Read Navajo I KINGS 13 Bible Online

I KINGS 13 - Navajo bible

I KINGS 13

¹Nít'éé' shoo, Júdah dine'é bitahdóó Diyin God yá halne'ii éí Bóhólníihii yee haadzí'ígíí bik'ehgo Bétheljį' níyá, áádóó Jerobówam éí łikání halchingo dilidii nááhizhdoołnih biniyé bikáá' náá'iiniihí bíighahgi dzizį́.

²Áko bikáá' náá'iiniihí éí Bóhólníihii yee haadzí'ígíí bee yéego yik'ijį' haadzíi'go ání, Bikáá' náá'iiniihí, náá'iiniihí nílíinii, Bóhólníihii kóníłní, Jó, David ba'áłchíní náás ahoolchíiłii bitahdóó awéé' doochííł; éí Josáíyah bee yídóojiił; éí nááda'iiłniihii ninádahałaah doo biniyé wódahgo nahaz'ą́ągo ádayiilaaígíí nikáá'dóó tsin bijeeh dilidgo łikání halchinii náádayiiłniihígíí nikáá'dóó nááhodiyoołnih áádóó nikáa'gi diné bits'in didoodlił.

³Áádóó t'áá éí bijį́ bee ééhózinii hach'į' áyiilaa kóníigo, Díí éí bee ééhózinii Bóhólníihii yee haadzí'ígíí át'é, Jó, bikáá' náá'iiniihí ahádooltǫǫłgo bikáa'gi łeeshch'iih éí hadadoozhosh.

⁴Nít'éé' aláahgo naat'áanii Jerobówam éí Diyin God yá halne'ii Béthelgi bikáá' náá'iiniihí yik'ijį' haadzíi'go yidiizts'ą́ą'go bikáá' náá'iiniihí bíighahdóó k'ízhdeeshchidgo ájíní, Daosxił. Áádóó hála' bee bik'ijį' k'ízhdeeshchidígíí ahaniníyáago sigan, áko doo t'ą́ą́' anízhdólnííh át'ée da silį́į́'.

⁵Diyin God yá halne'ii éí Bóhólníihii yee haadzíi'go bee ééhózinii áyiilaaígíí bik'ehgo bikáá' náá'iiniihí ałdó' ahááltǫ'go łeeshch'iih hadáázhoozh.

⁶Nít'éé' aláahgo naat'áanii éí Diyin God yá halne'ii yich'į' haadzíi'go ání, Bóhólníihii niDiyin God k'ad néinikąąhgo shá sodílzin, áko shíla' yá'át'ééh nídoodleeł. Áádóó Diyin God yá halne'ii éí Bóhólníihii náyooskango aláahgo naat'áanii bíla' hadaałt' é bá ánályaago t'áá át'é yę́ęgi át'é násdlį́į́'.

⁷Aláahgo naat'áanii éí Diyin God yá halne'ii ííłní, Tį', shighangóó nídiit'ashgo háádíílyįh áádóó bik'é nich'į' nidoolyéełii naa deeshłééł.

⁸Áádóó Diyin God yá halne'ii éí aláahgo naat'áanii ííłní, Nighan ałníí'dóó shaa dííní'ą́ą nidi doo ákǫ́ǫ́ nił deesh'ash da, doo nidi ákwii bááh deeshį́įł da, tó nidi doo deeshdlį́įł da,

⁹háálá Bóhólníihii kót'éego yee haadzíi'go áshidííniid, Bááh doo dííyį́įł da, tó ałdó' doo díídlį́įł da, áádóó yíníyá yę́ędę́ę́' doo t'áá ákóne' t' ą́ą́' nídíídáał da.

¹⁰Áko náánáłahjigo anídzoodzá; Bétheljį' jiníyá yę́ędę́ę́' doo t'áá ákóne' t'ą́ą́' nídzídzáa da.

¹¹Nít'éé' Béthelgi Diyin God yá halne'ii haastih léi' kééhat'į́į́ lá; éí biye'ké baa yíkaigo t'áá éí bijį́ Béthelgi Diyin God yá halne'ii yaa naayáhígíí áádóó aláahgo naat'áanii yich'į' hahaasdzí'ígíí ałdó' bizhé'é yee yił dahoolne'.

¹²Áádóó bizhé'é ábíłní, Háajigoshą' ííyá? Háálá haye'ké éí Júdahdę́ę́' Diyin God yá halne'ii níyáhígíí ííyáajigoígíí hadayíísid.

¹³Áádóó haye'ké ábijiní, Télii shá bik' i dah asohnííł. Áko há yik'i dah da'aznilgo hoł dah diildloozhgo

¹⁴Diyin God yá halne'ii bikéé' dashdiiyáago chéch'ilyaagi sidáago bik'ízhníyá, áko ábizhdííniid, Da' niísh Diyin God yá halne'ii Júdahdę́ę́' níyáhígíí ánít'į́? Áko ání, Éí ásht'į́.

¹⁵Nít'éé' ánáábizhdoo'niid, Tį', shighangóó nídiit'ashgo bááh dííyį́į́ł.

¹⁶Áádóó ájíní, T'ą́ą́'góó nił nídeesht'ash doo shá bohónéedzą́ą da, índa doo nidi nił yah adeesh'ash da; kwe'é nahós'a'gi doo nidi adiidį́įł da, áádóó tó nidi doo diidlį́įł da,

¹⁷háálá Bóhólníihii shich'į' haadzíi'go ání, Áadi bááh doo dííyį́įł da índa tó doo díídlį́įł da, áádóó yíníyá yę́ędę́ę́' doo t'áá ákóne' t'ą́ą́' nídíídáał da.

¹⁸Áko áhodííniid, Shí lá ałdó' t'áá nigi át'éego Diyin God yá halne'ii nishłį́ ni; Bóhólníihii haadzíi'go diyingo naal'a'í shił hoolne'go ání, Bááh yidooyį́į́ł áádóó tó yidoodlį́į́ł biniyé nighandi bił nídíít'ash. Nidi éí honíí'aa'.

¹⁹Áko bighangóó t'ą́ą́' bił níjít'áazhgo bighandi bááh jííyą́ą́' áádóó tó joodlą́ą́'.

²⁰Nít'éé' bikáá' adání bich'į' dzizkéego Diyin God yá halne'ii hoł nát' ázhígíí éí Bóhólníihii bich'į' haadzíí',

²¹áádóó Júdahdę́ę́' Diyin God yá halne'ii yich'į' yéego haadzíi'go ání, Bóhólníihii kóní, Bóhólníihii ándííniidígíí doo bik'eh hwííníł'įįd dago biniinaa Bóhólníihii niDiyin God bik'ehgo ádííníiłgo yee nich'į' haadzí' ígíí t'áadoo bi'iinilaa dago,

²²nidi Bóhólníihii nich'į' haadzíi'go, Kwe'é bááh doo dííyį́įł da índa tó doo díídlį́įł da, nidííniid yę́ę t'ą́ą́' néínídzáago bááh áádóó tó bił yíníyą́ą́'; éí biniinaa nizhé'é danilíinii yę́ę bitséní'ootséél góne' nits'íís doo yóó'ádoolníił da.

²³Nít'éé' bááh jííyą́ą'go áádóó tó joodlą́ą́'dóó bik'ijį' Diyin God yá halne'ii t'ą́ą́' bił níjít'ázhígíí bá télii bik'i dah adziznil.

²⁴Áádóó dah nídiidzáago náshdóítsoh bitsiijį' ditł'ooígíí bidááh níyáago biisxį́, áko hats'íís atiingóó sitį́įgo télii bíighahgóó sizį́; náshdóítsoh bitsiijį' ditł'ooígíí ałdó' ats'íís yíighahgóó sizį́.

²⁵Diné ła' yíighahgóó hidikáahgo, shoo, ats'íís atiingóó sitį́įgo áádóó náshdóítsoh bitsiijį' ditł'ooígíí ats'íís yíighahgóó sizį́įgo dayiiłtsą́, áko kin haal'áadi Diyin God yá halne'ii haastihígíí kééhat'į́įdi yíkaigo yaa dahoolne'.

²⁶Áko nít'éé' Diyin God yá halne'ii nát'ą́ą́' hoł nát'ázhígíí yiyíínii'go ání, Diyin God yá halne'ii yę́ę Bóhólníihii doo yik'eh hóół'įįdígíí át'į́; éí bąą Bóhólníihii t'áá hach'į' yee haadzí'ígíí bik'ehgo Bóhólníihii éí náshdóítsoh bitsiijį' ditł'ooígíí yaa hodiní'ą́ągo nahwiizhnizhgo hwiisxį́.

²⁷Áádóó biye'ké yich'į' haadzíi'go ání, Télii shá bik'i dah asohnííł. Áko há yik'i dah da'aznil.

²⁸Nít'éé' ákǫ́ǫ́ jiníyáago atiingóó ats'íís sitį́įgo áádóó télii índa náshdóítsoh bitsiijį' ditł'ooígíí bíighahgóó sizį́įgo baazhníyá, áko náshdóítsoh bitsiijį' ditł'ooígíí ats'íís t'ah doo yiyą́ą da lá, télii nidi doo niyiizhnizh da lá.

²⁹Diyin God yá halne'ii éí Diyin God yá halne'ii yę́ę bits'íís néidiiłtį́įgo télii yikáá' dah yistį́įgo yee nát'ą́ą́' néiníłtį́, áádóó Diyin God yá halne'ii haastihígíí éí haa doocha áádóó yóó'ahodoolííł biniyé kin haal'áajį' nádzá.

³⁰Áko t'áá hó hatséní'ootséél góne' bits'íís yóó'ájiilaago haa dajichago ádajiní, Aháláane', shik'is!

³¹Áko yóó'ájiilaadóó bik'ijį' haye'ké bich'į' hadzoodzíi'go ájíní, Dasétsą́ągo díí Diyin God yá halne'ii tséní'ootséél góne' yóó'ályaaígi bits'in bíighahgóó shits'in yóó'ádadoohłííł,

³²háálá Bóhólníihii yee haadzí'ígíí éí Béthelgi bikáá' náá'iiniihí áádóó Samériya kéyahgi kin hadaas'áágóó ninádahałaah doo biniyé wódah nahaz'ą́ągo ádayiilaaígi kin naaznilii yik'ijį' haadzíi'ii t'áá aaníí bohodoolnííł.

³³Ákódahóót'įįdóó bik'ijį' Jerobówam doo yá'áshǫ́ǫ́góó ááníłígíí doo yits'ą́ąjį' kónéeh da, nidi diné bitahdóó éí ninádahałaah doo biniyé wódah nahaz'ą́ągo ádayiilaadi bá nááda'iiłniihii ánááyoo'nil; t'áá háiida náá'iiłniihii nishłį́į doo danízinígíí ats'ábi'diltééh áádóó ninádahałaah doo biniyé wódah nahaz'ą́ągo ádayiilaadi nááda'iiłniihii atah yileeh.

³⁴Áko díí Jerobówam ba'áłchíní náás ahoolchíłígíí nihokáá'dóó áhodi'dooldįįłgo áádóó nahjį' kóhodi'doolnííł biniyé hak'ijį' ádił oodzíí' silį́į́'.