Read Navajo II SAMUEL 20 Bible Online

II SAMUEL 20 - Navajo bible

II SAMUEL 20

¹Nít'éé' Bíkrai biye' Bénjamin dine'é Shííba wolyéii diné doo yá'áshóonii nilį́įgo ákwii naaghá. Éí deenásts'aa' bidee' bee í'dílzoołí yee ádííniidgo, Nihí éí David doo bídadíníit'i' da, índa Jésii biye' bíí' nilíinii ałdó' doo nihídadéét'i' da; Ízrel dine'é nohłíinii, t'ááłá'í nootínígo nihiníbaalgóó nihééhóhkááh.

²Áko Ízrel dine'é t'áá ałtso David yits'ą́ąjį' dah diikaigo Bíkrai biye' Shííba yikéé' dah diikai, nidi Júdah dine'é éí aláahgo binanit'a'í bił dáálįįd; Jórdan toohdóó Jerúsalem kin haal'áajį' ákót'éego bił hoo'a'.

³Nít'éé' David éí Jerúsalem kin haal'áadi bighangi nádzá, áádóó aláahgo naat'áanii ba'ákéí yíł'íní neeznált'éego, éí haghan yaa ádahalyánígíí náánáła' kin góne' nizhnínilgo baa áháyą́ągo áádóó ba'altso'go ájiilaa, nidi hó éí doo bich'į' nijigháa da. Áko daneeznáajį' bidá'deelkaal; asdzání bąąh ádahasdįįdii nahalingo naháaztą́ą́ nít'éé'.

⁴Áko aláahgo naat'áanii éí Améísa áyidííniid, T'áadoo táá' yiłkaahí Júdah dine'é shaa áłah ádíílííł, áádóó ni ałdó' kwe'é nanináa doo.

⁵Nít'éé' Améísa éí Júdah dine'é áłah ábizhniilaa biniyé dashdiiyá, nidi t'óó binánijigháago bee há nihoot'ánígíí bilááhgóó ahoolzhiizh.

⁶Nít'éé' David éí Abísheiyai áyidííniid, K'ad Bíkrai biye' Shííba éí Ábsalam atínihiilaa yę́ę t'ah bilááh át'éego nihaa hideesdzáago át'é. Bóhoníłníihii nishłíinii shá nidaal'a'í dah dii'éeshgo bikéé' hidohkááh; éí doodago kin hadaas'á ditą́ągo binaa ahééda'atł'inígíí ádá shóidoołt'eełgo nihits'ą́ą́' áajį' yisdádínóochééł.

⁷Áádóó Jó'ab éí diné yił naakaígíí éí Kéreth dine'é áádóó Pííleth dine'é índa diné dahayóii t'áá ałtso bił Abísheiyai yikéé' ch'íkaigo Bíkrai biye' Shííba bikéé' hizhdookah biniyé Jerúsalem kin haal'áádóó ch'íníná.

⁸Gíbiyan kin haal'áagi tsé ayóó áníłtso si'ą́ągi jinínáago Améísa hadááh níyá. Jó'ab éí siláojí é'ígíí yii' sitį́įgo bikáa'gi diltłish bizis yił ákászaazgo diltłish bii' sitą́ągo béheestł'ǫ́ǫ́ nít'éé', áko dashdiilwodgo háákę́ę́z.

⁹Nít'éé' Jó'ab éí Améísa ííłní, Yá'át'éehgoósh naniná, shik'is? Áádóó Jó'ab éí Améísa yidoots'ǫs biniyé nish'náájí yee bidághaa' yisił.

¹⁰Nidi Améísa éí Jó'ab diltłish bílák'ee sitánígíí doo yaa ákonízin da, áko hátsą́ą́' biyaa góne' yaa ayííłgeedgo áádę́ę́' ni'jį' hach'íí' hááłhęęzh, índa t'áadoo nínáhodiiłhaałí dadziztsą́. Ákódzaago Jó'ab áádóó hak'is Abísheiyai éí Bíkrai biye' Shííba yikéé' ahoot'áázh.

¹¹Nít'éé' Jó'ab éí dinééh yił naakaígíí ła' bíighah sizį́įgo ání, T'áá háiida Jó'ab áádóó David bich'odajinínígíí bíni'dii Jó'ab bikéé' dashdiikááh.

¹²Nidi atiin ałníí'góó Améísa bidił bik'ee chxii'go sitį́. Áádóó éí dinééh diné t'áá ałtso áajį' nehejeehgo yiyiiłtsą́ągo Améísa yę́ę atiindóó nahjį' hayííłtį́įgo yik'é'ésti', háálá binááł diné t'ááłá'í nítínígo ats'íís sitíníjį' neheezhjéé'.

¹³Atiindóó nahjį' hayííłtį́įgo diné t'áá ałtso Jó'ab yikéé' dah diikaigo Bíkrai biye' Shííba yikéé' ííná.

¹⁴Nít'éé' Shííba éí Ízrel dine'é t'áá a łtso bitah hazhdiiyáago kéyah Beth-méíyakahgi Éíbel kin haal'áhíjį' jiníyá, áádóó Biiráíyah ba'áłchíní t'áá ałtso ahíikaigo áłah silį́į'go ałdó' hakéé' dah diiná.

¹⁵Áko Jó'ab éí diné yił naakaígíí Beth-méíyakahgi Éíbel kin haal'áhígi yíkaigo yináshzhiizh áádóó binaa ahéé'ítł'inígíí tł'óó'dę́ę́' bitsį́į́góó ahéé'ígeedígíí góne' łeezh háádeidééłbįįdgo ítł'inígíí łeezh bíilk'idgo ádayiilaa índa diné t'áá ałtso yił naakaígíí éí ítł'inígíí nideidoołkał yiniyé nídeiniłgoh.

¹⁶Nít'éé' asdzání hóyáanii léi' kin haal'áhídę́ę́' yéego haadzíi'go ání, Da'íísółts'ą́ą́', da'íísółts'ą́ą́', nánihooshkąąh, Jó'ab áháníjį' shich'į' nidoogáałgo bich'į' hadeesdzih.

¹⁷Áádóó áháníjį' bich'į' nizhníyáago asdzání ání, Niísh Jó'ab ánít'į́? Áko ábijiní, Shí éí ásht'į́. Áádóó asdzání áháłní, Asdzání ná naal'a'í bizaad diits'į́į́h. Áádóó ájíní, Níínísts'ą́ą́'.

¹⁸Ákohgo asdzání haadzíi'go ání, Ałk'idą́ą́' ádajiníí nít'éé', Éíbel kin haal'áagi kót'é ha'nínígíí bínda'ízhdídóołkił. Ákót'éego hoda'diił'áhígíí nidahat'ééh nít'éé'.

¹⁹Ízrel dine'é bitahgi k'é dandzinii áádóó bada'ahódlíii ła' nishłį́; Ízrel dine'é bitahgi kin haal'áhígíí áádóó amá nilíinii atídadíílííł bíká ánít'į́ nisin. Ha'át'íísh biniyé Bóhólníihii bíi'ii áníłdįįh doo?

²⁰Nít'éé' Jó'ab hanáánáádzíi'go ání, Doodahéi, doodahéi, dooyee' t'áá k'ad ánihisíłdįįd da, doodaii' tínihidiishłaa da.

²¹Éí doo ákót'ée da, nidi diné léi' Dził Íífreiyim dani'áhídę́ę́' naagháhígíí Bíkrai biye' Shííba wolyéii éí aláahgo naat'áanii yich'į' nídiildzil. T'áá bí t'éí nihaa nołteeh, áko kin haal'áhígíí bits'ą́ąjį' dah nídadidii'nééł. Áádóó asdzání éí Jó'ab ííłní, Shoo, bitsiits'iin éí kin haal'á binaa ahéé'ítł'inígíí báhátis nich'į' ahidoolghą́ą́ł.

²²Áko asdzání éí bidine'é t'áá ałtso áłah áyiilaii hóyą́ągo yich'į' yáłti'. Áádóó Bíkrai biye' Shííba bik'os k'ídeisne'go bitsiits'iin éí Jó'ab bich'į' ch'ídayiisxan. Nít'éé' Jó'ab éí deenásts'aa' bidee' bee í'dílzoołí yee ádííniidgo kin haal'áhígíí bik'izdeeskaigo diné t'ááłá'í jinítínígo t'áá hó dahaníbaal naaznilgóó anídziiskai, índa Jó'ab éí Jerúsalem kin haal'áágóó aláahgo naat'áanii yich'į' anáádzá.

²³Nít'éé' Jó'ab éí Ízrel dine'é bisiláo dah deínéehii yinanit'a'í nilį́į́ nít'éé' áádóó Jiihóíyada biye' Biinéíyah éí Kéreth dine'é índa Pííleth dine'é yinanit'a'í nilį́į́ nít'éé'.

²⁴Áádóó Adóram éí naalte' binaanishii yinant'áago ábi'diilyaa; Aháílad biye' Jiiháshafat éí naat'áaniishchíín nilį́į́ nít'éé'.

²⁵Shííva éí naaltsoos ííł'íní nilį́į́ nít'éé' áádóó Zéídak índa Abáíyathar éí náá'iiłniihii nilį́į́ nít'éé'.

²⁶Áádóó ałdó' Jéíyer ba'áłchíní ahoolchíiłii ła' Áíra wolyéii éí David bá aláahgo náá'iiłniihii nilį́į́ nít'éé'.