Read Navajo I KINGS 12 Bible Online

I KINGS 12 - Navajo bible

I KINGS 12

¹Riihobówam éí Shííkemgóó ííyá, háálá Ízrel dine'é t'áá ałtso aláahgo naat'áanii adahodoolííł biniyé Shííkemgi neheeskai.

²Nít'éé' Nííbat biye' Jerobówam t'ah Ííjip kéyahdi kééhojit'į́įgo éí yiyíínii'go (jó, Sálaman bits'ąą Ííjip kéyahgóó yóó'ajoolwod nít'éé',)

³háká ada'as'a'go hágo dahodííniid. Áko Jerobówam áádóó Ízrel dine'é t'áá át'é áłah nilínígíí yíkaigo Riihobówam yich'į' hadaasdzíi'go ádaaní,

⁴Nizhé'é yę́ę nihiyéél nidaazgo áyósin nít'éé'; éí bąą k'ad, nizhé'é yę́ę bik'ee ti'dahwii'níihgo bá nideiil'a' yę́ę áádóó hééł nidaazgo nihá áyósin yę́ę aszólígo nihá ánílééh, áko ná nideiil'a' dooleeł.

⁵Áko áyidííniid, Táá' yiską́ąjį' nídadohkáahgo áádę́ę́' shaa náádoohkah. Áádóó diné anídahaaskai.

⁶Nít'éé' aláahgo naat'áanii Riihobówam éí hastóí danilíinii éí hazhé'é Sálaman yę́ę t'ah hiná yę́ędą́ą́' yidááhdóó naazį́į́ nít'é'ígíí bił baa nídadzist'įįdgo ííłní, Haash yit'éego díí diné bich'į' t'ą́ą́' háádeesdzihgo bee bił nídahodeeshnihígíí bee shił dahołne'?

⁷Áádóó hach'į' hadaasdzíi'go ádahałní, Díí jį́į́dóó díí dine'é bá choiní'į́įgo bá nanil'a' ládą́ą́' áádóó dayókeedígíí baa hidí'aahgo índa saad yá'ádaat'éehii bee bich'į' yáníłti'go hool'áágóó ná nidaal'a'í dadooleeł.

⁸Áko hastóí danilíinii bił baa nídadzist'įįdgo hąąh nideizláhígíí doo bázniizį́į' da, nidi dinééh danilíinii bił dazhneeyáanii hadááhdóó naazínígíí bił baa nídadzist'įįdgo

⁹ábijiní, Díí diné shich'į' hadaasdzíi'go kódaanínígíí, Nizhé'é yę́ę nihiyéél nidaazgo áyósin nít'é'ígíí aszólígo nihá ánílééh; éí haash yit'éego bich'į' t'ą́ą́' háádadiidzihgo bee bił dahodiilnihígíí bee shił dahołne'?

¹⁰Áko dinééh hoł daneeyánígíí hach'į' hadaasdzíi'go ádahałní, Díí dine'é nich'į' hadaasdzí'ígíí kót'éego bich'į' hadíídzihgo kódidííniił, Éí nizhé'é yę́ę nihiyéél nidaazgo áyósin nít'éé', nidi aszólígo nihá ánílééh, daniłnínígíí kóbididííniił, Shíláyázhí éí shizhé'é yę́ę biníí' áníłtsázígíí biláahgo áníldíil doo.

¹¹Áko shizhé'é yę́ę nihiyéél nidaazgo nihá áyósin nít'éé' yę́ę t'ah biláhígi át'éego nihiyéél nidaazgo nihá ádeeshłííł; shizhé'é yę́ę éí bee atsxis yee atínihił'į́į́ nít'éé', nidi shí éí bee atsxis séígo' adishish nahalingo bee atínihish'į́į dooleeł.

¹²Nít'éé' aláahgo naat'áanii, Táá' yiską́ągo shaa náhidoohkah, hałníigo há nihoní'ánígíí bik'ehgo táá' yiską́ągo Jerobówam áádóó dine'é t'áá át'é Riihobówam yaa haaskai.

¹³Áko aláahgo naat'áanii éí hastóí danilíinii kót'éego dahałnínígíí doo bázhniizį́į́'góó t'áá na'níle'dii diné bich'į' hadziisdzíí',

¹⁴áádóó dinééh danilíinii kót'éego dahałnínígíí bee bich'į' hadzoodzíi'go ájíní, Shizhé'é yę́ę nihiyéél nidaazgo áyósin nít'éé', nidi shí éí t'ah biláhígi át'éego nihiyéél nidaazgo ádeeshłííł; shizhé'é yę́ę ałdó' bee atsxis yee atínihił'į́į́ nít'éé', nidi shí éí séígo' adishish nahalingo bee atsxis bee atínihish'į́į dooleeł.

¹⁵Ákohgo aláahgo naat'áanii éí diné doo yiyíists'ą́ą' da, háálá Bóhólníihii éí Sháílohdóó diné nilíinii Aháíjah éí Nííbat biye' Jerobówam yee yá hahaasdzí'ígíí Bóhólníihii bits'ą́ą́dę́ę́' bohodoolníiłii át'é.

¹⁶Nít'éé' Ízrel dine'é t'áá ałtso aláahgo naat'áanii doo hwíists'ą́ą́'góó yaa ákódaniizį́į'go diné éí aláahgo naat'áanii yich'į' hanáádaasdzíi'go ádaaní, David yę́ęshą' ha'át'íí bits'ą́ą́dóó danihí? Jésii biye' bits'ą́ą́dóó nihíí' dooleełii nidi doo ła' nihí da; Ízrel dine'é danohłíinii, danihiníbaalgóó nídadohkááh; David dine'é danohłíinii, na'áłchíní náás ahoolchíiłii baa ádahołyą́. Ákohgo Ízrel dine'é dabiníbaalgóó anídahaaskai.

¹⁷Nidi Riihobówam éí Ízrel dine'é Júdah kin hadaas'áagi kéédahat'ínígíí yinant'áá nít'éé'.

¹⁸Áko aláahgo naat'áanii Riihobówam éí Adóram wolyéii naanish bí'nílchééh yinanit'a'í nilíinii ayííł'a'go Ízrel dine'é t'áá ałtso tsé yee nídahoneesne'go hoł nidadzisne'. Éí bąą aláahgo naat'áanii Riihobówam bitsinaabąąs bijáád naakiígíí tsxį́įłgo yiih yíyáago Jerúsalemgóó anííchą́ą́'.

¹⁹Éí yoołkááł yę́ędą́ą́'dóó díí jį́įjį' Ízrel dine'é David ba'áłchíní náás ahoolchíiłii yich'į' nidaalteehgo hoolzhish.

²⁰Nít'éé' Ízrel dine'é t'áá át'é éí Jerobówam nádzáago dayíínii'go yíká ada'as'a'go áłah ílíníjį' hágo dahodííniid, áádóó Ízrel dine'é t'áá ałtso aláahgo naat'áanii jílį́į doogo ádahoolaa; David ba'áłchíní náás ahoolchíiłii doo ła' yikéé' yikah da, nidi Júdah dine'é t'éiyá.

²¹Áko Riihobówam éí Jerúsalemjį' níyáago Ízrel dine'é yik'iidoojah áádóó Sálaman biye' Riihobówam bee bóhólnííh nít'éé' yę́ę bíí' nídoodleeł biniyé Júdah dine'é éí Bénjamin dine'é yił áłah áyiilaago éí bitahdóó t'ááłáhídi neeznádiindóó ba'aan tseebídiindi mííl diné na'abaah yéédahósinii yitayiizláá'.

²²Nidi Diyin God éí bá halne'ii Shiiméíyah wolyéii yich'į' haadzíi'go ání,

²³Júdah kéyahgi Sálaman biye' aláahgo naat'áanii Riihobówam áádóó Júdah dine'é índa Bénjamin dine'é t'áá ałtso áádóó Ízrel dine'é daadziihígíí bich'į' hadíídzihgo kóbididííniił,

²⁴Bóhólníihii ání, Doo ch'ídoohkah da, doo nidi danihik'isóó Ízrel dine'é bik'iidoohjah da; diné t'ááłá'í nootínígo danihighangóó nídadohkááh, háálá díí shits'ą́ą́dóó át'é. Éí bąą Bóhólníihii hach'į' haadzí'ígíí bik'eh dahojííł'įįdgo haghangóó anídadziiskai.

²⁵Nít'éé' Jerobówam éí Dził Íífreiyimgi Shííkem kin haal'áago áyiilaago ákwii kééhat'į́į́ nít'éé', áádóó dah náádiidzáago Piinúwel kin haal'áago ałdó' áyiilaa.

²⁶Áádóó Jerobówam t'áá biyi'ídi ání, K'ad David ba'áłchíní náás ahoolchíiłii bee óhólníihii bíí' nídoodleeł:

²⁷díí dine'é Jerúsalemgi Bóhólníihii bikin bii' sohodizin biyi' nááda'di'yoołnih biniyé ákóde eekai ládą́ą́', díí diné łahgo áńdeiniidzį́į'go yídahółníihii Júdah dine'é aláahgo binanit'a'í Riihobówam yikéé' dah nídiisą́ągo shí dashdiyoołhéełgo Júdah dine'é aláahgo binanit'a'í Riihobówam yikéé' dah nínáádidookah.

²⁸Nít'éé' aláahgo naat'áanii díí yaa nitsízkéezgo óola yee béégashii yáázh naakigo áyiilaa áádóó diné ííłní, Jerúsalem góde ałnáádaahkahígíí doo nihá bíighah da; Ízrel dine'é danohłíinii, Ííjip kéyahdę́ę́' nihidiyin ch'ínihiní'eezhígíí kǫ́ǫ́ danół'į́.

²⁹Áádóó ła' Béthel hoolyéegi yiyiisį' áádóó náánáła' Dan hoolyéegi yiyiisį'.

³⁰Áko díí bee t'áá íiyisí ádił ni'iidzííh hazlį́į́', háálá Ízrel dine'é éí béégashii yáázh ła' yich'į' nidahałá yiniyé ákǫ́ǫ́ ałnáádaakah nít'éé' áádóó Dan hoolyéejį' ałdó' yiniyé ałnáádaakah nít'éé'.

³¹Áádóó ninádahałaah doo biniyé wódah nahaz'ą́ądi kin nideiznil índa diné bitahdóó doo Líívai dine'é danilínígíí nááda'iiłniihii danilį́įgo niinínil.

³²Áko Jerobówam tseebíí nídízííd binih ashdla'áadah jį́į́ góne' Júdahgi dílzingo áłah ná'ádleehígi át'éego dílzingo áłah ná'ádleeh dooleełgo yee hooł'a' áádóó bikáá' náá'iiniihí bikáa'jį' didlidgo nááhániihii nááyiisnii'. Éí Béthel kin haal'áagi béégashii yáázh yi'iilaa yę́ę yich'į' náá'iisnii', áádóó índa ninádahałaah doo biniyé wódah nahaz'ą́ągo ádayiilaaígi nááda'iiłniihii nidaal'a'ígíí éí Béthelgi niinínil.

³³Kót'éego Bétheldi bikáá' náá'iiniihí áyiilaa yę́ę yikáá' náá'iisnii'; tseebíí nídízííd binih ashdla'áadah jį́į́ góne' t'áá éí yiziłígíí binih t'áá hayi'ídi tsízdeezkéezgo bee hozdeez'ą́ yę́ędą́ą́' Ízrel dine'é bá dílzingo áłah ná'ádleeh jiił'a' go bikáá' náá'iiniihí bikáá' náájiisnii', índa łikání halchingo dilidii náájiisnii'.