Read Navajo II SAMUEL 8 Bible Online

II SAMUEL 8 - Navajo bible

II SAMUEL 8

¹Áádóó díí bik'ijį' David éí Filístiya dine'é yik'eh deesdlį́į'go yee ádíhoos'níí' índa David éí Míítheg-ámah hoolyéego Filístiya dine'é bikin haal'áhígíí yighaideet'ą́.

²Áádóó Mó'ab dine'é yik'eh deesdlį́į'go tł'óół yee yí'nééł'ąądgo ni'góó yineeshjéé', áko naaki hadiit'i'ígíí neistseed; t'ááłá'í hadiit'i'ígíí ánéísįįdgo t'áá dahináago áyiilaa. Áádóó Mó'ab dine'é éí David yá nidaal'a'í daazlį́į́', áko yich'į' nida'iilé.

³Kót'éego David éí Rííhob biye' Hadadíízer bik'eh jideesdlį́į́'; éí Zóbah kéyahgi aláahgo naat'áanii nilį́į́ nít'éé'; hasiláo bił joonéełgo Yufréítiiz tooh nílíníjį' chánahgo bee ádíhwííníshníih doo jinízin.

⁴Áko David éí Hadadíízer bitsindaabąąs bijáád naakiígíí t'ááłáhídi mííl áádóó siláo łį́į́' yee nidaabaahígíí tsosts'idi neeznádiin índa siláo t'áá ni' nidaanéhígíí naadiindi mííl yisná, áádóó łį́į́' éí tsindaabąąs bijáád naakiígíí nideiłbąąsígíí t'áá át'é bitsáts'id jiizhgizh, nidi łį́į́' neeznádiingo oołbąs bíighahgo áá jísįįd.

⁵Áádóó Damáskas kin haal'áádóó Síriya dine'é éí Zóbah kéyahgi aláahgo naat'áanii Hadadíízer yíká iijeeh yiniyé yinéełgo David éí Síriya dine'é bisiláo naadiin naakidi mííl yinéłígíí neistseed.

⁶Áko Síriya kéyah hahoodzogi Damáskas kin haal'áágóó David éí hasiláo hada'ídées'į́į'ii nijiiznil áádóó Síriya dine'é éí David yá nidaal'a'í daazlį́į'go yich'į' nida'iilé. Áádóó Bóhólníihii éí David t'áá hizhdighááhgóó ak'eh hizhdidleehgo áhósin.

⁷Áádóó David éí óola naagé bine' na'adzi'ii éí Hadadíízer bá nidaal'a'í ałtso íísdįįdígíí yílák'ee hayiiznil, áádóó Jerúsalemgóó yiníjaa'.

⁸Bíítah hoolyéego índa Biiróthai hoolyéego Hadadíízer bikin haal'áá nít'é'édę́ę́' aláahgo naat'áanii David éí béésh łitsoii t'óó ahayóí néiníjaa'.

⁹Héímathdóó aláahgo naat'áanii Tówii wolyéii éí Hadadíízer bisiláo dah deínéhígíí ałtso David áhásdįįdgo yaa hodiizts'ą́ą́'.

¹⁰Ákohgo Tówii haye' Jóram dashdiił'a', áko aláahgo naat'áanii David k'é yididooniił áádóó nizhónígi íinidzaa yididooniił jinízin, háálá David éí Hadadíízer yił ana'ahishchį́įgo yik'eh deesdlį́į́'. Jó, Hadadíízer éí Tówii yił anaa' ahil'į́į́ nít'éé'. Jóram éí béésh łigaii áádóó óola índa béésh łitsoii bee łeets'aa' ádaalyaii yiníjaa'.

¹¹Áko aláahgo naat'áanii David éí Bóhólníihii yich'į' diyingo niidiní'áanii ał'ąą ana'í yik'eh deesdlį́'ígíí bits'ą́ą́dóó béésh łigaii índa óola t'áá íídą́ą́' diyingo niidiní'ánígíí éí yíjaa' yę́ę yíyiyiiłtsoodgo diyingo niidiní'ą́.

¹²Síriya dine'é, Mo'ab dine'é, Áman dine'é, Filístiya dine'é, Ámalek dine'é índa Rííhob biye' Hadadíízer éí Zóbah kéyahgi aláahgo naat'áanii yik'eh deesdlį́į́' yę́ę bindaalye'é diyingo niidiní'ą́.

¹³Áádóó Áshįįh Bił Honíts'aa' góyaa Síriya dine'é bisiláo bik'eh jideesdlį́'ígíí bee David ho'dójíigo ch'ího'dit'ááh dzizlį́į́' éí tseebííts'áadahdi míilgo diné ádzísdįįd.

¹⁴Íídam kéyahgi siláo hada'ídées'į́į'ii nijiiznil; t'áá éí Íídam kéyahgi t'áá ałtsogóó siláo hada'ídées'į́į'go ájiilaa, áko Íídamgi kéédahat'íinii t'áá ałtso David yá nidaal'a'í daazlį́į́'. Áádóó Bóhólníihii éí David t'áá hizhdighááhgóó ak'eh hizhdidleehgo áhósin.

¹⁵Nít'éé' David éí Ízrel dine'é t'áá ałtso yinant'á, áko David éí ts'ídá doo haada yit' éégóó áádóó t'áá ákogi át'éego bidine'é t'áá ałtso yá hoo'ááł nít'éé'.

¹⁶Áádóó Zerowáíyah biyáázh Jó'ab éí siláo dah deínéehii yinant'á, áádóó Aháílad biye' Jiiháshafat éí naat'áaniishchíín nilį́į́ nít'éé'.

¹⁷Áádóó Aháítab biye' Zéídak índa Abáíyathar biye' Ahímelek éí náá'iiłniihii nilį́į́ nít'éé', Siiréíyah éí naaltsoos ííł'íní nilį́į́ nít'éé'.

¹⁸Áádóó Jiihóíyada biye' Biinéíyah éí Kéreth dine'é índa Pííleth dine'é t'áá áłah yee bóhólnííh, áádóó David biye'ké éí agháago bídahólnííh.