Read Navajo I KINGS 15 Bible Online

I KINGS 15 - Navajo bible

I KINGS 15

¹Áko nít'éé' Nííbat biye' Jerobówam aláahgo naat'áanii nilį́įgo tseebííts'áadah náhááh binih Abáíjam éí Júdah dine'é yinanit'a'í silį́į́'.

²Táá' nááhaijį' Jerúsalemgi aláahgo naat'áanii nilį́į́ nít'éé'. Bimá Méíyakah wolyéii éí Abíshalam bitsi' nilį́į́ nít'éé'.

³Áádóó hazhé'é yę́ę halą́ąjį' yee ni'iisíí' yę́ę t'áá át'é bee ha'át'e'go joogááł nít'éé', áko hazhé'é David yę́ę bijéí yee Bóhólníihii biDiyin God yił t'áá ákwii át'é yę́ęgi át'éego doo joogáał da nít'éé'.

⁴Azhą́ ákót'ée nidi haye' hakéé' góne' dah yidínóołdaał áádóó Jerúsalem niłdzilgo íidoolííł biniyé David binahjį' Bóhólníihii haDiyin God Jerúsalemgi bee adinídíin dooleełii haidiní'ą́,

⁵háálá David yę́ę bíiníłką́ą́dę́ę́' Bóhólníihii binááł t'áá ákogi ájoonííł nít'éé' índa yee hach'į' haadzí'ígíí t'áadoo bits'ą́ąjigo ádziidzaa da; t'áá hazhó'ó Het diné ła' Yuráíyah bee ádił adzisiih yę́ę t'éiyá.

⁶Áko Abáíjam bíyoołkááłdą́ą́' Riihobówam áádóó Jerobówam t'áá áłahjį' yił anaa' hółǫ́ǫ́ nít'éé'.

⁷Áko Abáíjam yaa naayáhígíí t'áá át'é índa íídą́ą́' ádahóót'įįdígíí éí Júdah dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo. Íídą́ą́' Abáíjam áádóó Jerobówam yił anaa' hółǫ́ǫ́ nít'éé'.

⁸Áádóó Abáíjam éí dabizhé'é yę́ę ada'iishxaazhígi át'éego i'jííłhaazhgo David yę́ę bikin haal'áagi yóó'áho'diilyaa, áko haye' Éísa hatsásk'ehgi aláahgo naat'áanii náánásdlį́į́'.

⁹Jerobówam éí Ízrel dine'é yinant'áago naadiin náhááh binih Éísa éí Júdah dine'é yinanit'a'í silį́į́'.

¹⁰Áádóó dízdiindóó ba'aan t'ááłá'í nááhaijį' Jerúsalemgi aláahgo naat'áanii nilį́į́ nít'éé'. Bimá éí Méíyakah wolyéii éí Abíshalam bitsi' nilį́į́ nít'éé'.

¹¹Bóhólníihii binááł Éísa éí hazhé'é David yę́ę t'áá ákogi át'éego hináá nít'éé' yę́ęgi át'éego jiináá nít'éé'.

¹²Diné ahaa ninádaaldeehígíí kéyahdóó nahjį' hazhnííłkaadgo hazhé'é éí eda'alyaii ádayiilaa yę́ę t'áá át'é nahjį' kójiilaa.

¹³Náá'áłdó' hamá Méíyakah asdzą́ą́ naat'ááh nilį́įgo éí nidi nahjį' hayííłt'e', háálá asdzání be'elyaii doo daaldinii áyiilaa, áko éí asdzání be'elyaii áyiilaaígíí hats'ą́ą́' Éísa niyiishchǫ'go Kídran tó nílínígi yidííłid.

¹⁴Nidi ninádahałaah doo biniyé wódah nahaz'ą́ągo ádaalyaaígíí éí t'áadoo nahjį' kódaalyaa da; azhą́ ákót'ée nidi Éísa éí Bóhólníihii yich'į' bijéí t'áá ákogi át'éego bíiníłką́.

¹⁵Áádóó hazhé'é yę́ę diyingo neidiyiiz'ánígíí índa t'áá bí ałdó' diyingo neidiyiiz'ánígíí éí béésh łigaii áádóó óola índa ákóne' chodao'íinii Bóhólníihii bikin bii' sohodizin góne' yah ayiizhjaa'.

¹⁶Áko Éísa áádóó Ízrel dine'é aláahgo binanit'a'í Béíyasha bíyoołkááłdą́ą́' t'áá áłahjį' yił anaa' hółǫ́ǫ́ nít'éé'.

¹⁷Áádóó Ízrel dine'é aláahgo binanit'a'í Béíyasha éí Júdah dine'é yik'ijį' nídiibaa'go Júdah dine'é aláahgo binanit'a'í Éísa bich'į' doo ałná'áhát'į́į da doo biniyé Réímah kin haal'á áyiilaa.

¹⁸Nít'éé' Éísa éí Bóhólníihii bikin góne' áádóó aláahgo naat'áanii bikin góne' yódí bá haz'ánígi béésh łigaii áádóó óola nii'nilígíí ałtso néidiinilgo bá nidaal'a'í yílák'ee yíínil, áko aláahgo naat'áanii Éísa éí Síriya dine'é aláahgo binanit'a'í Hííziyan binálí Tabríman biye' Ben-héídad wolyéii éí Damáskasgi kééhat'ínígíí bich'į' yił ayiis'a'go ání,

¹⁹Shizhé'é yę́ę áádóó nizhé'é yę́ę ałha'deet'ą́; nihita'gi ałdó' t'áá ákót'ée doo; jó, béésh łigaii áádóó óola aa doolyéełii nich'į' áshłaa; hágoshį́į́ Ízrel dine'é aláahgo binanit'a'í Béíyasha shits'ádoogááł biniyé bił ałha'díínít'ánígíí yóó'adí'aah.

²⁰Aláahgo naat'áanii Éísa ádííniidígíí Ben-héídad yi'iilaago siláo dah deínéehii bindanit'a'í éí Ízrel bikin hadaas'áágóó Áíjan áádóó Dan áádóó Éíbel-beth-méíyakah índa Kínerath dahoolyéégóó t'áá át'é áádóó Náftalai dine'é bikéyah t'áá át'é yich'į' ayiis'a'go yik'eh dadeesdlį́į́'.

²¹Áko nít'éé' Béíyasha éidí yaa hodiizts'ą́ą'go Réímah kin haal'á ánéídléhígíí yik'i deeyáago Térzah kin haal'áagi kééhat'į́į́ nít'éé'.

²²Áko aláahgo naat'áanii Éísa éí Júdah dine'é t'áadoo ła' doodaií t'áá át'é bich'į' hadzoodzíi'go hágo dabizhdííniid, áádóó kin haal'á Réímahdóó tsé índa tsin éí Béíyasha yee hałbį' nít'é'ígíí yits'ą́ą́' adayiizyį́įgo éí yee aláahgo naat'áanii Éísa éí Bénjamin dine'é bikéyahdi Gííba áádóó Mízpah kin haal'áago áyiilaa.

²³Áko łahjį' Éísa yaa naayáhígíí t'áá át'é áádóó ayóó ádaat'éego yaa naayáhígíí índa kin hadaas'áago ádayiilaa yę́ę Júdah dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo. Azhą́ ákót'ée nidi haastih silį́į'go bikee' naałniih bee bąąh dahoo'a'.

²⁴Áádóó Éísa éí dabizhé'é yę́ę ada'iishxaazhígi át'éego i'jííłhaazhgo hazhé'é David yę́ę bikin haal'áagi dahazhé'é yę́ę bitahgi yóó'áho'diilyaa, áádóó haye' Jiiháshafat hatsásk'ehgi aláahgo naat'áanii náánásdlį́į́'.

²⁵Íídą́ą́' Éísa éí Júdah dine'é aláahgo yinanit'a'í nilį́įgo naaki náhááh binih Jerobówam biye' Néídab éí Ízrel dine'é aláahgo yinanit'a'í silį́į́' áádóó Ízrel dine'é binazhnit'áago naaki nááhai.

²⁶Áko Bóhólníihii binááł doo yá'áshónígi ájíít'įįd; hazhé'é ádił ni'iisíhígíí bee Ízrel dine'é ałdó' ádił nida'iisíihgo áyiilaii jideeskáá'.

²⁷Áádóó Ísakar dine'é ahoolchíiłii ła' Aháíjah biye' Béíyasha éí Néídab yihodeez'ą́ągo Gíbiithan éí Filístiya dine'é bikin haal'áagi yiyiisxį́, háálá Néídab áádóó Ízrel dine'é t'áá át'é Gíbiithan yizénáshzhiizh.

²⁸Éísa éí Júdah dine'é aláahgo yinanit'a'í nilį́įgo táá' náhááh góne' Béíyasha éí Néídab yiyiisxį́įgo yitsásk'eh góne' nináánít'áá nít'éé'.

²⁹Nít'éé' Béíyasha nant'áago Jerobówam ba'áłchíní ahoolchíiłii t'áá át'é ałtso neistseed; Bóhólníihii kóníigo bá naal'a'í Sháíloh kin haal'áádóó diné Aháíjah wolyéii yee yich'į' haadzí'ígíí bik'ehgo Jerobówam yits'ą́ą́dóó danilíinii nabi'diztseedjį' doo ła' ch'ééyáa da,

³⁰háálá Jerobówam ádił ni'iisíihgo yee ni'iisíí' yę́ę bee Ízrel dine'é nida'iisíihgo ájiilaa; éí biniinaa Bóhólníihii Ízrel biDiyin God bá hojííłchįįd.

³¹Áko Néídab yaa naayáhígíí t'áá át'é índa íídą́ą́' ádahóót'įįdígíí éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

³²Nít'éé' Éísa áádóó Ízrel dine'é aláahgo binanit'a'í Béíyasha bíyoołkááłdą́ą́' t'áá áłahjį' yił anaa' hółǫ́ǫ́ nít'éé'.

³³Áádóó Éísa éí Júdah dine'é aláahgo yinanit'a'í nilį́įgo táá' náhááh binih Aháíjah biye' Béíyasha éí Térzah kin haal'áagi Ízrel dine'é t'áá át'é binazhnit'áago naadiin dį́į́' nááhai.

³⁴Áko Bóhólníihii binááł doo yá'áshónígi ájíít'įįd; Jerobówam ádił ni'iisíhígíí bee Ízrel dine'é ałdó' ádił nida'iisíihgo áyiilaii jideeskáá'.