Read Navajo II SAMUEL 3 Bible Online

II SAMUEL 3 - Navajo bible

II SAMUEL 3

¹Saul yę́ę ba'áł chíní áádóó David ba'áłchíní ałch'į' anaa' dahółǫ́ǫgo nízaad nihoolzhiizh, áko David éí bidziil yileełgo bidziil silį́į́' índa Saul yę́ę ba'áłchíní éí doo bidziil da yileełgo doo bidziil da silį́į́'.

²Áádóó David éí Hííbrangi biye'ké bá neheezhchį́; alą́ąjį' bá yizhchínígíí Ámnan wolyé; éí Jézriyel dine'é asdzání Ahínowam wolyéii biyáázh jílį́.

³Naaki góne' bá yizhchínígíí éí Kíliyab wolyé; éí Kármeldóó dine'é Néíbal be'asdzą́ą́ nít'é'ígíí Ábigeil wolyéii biyáázh jílį́ áádóó táá' góne' bá yizhchínígíí éí Ábsalam wolyé; Gíísher kéyahgi aláahgo naat'áanii Tálmai bitsi' Méíyakah wolyéii biyáázh jílį́.

⁴Dį́į́' góne' bá yizhchínígíí Adonáíjah wolyé, éí Hágith biyáázh jílį́; áádóó ashdla' góne' bá yizhchínígíí Shefatáíyah wolyé, éí Abáítal biyáázh jílį́;

⁵áádóó hastą́ą́h góne' bá yizhchínígíí Íthriyam wolyé, éí David be'asdzą́ą́ Églah wolyéii biyáázh jílį́. Díí David éí Hííbrangi bá neheezhchį́.

⁶Áádóó bik'ijį' Saul yę́ę ba'áłchíní índa David ba'áłchíní anaa' da'ahil'į́įgo Ábner éí Saul yę́ę ba'áłchíní bitahgi bidziilgo dah oo'ish í'diilyaa.

⁷Saul yę́ę be'asdzą́ą́ yíł'íní ła' éí Rízpah wolyéego Éíyah bitsi' nilį́, áádóó Ish-bósheth éí Ábner áyidííniid, Ha'át'éegoshą' shizhé'é yę́ę be'asdzą́ą́ yíł'íní nít'é'ígíí ba'ałk'eejį' dah ninááh?

⁸Áko Ábner éí Ish-bósheth haadzí'ígíí yik'ee naastáalgo ádííniid, Da' łééchąą'í bitsiits'iin hanii nishłį́? Júdah dine'é bik'ijį' nishłį́įgo díí jį́ yee' nizhé'é yę́ę Saul ba'áłchíní áádóó bik'isóó índa bik'is danilíinii baa jiinishba', áádóó David t'áadoo bílák'ee nidíí'ą́ą da, ákondi díí jį́ t'áá ádzaagóó díí asdzání bee shik'i hodiní'ą́.

⁹Diyin God yee' Ábner nishłíinii atíshidoolííł, áádóó t'ah yówehígo át'éego ákóshidoolííł, Bóhólníihii éí David yich'į' yee ádee hadoodzíi'ii doo bá be'eshłééhgóogo ákóshidoolííł.

¹⁰Éí Saul yę́ę ba'áłchíní éí aláahgo yee bóhólníihii bibikáá'dóó nahat'áii David baa didoot'áałgo, yikáá'dóó hoo'áałgo Ízrel índa Júdah dine'é yinant'áago Dan kin haal'áádóó Bíyer-shííba kin shijaa'jį' yee bóhólníih doo.

¹¹Áko t'áadoo bich'į' hanáádzoodzíi' da, háálá Ábner béédzísdzííd.

¹²Áádóó Ábner éí t'áá áko nidaal'a'í ła' David yich'į' ayiis'a' kóníigo, Kéyahshą' háí bí? Áádóó ałdó' ání, Nił ahadi'deesht'áałgo, shoo, níká anáshwo' doo, áko Ízrel dine'é t'áá ałtso naa áłah ádeeshłííł.

¹³Áádóó ádííniid, Lą́'ąą, nił ahadi'deesht'ááł, nidi t'ááłáhígo haz'ą́, éí kóndideeshniił, Doo shich'į' nanináágóó doo shííní'į́į da doo; t'áá hazhó'ó Saul yę́ę bitsi' Máíkal bił shaa yíní'áazhgo t'éiyá náshiiltséeh doo.

¹⁴Áádóó David éí bá nidaal'a'í Saul yę́ę biye' Ish-bósheth yich'į' ayiis'a' kóníigo, She'asdzą́ą́ Máíkal shich'į' bi'níłnííh; éí Filístiya dine'é bicho' bílátahgi bicho'azis ahénálgizhígíí neeznádiingo bik'é shaa ho'deeltį́į ni'.

¹⁵Áko Ish-bósheth dah adiił'a'go hahastiin bits'ą́ą́' dahodiilóóz; Léíyish biye' Fáltiyel wolyéego hahastiin nít'éé'.

¹⁶Áádóó hahastiin haichago hakéé' yigáałgo Bahúrim haz'áníjį' hakéé' niníyá. Áko Ábner ábidííniid, Nílááh, nídídááh. Áádóó t'ą́ą́' dah nídiidzá.

¹⁷Ábner éí Ízrel dine'é yá aląąjį' naazíinii yił yaa nídaast'įįdgo ání, David éí aláahgo nihinanit'a'í nilį́į dooleeł danohsingo hodeeshzhiizh.

¹⁸K'ad ákódaohłééh, háálá Bóhólníihii éí David yee haadzíi'go ádííniid, Shá naal'a'í David binahjį' shidine'é Ízrel éí Filístiya dine'é bits'ą́ąjį' áádóó ana'í t'áá ałtso bits'ą́ąjį' yisdádeeshnił.

¹⁹Áádóó Ábner éí Bénjamin dine'é ałdó' yich'į' yee hahaasdzíí', índa Ábner éí Hííbran kin haal'áagi David ałdó' yaa níyáago yich'į' yee hahaasdzíí'; éí Ízrel dine'é bił yá'ádaat'éehii áádóó Bénjamin dine'é bił yá'ádaat'éehii t'áá át'é yee yił nahasne'.

²⁰Áko Ábner áádóó diné naadiingo bił Hííbran kin haal'áagi David baa jíkai, áádóó David éí Ábner índa diné hoł yíkaígíí yá áda'íísįįd.

²¹Áko Ábner éí David áyidííniid, Hasht'e'ádideeshníiłgo ákǫ́ǫ́ deeshááł, áádóó Ízrel dine'é t'áá ałtso éí bóhonishníihii aláahgo naat'áanii baa áłah ádeeshłííł, áko éí nił ahadadi'doot'ááł áádóó ni éí t'áá ałtsogóó nanít'áa dooígíí ádaa didíít'ááł. Áádóó David éí Ábner yéé'níłnii'go hózhǫ́ǫgo anáádzá.

²²Nít'éé', shoo, David bá nidaal'a'í éí Jó'ab yił ana'í yikéé' ííjéé' yę́ędę́ę́' nákaigo ana'í bindaalye'é t'óó ahayóí nídeizhjaa', nidi Ábner éí Hííbran kin haal'áagi David doo yił naa'aash da, háálá yéé'níłnii'go hózhǫ́ǫgo anáádzáa ni'.

²³Jó'ab índa siláo yił naakaígíí t'áá ałtso yił nákaigo Jó'ab bił hóóne'go áho'doo'niid, Ner biye' Ábner éí aláahgo naat'áanii yaa níyá, áádóó anábi'dool'a'go hózhǫ́ǫgo dah nídiidzá.

²⁴Áko Jó'ab éí aláahgo naat'áanii yaa níyáago ání, Ha'át'íí lá baa nisíníyá? Jó, Ábner naa níyáá lá. Ha'át'íísh biniyé t'óó béé'ííníłnii'go hózhǫ́ǫgo dah nídiidzá?

²⁵Ner biye' Ábner bééhonísin; bí éí nini'dooloh yiniyé naa níyá, áko dah hidiinááhgóó áádóó yah anáhídáahgi índa baa nanináhígíí t'áá ałtso bił bééhodoozįįł yiniyé át'į́.

²⁶Áádóó Jó'ab éí David yits'ą́ą́' dah nídiidzáago, t'áá áko bá nidaal'a'í Ábner yikéé' ayiis'a'go Sáírah tó hahadleehdóó t'ą́ą́' hoł nídaaskai, nidi ákódzaaígíí David t'áadoo baa ákozniizį́į' da.

²⁷Nidi Ábner éí Hííbran kin haal'áajį' nádzáago Jó'ab t'áá sahdii ats'áhonílóozgo yah a'atiinígi hazhó'ó hach'į' hadeesdzih nízin nít'éé'; t'óó hátsą́ą́' biyaa góne' diltłish hagháiníłgeedgo dadziztsą́, háálá Jó'ab bitsilí Éísahel jiisxį́įgo bidił bits'ánílį́ ájiilaa.

²⁸Ákóhóót'įįdóó bik'ijį' David haa hodiizts'ą́ą'go ádííniid, Shí índa aláahgo bee shóhólníihgo bił haz'ą́ągi éí Bóhólníihii binááł doo bee nihidahodiit'i'góó Ner biye' Ábner seesyį́įgo bidił deezna'ígíí doo nihik'ehdii áhóót'įįdgóó ahool'áa doo.

²⁹Bíni'dii éí Jó'ab áádóó bizhé'é ba'áłchíní t'áá ałtso bik'ijį' nídoodleeł, áádóó bíni'dii Jó'ab ba'áłchíní bitahdóó ła' t'áá áłahjį' bilóód bits'ą́ą́dóó his háálį́į doo, doodaii' łóód ats' íís yiyáanii naałdzidii bee bąąh dahaz'ą́ą doo, doodaii' bigish áyah yiniil'áa doo, doodaii' diltłish bee bidi'yoolyééł, éí doodaii' dichin yik'ee naagháa doo.

³⁰Kót'éego Jó'ab áádóó bitsilí Abísheiyai bił Ábner jiisxį́, háálá Gíbiyan kin haal'áagi anaa' baa na'aldeehdi bitsilí Éísahel wolyéii bits'ą́ą́' jiisxį́.

³¹Nít'éé' David éí Jó'ab áádóó diné t'áá ałtso yił naakaígíí ábizhdííniid, Nihi'éé' ák'indahidoołdlałgo tł'oh azis bee áká dadoołzis, áádóó Ábner yę́ę baa daahcha doo. Áko aláahgo naat'áanii David t'áá bí ats'íís bee naaltéhí yikéé' yigááł.

³²Áádóó Hííbran kin haal'áagi Ábner yóó'ádayiilaa, áko aláahgo naat'áanii biinéé' ayóó íits'a'go Ábner yóó'ályaa yę́ęgi yícha áádóó diné t'áá ałtso dáácha.

³³Aláahgo naat'áanii éí Ábner yaa atínídindleehgo ání, Da' Ábner joolyéiísh diné doo áhályáanii daaztsánígi át'éego dadziztsą́?

³⁴Níla' doo ahéheestł'ǫ́ǫ́góó, doodaii' nikee' doo ahéheestł'ǫ́ǫ́góó diné doo yá'ádaashóonii dahwiisxį́ nahalingo ni'diisyį́. Áádóó diné t'áá ałtso haa náádáácha.

³⁵Áádóó diné t'áá ałtso éí David adooyį́į́ł danízingo t'ah nízaad az'ą́ągo yaa yíkai; nít'éé' David ádee hadoodzíi'go ádííniid, Diyin God yee' átíshidoolííł áádóó t'ah yówehígi át'éego ákóshidoolííł; t'áadoo e'e'aahí bááh, doodaii' t'áadoo le'é ła' yíyą́ą'go ákóshidoolííł.

³⁶Áko diné t'áá ałtso yaa ákodaniizį́į'go bił yá'ádaat'ééh. Ákót'éego aláahgo naat'áanii áát'įįdígíí t'áá át'é diné t'áá ałtso bił yá'ádaat'ééh.

³⁷Áko diné t'áá ałtso áádóó Ízrel dine'é t'áá ałtso ak'idadi'yiitįįhgo éí Ner biye' Ábner bi'diisyį́ yę́ędą́ą́' aláahgo naat'áanii doo bíniik'ehgo áhoodzaa da lá.

³⁸Áádóó aláahgo naat'áanii bá nidaal'a'í áyidííniid, Da' díísh t'áadoo baa ákodanoozį́į' da? Naat'áanii ayóó át'éii índa diné aláahgo át'éii Ízrel dine'é bitahgi daaztsą́.

³⁹Áádóó díí jį́ yee' doo shidziil da. Azhą́ aláahgo naat'áanii nishłį́į doo biniyé ak'ah bee alzį́įhii shik'i yaadziid nidi ákónísht'é. Díí diné éí Zerowáíyah biyáázhké danilį́įgo nantł'aígi shits'ą́ą́' ádaat'į́. Éí doo yá'áshǫ́ǫ́góó ájíít'įįdígíí hadoo yá'áshǫ' bik'ehgo Bóhólníihii k'ééhodidoodlííł.