Read Navajo II SAMUEL 24 Bible Online

II SAMUEL 24 - Navajo bible

II SAMUEL 24

¹Náá'áłdó' Bóhólníihii éí Ízrel dine'é yich'į' bánááhóóchįįdgo David hak'ijį' náádiildził áyiilaago ání, Nílááh, Ízrel dine'é índa Júdah dine'é deínółta'.

²Áko aláahgo naat'áanii éí siláo dah deínéehii yinanit'a'í Jó'ab bił sikéego áyidííniid, Nílááh, Ízrel dadóone'é danilínígíí t'áá ałtso bitahgóó dínáahgo Dan kin haal'áádóó Bíyer-shííba kin shijaa'jį' diné yídííłtah; éí dine'é ánéelą́'ígíí shił bééhodoozįįł.

³Nít'éé' Jó'ab éí aláahgo naat'áanii áyidííniid, K'ad Bóhólníihii niDiyin God éí diné yilááh áyoolííł; ádanéelt'e'ii t'ááłáhídi neeznádiindi ánánéelą́ą'go yilááh áyoolííł, áko bóhonishníihii aláahgo naat'áanii yiníł'į́įgo haa néelą́'ígíí bił bééhodoozįįł. Nidi ha'át'íí biniyé bóhonishníihii aláahgo naat'áanii díí yaa bił hózhǫ́ǫgo íidoolííł?

⁴Azhą́ kózhdííniid nidi, aláahgo naat'áanii éí Jó'ab áádóó siláo dah deínéehii yinanit'a'í danilíinii yigha'deet'ą́. Áko Jó'ab áádóó siláo yinanit'a'í danilíinii aláahgo naat'áanii dah sidáhídóó dashdiikaigo Ízrel dine'é bida'ízhníiłta'góó dashdiikai.

⁵Áádóó Jórdan tooh ha'naa nijíkaigo Géed honíts'aa'gi Aró'er kin haal'áhígíí shádi'ááhjígo Jéízer kin haal'áii bich'į' honít'i'ígi nizhníná.

⁶Nít'éé' Gíliyad kéyahgi náájíkai áádóó Tátim-hádshai kin shijaa'góó tázhdookaigo Dan-jéíyangi náájíkai índa Sáídan kin haal'áajį' nábik'ee'ąądę́ę'go jíkai.

⁷Áádóó Táir kin haal'áagi bine' na'adzi'ii bił haz'ą́ąjį' índa Háíva dine'é áádóó Kéínan dine'é bikin hadaas'áágóó tázhdookai, áko índa Júdah kéyah shádi'áahjigo Bíyer-shííba kin shijaa'go áajį' jíkai.

⁸Áko kéyah t'áá át'é bii' tázhdookaigo Jerúsalem kin haal'áajį' níjíkaijį' náhást'éí hwee nídadeezidóó naadiin jį́ hwee da'azlį́į́' lá.

⁹Ákohgo Jó'ab éí Ízrel dine'é jííłta'go diné ánéelą́'ígíí naaltsoos bikáá' ájiilaago aláahgo naat'áanii baazhníłtsooz; nít'éé' Ízrel dine'é doo nídanilyéesii tseebíidi neeznádiindi mííl ánéelą́ą'go diltłish bee na'abaah dayiichįįh lá, áádóó Júdah dine'é ashdladi neeznádiindi míilgo ánéelą́ą́' lá.

¹⁰David éí dine'é yéélta'dóó bik'ijį' náhozhdííłhaaliigi ádziidzaa áádóó David éí Bóhólníihii áyidííniid, Díigi í' iishłaaígíí bee ayóó át'éego ádił asésiih, áko, nánooshkąąh, Bóhólníihii nílíinii, ná naal'a'í nishłíinii doo ákwii áát'įįdígíí shá yóó'adí'aah; jó, doo áhosisyąągóó ákwíít'įįd.

¹¹Áko nít'éé' David hoos'įįdgo nízhdii'na'go, Bóhólníihii t'áá bí bizaad yee haadzíi'go éí Géed halne'ii nilíinii, t'áá éí David yá náásgóó halne'ii nilį́įgo áyidííniid,

¹²Nílááh, David bich'į' dínáahgo ábidiní, Bóhólníihiiga' kóní, Táa'go haz'ą́ nich'į' nídíínil; éí ándeeshłíłígíí biniyé t'ááłá'ígo nididíí'ááł.

¹³Áko Géed éí David baazhníyáago bee bił hojoolne'go ábijiní, Tsosts'id nááhaijį'ísh nikéyah bikáá'góó dahodidoochįįł? Éí doodago, táá' nídeezidjį' daats'í ni'ana'í nik'eh dadidlį́įgo nidaniniłchée doo? Éí náádoodago, táá' yiską́ąjį' daats'í nikéyahgi naa hodoołnih? K'ad ha'át'íí diniih, áko t'áá bee háínídzí'ígíí éí bee shiníł'a'ii bił náhodeeshnih.

¹⁴Áádóó David éí Géed ííłní, Ts'ídá t'áadoo ádóshne'gi da; háni'dii k'ad Bóhólníihii bílák'eejį' nida'ádidiit'ááł, háálá ayóó át'éego aa a'ááh nízin. Diné éí doo ła' bílák'eejį' ni'ádideesht'áał da.

¹⁵Ákohgo Bóhólníihii éí naałniih Ízrel dine'é yik'ijį' yiníłnii'ígíí abínídóó níléí bee nihoot'áníjį' yiníłnii', áko Dan kin haal'áádóó Bíyer-shííba kin shijaa'jį' diné daneeznánígíí tsosts'idiindi mííl nít'éé' lá.

¹⁶Áádóó diyingo naal'a'í éí Jerúsalem kin haal'áagi diné íidoołdįįł biniyé yik'ijį' dah didiilnii'go Bóhólníihii díí doo yá'át'éhígi áhoodzaaígíí yąąh bíni' áádóó diyingo naal'a'í na'ałtseedígíí ííłní, K'adí t'ą́ą́' háádílnííh. Nít'éé' Bóhólníihii bidiyingo naal'a'í Jííbas dine'é Arónah bitł'oh naadą́ą́' habíníná'ál'isí bíighahgi yiizį'.

¹⁷Áko David éí diyingo naal'a'í diné neiłtseedgo yiyiiłtsą́ągo Bóhólníihii yich'į' haadzíi'go ání, Dooládó' ádił asésiih da áádóó ts'ídá doo yá'áshónígi íít'įįd da lá! Nidi díí dibéshą' haa daadzaa? Baa nánooshkąąh, háni'dii níla' bee atíshílééh; shizhé'é yę́ę ba'áłchíní ahoolchíiłii t'áá bił atíshílééh.

¹⁸Áádóó t'áá éí bijį́ Géed éí David yaa níyáago ííłní, Nílááh, Jííbas dine'é Arónah bitł'oh naadą́ą́' habíníná'ál'isí góde dínáahgo áadi Bóhólníihii bich'į' bikáá' náá'iiniihí nidíí'ááł.

¹⁹Áádóó Géed ádííniidígíí bik'ehgo David éí Bóhólníihii áhodííniidígíí bik'ehgo ádziidzaa.

²⁰Áádóó Arónah jidéé'į́į'go aláahgo naat'áanii índa bá nidaal'a'í yił hach'į' yikahgo jiiłtsą́, áádóó Arónah ch'ízhníyáago aláahgo naat'áanii biyaajį' nitsizhdinígo'go ni'jį' tsé'yaa jineeshjool.

²¹Áko Arónah ání, Ha'át'íí lá biniyé bóhonishníihii aláahgo naat'áanii bá naal'a'í nishłíinii shaa níyá? David ádííniid, Tł'oh naadą́ą́' habíníná'ál'isígi naa nahodiyeeshnihgo ákwii bikáá' náá'iiniihí nideesh'áałgo Bóhólníihii bich'į' náá'iiniihgo, áko naałniih éí diné bits'ą́ąjį' kódoonííł biniyé náádi'yeeshnih.

²²Áádóó Arónah éí David ííłní, Bíni'dii bóhonishníihii aláahgo naat'áanii náhodii'aahgo t'áá ha'át'íhída bił yá'át'éhígíí ákwii néidiyoołnih. Jó, kǫ́ǫ́ didlidgo nááhániihii biniyé béégashii hólǫ́ áádóó ha'íníná'ál'isígi tsin chodao'ínígíí índa béégashii ałdó' éí tsin bizénínádéetį́įhgo yee tsin ak'i neishoodii didlidgo bee náádi'yoonihii hólǫ́.

²³Arónah éí díí t'áá ałtso yee aláahgo naat'áanii yich'į' yílnáago aláahgo naat'áanii yeidiní'ą́. Áko Arónah éí aláahgo naat'áanii áyidííniid, Bóhólníihii niDiyin God éí nááhíníłnii'ígíí ná yidínóozįįł.

²⁴Áko aláahgo naat'áanii Arónah ííłní, Dooda, nidi t'áá bą́ą́h ílínígíí bíighahgo t'áá aaníí naa nahideeshnih, áádóó t'áadoo bik'é ni'níláii doo bą́ą́h ílíinii éí doo Bóhólníihii shiDiyin God bich'į' nááhideeshnih da. Ákohgo David éí ha'íníná'ál'isígi índa béégashii t'áá bóóltą'go béésh łigaii shékel ashdladiin bíighahgo yee nayiisnii'.

²⁵Áádóó ákwe'é David éí Bóhólníihii bich'į' náájiiłniih doo biniyé bikáá' náá'iiniihí nizhní'ą́ągo didlidgo nááhániihii áádóó hózhǫ́ǫ́jí nááhániihii náájiisnii'. Ákohgo Bóhólníihii éí kéyah bá níjooskango hodiizts'ą́ą́' áádóó naałniihígíí Ízrel dine'é bits'ą́ąjį' kónáyiidlaa.