Read Navajo II SAMUEL 23 Bible Online

II SAMUEL 23 - Navajo bible

II SAMUEL 23

¹K'ad díidíígíí David ts'ídá akée'di saad yee hahaasdzí'ígíí át'é: Jésii biye' David ání, éí diné wódahgo ábiilaii Jéíkab biDiyin God ak'ah yik'i yayiiziidgo yiyíísį́į'ii áádóó Ízrel dine'é bitahdóó sin nizhónígo yee hataałii ání,

²Bóhólníihii biNíłch'i Diyinii shee yáłti'go bizaad bee hahasdziih.

³Ízrel dine'é biDiyin God kóní, Ízrel dine'é bitsé niłdzilii shich'į' yáłti'go ání, T'áá háiida dine'é binazhnit'áago t'áá ákogi ájít'ée doo; Diyin God jidísingo hóhólníih doo.

⁴Abínígo adididla'ígi át'éego abínígo k'os ádingo jį́honaa'éí haagháhígi át'éego áádóó ałtso ahałtį́į́hdóó bik'ijį' tł'oh dit'ódí bik'i diidíingo haajah łeeígi át'éego azhdiníłdíin doo.

⁵Da' sha'áłchíní náás ahoolchíiłiísh Diyin God doo bee bidahoníłdzil da doo? Jó, ahóyéel'áágóó bibee aha'deet'áanii shił hasht'eyiilaa; t'áá ałtsoní ákót'éego hasht'eyiilaii t'áá aaníinii át'é. Díí t'áá át'é bee yisdáhásháahii át'é áádóó t'áá át'é bídin nishłíinii át'é. Da' bíísh éí doo yee nihidínóoséeł da?

⁶Nidi diné doo yá'ádaashóonii biye'ké t'áá ałtso ch'il ahoshí nahgóó kól'įįhígi ádabidi'doolnííł, háálá éí doo yílá bee naaljooł da.

⁷Nidi t'áá háiida bizhdidoolchiłgo éí bee náhwiidzídí yee ahaniidiyooził áádóó ahaniyiiziidígi ts'ídá ałtso ahididoolk'ą́ą́ł.

⁸David bidiné ayóó ádaat'éii dah yoo'ishígíí éí kódaolyé: Tákmon dine'é Jósheb-bashííbet wolyéii éí siláo binanit'a'í alą́ąjį' yinanit'a'í nilį́įgo Ézen dine'é Adíno ałdó' yee dayózhí, áko éí bitsiidétáán yee tseebíidi neeznádiin diné t'áá łahjį' neistseed.

⁹Áádóó bikéé'dóó éí Dódo biye' Eliyéízar éí Ahówa binálí; David bidiné táa'go ayóó ádaat'éhígíí atah nilį́; éí Filístiya dine'é anaa' dahodoohłeeł yiniyé ahíikaigo bee nidahozhdeeshzhǫ'; jó, Ízrel dine'é éí t'áá íídą́ą́' yóó'adahineezhchą́ą́' lá.

¹⁰Nít'éé' bí éí naaldzilgo bíla' dínéesna'jį' Filístiya dine'é neistseed, áko diltłish yidiniiltsood, áko éí bijį́ Bóhólníihii éí ayóó át'éego hwee ak'eh deesdlį́į́', áko naalye'é bąąh da'oogą́'ígíí t'éiyá biniyé diné hakéé' t'ą́ą́' nákai.

¹¹Náábíkéé' góne' sizínígíí éí Héíra dine'é ła' Éígii biye' Shámmah wolyé. Filístiya dine'é áłah ádzaago naa'ołí nímazí t'óó ahayóí háájéé' léi'gi ahíikai, áko Ízrel dine'é éí Filístiya dine'é yik'ee yóó'adahineezhchą́ą́'.

¹²Nidi bí t'éí dá'ák'eh ałníi'gi sizį́įgo yich'ą́ą́h naazbaa', áko Filístiya dine'é neistseed, áko Bóhólníihii éí ayóó át'éego hwee ak'eh deesdlį́į́'.

¹³Nít'éé' tádiingo aląąjį' naazíinii dajílínígíí tájílt'éego dashdiikaigo da'agizhjį' ahoolzhiizhgo tsé'áán Adálam hoolyéejį' David baa jíkai, áko Filístiya bisiláo dah deínéehii éí Réfeiyim honíteelgi dah yinééł.

¹⁴Íídą́ą́' David éí bidziilgo haz'ą́ągi dah yinééł, áko Filístiya bisiláo Béthlehem kin shijaa'di dah yinééł.

¹⁵Áko nít'éé' David ání, Béthlehemdi dáń'dítį́hígi tó hahadleehdóó ła'da tó haa yókáałgo jódlą́ą́' laanaa.

¹⁶Áko díí diné táa' go ayóó ádabóodziilígíí Filístiya bisiláo dah yinééł góne' bił ch'ízhníjée'go Béthlehemgi yah a'atiinígi tó hahadleehdóó tó hadeizlo'go David yá nídeizką́, nidi t'áadoo yoodlą́ą́'góó t'óó Bóhólníihii bich'į'go yayiiziid.

¹⁷Áádóó David ání, Bóhólníihii nílíinii, díí ádeeshníłígíí doo shit'áahjį' bił nitséskees da doo. Da' díísh doo diné be'iina' ninádeiz'ą́ągo dabidił át'ée da? Éí bąą tó t'áadoo yoodlą́ą' da. Díí diné táa'go ayóó ádabóodziilígíí ákódáát'įįd.

¹⁸Zerowáíyah biyáázh Jó'ab bik'is Abísheiyai éí akéédę́ę́' táa'go nibidee'nilígíí ajítahgo aláahgo hóhólnííh; éí bitsiidétáán néidiitą́ągo yee táadi neeznádiin diné neistseed, áko diné tált'éhígíí atah jílį́ ho'di'ní.

¹⁹Doósh éí diné tált'éhígíí bitahdóó hó aláahgo diné bił jíílįįd da? Éí bąą hó alą́ąjį' ho'diilzį'; azhą́ táa'go aląąjį' nibidee'nilígíí doo ajítah da nidi, t'áá alą́ąjį' dzizį́.

²⁰Áádóó diné doo nánílyéesii Jiihóíyada biye' Biinéíyah éí Kábziyel kin haal'áádóó diné ayóó át'eego na'abaah yee nilíinii binálí jílį́. Éí Mó'ab dine'é naakigo naayéé' nilíinii nidzistseed áádóó łah yidzaazgo a'áán góyaa ajííyáago náshdóítsoh bitsiijį' ditł'ooígíí jiisxį́.

²¹Áádóó Ííjip dine'é jiisxį́; éí diné ayóó át'éii nineezii nilį́į́ nít'éé' áádóó Ííjip dine'é nilį́įgo tsiidétáán neitin, nidi Biinéíyah éí gish t'éí jootį́įłgo ákóyaa bich'į' jiníyá áádóó Ííjip dine'é bitsiidétáán bílák'ee hajiyííłhan, áko t'áá bí bitsiidétáán bee jiisxį́.

²²Áko díigi át'éego Jiihóíyada biye' Biinéíyah kwáát'įįd; kót'éego diné táa'go ayóó ádaat'éii atah jílį́ ho'di'ní.

²³Áko éí diné tádiinígíí bitahdóó aláahgo diné bił jíílįįd, nidi diné táa'go aląąjį' nibidee'nilígíí doo ajítah da. Áko David hak'i dadéez'į́į'ii yee bóhólníihgo ájiilaa.

²⁴Jó'ab bik'is Éísahel éí tádiinígíí ajítah, áádóó Béthlehem kin shijaa'dóó Dódo biye' Elhéínan ałdó',

²⁵Héírad dine'é Shámmah ałdó', Héírad dine'é Iiláíka ałdó',

²⁶Páltai dine'é Híílez ałdó', Tekówa dine'é Íkesh biye' Áíra ałdó',

²⁷Ánethathdóó dine'é Éíbiyíízer ałdó', Húshai dine'é Miibónai ałdó',

²⁸Ahówah dine'é Zálmon ałdó', Niitófahdóó dine'é Maharéíyai ałdó',

²⁹Niitófahdóó dine'é Béíyanah biye' Hííleb ałdó', Bénjamin dine'é bikin haal'áhígíí Gíbiyahdóó dine'é Ráíbai biye' Ítayai ałdó',

³⁰Pírathandóó dine'é Biinéíyah ałdó', Géíyash tó danílínídóó dine'é Hídeiyai ałdó',

³¹Áraba haz'ą́ą́dóó dine'é Ábai-álban ałdó', Barhúmai dine'é Azméíveth ałdó',

³²Sheiyálbimdóó dine'é Iiláíyaba ałdó', Jéíshen biye' ła' Jánathan ałdó',

³³Héírad dine'é Shámmah ałdó', Héírad dine'é Shéírer biye' Aháíyam ałdó',

³⁴Méíyakah dine'é biye' Ahásbai biye' Iilífalet ałdó', Gáílodóó dine'é Ahíthofel biye' Iiláíyim ałdó',

³⁵Kármeldóó dine'é Híízreiyai ałdó', Árba dine'é Péíyarai ałdó',

³⁶Zóbahdóó Néíthan biye' Áígal ałdó', Géed dine'é Béínai ałdó',

³⁷Áman dine'é Zíílek ałdó', Biyérathdóó dine'é Néíharai ałdó', éí Zerowáíyah biyáázh Jó'ab bibee na'abaahí yá neijaah nít'éé',

³⁸Íthra dine'é Áíra ałdó', Íthra dine'é Géíreb ałdó',

³⁹Het dine'é Yuráíyah ałdó', éí t'áá ałtsogo tádiindóó ba'aan tsosts'id jilt'é.