Read Navajo I KINGS 1 Bible Online

I KINGS 1 - Navajo bible

I KINGS 1

¹Nít'éé' aláahgo naat'áanii David éí hajistih áádóó lą'í honááhaigo są́ ho'niiłhį́, áko hak'ínídajiłtih nidi ayóogo jidlóóh.

²Éí bąą há nidaal'a'í ádahałní, Bíni'dii bóhonishníihii aláahgo naat'áanii ch'ikę́ę́h ła' ná shóidoot'eeł, áko éí bíni' aláahgo naat'áanii nílíinii ná naal'a' doo áádóó hazhó'ó naa áhályą́ągo niyid binahjį' sitį́įgo bóhonishníihii aláahgo naat'áanii éí bee níná'iidził doo.

³Ákohgo Ízrel dine'é bikéyah hadahwiisdzogóó t'áá át'éé nít'éé' ch'ikę́ę́h ayóó ánóolninii hadazneeztą́ą́', áko Shúnem haz'ánídóó ch'ikę́ę́h Ábishag wolyéego bik'ídazneeztą́ą'go aláahgo naat'áanii bich'į' bił dadziskai.

⁴Áko ch'ikę́ę́h t'áá íiyisí nizhóní áádóó aláahgo naat'áanii hazhó'ó yaa áhályą́ągo yá naal'a'; nidi aláahgo naat'áanii t'áadoo hoł ałt'áá'áazh da.

⁵Nít'éé' Hágith biyáázh Adonáíjah ayóó át'é í'diilyaago ání, Shí aláahgo naat'áanii deeshłeeł. Áádóó tsindaabąąs bijáád naakiígíí áádóó siláo éí łį́į́' yee nidaabaahii índa diné ashdladiingo éí bilą́ąjį' naajeeh doo biniyé ádá hasht'eyiilaa.

⁶Hazhé'é éí, Ha'át'íísh biniyé kwíínít'įįd? ts'ídá t'áadoo hodííniidgóó t'ááłá'í nidi t'áadoo yee hainíst'įįd da. Áko ałdó' t'áá íiyisí diné bíiyisii jílį́; Ábsalam bikéédę́ę́' ho'dizhchį́.

⁷Áádóó Adonáíjah éí Zerowáíyah biyáázh Jó'ab áádóó náá'iiłniihii Abáíyathar ałdó' bił ahił nidahodzisne', áko Adonáíjah bikéé' nizhní'áazhgo bíká ahizhnoolchą́ą́'.

⁸Nidi náá'iiłniihii Zéídak áádóó Jiihóíyada biye' Biinéíyah áádóó Diyin God yá halne'ii Néíthan áádóó Shímiyai áádóó Ríyai índa diné dahayóii David yich'ijí danilínígíí éí doo Adonáíjah yich'ijí danilį́į da.

⁹Áádóó Adonáíjah éí Enrógel haz'ání bíighahgóó Zóhiileth tsé si'ání bíighahgi dibé áádóó béégashii índa béégashii yáázh daneesk'ahii neistseed. Dabik'isóó t'áá ałtso aláahgo naat'áanii biye'ké danilíinii índa Júdah dine'é éí aláahgo naat'áanii yá nidaal'a'í danilíinii t'áá ałtso nidahidookah, yidííniid.

¹⁰Nidi Diyin God yá halne'ii Néíthan áádóó Biinéíyah índa diné dahayóii áádóó bik'is Sálaman ałdó' t'áadoo yida'asnii' da.

¹¹Éí bąą Néíthan éí Sálaman bimá Bath-shííba yich'į' haadzíi'go ání, Hágith biyáázh Adonáíjah aláahgo naat'áanii silį́į'goósh baa hodisíníts'ą́ą́', áko David bídahwííníilníihii éí doo bił bééhózin da?

¹²Éí bąą t'áá k'ad, shíni'dii nánooshkąąh, nanik'íyáshti', áko t'áá ni ne'iina' áádóó niyáázh Sálaman be'iina' doodzih.

¹³Nílááh, aláahgo naat'áanii David bił yah anináahgo ábidiní, Bóhonishníihii aláahgo naat'áanii nílíinii, da' doósh shí asdzání ná naal'a'í nishłį́įgo shich'į' bee ádee hadíínídzíi'go áshidííníniid da? Niyáázh Sálaman shikéé' góne' nináánít'áa doo; shibikáá'dóó nahat'áii yikáá'dóó dah sidáa doo, diníi ni'. Ákoshą' ha'át'éego Adonáíjah nant'á?

¹⁴Shoo, aláahgo naat'áanii t'ah bich'į' yáníłti'go shí ałdó' nikéé' yah adeesháałgo t'áá aaníígóó hólne' nidideeshniił.

¹⁵Áádóó Bath-shííba éí aláahgo naat'áanii nitéhé góne' yah ajííyá, áko aláahgo naat'áanii yéego haastih; Shúnem haz'ánídóó ch'ikę́ę́h Ábishag éí aláahgo naat'áanii yaa áhályą́.

¹⁶Nít'éé' Bath-shííba éí aláahgo naat'áanii yich'į' yaa ádzaago neeshjoolgo bił yílįįd. Áko aláahgo naat'áanii ání, Ha'át'íí lá?

¹⁷Áko ábijiní, Bóhwííníshníihii, Bóhólníihii niDiyin God binahjį' asdzání ná naal'a'í nishłíinii shich'į' ádee hadíínídzíi'go áshidííníniid, Niyáázh Sálaman shikéé' góne' nináánít'áa doo; shibikáá'dóó nahat'áii yikáá'dóó dah sidáa doo, diníi ni'.

¹⁸Jó, k'ad, Adonáíjahda aláahgo naat'áanii nilį́, nidi bóhwííníshníihii aláahgo naat'áanii nílíinii, éí doo nił bééhózin da;

¹⁹béégashii áádóó béégashii yáázh daneesk'ahígíí índa dibé ałdó' t'óó ahayóí neistseed. Áádóó aláahgo naat'áanii dabiye'ké t'áá ałtso índa náá'iiłniihii Abáíyathar áádóó siláo yinanit'a'í nilíinii Jó'ab ałdó', Nidahidoohkah, yidííniid, nidi ná naal'a'í Sálaman éí t'áadoo yi'níłnii' da.

²⁰Áko ni bóhonishníihii aláahgo naat'áanii nílíinii, Ízrel dine'é t'áá ałtso nich'į' dadéez'į́į́', áko bóhonishníihii aláahgo naat'áanii nílíinii, háí nikéé'dóó bikáá'dóó nahó'áii yikáá' dah dínóodaałígíí bee bił hodíílnih.

²¹Éí doodago, bóhonishníihii aláahgo naat'áanii dabizhé'é yę́ę yitah iidoołhoshgo, áko shí índa shiyáázh Sálaman ałdó' ana'í niidlį́įgo nihaa tsóhodookos.

²²Jó, t'ahdii aláahgo naat'áanii bił ałch'į' yájíłti'go Diyin God yá halne'ii Néíthan ałdó' yah ííyá.

²³Áádóó aláahgo naat'áanii yił dahoolne'go ádaaní, Shoo, Diyin God yá halne'ii Néíthan níyá. Áko aláahgo naat'áanii bił yah ajííyáago ni'jį' nitsizhdeelgo'go jineeshjool.

²⁴Áko Néíthan ájíní, Bóhonishníihii aláahgo naat'áanii nílíinii, da' ákoósh ádííníniid? Adonáíjah éí shikéédę́ę́' nináánít'áa doo; shibikáá'dóó nahat'áii yikáá'dóó dah sidáa doo.

²⁵Háálá díí jį́ ákóyaa ííyá, áko béégashii áádóó béégashii yáázh daneesk'ahígíí índa dibéda t'óó ahayóí neistseed, áko aláahgo naat'áanii biye'ké t'áá ałtso áádóó siláo dah deínéehii yinanit'a'í danilíinii índa náá'iiłniihii Abáíyathar ałdó', Nidahidoohkah, yidííniid; jó, binááł da'ayą́ índa da'adlą́ągo ádaaní, Adonáíjah aláahgo naat'áanii as'ahgóó hináa le'.

²⁶Nidi shí ná naal'a'í nishłíinii áádóó náá'iiłniihii Zéídak áádóó Jiihóíyada biye' Biinéíyah índa ná naal'a'í Sálaman, Nihí ałdó' shaa hidoohkah, doo nihizhdííniid da.

²⁷Bóhonishníihii aláahgo naat'áanii nílíinii, da' díísh ninahat'a' bik'ehgo ádzaa, áko ná naal'a'í nishłíinii éí t'áadoo bee shił hwíínílne' da? Háishą' bóhonishníihii aláahgo naat'áanii bikéé'dóó bikáá'dóó nahat'áii yikáá'dóó dah sidáa doo?

²⁸Nít'éé' aláahgo naat'áanii hach'į' haadzíi'go ání, Bath-shííba shá hágo bidiní. Áko aláahgo naat'áanii bich'į' nizhníyáago bidááhdę́ę́' dziizį'.

²⁹Áádóó aláahgo naat'áanii ádee hadoodzíi'go ání, Ts'ídá t'áá aaníí Bóhólníihii hiná; éí ach'į' nahwii'ná bits'ą́ąjį' shii' sizíinii nááyiisnii';

³⁰ákót'éego ts'ídá t'áá aaníí Bóhólníihii Ízrel dine'é biDiyin God bee nich'į' ádee hadisdziihgo ádíshní, Niyáázh Sálaman éí shikéédę́ę́' nináánít'áa doo, índa dah sédáhígi bikáá'dóó nahat'áii yikáá'dóó dah sidáa doo; kót'éego lą́ą díí jį́ t'áádóo nídí hwee hadisdziih.

³¹Áko Bath-shííba éí ni'jį' jineeshjoolgo aláahgo naat'áanii bich'į' hozdísingo ájíní, Bíni'dii bóhonishníihii aláahgo naat'áanii David hináago ahóyéel'áa le'.

³²Áádóó aláahgo naat'áanii David ání, Náá'iiłniihii Zéídak áádóó Diyin God yá halne'ii Néíthan índa Jiihóíyada biye' Biinéíyah shá hágo dabidohní. Áko aláahgo naat'áanii yidááhdę́ę́' niikai.

³³Áko aláahgo naat'áanii áháłní, Bídahonołníihii bá nidaal'a'í bił dohkáahgo shiye' Sálaman t'áá shí shidzaanézígíí bikáá' dah dabinoołdáago Gáíhan góyaa bił doohkah,

³⁴áádóó bíni'dii náá'iiłniihii Zéídak áádóó Diyin God yá halne'ii Néíthan éí ak'ah hak'i yeidooziłgo hodoohsįh Ízrel dine'é aláahgo binanit'a'í jidooleeł, áádóó deenásts'aa' bidee' bee í'dílzoołí bee ádadidoohniiłgo, Sálaman aláahgo naat'áanii as'ahgóó hináa le', dadidoohniił.

³⁵Áadi índa bikéé' hadoohkahgo níyáago shibikáá'dóó nahat'áii yikáá' dah dínóodaał, háálá hó éí shitsásk'ehdóó aláahgo naat'áanii náájídlį́į doo, índa Ízrel dine'é áádóó Júdah dine'é binazhnit'áa doogo áhooshłaa.

³⁶Áádóó Jiihóíyada biye' Biinéíyah aláahgo naat'áanii ánéidoo'niidgo ání, T'áá ákót'ée le'; bíni'dii bóhonishníihii aláahgo naat'áanii biDiyin God ałdó' ákódidooniił.

³⁷Bóhólníihii éí bóhonishníihii aláahgo naat'áanii yił hólónígi át'éego Sálaman yił hólǫ́ǫ doo, áádóó ts'ídá aláahgo ayóó át'éego bibikáá'dóó nahat'áii yik'i dah sidáago nant'áa doo; bóhonishníihii aláahgo naat'áanii David bibikáá'dóó nahat'áii yikáá'dóó nant'áhígi át'éego.

³⁸Kót'éego náá'iiłniihii Zéídak áádóó Diyin God yá halne'ii Néíthan índa Jiihóíyada biye' Biinéíyah áádóó Kéreth dine'é áádóó Pííleth dine'é ákóyaa yíkaigo Sálaman aláahgo naat'áanii David bidzaanééz yik'i dah deineesdáago Gáíhanjį' yił daaskai.

³⁹Nít'éé' náá'iiłniihii Zéídak éí níbaal bii' hodílzinii biyi'dę́ę́' adee' bee ak'ah nízhdiiką́ągo Sálaman ak'ah yik'i yayiiziidgo bíísį́į́'. Áádóó deenásts'aa' bidee' bee í'dílzoołí bee ádazhdííniidgo diné t'áá áté ádaaní, Aláahgo naat'áanii as'ahgóó hináa le'.

⁴⁰Áádóó diné t'áá át'é hakéé' haaskai índa tsin bee í'dílzoołí yee nidaanéego áádóó bił nidahoozhǫǫhgo ayóó át'éego bił dahózhǫ́; wónáasii hodiits'a'ígíí bee ni' neheldóóh.

⁴¹Áádóó Adonáíjah índa baa haaskaígíí t'áá ałtso yił k'adę́ę ałtso da'ayą́ągo da'diizts'ą́ą́'. Áko Jó'ab éí deenásts'aa' bidee' bee í'dílzoołí yidiizts'ą́ą'go ání, Haa lá hóót'įįdgo díí kin haal'áádóó ayóó íits'a'go hahóó'á?

⁴²Áko t'ah yájíłti'go, shoo, náá'iiłniihii Abáíyathar biye' Jánathan yílwod, áádóó Adonáíjah áháłní, Yah aninááh; jó, ni diné hayóii nílį́ índa hane' yá'át'éhígíí bił nináhídááh.

⁴³Áádóó Jánathan éí Adonáíjah áyidííniid, Nidaga', bídahwííníilníihii aláahgo naat'áanii David yee' éí Sálaman aláahgo naat'áanii nilį́įgo áyiilaa.

⁴⁴Áádóó aláahgo naat'áanii éí náá'iiłniihii Zéídak áádóó Diyin God yá halne'ii Néíthan índa Jiihóíyada biye' Biinéíyah áádóó Kéreth dine'é índa Pííleth dine'é éí Sálaman wolyéii aláahgo naat'áanii bidzaanééz yik'i dah deineesdáago bił yíldloozh,

⁴⁵áko náá'iiłniihii Zéídak índa Diyin God yá halne'ii Néíthan éí Sálaman aláahgo naat'áanii nilį́į doo biniyé Gáíhandi ak'ah yik'i yayiiziidgo bíísį́į́'; áádę́ę́' náá'néełgo bił nidahoozhǫǫh, éí bąą kin haal'áagi hahóó'á. Díí éí hahóół'áago disíníts'ą́ą́'.

⁴⁶Áádóó Sálaman ałdó' bee íhólníihgo bił haz'ą́ągi bikáá'dóó nahat'áii yikáá' dah neezdá.

⁴⁷Áádóó náá'áłdó' aláahgo naat'áanii bá nidaal'a'í éí bídahwííníilníihii aláahgo naat'áanii David yik'idazhdoodliił yiniyé yíkaigo ádaaní, Diyin God éí ni nízhi' biláahgo Sálaman bízhi' ílį́įgo íidoolííł, índa bikáá'dóó nahó'áii biláahgo bí yikáá'dóó naha'áii ayóó át'é íidoolííł. Áádóó aláahgo naat'áanii bitsásk'eh yikáa'jį' yaa ádzaago sodoolzin.

⁴⁸Áádóó ałdó' aláahgo naat'áanii kóní, Ízrel dine'é biBóhólníihii Diyin God baa ha'niih le', bí éí díí jį́ shibikáá'dóó nahat'áii yikáá' ła' dah néineesdá; t'áá shináá' bee yiiłtsą́.

⁴⁹Áádóó Adonáíjah baa jiiskaígíí t'áá ádzíłtso nídadzisdzííd, áko nízhdiijée'go t'ááłá'í jinítínígo anídajiiskai.

⁵⁰Áko Adonáíjah éí Sálaman bik'ee hoł yéé' hazlį́į'go nízhdii'na' áádóó dashdiiyáago bikáá' náá'iiniihí adee' bits'ádaaz'áhígíí ła' dzisił.

⁵¹Áko Sálaman bił hóóne', Shoo, Adonáíjah éí aláahgo naat'áanii Sálaman yinásdzííd; jó, bikáá' náá'iiniihí adee' bits'ádaaz'áhígíí yisiłgo ání, Bíni'dii aláahgo naat'áanii Sálaman bá naal'a'í diltłish doo yee yidiyoołhééłgóó díí jį́ yee shich'į' ádee hadidoodzih.

⁵²Áádóó Sálaman ání, Diné ílíinii jílį́įgo hatsii' t'ááł á'í nidi doo ła' ni'jį' nidoodił da, nidi doo yá'ádaashóonii bee haho'deel'į́į'go éí dazdootsaał.

⁵³Áko aláahgo naat'áanii Sálaman i'ííł'a'go bikáá' náá'iiniihí si'ánídę́ę́' Adonáíjah yił haa daaskai. Áko jiníyáago aláahgo naat'áanii Sálaman bich'į' yaa ádziidzaago hoł yílįįd, áádóó Sálaman hach'į' haadzíi'go áháłní, Nílááh, nighangóó nídídááh.