Read Navajo I KINGS 19 Bible Online

I KINGS 19 - Navajo bible

I KINGS 19

¹Áko Éíhab éí Iiláíjah yaa naayáhígíí t'áá át'é áádóó Béíyal yá dahalne'ii t'áá ałtso diltłish yee neistseedígíí Jézebel yił hoolne'.

²Nít'éé' Jézebel hane' yił naal'a'ígíí ła' Iiláíjah yich'į' ayííł'a'go ání, Yiską́ągo kóhoodzaago diné nisíníłtseed yę́ęgi át'éego doo ákóniishłaa ládą́ą́' shí ałdó' t'ah yówehgo shidiyin danilíinii ákódashidoolííł.

³Áko éí baa ákozniizį́į'go nízhdii'na'go hwe'iina' bąąh hą́ą́sniizį́į'go Júdah dine'é bikéyah Bíyer-shííbagóó jiníyá; ákwii há naal'a'í nizhníłtį́.

⁴Áádóó hó éí honoojíígóó ła'a jį́ oodááł bíighahjį' nizhníyáago gad biyaagi dzineezdá, áko dazdootsaałígíí ádá jííkeedgo ájíní, K'adí, shiBóhólníihii nílíinii, she'iina' náádiidlé, háálá dashizhé'é yę́ę doo bitisdi ánísht'ée da.

⁵Kót'éego gad biyaagi jineeztį́įgo ajiiłhaazh, shoo, diyingo naal'a'í hodeelchidgo áháłní, Nídiidáahgo íyą́.

⁶Áko jideezghal nít'éé', shoo, tsííd bikáa'gi łees'áán sit'éé lá, áádóó jinées'ání bíighahgi tóshjeeh yázhí bee tó si'ą́. Áko ajííyą́ą́dóó tó joodlą́ą'go názneeztį́.

⁷Diyingo naal'a'í naakidi haa náánádzáá góne' hodeelchidgo ání, Nídiidáahgo íyą́, háálá ayóó ánízáágóó díníyá.

⁸Áádóó nízhdii'na'go ajííyą́ą́' áádóó tó joodlą́ą'go Diyin God biDził Hórebgóó dízdiin jį́ áádóó dízdiin tł'éé' éí ch'iyánígíí bee hadziilgo jiníyá.

⁹Áádóó tsé'áán léi'gi jiníyáago ákwii hwiiską́, nít'éé' jó, Bóhólníihii hach'į' haadzíi'go áháłní, Iiláíjah kwe'é lá ha'át'íí baa naniná?

¹⁰Áko ájíní, T'áá ałtsoní bee Bóhólníihii Diyin God bá haleego ásdzaa. Jó, Ízrel dine'é nibee aha'deet'ą́ yóó'adeideez'ą́; nibikáá' nááda'iiniihí dayiistł'ííd, áádóó ná dahalne'ii diltłish yee nideistseed, áko shí, t'áá shí t'éiyá, ch'ééyá, áko k'ad dashidiyoołhééł biniyé hadashintá.

¹¹Nít'éé' Diyin God áháłní, Nílááh, ch'ínínáahgo Bóhólníihii binááł dził bikáá'dóó dah yiizįįh. Áko shoo, Bóhólníihii kǫ́ǫ́ ch'íníyá, nít'éé' ayóó át'éego bidziilgo deeyolgo daadził nidahastǫ' índa Bóhólníihii binááł tsé dadíízéí, nidi Bóhólníihii éí níyol doo yee honíle' da, áádóó ííyoldóó bik'ijį' ni' nahaasnáá', nidi Bóhólníihii ni' hideesná'ígíí doo yee honíle' da,

¹²áádóó ni' hideesnáá'dóó bik'ijį' éí kǫ' hadíínáád, nidi Bóhólníihii éí kǫ' doo yee honíle' da, áádóó kǫ' hadíínáádóó bik'ijį' éí t'įįhdígo iinéé' diists'ą́ą́'.

¹³Kót'éego Iiláíjah éí yidiizts'ą́ą'go bi'éétsoh binii' yik'íísti'go ch'íníyáago tsé'áán bich'é'édą́ą'gi jiizį'. Jó, iinéé' dzidiizts'ą́ą'go áháłní, Iiláíjah kwe'é lá ha'át'íí baa naniná?

¹⁴Áko ájíní, T'áá ałtsoní bee Bóhólníihii Diyin God bá haleego ásdzaa. Jó, Ízrel dine'é nibee aha'deet'ą́ yóó'adeideez'ą́; nibikáá' nááda'iiniihí dayiistł'ííd, áádóó ná dahalne'ii diltłish yee nideistseed, áko shí, t'áá shí t'éiyá, ch'ééyá, áko k'ad dashidiyoołhééł biniyé hadashintá.

¹⁵Áádóó Bóhólníihii áháłní, Nílááh, Damáskas honoojítahjigo nídídááh; áadi yíníyáago Házeiyel éí Síriya dine'é yá aláahgo naat'áanii nilį́į doo biniyé ak'ah bik'i yeidííziłgo bidíísį́h;

¹⁶Nímshai biye' Jííhu éí Ízrel dine'é yá aláahgo naat'áanii nilį́į doo biniyé ak'ah bik'i yeidííziłgo bidíísį́h índa Éíbel-miihólahdóó Shéífat biye' Iiláísha éí nitsásk'eh góne' Diyin God yá halne' doo biniyé ak'ah bik'i yeidííziłgo bidíísį́h.

¹⁷Áko baa hoolzhiizhgo kót'ée doo; diné t'áá háiida Házeiyel bidiltłish yiyaa haalwodígíí éí Jííhu hodiyoołhééł, áádóó diné t'áá háiida Jííhu bidiltłish yiyaa haalwodígíí éí Iiláísha hodiyoołhééł.

¹⁸T'ahdii Ízrel dine'é bitahgi tsosts'idi míilgo t'ah baa áháshyą́; éí t'áá ałtso t'ah doo Béíyal yich'į' nitsidadigeeh da; t'áá ałtso t'ah doo nidi dayiits'ǫs da.

¹⁹Áádóó Iiláíjah dashdiiyáago Shéífat biye' Iiláísha bik'ízhníyá; éí hadáahgi naakits'áadah yilt'éego béégashii yee nidahwiiłdlaad lá; Iiláísha éí naakits'áadah góne' hoołdlałgo Iiláíjah hwíighah dah diiyáago bi'éétsoh hak'ijį' iiyííłhan.

²⁰Áádóó béégashii t'áá ákǫ́ǫgo Iiláíjah yikéé' nídiilwodgo ání, T'áá shǫǫdí, shíni'dii shizhé'é áádóó shimá deests'ǫs, áko índa nikéé' yisháał doo. Áko ábijiní, Nílááh, t'ą́ą́' nídídááh, haashą' niishłaa?

²¹Áko bits'ą́ą́' t'ą́ą́' dah nízhdiidzáago béégashii nízhdii'eezhgo nidzistseed, áko bee nihwiildlaadí bee bitsį' jishbéezhgo diné bazhníłtsoodgo dayííyą́ą́'. Áádóó nízhdii'na'go Iiláíjah bikéé' dashdiiyáago bá nidzis'a'.