Read Navajo I KINGS 17 Bible Online

I KINGS 17 - Navajo bible

I KINGS 17

¹Nít'éé' Gíliyad kéyahgi kéédahat'íinii ła' Tíshbeh diné nilį́įgo Iiláíjah éí Éíhab ííłní, Bóhólníihii Ízrel biDiyin God bidááhdóó sézínígíí ts'ídá t'áá aaníí hiná; ákót'éego ts'ídá t'áá aaníí díí deíhááh góne' dahtoo' doo náhádleeh da doo índa doo nahałtin da doo, nidi ádíshnínígíí bik'ehgo t'éiyá.

²Áko Bóhólníihii hach'į' haadzíi'go ání,

³Dah diináahgo Jórdan tooh nílínígíí ha'a'aahjígo Kíírith tó nílínígíí bíighahgi nídidíít'į́į́ł.

⁴Ííshją́ą́ kót'ée doo, éí tó nílínígíí nidlą́ą doo, áádóó gáagii éí ákwe'é nada'ałtso' doogo bee bich'į' haasdzíí'.

⁵Áko Bóhólníihii hach'į' yee haadzí'ígíí bik'ehgo dashdiiyá, áko dashdiiyáago Jórdan toohdóó ha'a'aahjigo Kíírith tó nílínígíí bíighahgi dzizdáá nít'éé'.

⁶Áádóó gáagii éí abínígo bááh áádóó atsį' haa nídeiłtsah, índa e'e'áahgo bááh áádóó atsį' haa nídeiłtsah, áko éí tó nílínígíí níjídlį́į́h.

⁷Nít'éé' wónáásdóó éí tó nílį́ nít'éé' yę́ęgi náhooltsaii, háálá éí kéyahgi doo nahałtin da.

⁸Áádóó Bóhólníihii hach'į' haadzíi'go ání,

⁹Nídiidáahgo Sáídan bikin haal'á Zárefath hoolyéejį' dínááh; ákwe'é kééhót'į́į doo; jó, ákwii asdzání bąąh áhásdįįdii léi' naa áhályą́ą doogo bee bich'į' haasdzíí'.

¹⁰Áko nízhdii'na'go Zárefathgóó dashdiiyá. Nít' éé' kin haal'á bidáń'dítį́įhgi jiníyáago; jó, ákwe'é asdzání bąąh áhásdįįdii léi' chizh náyiilááh, áádóó bich'į' ázhdííniidgo ábijiní, Nánooshkąąh, ásaa' bee tó áłch'į́į́dígo shá nídiikaahgo deeshdlį́į́ł.

¹¹Áádóó yíká dah diilwodgo bikéé' ázhdííniidgo ábijiní, Nánooshkąąh, łees'áán áłts'íísígo ałdó' ła' shá nídíí'ááł.

¹²Nít'éé' ání, Ts'ídá t'áá aaníí Bóhólníihii niDiyin God hiná; ákót'éego ts'ídá t'áá aaníí łees'áán shee ádin, nidi ak'áán yílá bee haajaa' bíighahgo t'éiyá tóshjeeh yázhí bii', ak'ah ałdó' áłch' į́į́dí tóshjeeh yázhí bii'; jó, chizh naakigo náháshłááh, áko yah adeesháałgo łees'áán ádeeshłííł; shiyáázh áádóó shí éí diidį́įłgo áádóó díníi'nééł.

¹³Áko Iiláíjah áhodííniid, T'áadoo nił yé'í; nílááh, t'áá ádííníniidígi ánínééh, nidi shí áłtsé łees'áán áłts'íísígo shá ádíílíiłgo shaa díí'ááł, áko índa niyáázh bił átsą́ ádi'doołnííł.

¹⁴Háálá Bóhólníihii Ízrel biDiyin God kóní, Bóhólníihii éí nihokáá'góó nahałtingo ánáyiidlaajį' tóshjeeh yázhí bii' ak'áán doo ádoodįįł da, tóshjeeh yázhí bii' ak'ah nidi doo ádoodįįł da.

¹⁵Áádóó dashdiiyáago Iiláíjah t'áá ádííniidígíí bik'ehgo ádziidzaa, áko hó áádóó Iiláíjah índa haghangi nída'jidį́įhgo lą'í yiską́.

¹⁶Áko Bóhólníihii éí Iiláíjah yich'į' yee haadzí'ígíí bik'ehgo tóshjeeh yázhí bii' ak'áán t'áadoo ásdįįd da, ak'ah nidi t'áadoo bi'oh silį́į' da.

¹⁷Nít'éé' kódahóót'įįdóó asdzání bighangi biyáázh bitah honiigai, áko bitah honiigaígíí yéego ádzaago doo nídídzih da silį́į́'.

¹⁸Áko Iiláíjah ábijiní, Diyin God bits'ą́ą́dóó diné nílíinii, haashą' nideeshłííł? Da' t'óósh ádi ł ni'iiyésíí' yę́ę béédeeshnihgo índa shiyáázh diyííłhéełgo biniyé shéíníyá?

¹⁹Áko Iiláíjah áháłní, Niyáázh shaa níłteeh. Áádóó ádíjóltą'dóó néidiiłtį́įgo wódahdi jinitéhí góde hadzistį́įgo hatsásk'eh bikáá' nizhníłtį́.

²⁰Áádóó Bóhólníihii bich'į' ázhdííniidgo ájíní, Bóhólníihii shiDiyin God nílíinii, da' asdzání bąąh áhásdįįdii baa ałk'ee sédáhígíísh ałdó' doo yá'át'éhígi ádíílíiłgo biyáázh síníłhį́?

²¹Áko ashkii bikáa'jį' tsé'yaa názhnítéehgo táadi azlį́į'go Bóhólníihii bich'į' ázhdííniidgo ájíní, Bóhólníihii shiDiyin God, nánooshkąąh, díí ashkii bii' sizíinii biih nídoodáałgo bee ba'di'ní'aah.

²²Nít'éé' Bóhólníihii éí Iiláíjah biinéé' yidiizts'ą́ą'go ashkii bii' sizíinii biih náádzáago hinááh násdlį́į́'.

²³Áádóó Iiláíjah éí ashkii néidiiłtį́įgo jinitéhídę́ę́' bidáájííłtį́įgo wóne'é bimá baazhníłtį́, áko Iiláíjah ání, Shoo, niyáázh hiná.

²⁴Nít'éé' asdzání éí Iiláíjah ííłní, K'ad díí lą́ą bee Diyin God bíí' nílį́įgo áádóó Bóhólníihii bizaad bee yáníłti'ígíí éí t'áá aaníinii át'éego shił bééhoozin.