Read Navajo II SAMUEL 22 Bible Online

II SAMUEL 22 - Navajo bible

II SAMUEL 22

¹Áko David éí Bóhólníihii bich'į' hadzoodzíi'go, íídą́ą́' díí saad bee sin ályaaígíí bee bich'į' hojitaałgo hwe'ana'í t'áá ałtso bits'ą́ąjį' índa Saul yę́ę bits'ą́ąjį' Bóhólníihii yisdáhóółtį́.

²Áádóó ázhdííniid, Bóhólníihii éí tsé shá nilį́, índa bine' adziihii shá nilį́, áádóó yisdáshiiłteehii nilį́.

³ShiDiyin God éí tsé bine' naasdzi'ii nilį́įgo t'áá bí t'éí baa jííníshłíigo bine' ahinishchééh; shinaage' áádóó adziil bee yisdáhásháahii nilį́, nehesdzíihii áádóó bine' ahinishchéehii, shiyisdá'iiníiłii nilį́. Ni t'éí shi'ana'í nídahwéedǫ́ǫsii bits'ą́ąjį' yisdáshiyíłteeh.

⁴Bóhólníihii náoshkąąh doo; éí baa ha'niihgo yą́ą́h nilį́. Kót'éego shi'ana'í danilíinii yits'ą́ąjį' yisdáshiiłteeh.

⁵Aniné t'éí shináhaazláago shik'i náhoodleeh. Tó nídaadląąhiigi át'éego doo Diyin God k'ehgo ádaat'éii shaa nahaakaigo shił yéé' dahasłį́į́'.

⁶Ch'į́įdiitah bik'ee yínííł na' adáii shináhaazláá nít'éé', aniné biloh shiyah náhodiłhis nít'éé'.

⁷Shił nahodít'é sélį́į'go Bóhólníihii bich'į' sodeeszin; shiDiyin God, shíká adoolwoł biniyé néisiskan; bikin bii' sohodizin bii'dę́ę́' shidiizts'ą́ą́', áko náoshkąąhígíí t'áá aaníí yidiizts'ą́ą́'.

⁸Ákohgo nahasdzáán ádoogáadgo ditłid; yá bee daniłdzilii nidahaasnáa'go daditłid nít'éé', háálá Bóhólníihii báhóóchįįd.

⁹Bíníí'dę́ę́' łid ha'ííjool, áádóó bizéé'dę́ę́' kǫ' ó'oołdįįłii hadíínóodgo bee tsííd dadiiltłah.

¹⁰Yót'ááh hiníláii ałdó' ąą ádeile'go hadááyáago bikee' biyaagi chahałheeł dah yildoh.

¹¹Áko diyingo naal'a'í chérab wolyéii yik'i dah sidáago éí bił yít'a'; níłch'i bąąh diits'a'go bi'diiltsą́.

¹²Áádóó chahałheeł bik'i hííkaadgo í'diilyaa, índa tó diłhiłgo áádóó k'os diłhił bił nihihidiiyį́.

¹³Bits'ádi'nílídígíí bits'áhodiltłi'go bee tsííd dadiiltłah.

¹⁴Yádiłhił biyi'dę́ę́' adi'ní nahalingo Bóhólníihii haadzíí', Aláahgo Ayóó'át'éii biinéé' diists'ą́ą́'.

¹⁵Áádóó k'aa' yee adziiłt'óohgo ana'í tainooskaad; nída'iilgęshgo bee t'óó bił dahóóląąd.

¹⁶Tó dahidinéhígóó áádóó nahasdzáán bee daniłdzilígíí yit'į́ daazlį́į́', háálá Bóhólníihii adeeztehgo bíníí' yéego yee deeyolgo ákót'é silį́į́'.

¹⁷Aghánáhóó'áádę́ę́' shíká adoolnii'go sisił; tó t'óó ahayóí siyį́ biyi'dę́ę́' yisdáshííłtį́.

¹⁸Shi'ana'í bidziilii índa shik'ee dadiniihii yits'ą́ąjį' yisdáshííłtį́, háálá éí shiláahgo ádabóodziil nít'éé'.

¹⁹Shich'į' nahwii'náago yoołkááł yę́ędą́ą́' shaatįįh yínáa nidi Bóhólníihii bee nisdzil nít'éé'.

²⁰Áádóó ałdó' honíteelgo haz'ą́ąjį' shił íí'áazhgo yisdáshííłtį́, háálá shaa bił hózhǫ́.

²¹T'áá ákogi ánísht'éii bik'ehgo Bóhólníihii shich'į' na'nílá; a'át'e' shąąh ádinígíí bik'ehgo shich'į' na'nílá.

²²Háálá Bóhólníihii áníinii bik'eh honish'į́įgo yishááł nít'éé' áádóó doo yá'ádaashóonii doo baa naasháágóó t'áadoo shiDiyin God bits'áníyáa da.

²³Háálá yee nihodiiz'áanii shidáahgi hólǫ́ǫ́ nít'éé' índa yee nihwiiz'áanii t'áadoo bits'áníyáa da.

²⁴Binááł t'áá ákóne' ánísht'éé nít'éé'; doo ákwii ánísht'ée dooleełígíí bits'ąą ádaa áháshyą́ą́ nít'éé'.

²⁵Éí bąą Bóhólníihii éí t'áá ákogi ánísht'éii bik'ehgo shich'į' na'nílá, índa binááł a'át'e' shąąh ádinígíí bik'ehgo Bóhólníihii shich'į' na'nílá.

²⁶Aa a'ááh danízinii bich'į' aa a'ááh nínízingo í'díínílzin; t'áá ákóne' ádaat'į́įgo deíkáahii bich'į' t'áá ákóne' ánít'į́įgo í'díínílzin.

²⁷Ba'át'e' ádaadinii bich'į' na'át'e' ádingo í'díí'nílzin; ák'eh dahal'íinii bik'ijį' nílį́įgo í'díí'nílzin.

²⁸Diné bich'į' nidahwii'náanii yisdáhínííł, nidi diné ádaa daha'niihii níníł'į́; éí a'ohgo ádaat'éego ádíílííł.

²⁹Shibee hool'iní nílį́, Bóhólníihii; shił tł'ée'go Bóhólníihii shił ch'ídi'doołdlał.

³⁰Jó, ni neego siláo yinéełii bik'eh dideeshdleeł; shiDiyin God bee kin haal'á ahéénítł'inii báhátis dah dínéeshjį́į́ł.

³¹Diyin God t'áá bí át'éii ts'ídá t'áá ákogi át'é; Bóhólníihii bizaad bóhoneestą́ą'go bee baa hodzoosdlíí'; baa deidzólíii t'áá ałtso yá naagé nilį́.

³²Háí lá Diyin God nilį́? Bóhólníihii lą́ą; háísh tsé niłdzilii nilį́? NihiDiyin God lą́ą.

³³Diyin God bee shidziilgo bine' naasdzi'ii nilį́, t'áá ákogi ánísht'éego áshósin.

³⁴Bįįhtsa'ii dilwo'ígi át'éego shikee' bee doo shił nahontł'agóó áshósin, áádóó shi'aghádahaz'áagi dah náshiisįįh.

³⁵Shíla' bee anaa' yiishchįįh dooleełgo yínashiniłtin, áko béésh łitsoii ałtį́į́' éí shigaan bee néístas.

³⁶Nibee yisdá'iildééh naagé ałdó' shaa dííní'ą́; ná'áhwiinít'į́'íii bee ayóó ánísht'éego áshiinilaa.

³⁷Doo nantł'agóó nihidishtaałgo áshiinilaa; éí bąą t'áadoo ałtádiighaz da.

³⁸Shida'ana'í bikéé' náhidiishyeedgo ádaséłdįįd índa t'áadoo ánáhoosht'įįhí ałtso nahódaséłdįįdjį' hakéé' hinisdzá.

³⁹Áko ałtso ádahoséłdįįd; tídahodiishłaago t'áadoo náádahizhdii'na' da; t'áá aaníí shiyaajį' naa'ahizhneezdee'.

⁴⁰Háálá ana'al'į́į doogi adziil bee ákásíszaazgo áshiinilaa, shik'i néijah yę́ę shiyaajį' bik'eh dadínídlį́į́'.

⁴¹Shida'ana'í ałdó' shílák'ee dadííní'ą́, áko dashijijoołá yę́ę ádahodeeshdįįł.

⁴²Bíká adoolwołii yíká dadéez'į́į́' nít'éé', nidi t'áadoo yisdábóníłí da; Bóhólníihii yich'į' dadéé'į́į́', nidi t'áadoo bich'į' ééhoosįįd da.

⁴³Áko ni'góó łeezhgi át'ée doogo bik'ída'iiséłhaal; kintah atiingóó hashtł'ishígi át'éego bik'i niséyáago nídíí'eez.

⁴⁴Shidine'é saad dahółóonii ałdó' bits'ąą yisdáshííníłtį́; ał'ąą dine'é aláahgo binanisht'áago áshíínísingo diné doo béédahasin yę́ę shá nidaal'a'.

⁴⁵Dé'éyóní danilíinii t'áá bí shiyaajį' ni'ídii'nííł; t'áá dashidiits'į́hí shik'eh dahół'į́.

⁴⁶Dé'éyóní bichoo'į́ ádaasdįįd, áádóó bidziilgo bił nahaz'ą́ą́dóó nídaaldzidgo ch'éhékááh.

⁴⁷Bóhólníihii hiná; shitsé niłdzilii nilį́įgo baa ha'niih le', áko Diyin God éí tsé bee yisdéíyáii ayóó át'éii nilį́į le'.

⁴⁸Diyin God éí shá k'éédidoo'nííł, áádóó t'áá bí dadine'é shá yik'eh doodleełgo shiyaa ayiinííł.

⁴⁹Áádóó shida'ana'í bits'ąą yisdáshíłtééh áádóó shik'ijį' nídahidiikáahii bilááh ánísht'éego áshíínísin; diné doo daats'íidii bits'ąą yisdáshíłtééh.

⁵⁰Éí bąą shí nich'į' ahééh nisin doo, Bóhólníihii nílíinii, ał'ąą dine'é bitahgóó nízhi' baa hashniihgo hashtaał doo.

⁵¹Bóhólníihii éí bi'aláahgo naat'áanii bá bee yisdáhóót'i'ii ayóó át'éii nilį́; ak'ah bik'i yaadziidgo yiyíísį́į'ii David áádóó ba'áłchíní ahoolchíiłii yaa a'ááh nízingo ahóyéel'áa doo.