Read Navajo II SAMUEL 5 Bible Online

II SAMUEL 5 - Navajo bible

II SAMUEL 5

¹Nít'éé' Ízrel dine'é t'áá ałtso Hííbran kin haal'áajį' David yaa haaskaigo yádaałti'go kódeidííniid, Shoo, nits'in áádóó nits'íís daniidlį́įgo nik'éí niidlį́.

²Hoolzhiizhdę́ę́' Saul aláahgo nihinanit'a'í nilį́ yę́ędą́ą́', ni lą́ą Ízrel dine'é niidlíinii dah nihidini'eezh áádóó yah anánihííní'eezh, áádóó Bóhólníihii ándííniid, Shidine'é Ízrel ba'íłtso' índa Ízrel dine'é aláahgo binanit'a'í nílį́į doo.

³Áko Ízrel dine'é aląąjį' naazíinii t'áá ałtso Hííbran kin haal'áadi aláahgo naat'áanii yaa haaskai, áádóó Hííbran hoolyéedi Bóhólníihii binááł aláahgo naat'áanii David yił ahada'deest'ą́, índa aláahgo naat'áanii David éí Ízrel dine'é binanit'a'í dooleeł biniyé ak'ah yik'i yadeiyiiziidgo dayíísį́į́'.

⁴David tádiin honááhaigo aláahgo naat'áanii dzizlį́į́', áádóó dízdiin nááhaijį' aláahgo naat'áanii jílį́į́ nít'éé'.

⁵Hííbran kin haal'áagi tsosts'id nááhaidóó hastą́ą́h nídeezidjį' Júdah dine'é binanit'a'í jílį́į́' nít'éé' índa Jerúsalem kin haal'áagi Ízrel dine'é áádóó Júdah dine'é t'áá ałtso tádiindóó ba'aan táá' nááhaijį' binanit'a'í jílį́į́ nít'éé'.

⁶Áádóó aláahgo naat'áanii bisiláo yił Jerúsalem kin haal'áagi Jííbas dine'é éí kéyah yii' kéédahat'ínígíí baa jíkai; éí David yich'į' yádaałti'go ádeidííniid, Doo da' oo'íinii áádóó nida'niłhodii doo nahjį' bi'ííníłnii'góó doo kojį' yah adíínéeł da. Éí David yah azhdoonéłígíí doo bízhneel'ą́ą da, dahó'ní.

⁷Azhą́ ákót'ée nidi David éí Záíyan yee ayóó ábóodziilii yisná, áko t'áá éí David bikin haal'á silį́į́'.

⁸Áádóó íídą́ą́' David ádííniid, T'áá háiida dził bii' hahodiidzą́ą́ góde hadzis'na'go Jííbas dine'é áádóó nida'niłhodii índa doo da'oo'íinii atízhdoolíiłgo éí David hak'ee diniihii ádajit'į́. Éí bąągo ła' ádaaní, Doo da'oo'íinii índa nida'niłhodii kin góne' doo yah adoogáał da.

⁹Áko David éí bidziilgo haz'ánígi kééhojit'į́, áádóó David bikin haal'á hoolyée doo, dííniid. Áko David éí Míllo haz'ánídóó dah adiitł'ingo t'áá kin haal'áá nít'éé' yiná'áztł'in.

¹⁰Áádóó David bidziilgo bił hoo'a', índa t'áá ałtsoní bee Bóhólníihii Diyin God bił hólǫ́.

¹¹Táirdóó aláahgo naat'áanii Háíram éí David yich'į' naal'a'í ayiis'a'go kin ádeił'íinii áádóó tsé deitł'inii éí dilk'is tsin yił ayiis'a'go David yá kin ádayiilaa.

¹²Áádóó David díí baa ákozniizį́į́': Bóhólníihii éí Ízrel dine'é aláahgo binanit'a'í jílį́įgo chánah áhoolaa índa hadine'é Ízrel bá bee hóhólníihgo bił haz'áanii ayóó át'éego áyiilaa.

¹³David éí Hííbran kin haal'áádę́ę́' níjí'náádóó bik'ijį' Jérusalem kin haal'áajį' jiníyáago hwe'asdzą́ą́ jíł'íní índa hwe'asdzą́ą́ ła' nínáájiisdláá'; ákwe'é haye'ké índa hatsi'ké há nidayiishchį́.

¹⁴Áádóó díí éí Jerúsalemgi há neheezhchínígíí kódaolyé: Shamúwa, Shóbab, Néíthan, Sálaman,

¹⁵Íbhar, Iilíshuwa, Níífeg, Jafáíya,

¹⁶Iilíshama, Iiláíyada índa Iilífalet daolyé.

¹⁷Áko Filístiya dine'é éí Ízrel dine'é yinanit'a'í nilį́į doo biniyé David ak'ah bik'i yaadziidgo bee bi'doolzį́į'go yaa dahodiizts'ą́ą'go Filístiya dine'é t'áá ałtso David hadeintáá góde aheeskai; éí David yiyíínii'go bidziilgo haz'ání góyaa ííyá.

¹⁸Filístiya dine'é neheeskaigo Réfeiyim honíts'aa' góyaa t'áá níłtéél nít'éé' nidahaazná.

¹⁹Áádóó David éí Bóhólníihii áyidííniidgo ání, Da' Filístiya dine'éésh bich'į' deeshbah? Da' shílák'ee didíí'ááłísh? Áko Bóhólníihii éí David áyidííniid, Ákóde bich'į' díbááh, háálá doo naaki nilį́į́góó Filístiya dine'é nílák'ee dideesh'ááł.

²⁰Áko David éí Béíyal-piiréízim haz'áníjį' jiníyáago ákwii David ak'eh deesdlį́į́'. David ání, Bóhólníihii shinááł shi'ana'í ałtso íísdįįd; tó hoł na'neeshxaazhígi áhoolaa; éí bąą Béíyal-piiréízim hoolyée doo, jidííniid.

²¹Ákwii bi'eda'alyaii yik'i daneezhchą́ą́', áko David áádóó diné yił naakaígíí éí eda'alyaii adeideesk'ą́ą́'.

²²Áádóó Filístiya dine'é nináádahaasnáago Réfeiyim honíts'aa' góyaa t'áá níłtéél nít'éé' nináádahaazná.

²³David éí Bóhólníihii ánááyidoo'niidgo ábidííniid, Doo t'áá k'éhézdon bich'į' dííbah da, nidi bine'jígo adíníít'į́įłgo tsin múlberri wolyéii yíl'áhígíí binaashiijí yídííbah.

²⁴Áádóó siláo yinééł yists'ą́ą'go tsin múlberri yíl'áhígíí bílátahgóó bii' hodiists'ą́ą'go bikéé' hidoohkah, áko Bóhólníihii nihilą́ąjį' hooleełgo Filístiya bisiláo yinéełii neidoołtsił.

²⁵Áádóó David éí t'áá ákó'jiilaa Bóhólníihii hach'į' yee haadzí'ígi át'éego éí Gííba kin shijaa'dóó níléí Gíízer kin haal'áajį' Filístiya siláo dazníłtseed.