Read Navajo I KINGS 18 Bible Online

I KINGS 18 - Navajo bible

I KINGS 18

¹Áádóó łą́ yiską́ą́dóó bik'ijį' táá' náhááh binih Bóhólníihii éí Iiláíjah yich'į' haadzíi'go ání, Nílááh, Éíhab bich'į' dínááh, áko nihokáá'góó nahałtingo ádeeshłííł.

²Áko Iiláíjah éí Éíhab baazhdoogááłgóó dashdiiyá; nít'éé' Samériyagi t'áá íiyisí hodííchįįd lá.

³Áko Éíhab éí Obadáíyah hágo yidííniid; jó, éí haghan haz'ą́ągi yinanit'a'í nilį́. (Nít'éé' Obadáíyah éí ayóogo Bóhólníihii yidósin;

⁴jó, éí kódzaa, Jézebel éí Bóhólníihii yá dahalne'ii neistseedgo Obadáíyah éí Bóhólníihii yá dahalne'ii neeznádiingo néidiinil, áádóó t'áá ał'ąą ashdladiingo tsé'áán góne' néidees'į́į'go bááh áádóó tó biłgo yaná'áltso' nít'éé'.)

⁵Áko Éíhab éí Obadáíyah ííłní, Nílááh, kéyah bii' tó hadaazlį́į́góó índa tó danílį́į́góó dínááh; t'áá daats'í shǫǫh tł'oh ła' bik'ídiit'ashgo łį́į́' áádóó dzaanééz deiłchozh doo, áko nihilį́į́' doo ałtso dichin bidooghą́ął da.

⁶Kót'éego kéyah bikáá' tázhdidoo'ashígíí aházdoodzogo Éíhab łahjígo t'áá sáhí dah diiyá; Obadáíyah éí náánáłahjigo t'áá sáhí dah diiyá.

⁷Obadáíyah joogááł nít'éé', shoo, Iiláíjah hadááh níyá, áko bééhodzoosįįdgo ni'jį' yaa ádziidzaago ájíní, Da' niísh ánít'į́, shinanit'a'í Iiláíjah?

⁸Áádóó hach'į' haadzíi'go ání, Éí ásht'į́; nílááh, ninanit'a'í bił hólne', Shoo, kwe'é Iiláíjah níyá.

⁹Nít'éé' ábijiní, Ha'át'íísh bee ádił asésiihgo ná naal'a'í Éíhab shidiyoołhéełgo baa shidiní'aah doo.

¹⁰Ts'ídá t'áá aaníí Bóhólníihii niDiyin God hiná; ákót'éego ts'ídá t'áá aaníí ał'ąą dine'é índa bee íhólníihgo bił nahaz'ą́ą́góó t'áadoo ła' doodaaí ts'ídá t'áá ałtsogo shinanit'a'í i'iis'a'go há nidéez'į́į'go níká tá'dííł'a', áko ádaaní, Doo kwe'é naagháa da; ał'ąą dine'é áádóó íhólníihgo bił nahaz'ą́ą́góó t'áadoo nik'ídaaskai dago ádee hadadeesdzíí'.

¹¹Áko k'ad ádíní, Nílááh, ninanit'a'í bił hólne', Shoo, kwe'é Iiláíjah níyá.

¹²Kóhodoonííł, t'áá nits'ą́ą́' dah diiyáhí Bóhólníihii biNíłch'i doo shił bééhózinígóó háajigo shį́į́ nił dah didoo'ash, áko Éíhab baa níyáago bił hweeshne'go ch'ééh hanineeztą́ą'go shidiyoołhééł, nidi shí, ná naal'a'í nishłíinii t'áá áłchíní nishłį́į́dę́ę́' Bóhólníihii díínísin.

¹³Da' doósh ásdzaaígíí shinanit'a'í bee bił hóóne' da, shą́ą́', Jézebel éí Bóhólníihii yá dahalne'ii neistseed yę́ędą́ą́' Bóhólníihii yá dahalne'ii neeznádiingo t'áá ał'ąą ashdladiingo tsé'áán góne' nídééł'į́į'go bááh áádóó tó bił baná'ástso' nít'éé'?

¹⁴Áko k'ad ádíní, Nílááh, ninanit'a'í bił hólne', Shoo, kwe'é Iiláíjah níyá áádóó shidiyoołhééł.

¹⁵Iiláíjah ání, T'áá ałtsoní bee Bóhólníihii bidááhdóó sézínígíí ts'ídá t'áá aaníí hiná; ákót'éego ts'ídá t'áá aaníí t'áá díí jį́ haa deeshááł.

¹⁶Áko Obadáíyah éí Éíhab bidááshdoogááłgóó dashdiiyá áádóó bił hojoolne'go Éíhab éí Iiláíjah yidááh doogááłgóó ííyá.

¹⁷Áádóó nít'éé' Éíhab éí Iiláíjah yiyiiłtsą́ągo Éíhab ání, Da' niísh Ízrel dine'é bich'į' nahwiyíłnánígíí ánít'į́?

¹⁸Áko bich'į' hadzoodzíí', Shí doo Ízrel dine'é bich'į' nahwiishnáa da, nidi ni índa danizhé'é yę́ę bits'ą́ą́dóó ahoolchíiłii éí Bóhólníihii bibik'eh ó'oo'níiłii yóó'adasidoo'ą́ągo Béíyalim eda'alyaii bikéé' dah doojéé'.

¹⁹Éí bąą k'ad adíł'áago Ízrel dine'é t'áá át'é Dził Kármelgi shá áłah ánílééh; Béíyal yá dahalne'ii dį́įdi neeznádiindóó ba'aan ashdladiingo áádóó asdzání beda'alyaii yá dahalne'ii dį́įdi neeznádiingo éí Jézebel bibikáá' adáníjį' nída'adį́hígíí ałdó' shá áłah ánílééh.

²⁰Áko Éíhab éí Ízrel dine'é t'áá ałtso áádóó t'óó ádahodil'į́įgo dahalne'ii yich'į' i'ííł'a'go Dził Kármeljį' áłah áyiilaa.

²¹Áádóó Iiláíjah éí diné t'áá ałtso yich'į' niníyáago ání, Haa lá nízáágóó naakigo haz'ą́ bita' nidadinohdle' doo? Bóhólníihii éí Diyin God nilį́įgo bikéé' ninohkááh. Nidi Béíyal éí diyin át'é ládą́ą́' bikéé' ninohkááh. Áko diné łá'í nidi t'áadoo ła' hach'į' haadzíi' da.

²²Nít'éé' Iiláíjah diné áłah nilínígíí ííłní, Shí, t'áá shí t'éiyá, Bóhólníihii yá halne'ii nishłį́įgo yisdziih, nidi Béíyal yá dahalne'ii éí dį́įdi neeznádiindóó ba'aan ashdladiin yilt'é.

²³Éí bąą bíni' dóola naakigo nihaa dazhdoonił, áádóó bíni' dóola ła' ádá nídazhdidoołtéełgo nidahizhdoołgish, índa chizh bikáa'gi nidazhdoonił; t'áadoo biyaa kǫ'í, áádóó dóola ła'ígíí hasht'edeeshłíiłgo chizh bikáa'gi dah deeshnił; t'áadoo biyaa kǫ'í;

²⁴nihí danihidiyin bízhi' dayínóhshí, áádóó shí Bóhólníihii bízhi' yíídéeshiił, áko kǫ' yee énáhoosįįdígíí éí t'áá aaníí Diyin God át'ée doo. Áko diné t'áá át'é hadaasdzíi'go ádaaní, T'áá íiyisí yá'át'éehgo ha' oodzíí'.

²⁵Áádóó Iiláíjah éí Béíyal yá dahalne'ii ííłní, Nihí t'óó ahonohyóígíí biniinaa nihí átsé dóola ła' nídadoohdzį́įsgo hasht'edaahłéehgo t'áadoo biyaa kǫ'í danihidiyin bízhi' dayínóhshí.

²⁶Áko dóola beíltínígíí nídeidiidzį́įzgo hasht'edayiilaa, áko abínídóó ałní'ní'ą́ąjį' Béíyal bízhi' dayózhíigo ádaaní, Béíyal nílíinii, nihich'į' ééhonísįįh. Doo nidi háádę́ę'da iinéé' dazdiizts'ą́ą' da, doo nidi háádę́ę'da ha'oodzíi' da. Áko bikáá' náá'iiniihí ádayiilaaígíí yinaagóó nída'dilzhish.

²⁷Nít'éé' ałní'ní'ą́ągo Iiláíjah t'óó há nahałt'i'go ání, Yéego dadołwosh; jó, diyin jílį́; yáłti' daats'í, eelzhee' daats'í, ch'aa daats'í ííyá, doodaii' iiłhaazhgoda shį́į́ ch'éébidi'doolził.

²⁸Áko yéego dadilwoshgo diltłish bee áádóó tsiidétáanda bee ádíkáá'góó nidayiiłgéésh; wónáásdóó dił bąąh hadajiisxiih.

²⁹Áko nít'éé' ałní'ní'ą́ą́dóó bik'ijį' t'áá nidahidilgháashgo hííłch'į'go náá'iiniihjį' ahoolzhiizhgo doo nidi háádę́ę'da iinéé' dazdiizts'ą́ą' da, doo nidi háádę́ę'da ha'oodzíi' da, índa t'áadoo haa ákoniizį́į' da.

³⁰Áádóó Iiláíjah éí diné t'áá ałtso ííłní, Hágo, áháníjį' shich'į' ninohkááh. Áko diné t'áá át'é áháníjį' hach'į' niikai. Áádóó Bóhólníihii bibikáá' náá'iiniihí neheestǫ'ígíí hasht'ééyiidlaa.

³¹Áko Jéíkab éí Bóhólníihii bich'į' haadzíi'go Ízrel yinílyée doo, biłnínígíí éí biye'ké bits'ą́ą́dóó dine'é hazlį́'ígíí bik'ehgo Iiláíjah éí tsé naakits'áadahgo néidiinil,

³²áádóó éí tséhígíí bee bikáá' náá'iiniihí Bóhólníihii bízhi' bee wójíigo áyiilaa, áádóó bikáá' náá'iiniihí binaagóó ahéé'nígeedgo tó bee naakáhí naakidi tó hadeezbin yaadziidgo bíighahgo áyiilaa.

³³Áko chizh hazhó'ó hasht'eyiilaago dóola niyiishgizhgo chizh yikáá' niinínilgo ání, Tóshjeeh dį́į'go tó bee hadadołbingo didlidgo nááhániihii índa chizh bikáa'jį' yadahohnííł.

³⁴Áádóó ání, Naakidi nááná. Áko naakidi ákódajiilaa. Áádóó ánáádí'ní, Táadi nááná. Áko táadi ákódajiilaa.

³⁵Áko bikáá' náá'iiniihí tó binázlį́, áádóó ałdó' ahéé'ígeedí góyaa tó hadeidééłbįįd.

³⁶Kót'éego hííłch'į'go náá'iiniihjį' ahoolzhiizhgo Diyin God yá halne'ii Iiláíjah aháníjį' niníyáago ání, Bóhólníihii éí Éíbraham áádóó Áízak índa Ízrel biDiyin God nílíinii, bíni' díí jį́ bééhoozįįh le'; t'áá ni éí Ízrel dine'é biDiyin God nílį́, áádóó shí éí ná naal'a'í nishłį́, áko díí baa niséyáhígíí t'áá át'é nizaak'ehgo ásdzaa.

³⁷Shich'į' ééhonísįįh, Bóhólníihii, shich'į' ééhonísįįh, áko díí dine'é éí Bóhólníihii Diyin God nílį́įgo bił béédahodoozįįł, áádóó ni éí bijéí łahgo át'éego tsíńdabidííníłkééz.

³⁸Nít'éé' Bóhólníihii bikǫ' bidadíínóód, áko didlidgo nááhániihii áádóó chizh áádóó tsé índa łeezh ałtso yidííłid, índa ahéé'ígeed yę́ę góyaa tó iidííłk'ą́ą́'.

³⁹Áko diné t'áá át'é éí dayiiłtsą́ągo ni'jį' tsé'yaa daneeshjoolgo ádaaní, Bóhólníihii éí Diyin God nilį́; Bóhólníihii éí Diyin God nilį́į́ lá.

⁴⁰Áádóó Iiláíjah áháłní, Béíyal yá dahalne'ii daosił; t'ááká ła' yóó'oolyeed lágo. Áko deisiłgo Iiláíjah éí Kíshan tó nílíní góyaa yiní'eezhgo áadi neistseed.

⁴¹Áko Iiláíjah éí Éíhab ííłní, Nídiidáahgo íyą́ áádóó ídlą́, háálá aadę́ę́' t'óó ahayóí hooł tį́į́ł yiits'a'.

⁴²Nít'éé' Éíhab adooyį́į́ł áádóó adoodlį́įłgo nídii'na'. Áádóó Iiláíjah éí Dził Kármel bílátah góde hajiyáago ni'jį' nitsizhdinígo'go hagod bita' góne' azhnoot'ą́,

⁴³áko há naal'a'í ábijiní, K'ad ákóde hasínáahgo tónteel bich'į'go díní'į́į́'. Ákǫ́ǫ́ haayáago déé'į́į́' nít'éé' ání, Doo áhoot'éhí da. Áko ábijiní, Nílááh ákóde, tsosts'idi háádíídááł.

⁴⁴Nít'éé' ákódzaago tsosts'idi aleeh góne' ázhdííniid, Shoo, k'os áłts'íísígo diné bíla' nahalingo tónteel biyi'dę́ę́' haalzhóód. Áko ábijiní, Nílááh, Éíhab bich'į' dínáahgo ábidiní, Nitsinaabąąs bijáád naakiígíí bighą́ą́h díníiłgo t'ah doo aho'niiłtįįhdą́ą́' nił nááwoł.

⁴⁵T'áá áko k'os diłhiłgo hadahaashzhóód áádóó deeyolgo t'óó báhádzidgo aho'niiłtą́. Áádóó Éíhab éí Jézriyel kin haal'áágóó ná'ołbąs.

⁴⁶Áko Bóhólníihii éí Iiláíjah yił hólǫ́ǫgo bi'éé' bitsiist'ah gónaa ahénágiizhgo Jézriyel yah e'etiingóó Éíhab yilą́ąjį' nídiilwod.