Read Navajo I KINGS 11 Bible Online

I KINGS 11 - Navajo bible

I KINGS 11

¹Áko nít'éé' aláahgo naat'áanii Sálaman éí Féro bitsi' biłgo asdzání dé'éyóní danilíinii t'óó ahayóí ayóó'áyó'ní, éí Mó'ab dine'é, Áman dine'é, Íídam dine'é, Sáídan dine'é índa Het dine'é asdzání danilį́;

²Bóhólníihii éí Ízrel dine'é yich'į' haadzíi'go ání, Díí ał'ąą dine'é t'áadoo bá nida'oohyehí índa t'áadoo nihá nida'ayehí, háálá t'áá aaníí nihida'doolohgo bidiyin dabidi'níinii bikéé' yóó'ádanihidoo'ish. Sálaman éí díí ba'ákéí danilíinii doo yidóchííd át'éégóó ayóó'áyó'ní.

³Hwe'asdzą́ą́ danilíinii éí naat'áanii bitsi' danilį́įgo tsosts'idi neeznádiin áádóó ba'ákéí éí táadi neeznádiin, áko hweda'asdzą́ą́ hajéí łahgo ádayiilaa.

⁴Ákódzaago Sálaman ho'niitihgo hwe'asdzą́ą́ danilíinii diyin dabidi'níinii bikéé' yóó'adahaazlóóz; hazhé'é David yę́ę éí t'áá ákogi át'éego níyá, nidi hó éí Bóhólníihii haDiyin God bich'į' doo t'áá ákogi ájít'į́į́góó jiníyá.

⁵Jó, Sálaman éí Sáídandóó asdzą́ą́ diyin bidi'níinii Áshtoreth wolyéii áádóó Áman dine'é bidiyin doo yildinii Mílkam wolyéii yikéé' niníyá.

⁶Áádóó Sálaman éí Bóhólníihii binááł doo yá'áshónígíí ájíít'įįd; hazhé'é David yę́ę doo naaki nilį́į́góó Bóhólníihii yikéé' níyá, nidi hó éí nee'nijį' t'áadoo ákódziidzaa da.

⁷Nít'éé' Sálaman éí Jerúsalemdóó ha'a'aahjígo ninádahałaah doo biniyé wódah nahaz'ą́ągo ádayiilaa éí Mó'ab dine'é bidiyin doo yildinii Kíímash wolyéii áádóó Áman dine'é bidiyin doo yildinii Mólek wolyéii yá hasht'ehoolaa.

⁸Áádóó náánáłahdę́ę́' asdzání nidaakaii hoda'asdzánígíí éí łikání halchingo dilidii áńdayiil'įįh áádóó náá'iiniihii bee bidiyin dabidi'níinii yich'į' nááda'iiłniih biniyé t'áá ákót'éego ałdó' bá hasht'edahojiilaa.

⁹Bóhólníihii éí Sálaman yich'į' báhóóchįįd, háálá Bóhólníihii éí Ízrel dine'é biDiyin God naakidi hach'į' yit'íní í'diilyaa yę́ę doo jiniizį́į́'góó bits'ázhníyá,

¹⁰áádóó diyin dabidi'níinii doo bikéé' dashdidoogááłgóó Bóhólníihii díí yee hach'į' haadzí'ígíí t' áadoo bik'eh hojííł'įįd da.

¹¹Éí bąą Bóhólníihii éí Sálaman ííłní, Díí kwíinidzaaígíí áádóó shibee ałha'deet'ą́ índa bee nihodiish'aahii bee haasdzí'ígíí t'áadoo bik'eh hwííníł'įįdígíí biniinaa bee nóhólníhígíí t'áá aaníí nighahideeshxą́ąłgo ná naal'a'í nilíinii baa dideesh'ááł.

¹²Azhą́ ákót'ée nidi nizhé'é David yę́ę binahjį' éí níyoołkááłgóó doo ákódeeshníił da, nidi niye'go bighahideeshxą́ą́ł.

¹³Kót'ée nidi bee óhólníhígíí doo t'áá át'é nighahideeshxą́ął da, nidi shá naal'a'í David yę́ę binahjį' áádóó Jerúsalem náhodii'ánígíí binahjį' Ízrel naakits'áadahgo dine'é danilíinii bitahdę́ę́' t'ááłá'í dine'égo éí niye' baa dideesh'ááł.

¹⁴Nít'éé' Bóhólníihii éí ana'í ła' Sálaman yik'ijį' tsíideeskééz; éí Héídad wolyéego Íídam dine'é aláahgo naat'áanii ba'áłchíní ła' nilį́.

¹⁵Íídą́ą́' David yę́ę Íídamgi naaghá yę́ędą́ą́' áádóó siláo dah deínéehii yinanit'a'í nilíinii Jó'ab yę́ę Íídam dinéhígíí t'áá ashiikéjį' ałtso neistseedóó bik'ijį' neistseedígíí yóó'ádeiile' yę́ędą́ą́',

¹⁶(hastą́ą́h nídeezidjį' Íídam dinéhígíí t'áá ashiikéjį' ałtso nidajistseedjį' Jó'ab áádóó Ízrel dine'é t'áá át'é bił t'áá ákwe'é nijikai nít'éé')

¹⁷Héídad áádóó hazhé'é bá nidaal'a'í ła' bił Ííjip kéyahgóó adazhneezhchą́ą́', áko íídą́ą́' Héídad t'ah áłchíní nilį́.

¹⁸Áádóó Mídiyandóó dah náázhdiikaigo Péírangi jíkai; nít'éé' Péírandóó diné ła' bił dah náázhdiikaigo Ííjip kéyahgi aláahgo naat'áanii Féro baa jíkai, áko éí kin ła' haidiní'ą́ągo ch'iyáán ałdó' ła' haidiní'ą́ índa kéyah ałdó' ła' haidiní'ą́.

¹⁹Nít'éé' Héídad éí Féro t'áá íiyisí ayóo bił yá'ájít'éehgo bąą t'áá bí be'asdzą́ą́ éí asdzą́ą́ naat'ááh Táhpiiniiz wolyéii bideezhí hwe'asdzą́ą doogo hainíłtį́.

²⁰Áádóó Táhpiiniiz bideezhí éí haye' há yishchį́įgo Jiinóbath wolyé; éí Féro bighangi Táhpiiniiz bizhdíít'óód, áko Jiinóbath éí Féro biye'ké yił dabighan nít'éé'.

²¹Nít'éé' David yę́ę áádóó siláo dah deínéehii yinanit'a'í Jó'ab yę́ę dabizhé'é yę́ę bikéé' áhásdįįdgo éí Ííjip kéyahgi Héídad yiyíínii'go Féro ííłní, T'áá shí shikéyahgóó nídeeshdááł biniyé sha'di'ní'aah.

²²Nidi Féro áháłní, Ha'át'íísh t'ah doo naa nishłéégóó biniinaa, Shikéyahgóó nídeeshdááł, nínízin? Áádóó bich'į' hanáádzoodzíi'go ájíní, T'áadoo bídin nishłíní da, nidi t'óó shéé'níłnííh.

²³Áádóó ałdó' Diyin God éí Iiláíyada biye' Ríízan, éí Zóbah kéyahgi aláahgo naat'áanii Hadadíízer honanit'a'í bits'ą́ą́' yóó'ajoolwodígíí, éí ana'í nilį́įgo Sálaman bik'ijį' tsínáánéideeskééz:

²⁴íídą́ą́' David éí Zóbah dine'é neistseed yę́ędą́ą́' Ríízan aghada'ii'níiłii danilíinii ádíyii'nilgo yinanit'a'í silį́į́', áko éí Damáskasgóó eekaigo áadi kéédahat'į́įgo ákwii nant'áá nít'éé'.

²⁵Sálaman bíyoołkááł yę́ędą́ą́' Héídad ach'į' nahwiiłná yę́ęgi át'éego ákót'éego ałdó' Ríízan éí Ízrel dine'é yi'ana'í nilį́įgo hoolzhiizh, áko Ízrel dine'é ayóo yijoołáá nít'éé' índa Síriya kéyahgi nant'áá nít'éé'.

²⁶Zeríídah haz'ánídóó Íífreiyim dine'é ł a' Nííbat yę́ę biye' áádóó Zerówah asdzání bąąh áhásdįįdii biyáázh Jerobówam, éí Sálaman yá naal'a'í nilíinii, t'áá éí ałdó' aláahgo naat'áanii yik'ijį' silį́į́'.

²⁷Díí biniinaa aláahgo naat'áanii yik'ijį' silį́į́': Sálaman éí Míllo áyiilaa, áádóó bizhé'é David yę́ę bikin haal'áhígíí binaagóó ahéé'ítł'inígíí nídadíníizhoozhígíí hasht'ééyiidlaa.

²⁸Jerobówam éí diné doo nánílyéesii nilį́įgo Sálaman éí díí dinééh naanish yíneedlíinii nilį́įgo yiyiiłtsą́, áko naanish bí'nílchéehii éí Jóseph dine'é yindaalnishígíí bee bóhólníihgo áyiilaa.

²⁹Nít'éé' ákwe'é hoolzhish yę́ędą́ą́' Jerobówam Jerúsalemdóó ch'ízhníyáago Sháílohdóó diné Diyin God yá halne'ii Aháíjah atiingi hak'íníyá, áko Aháíjah éé' ániidíii yiih yííyáá lá, áádóó doo naagháhígi t'áá ájíłah t'áá sáhí ahizhdii'áázh,

³⁰áádóó Aháíjah bi'éé' ániidíii yii' sitínígíí yisiłgo naakits'áadahgo ałts'áyiizǫ́ǫ́z,

³¹áko Jerobówam áyidííniid, Neheesdǫ́zígíí neeznáago nídiinííł, háálá Bóhólníihii éí Ízrel dine'é biDiyin God ání, Shoo, Sálaman dadine'é bee hóhólníhígíí haghahideeshxą́ąłgo neeznáago dine'é naa dideesh'ááł.

³²(Nidi David shá naal'a'í nilíinii binahjį' áádóó Ízrel dine'é bitahdóó kin haal'á náhodii'ánígíí Jerúsalem binahjį' t'ááłá'í dine'égo haa dideesh'ááł,)

³³háálá yóó'adashideez'ą́ągo Sáídan dine'é éí asdzą́ą́ diyin deiłníinii Áshtoreth daolyéii, áádóó Mó'ab dine'é bidiyin bidi'níinii Kíímash wolyéii índa Áman dine'é bidiyin bidi'níinii Mólek wolyéii éí díí yich'į'go nidahałáago doo shik'ehgóó deíkáah da. Bizhé'é David yę́ę shich'į' t'áá ákogi át'éego ááníiłgo bee nihoyí'áanii áádóó bee nihodiish'aahii yik'eh hół'į́į́ nít'éé' yę́ęgi át'éego doo dajíkáah da.

³⁴Ákót'ée nidi bee óhólníihii doo t'áá át'é bighadideesh'áał da, nidi shá naal'a'í nídiiłtínígíí David yę́ę binahjį' éí shibik'eh ó'oo'níił ii áádóó bee nihoyí'áanii yik'eh hół'į́įgo bąą Sálaman éí t'áá naat'áanii nilį́įgo ni'doołdįįł,

³⁵nidi bee óhólnííh éí haye' bighadideesh'áałgo Ízrel dine'é neeznáá dine'é bíighahgo naa dideesh'ááł.

³⁶Kin haal'á Jerúsalem, shízhi' bee wójíi doo biniyé náhodii'ánígi shá naal'a'í David yę́ę bighą́ąhjį' t'áá áłahjį' bee hool'inii bá hólǫ́ǫ doo biniyé Ízrel t'ááłá'í dine'é haye' baa dideesh'ááł.

³⁷Áko ni éí nindeeshtéełgo íinínízinii t'áá át'é bik'ehgo hóó'áałgo Ízrel dine'é binanit'a'í nílį́į doo.

³⁸Áko kót'ée doo, shá naal'a'í David yę́ę ádzaaígi át'éego bee nich'į' hahasdziihii t'áá át'é bik'eh honíł'į́įgo áádóó shik'ehgóó yínáałgo áádóó shinááł t'áá ákóne' ááníiłgo índa bee nihoyí'áanii áádóó shibik'eh ó'oo'níiłii bik'eh honíł'į́įgo nił honishłǫ́ǫ doo áádóó t'áá David bidine'é doo nidoot'ihgóó náás ahoolchíiłgo áshłaa yę́ęgi át'éego ni ałdó' nidine'é náás ahoolchííłgóó doo nidoot'ihgóó ádeeshłííł índa Ízrel dine'é naa dideesh'ááł.

³⁹Áko David bits'ą́ą́dóó náás ahoolchíłígíí yóó'adashizhdeez'ánígíí biniinaa atídeeshłííł, nidi hool'áágóó doo t'áá ákót'ée da doo.

⁴⁰Éí bąą Sálaman éí Jerobówam diyeeshxééł nízin. Nidi Jerobówam nídii'na'go Ííjip kéyahgóó aláahgo naat'áanii Sháíshak yich'į' yóó'anííchą́ą́' áádóó Sálaman yę́ę daaztsą́ąjį' Ííjip kéyahdi naagháá nít'éé'.

⁴¹Áko Sálaman łahjį' yaa naayáhígíí t'áá át'é áádóó bibee hódzáanii éí Sálaman yaa naayáhígíí binaaltsoos bii' bik'e'ashchį́.

⁴²Jerúsalemgi Sálaman éí Ízrel dine'é t'áá át'é yinant'áago dízdiin nááhai.

⁴³Áko Sálaman éí dabizhé' é yę́ę da'iiłhaazhígi át'éego ajiiłhaazh, áádóó hazhé'é David yę́ę bikin haal'áagi yóó'áho'diilyaago haye' Riihobówam hatsásk'ehgi nant'áá nít'éé'.