Read Navajo II SAMUEL 4 Bible Online

II SAMUEL 4 - Navajo bible

II SAMUEL 4

¹Áádóó Saul yę́ę biye' Ish-bósheth éí Hííbran kin haal'áadi Ábner daaztsą́ągo yiyíínii'go t'óó bił áhásdįįd áádóó Ízrel dine'é t'áá ałtso niseekai.

²Saul yę́ę biye' éí diné naaki bá naal'a'go siláo binanit'a'í nilį́: ła' Béíyanah wolyé, náánáła'ígíí éí Rííkab wolyé, t'áá áłah Ríman biye' nilį́įgo Biyérath kin shijaa'dóó Bénjamin dine'é nilį́. (Jó, Biyérath kin shijaa'ígíí Bénjamin dine'é bíí' át'é,

³áádóó Biyérathdóó dine'é éí Gíteiyimgóó adahineezhchą́ą́', áko áadi díí jį́į́góó t'óó átsééd kéédahat'į́.)

⁴Jánathan yę́ę biye' éí Saul yę́ę binálí kót'éego nazhniłhod dzizlį́į́': ashdla' honááhaigo Jézriyel kin haal'áádę́ę́' Saul áádóó Jánathan yę́ę baa hóóne'go asdzání haa áhályánígíí dah hodiiłtį́įgo hoł dínéezhchą́ą́'; íídą́ą́' tsį́įłgo noochéełgo nahóółt'e'go bits'ą́ą́dóó nazhniłhod dzizlį́į́'. Éí Miifíbosheth joolyé.

⁵Áádóó Biyérath kin shijaa'dóó Ríman biye'ké Rííkab áádóó Béíyanah dah dii'áazhgo hadoh dah nídíno'go Ish-bósheth bighangi jiní'áázh; ałní'ní'ą́ągo bitsásk'eh yikáá' hanályį́į́h lá.

⁶Nít'éé' tł'oh naadą́ą́' bąąh hasht'elyaaígíí nízhdidoołtsos áhozhdil'į́įgo yah ajíí'áázh, áádóó hátsą́ą́' biyei góne' diltłish hagháinísi'go Rííkab áádóó bitsilí Béíyanah dah ahidíníilchą́ą́'.

⁷Jó, íídą́ą́' jinitéhí góne' hatsásk'eh bikáá' dziztį́įgo hoł yah íí'áazhgo diltłish hagháinísi'go hwiisxį́, áko hazéidíígizhgo hatsiits'iin dah yidii'ą́ áádóó halgaigóó tł'éé' bíighah yi'ashgo yiską́.

⁸Áádóó Ish-bósheth yę́ę bitsiits'iin éí Hííbran kin haal'áagi aláahgo naat'áanii David yeiní'ą́ągo áyidííniid, Shoo, ni'ana'í Saul yę́ę éí ni'niiłhį́ yę́ę biye' Ish-bósheth kǫ́ǫ́ bitsiits'iin. Saul yę́ę áádóó ba'áłchíní éí Bóhólníihii díí jį́ aláahgo naat'áanii bóhonishníihii yá k'éidiidlaa.

⁹Áádóó David éí Rííkab áádóó bitsilí Béíyanah Biyérathdóó Ríman biye'ké yich'į' haadzíi'go áyidííniid, Ts'ídá t'áá aaníí Bóhólníihii hiná; bí éí ach'į' nahwii'ná bits'ą́ąjį' shii' sizíinii nááyiisnii'.

¹⁰Íídą́ą́' ła' shił hojoolne'go ájíní, Shoo, Saul yę́ę dadziztsą́; éí hane' baa hoł hózhǫ́ǫ doo nízingo shił hojoolne', nidi ts'ídá t'áá aaníí hąąh dah níshjį́įdgo Zíklag kin haal'áagi hoséłhį́. Éí hoł hweeshne'go bik'é shich'į' ni'doolééł, shijó'níí nít'éé'.

¹¹T'ah nááyówehígi át'éego diné doo yá'áshóonii éí diné t'áá ákogi át'éii bighan góne' bitsásk'eh bikáa'gi yiyiisxį́įgo ts'ídá t'áá aaníí diné soołhínígíí bidił biniinaa k'éénihidideeshdlíiłgo nihokáá'dóó nahjį' kónihideeshłííł.

¹²Nít'éé' David tsíłkéí bá nidaal'a'ígíí hach'į' yiyííł'aadgo nidahastseedgo hála' áádóó hakee' dayiizhgizhgo Hííbran kin haal'áagi tó siyínígíí bíighahgi dah deidiyiinil. Nidi Ish-bósheth bitsiits'iin dah deidii'ą́ągo Hííbrangi tséní'ootséél góne' Ábner yóó'ábi'diilyaa yę́ę góne' adeiz'ą́.