó bił yish'ash doo?

³⁵Díí jį́ yee' shí tseebídiin shinááhai. Da' ákoósh yá'át'éehii índa doo yá'át'éehii baa ákonisin? Da' ná naal'a'í nishłį́įgo yishánígíí, doodaii' yishdlánígíísh t'áá yishłįh? Da' diné dahataałígíí índa asdzání dahataałígíí biinéé'ésh t'áá diists'a'? Ha'át'íishą' biniyé ná naal'a'í nishłį́įgo bóhonishníihii aláahgo naat'áanii bich'į' naanishtsoh nishłį́į doo?

³⁶Ná naal'a'í nishłíinii Jórdan tooh ha'naagóó t'áá áháníjį' aláahgo naat'áanii bił nideesh'ash nisin. Aláahgo naat'áanii nílį́įgo ha'át'íísh biniyé díí aa doolyéełii shich'į' ninánídlée doo?

³⁷Háni'dii ná naal'a'í nishłíinii, nánooshkąąh, nihéédeeshdáałgo t'áá shí shikin haal'áadi są́ shiiłhé áádóó shizhé'é yę́ę índa shimá yę́ę bijishcháá' bíighahjį' yóó'áshi'dilnééh. Nidi shoo, ná naal'a'í Kímham kǫ́ǫ́ sizį́; bíni'dii, bóhonishníihii aláahgo naat'áanii nílíinii, nił ha'naa nii'aashgo t'áá nił yá'át'éhígi áníł'į́į doo.

³⁸Áádóó aláahgo naat'áanii hanáánáádzíi'go ání, Kímham shił ha'naa nidoo'ashgo t'áá nił yá'át'éhígi át'éego bich'į' ánísht'ée doo, índa t'áá shííníkeedígíí ná bi'íínísin dooleeł.

³⁹Nít'éé' diné t'áá ałtso Jórdan tooh ha'naa niníná, áádóó aláahgo naat'áanii ha'naa nizhníyáago Barziléíyai dzizts'ǫs áádóó bik'ijiidzisdli'go bighangóó t'ą́ą́' dah nídiidzá.

⁴⁰Áko aláahgo naat'áanii Gílgal haz'ánígóó dah diiyá áádóó Kímham bił yi'ash, áádóó Júdah dine'é t'áá ałtso índa Ízrel dine'é ałníí'dóó aláahgo naat'áanii náás yił yinééł.

⁴¹Áádóó, shoo, Ízrel dine'é t'áá ałtso aláahgo naat'áanii yidááh yíkaigo aláahgo naat'áanii ádeidííniid, Ha'át'íísh biniyé nihik'isóó Júdah dine'é danineez'į́į'go aláahgo naat'áanii áádóó ba'áłchíní índa David bidiné danilíinii t'áá ałtso Jórdan tooh ha'naa yił ná'ná?

⁴²Áko Júdah dine'é t'áá ałtso éí Ízrel dine'é yich'į' hadaasdzíi'go ádeidííniid, Háálá aláahgo naat'áanii áhánígo nihik'éí nilį́. Ákoshą' ha'át'íísh biniinaa díí bik'ee nihá dahazhchįįd? Da' łahdaásh aláahgo naat'áanii yik'é ni'níláii deidą́ą́'? Éí doodago, da' łahdaásh niha'nílá?

⁴³Áádóó Ízrel dine'é éí Júdah dine'é ánáádeidoo'niid, Aláahgo naat'áanii bídéét'i'gi nihíyee' neeznáá bíighahgo bił ałts'ą́ą́' da'niilk'iiz áádóó David éiyá nihí nihiláahgo nihídéét'i'. Ha'át'íísh bąą danihisoo'įįd? Da' doósh nihí átsé hadasiidzíi'go aláahgo nihinanit'a'í bił nídasiikai da? Áko Júdah dine'é hadaasdzí'ígíí éí Ízrel dine'é hadaasdzí'ígíí biláahgo t'óó bééhóódzííd.