Read Navajo II SAMUEL 21 Bible Online

II SAMUEL 21 - Navajo bible

II SAMUEL 21

¹Nít'éé' David bíyoołkááł yę́ędą́ą́' táá' nááhaijį' hodííchįįd. David éí Bóhólníihii nayídééłkid, áádóó Bóhólníihii hach'į' haadzíi'go áhodííniid, Saul yę́ę áádóó ba'áłchíní ahoolchíiłii bił dił nidaashchxii'go ída'iilaa; jó, Gíbiyan dine'é nideistseed; éí bąą áhát'į́.

²Áádóó aláahgo naat'áanii éí Gíbiyan dine'é hágo yidííniidgo ííłní; (áko Gíbiyan dine'é éí doo Ízrel dine'é danilį́į da, nidi Ámor dine'é t'áá ayáhígo yidziihígíí danilį́. Azhą́ Ízrel dine'é éí Gíbiyan dine'é bich'į' ádee hadazdeesdzíí' nidi Saul éí Ízrel áádóó Júdah dine'é yá yínéésdlįįdgo Gíbiyan dine'é ałtso nideestsił niizį́į́':)

³éí bąągo David éí Gíbiyan dine'é ííłní, Ha'át'íísh nihá baa nideeshaał? Áádóó ha'át'íísh bee nihá k'ééhodeeshdǫǫłgo Bóhólníihii bíí' nilíinii bik'idajiinohdlíi doo?

⁴Gíbiyan dine'é ádahałní, Nihí éí Saul yę́ę, doodaii' ba'áłchíní bibéésh łigaii, doodaii' bi'óola doo daniidzin da, doodaii' t'ááká nihí nihiniinaa Ízrel dine'é ła' sóółhééł lágo. Áko David ání, T'áá dayínóokeedígíí nihich'į' kódeeshłííł.

⁵Nít'éé' aláahgo naat'áanii ánáádeidoo'niid, Éí diné nanihistseedígíí áádóó nihinahazgizgo Ízrel dine'é bikéyahgóó t'áá át'éé nít'éé' doo ła' diidzihgóó nihinahaz'ą́ą́ nít'éé' yę́ę bik'édígi,

⁶bíni'dii ba'áłchíní diné danilínígíí tsosts'idgo nihaa nínííł, áko Bóhólníihii binááł dah dahodiyiidloh; éí Gíbiyahgi Saul yę́ę bikin haal'áhígi ákódahodiilnííł. Bóhólníihii éí nibiníłtį́į́ nít'éé'. Áko aláahgo naat'áanii ání, Nihaa hodeeshnił lą́ą.

⁷Nidi aláahgo naat'áanii éí Jánathan yę́ę biye' Miifíbosheth, éí Saul yę́ę binálí t'áadoo ninéidiní'ą́ą da, háálá Saul yę́ę biye' Jánathan yę́ę éí David bił Bóhólníihii biniit'aa ałch'į' ádee hazdoodzíí'.

⁸Aláahgo naat'áanii éí Éíyah bitsi' Rízpah biyáázhké naaki, éí Saul yę́ę yá yishchínígíí, Armónai áádóó Miifíbosheth wolyéego néidiinil, áádóó Saul yę́ę bitsi' Máíkal biyáázhké ashdla'go éí Miihólathdóó diné Barziléíyai biye' Éídriyal yá niyiishchínígíí ałdó' néidiinil.

⁹Áko Gíbiyan dine'é yaa honínil áádóó wók'ą́ągi Bóhólníihii binááł dah dahodiyiilo', índa t'áá tsosts'id yilt'éego t'áá ła' bizhi'ee nidahastseed. Tł'oh naadą́ą́' bidee' í daagizh binih, da'agizhígíí baa nídiildee' binih nidaho'diztseed.

¹⁰Áádóó bik'ijį' Éíyah bitsi' Rízpah éí tł'oh yishbizh néidiiłtsoozgo tsé bikáá' ádá niiníłkaad; da'agizhígíí baa nídiildee'dóó yá biyi'dę́ę́' aho'niiłtą́ąjį' ákwii sidáago jį́įgo tsídii nidaat'a'ígíí ats'íís bik'éézhníłka', doodaii' tł'ée'go naaldlooshii nidaaldeehii ats'íís bik'éézhníłka'.

¹¹Nít'éé' Saul yę́ę ba'ákéí yíł'íní Éíyah bitsi' Rízpah áát'įįdígíí baa yáti'go David bił hóóne'.

¹²Nít'éé' David dah diiyáago Saul yę́ę bits'in áádóó biye' Jánathan yę́ę bits'in éí Jéíbesh-gíliyadóó diné yits'ą́ą́' nídeidiinil; jó, éí Béthshan kin haal'áagi atiindóó deineez'į́į́' nít'éé'. Ákwii Filístiya dine'é éí Gilbówa kin haal'áagi Saul dayiisxį́ bijį́į́ góne' bits'íís dah deidiilo'.

¹³Áádę́ę́' Saul yę́ę bits'in áádóó haye' Jánathan yę́ę bits'in názhníjaa', áádóó náádaała' dah dabi'diidlo' yę́ę dabits'in áłah áńjiidlaa.

¹⁴Nít'éé' Saul yę́ę áádóó haye' Jánathan yę́ę bits'in éí Bénjamin bikéyahdi Zíílah kin shijaa'gi Saul bizhé'é yę́ę Kish wolyéii bitséní'ootséél góne' yóó'ádajiilaa; aláahgo naat'áanii yee haadzí'ígíí t'áá ałtso bik'eh ádadziidzaa. Áádóó bik'ijį' Diyin God bich'į' kéyah bá sonídazdilzįįhgo há yik'iníjídliih.

¹⁵Áko nít'éé' Filístiya dine'é éí Ízrel dine'é yik'i náánéijéé' áádóó David bá nidaal'a'í yił ákóyaa níná; Filístiya dine'é yik'iijée'go yił da'ahoogą́ą́', áko David dínéesna'go nídínéesdzá.

¹⁶Nít'éé' Íshbai-bíínab wolyéii yé'iitsoh biye'ké ła' nilį́įgo éí bitsiidétáán bílátahjį' deeníigo bighą́ą́h dí'áhígíí éí béésh łitsoii bee ályaii táadi neeznádiin shékel wolyéii dah hidídlo' áádóó ákászaazígíí diltłish ániidíii bąąh dah sitą́ągo David diyeeshxééł nízin.

¹⁷Nidi Zerowáíyah biyáázh Abísheiyai éí David yíká aalwodgo Filístiya dine'é yighá'níłgeedgo yiyiisxį́. Áko David hadiné hach'į' ádee hadadeesdzíi'go ádahałní, Anaa' baa na'aldeehgóó t'áadoo nihił nanibaahí, áko Ízrel dine'é bibee adinídíinii doo dínííłtsis da.

¹⁸Ákódaadzaadóó náábík'ijį' Gab haz'ánígi Filístiya dine'é bił ałk'i náájiijéé', áko Húshath dine'é Síbiikai wolyéii Saf yiyiisxį́; éí yé'iitsoh biye'ké ła' nilį́į́ nít'éé'.

¹⁹Náá'áłdó' Gabgi Filístiya dine'é bił ałk'i náájiijéé'; t'áá ákwe'é Béthlehemdóó diné Jéíyarii-óriijim biye' Elhéínan éí Gath kin haal'áádóó diné ła' yiyiisxį́; éí Goláíyath yę́ę bik'is nilį́į́ nít'éé'; éí bitsiidétáán á sitą́ągi áníldííl.

²⁰Náá'áłdó' Gath kin haal'áagi ałk'i náájiijéé'; ákwii diné ayóó áníłnééz léi' naaghá. Éí bíla' t' áá ałch'ijí bílázhoozh hastą́ą́h, áádóó bikédiníbiní t'áá ałch'ijí ałdó' hastą́ą́h, áko t'áá át'égo naadiin dį́į́'; éí ałdó' yé'iitsoh biye' nilį́.

²¹Áko éí Ízrel dine'é nayé'é'įįhgo David bik'is Shímiya biye' Jánathan éí hwiisxį́.

²²Díí dį́lt'éego yé'iitsoh bá nidabi'diizhchį́įgo Gath kin haal'áagi nidaakai nít'éé'; David áádóó bá nidaal'a'í dabííghą́ą́'.