Read Navajo I KINGS 14 Bible Online

I KINGS 14 - Navajo bible

I KINGS 14

¹Íídą́ą́' Jerobówam biye' Abáíjah bitah honiigai.

²Áádóó Jerobówam be'asdzą́ą́ ííłní, Nídiidááh, nánooshkąąh, Jerobówam be'asdzą́ą́ nílínígíí, doo bee néého'dílzin da dooleeł biniyé łahgo át'éego í'dílnééh, áádóó Sháílohgóó dínááh; Diyin God yá halne'ii Aháíjah éí díí dine'é aláahgo binanit'a'í deeshłeełgo yee shił hoolne'ígíí áadi naaghá.

³Áko bááh neeznáago áádóó bááh dá'áka'í łikanii índa tsés'ná bitł'izh éí tózis bii'go bich'į' díjááh, áko nihiyázhí hait'ée dooleełígíí yee nił hodoolnih.

⁴Nít'éé' Jerobówam be'asdzą́ą́ ákódzaago nídii'na'go Sháílohgóó ííyá, áádóó Aháíjah bighandi jiníyá. Nidi Aháíjah doo oo'į́į da, háálá haastihgo doo oo'į́į da.

⁵Íídą́ą́' Bóhólníihii éí Aháíjah ííłní, Jerobówam be'asdzą́ą́ biyáázh yá t'áadoo le'é níídóokił biniyé aadę́ę́' yigááł, háálá biyáázh daatsaah; éí kót'éego bich'į' hadíídzih, háálá éí yah ííyáago asdzání náánáła' í'díl'į́į doo.

⁶Nít'éé' ákódzaago ch'é'étiindę́ę́' yah ajííyáago Aháíjah hakédil yidiizts'ą́ą́', áko ání, Yah aninááh, Jerobówam be'asdzą́ą́ nílíinii, ha'át'íí biniyé asdzání náánáła' í'díl'į́? Jó, hane' doo yá'át'éehii bił nich'į' shi'dool'aad.

⁷Nílááh, Jerobówam bił hólne', Bóhólníihii Ízrel dine'é biDiyin God kóní, Ízrel shidine'é bitahdóó ayóó ánít'éego ániishłaago binanit'a'í nílį́,

⁸áádóó David ba'áłchíní náás ahoolchíiłii bee óhólníihii bighadinisht'ą́ągo naa diní'ą́, nidi shá naal'a'í David yę́ę shibik'eh ó'oo'níiłii yik'eh hół'į́į́ nít'éé' áádóó bijéí t'áá át'é yee shikéé' yigááł nít'éé', índa t'áá ákwii ádaat'éii shinááł áyoolííł nít'éé', nidi ni éí t'áadoo ákwíinidzaa da,

⁹nidi t'áá ałtso nilą́ąjį' deíkai yę́ę biláahgo doo yá'áshǫ́ǫ́góó íínít'įįd, háálá diyin dabidi'níinii índa óola doolyį́į'go be'elyaii ádeinilaago bee shá hwííníłchįįd áádóó adinínáajigo ashiyíníłhan;

¹⁰éí biniinaa Jerobówam ba'áłchíní náás ahoolchíiłii doo yá'áshóonii bik'ijį' ádeeshłííł, áádóó Jerobówam bits'ą́ą́dóó dadinéhígíí t'áá ałtso éí naalte' danilíinii índa doo naalte' danilíinii ádeeshdįįł áádóó Jerobówam ba'áłchíní náás ahoolchíiłii daadziihígíí diné ła' ts'iilzéí ałtso ádįįhjį' yóó'ayiiyéhígi át'éego yóó'ahodeeshxééł.

¹¹T'áá háiida kin haal'áagi Jerobówam bits'ą́ą́dóó dajílíinii dazneeznánígíí éí łééchąą'í dahodoolghał, áádóó t'áá háiida níléí tł'óo'di daneeznánígíí éí tsídii nidaat'a'ii dahodooyį́į́ł, jó, Bóhólníihii éí yee haadzíí'.

¹²Éí bąą nídiidáahgo nighangóó nídídááh, áádóó kin haal'áá góne' anéínídzáago niyáázh dadootsaał.

¹³Áádóó Ízrel dine'é t'áá ałtso yaa yínííł danilį́įgo yóó'ádeidoolííł, áko Jerobówam bits'ą́ą́dóó hazlį́į'ii t'áá bí t'éiyá yóó'ádoolnííł, háálá Jerobówam ba'áłchíní bitahdóó t'áá bí t'éiyá Bóhólníihii éí Ízrel dine'é biDiyin God bich'į' yá'át'éehii bii' hólǫ́ǫgo bééhoozin.

¹⁴Náá'áłdó' Bóhólníihii éí Ízrel dine'é bá aláahgo naat'áanii ła' ádá náánéidiyoosįįł; éí díí jį́ Jerobówam ba'áłchíní náás ahoolchíiłii íidoołdįįł. Ákót'ée nidi ha'át'éegosh ałdó' dooleeł?

¹⁵Áádóó k'ad kodóó Bóhólníihii éí lók'aa' tó bighádígi át'éego Ízrel dine'é atíhodeeshłííł, índa díí kéyah yá'áhoot'éehii dabizhé'é yę́ę yeidiní'ánígíí bits'ą́ą́dóó Ízrel dine'é hahodeeshjihgo tooh nílínígíí bilááhgóó tahodínéeshkał, háálá asdzání be'elyaii ádá ádajiilaaígíí bee Bóhólníihii bá dahojííłchįįd.

¹⁶Áko Jerobówam hó ádił ni'jiisí'ígíí bee Ízrel dine'é ádił ni'iidzííh biih jíínilgo biniinaa Ízrel dine'é yóó'iididoo'ááł.

¹⁷Áádóó Jerobówam be'asdzą́ą́ nídii'na'go dah nídiidzáago Térzah kin haal'áajį' nádzá; nít'éé' ch'é'étiinjį' nizhníyáago hayáázh daaztsą́.

¹⁸Áko Bóhólníihii bá naal'a'í Diyin God yá halne'ii nilíinii Aháíjah binahjį' Bóhólníihii haadzí'ígíí bik'ehgo yóó'ádayiilaago Ízrel dine'é t'áá ałtso yaa yínííł naaskai.

¹⁹Áko łahjį' Jerobówam yaa naayáhígíí, éí naazbaa'ii índa honí'ánígíí éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²⁰Jerobówam nant'áago naadiin naaki nááhai, áko dahazhé'é yę́ę ada'iishxaazhígi át'éego i'jííłhaazhgo haye' Néídab hatsásk'ehgi aláahgo naat'áanii náánásdlį́į́'.

²¹Íídą́ą́' Sálaman biye' Riihobówam éí Júdah dine'é yinant'á. Riihobówam éí dízdiindóó ba'aan t'ááłá'í binááhaigo hodeez'ą́ áádóó Ízrel dine'é t'áá ałtso bitahdóó Jerúsalem kin haal'áhígíí éí Bóhólníihii náhodii'ánígíí bízhi' bee wójíi dooleełígi tsosts'idts'áadah nááhaijį' nant'áá nít'éé'. Bimá éí Áman dine'é ła' nilį́įgo Néíyamah wolyéé nít'éé'.

²²Áádóó Bóhólníihii binááł Júdah dine'é doo yá'áshóonii baa nidziskaigo dahazhé'é yaa naaskai yę́ę t'áá át'é biláahdi ádił nida'jiisí'ígíí bee Bóhólníihii haa łe'niizį́į'go bá dahojííłchįįd.

²³Háálá dah daask'idgóó t'áá át'é áádóó tsin dootł'izh naazkaadii t'áá át'é dabiyaagóó índa ninádahałaah doo biniyé wódah nahaz'ą́ągo ádayiilaaígíí áádóó eda'alyaii índa asdzání be'elyaii ádá ádayiilaa.

²⁴Áádóó ákwe'é kéyahgi diné ahaa ninádaaldeehígíí ałdó' hólǫ́; éí Bóhólníihii Ízrel dine'é bits'ą́ąjigo ał'ąą dine'é ch'íininíłkaadígíí doo daaldinii yaa naaskai yę́ę t'áá át'é yik'ehgo yaa naakai nít'éé'.

²⁵Nít'éé' aláahgo naat'áanii Riihobówam ashdla' náhááh binih Ííjip dine'é aláahgo binanit'a'í Sháíshak éí Jerúsalem yik'ijį' nídiibaa'.

²⁶Bóhólníihii bikin bii' sohodizindóó índa aláahgo naat' áanii bighandóó yódí ałtso ayííyį́, áko Sálaman éí naagé óola yee ádayiilaaígíí t'áá át'é éí Sháíshak ayííyį́.

²⁷Áádóó aláahgo naat'áanii Riihobówam éí naagé yę́ę bitsásk'eh góne' béésh łitsoii bee naagé ádayiilaago siláo alą́ąjį' binanit'a'í éí aláahgo naat'áanii bighan ch'é'édą́ą'gi yaa ádahalyánígíí bílák'e jíínil.

²⁸Bóhólníihii bikin bii' sohodizin góne' aláahgo naat'áanii éí t'áá yah anádááh bik'eh aa ádahalyánígíí naagé nínádeidii'nił áádóó bighan góne' ninádei'nił.

²⁹Áko Riihobówam yaa naayáhígíí t'áá át'é índa íídą́ą́' ádahóót'įįdii éí Júdah dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

³⁰Áko Riihobówam áádóó Jerobówam bíyoołkááłdą́ą́' t'áá áłahjį' yił anaa' hółǫ́ǫ́ nít'éé'.

³¹Riihobówam éí dabizhé'é yę́ę yił ada'iishxaazhgo David yę́ę bikin haal'áagi dahazhé'é yę́ę bitahgi yóó'áho'diilyaa. Hamá éí Áman dine'é ła' nilį́įgo Néíyamah wolyé. Áko haye' Abáíjam hatsásk'ehgi aláahgo naat'áanii náánásdlį́į́'.