Read Navajo I KINGS 16 Bible Online

I KINGS 16 - Navajo bible

I KINGS 16

¹Nít'éé' Hanéínai biye' Jííhu éí Bóhólníihii bich'į' haadzíi'go Béíyasha yik'ijį' nilį́įgo kóní,

²Łeeshtahdóó nándiiłtį́įgo shidine'é Ízrel binanit'a'í nílį́įgo ániishłaago áádóó Jerobówam yaa naayáhígíí dah díníłkáa'go shidine'é Ízrel ni'iidzííh biih yínínilgo ádił nida'iisííh bee shá hwííníłchįįdígíí biniinaa,

³jó, Béíyasha ba'áłchíní náás ahoolchíiłii índa dabik'éí náás ahoolchíiłii nahjį' ádeeshłíiłgo Nííbat biye' Jerobówam ba'áłchíní náás ahoolchíiłii áshłaa yę́ęgi át'éego na'áłchíní náás ahoolchíiłii ałdó' ákódeeshłííł.

⁴T'áá háiida kin haal'áagi Béíyasha bits'ą́ą́dóó dajílíinii dazneeznánígíí éí łééchąą'í dahodoolghał áádóó t'áá háiida níléí tł'óo'di dazneeznánígíí éí tsídii nidaat'a'ii dahodooyį́į́ł.

⁵Áko łahjį' Béíyasha yaa naayáhígíí áádóó ayóó át'éego yaa naayáhígíí éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁶Ákohgo Béíyasha éí dabizhé'é yę́ę ada'iishxaazhígi át'éego i'jííłhaazhgo Térzahgi yóó'áho'diilyaa, áádóó haye' Íílah hatsásk'ehgi aláahgo naat'áanii náánásdlį́į́'.

⁷Áádóó ałdó' Hanéínai biye' Jííhu éí Diyin God yá halne'ii binahjį' Bóhólníihii éí Béíyasha áádóó ba'áłchíní ahoolchíiłii yik'ijį' nilį́įgo haadzíí', háálá Bóhólníihii binááł doo yá'áshónígi ájíít'įįdígíí bee Bóhólníihii bá hojííłchįįd; éí Jerobówam ba'áłchíní náás ahoolchíiłii ádáát'įįdígi át'éego ádziidzaa índa Néídab jiisxį́.

⁸Éísa éí Júdah dine'é aláahgo yinanit'a'í nilį́įgo naadiin hastą́ą́h náhááh binih Béíyasha biye' Íílah éí Térzah kin haal'áagi Ízrel dine'é yinant'áago naaki nááhai.

⁹Nít'éé' Térzahgi nijigháago haghan há yaa áhályáanii Árza bighan góne' ajidlą́ągo hoł honiidoigo há naal'a'í Zímrai hatsindaabąąs bijáád naakiígíí ałníí'dóó ánéelą́ą'go yinanit'a'í nilíinii hak'ijį' hodeez'ą́.

¹⁰Áko Zímrai ákóne' yah ííyáago hoł dzideesxaalgo hwiisxį́; Éísa éí Júdah dine'é aláahgo yinanit'a'í nilį́įgo naadiin tsosts'id náhááh binih Zímrai hatsásk'ehgi aláahgo naat'áanii náánásdlį́į́'.

¹¹Áko nant'á silį́į'go t'áá áko bikáá'dóó nahat'áii yikáá' dah neezdáago Béíyasha ba'áłchíní ałtso neistseed; diné t'áá ałtso t'áá ashiikéjį' dahak'éígíí índa dahak'isóó doo ła' ch'ééyáa da.

¹²Kót'éego Diyin God yá halne'ii Jííhu binahjį' Bóhólníihii éí Béíyasha yik'ijį' saad yee haadzí'ígíí bik'ehgo Zímrai éí Béíyasha ba'áłchíní ałtso íísdįįd,

¹³háálá Béíyasha índa biye' Íílah ádił ni'iidzííh t'áá át'é yee ni'iisí'ígíí áádóó eda'alyaii daahóhígíí bee Ízrel dine'é nida'iisíihgo ádajiilaaígíí bee Bóhólníihii Ízrel biDiyin God bá dahojííłchįįd.

¹⁴Áko Íílah yaa naayáhígíí t'áá át'é índa íídą́ą́' ádahóót'įįdígíí éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹⁵Éísa éí Júdah dine'é aláahgo yinanit'a'í nilį́įgo naadiin tsosts'id náhááh binih Térzahgi Zímrai nant'áago tsosts'id yiską́. Áko bidine'é éí Gíbiithan kin haal'á Filístiya dine'é bíhígíí yik'ijį' nidahaazná.

¹⁶Nít'éé' Zímrai éí aláahgo naat'áanii yinahaz'ą́ągo áádóó yiyiisxį́įgo ałdó' diné nidahaaznánígíí dayíínii'; éí bąą t'áá éí bijį́ nida'iiznánígi Ízrel dine'é t'áá ałtso siláo dah deínéehii yinanit'a'í nilíinii Ámrii éí Ízrel binanit'a'í nilį́įgo ádayiilaa.

¹⁷Áádóó Ámrii índa Ízrel dine'é t'áá ałtso yił Gíbiithandę́ę́' Térzah kin haal'á góde haaskaigo áádóó yizéénáshzhiizhgo anadayííł'įįd.

¹⁸Nít'éé' Zímrai éí kin haal'á yisnáago yaa ákoniizį́į'go aláahgo naat'áanii bighan náwóne'é níléí ałníi'di haz'ání góne' yah ajííyáago ádík'ijį' bohozhdíínilgo dadziztsą́,

¹⁹háálá Bóhólníihii binááł doo yá'áshóonii baa nijigháago éí bee bąąhági át'éii bee ni'jiisíihgo Jerobówam jideeskáa'go áádóó yee ni'iisíihgo yaa naayáhígíí éí Ízrel dine'é ádił nida'iisíihgo ájiilaa.

²⁰Áko łahjį' Zímrai yaa naayáhígíí áádóó Íílah yik'ijį' nilį́įgo nahaz'ánígíí éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²¹Áko nít'éé' Ízrel dine'é ałts'áákai: ałníí'dóó dine'é éí Gínath biye' Tíbnai aláahgo naat'áanii ádeidoolííł biniyé yikéé' dah diikai; łahjį' ałníí'dóóígíí éí Ámrii yikéé' dah diikai.

²²Nidi dine'é Ámrii yikéé' dah diikaígíí éí Gínath biye' Tíbnai yikéé' dah diikaígíí yik'eh dadeesdlį́į́', áko Tíbnai daaztsą́, áádóó Ámrii éí aláahgo naat'áanii náánásdlį́į́'.

²³Éísa éí Júdah dine'é aláahgo yinanit'a'í nilį́įgo tádiindóó ba'aan t'ááłá'í náhááh binih Ámrii éí Ízrel dine'é aláahgo yinanit'a'í náánásdlį́į́' áádóó nant'áago naakits'áadah nááhai; Térzah kin haal'áagi nant'áago hastą́ą́h nááhai.

²⁴Áádóó Samériya dah yisk'idígíí éí béésh łigaii tálent wolyéhígíí naakigo yee Shíímer wolyéii yaa nayiisnii'go bighą́ą'gi kin haal'á áyiilaa, áko kin haal'áago áyiilaaígíí bee wójíi dooígíí éí dah yisk'id Shíímer wolyéii bí nít'é'ígíí Samériya yee yiyíízhi'.

²⁵Nidi Ámrii éí Bóhólníihii binááł doo yá'áshóonii baa nijiyá, áádóó halą́ąjį' naat'áanii danilį́į́ nít'é'ígíí éí t'áá ałtso dabiláhígo ájíít'įįd.

²⁶Háálá Nííbat biye' Jerobówam jideeskáa'go ni'iisí'ígíí áádóó éí bee Ízrel dine'é ádił nida'iisíihgo ádayiilaa; éí eda'alyaii daahóhígíí bee Bóhólníihii Ízrel dine'é biDiyin God yádahóółchįįd.

²⁷K'ad łahjį' Ámrii yaa naayáhígíí índa yee ayóó át'éii ííshją́ą́ áyiilaii éí Ízrel dine'é aláahgo yinanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²⁸Áko Ámrii éí dabizhé'é yę́ę ada'iishxaazhígi át'éego i'jííłhaazhgo Samériyagi yóó'áho'diilyaa, áádóó haye' Éíhab hatsásk'ehgi aláahgo naat'áanii náánásdlį́į́'.

²⁹Éísa éí Júdah dine'é aláahgo yinanit'a'í nilį́įgo tádiindóó ba'aan tseebíí náhááh binih Ámrii biye' Éíhab éí Ízrel dine'é aláahgo yinanit'a'í náánásdlį́į́', áko Ámrii biye' Éíhab Samériyagi Ízrel dine'é yinant'áago naadiin naaki nááhai.

³⁰Áádóó Bóhólníihii binááł Ámrii biye' Éíhab doo yá'áshóonii baa nijiyá, halą́ąjį' naat'áanii danilį́į́ nít'é'ígíí éí t'áá ałtso dabiláhígo ájíít'įįd.

³¹Áko nít'éé' Nííbat biye' Jerobówam yee ádił ni'iisí'ígíí t'įįhdígo át'é nahalingo jideeskáa'go Sáídan dine'é aláahgo binanit'a'í Ethbéíyal bitsi' Jézebel hwe'asdzą́ą́ ájiilaago Béíyal bá chojoo'į́įgo bich'į' nahojiłá.

³²Índa Béíyal bikin Samériyadi ájiilaaígíí biyi' góne' bikáá' náá'iiniihí Béíyal bá ájiilaa.

³³Áádóó Éíhab éí asdzání be'elyaii áyiilaago halą́ąjį' Ízrel dine'é aláahgo yinanit'a'í danilį́į́ nít'é'ígíí t'áá ałtso t'ah biláhídi át'éego Éíhab yaa naayáhígíí yee Bóhólníihii Ízrel biDiyin God yáhóółchįįd.

³⁴Hóyoołkááł yę́ędą́ą́' Bétheldóó diné Háíyel wolyéii Jériko kin haal'á áyiilaa: Bóhólníihii bizaad Nan biye' Jáshowa yee haadzí'ígíí bik'ehgo Jériko kin bitł'ááh nástł'in ííléehgo biye' átsé bá yizhchínígíí Abáíram daaztsą́ índa bidáń'daditį́hígíí áyiilaago biye' akéédę́'ígíí Síígab daaztsą́.