Read Navajo I KINGS 2 Bible Online

I KINGS 2 - Navajo bible

I KINGS 2

¹Ákohgo David doo na'ázdoos'níí'góó haye' Sálaman nazneeztą́ą'go ájíní,

²Nihokáá' dine'é t'áá ałtso bá nidahwiit'ééhjí dah diishááh; éí bąą nidziil le' áádóó diné nílį́įgo i'díí'nílzin,

³áádóó Bóhólníihii niDiyin God bik'eh yínáałgo bik'eh ánít'éego yee nihwiiz'áanii áádóó bibik'eh ó'oo'níiłii áádóó yee nihodiiz'áanii índa yee hahaadzíi'ii éí bee ak'e'ashchį́įgo Mózes bibee haz'áanii bii' yisdzohígi át'éego baa honíyą́, áko yá'át'éehgo ná áhooníiłgo ła' danile' dooleełii baa nanináii t'áá ałtso t'áá hidínááhgóó t'áá ni yá'át'éehgo áálíił doo,

⁴áádóó Bóhólníihii éí saad shídéét'i'ii yee shá haadzí'ígíí kóníi ni', Na'áłchíní hazhó'ó ádaa ádahalyą́ągo deíkáahgo, áko shinááł deíkáahgo dabijéí t'áá át'é áádóó bii' naazíinii t'áá át'é yee t'áá aaníinii yik'eh ádaat'éego ahii' háá'ahiyoołchííłgóó éí Ízrel dine'é bá bikáá'dóó nahat'áii yikáá' dah nídahidinoobįįł doo.

⁵Náá'áłdó' Zerowáíyah biyáázh Jó'ab áshííł'įįdígíí nił bééhózin; éí Ízrel dine'é bisiláo dah deínéehii binanit'a'í nidilt'éego, éí Ner biye' Ábner áádóó Jííther biye' Améísa áyííł'įįdígíí baa ákoninizį́į́'. Jó, t'áá k'é hólǫ́ǫgo anaa' hólónígi át'éego éí diné nidilt'é nidzistseedgo bidił haziiz bee ákádzíszaazígíí áádóó hakee' bii' dziz'eezígíí ałdó' dił bąąhgo ájiilaa.

⁶Éí bąą nibee hódzą́ bik'ehgo ádíínííł, áko t'áadoo bitsiiba' haleehí t'ááká bił hózhǫ́ǫgo łeeh bi'dóltééł lágo.

⁷Nidi Gíliyad dine'é Barziléíyai biye'ké éí bich'į' ná'áhwiinít'į́'í doo, índa éí bíni'dii nibikáá' adání yikáa'jį' nída'adį́įh doo, háálá éí nik'is Ábsalam bik'ee nanishchéego shaa yíkaigo shaa dajoozba'.

⁸Áádóó, shoo, Bahúrim haz'ánídóó Bénjamin dine'é ła' Gííra biye' Shímiyai kwe'é nił hólǫ́; éí Méíhanéíyim kin shijaa'góó yishááł yę́ędą́ą́' shi'íníidzíi'go t'óó báhádzidgo bik'e'íyé'ígi át'éego shéédzíí', nidi bí Jórdan toohgi shidááh níyáago bich'į' Bóhólníihii bee ádee hadeesdzíi'go ábidishní, Doo diltłish bee nidiyeeshxéeł da.

⁹Éí bąą k'ad ádihozhdiilt'i'go áhwíínísin, háálá ni diné hóyáanii nílį́, áádóó áhodíílíiłgi nił bééhózin doo, nidi t'áadoo hatsiiba' haleehí hodi'yoolyéełgo hadił bił łeeh hodi'dooltééł.

¹⁰Nít'éé' David éí dahazhé'é yę́ę da'iiłhaazhígi át'éego i'jííłhaazhgo David hakin haal'áagi yóó'áho'diilyaa.

¹¹Íídą́ą́' David éí Ízrel dine'é binazhnit'áago dízdiin nááhai: Hííbran kin haal'áagi nazhnit'áago tsosts'id nááhai áádóó Jerúsalem kin haal'áagi nazhnit'áago tádiindóó ba'aan táá' nááhai.

¹²Áko Sálaman éí bizhé'é yę́ę David bibikáá'dóó nahat'áii yikáá' dah neezdá, áádóó aláahgo yee bóhólníihgo bił haz'áanii ayóó át'éego chánah silį́į́'.

¹³Áádóó Hágith biyáázh Adonáíjah éí Sálaman bimá Bath-shííba yaa níyá. Áko Bath-shííba ání, Hózhǫ́ǫgoósh yíníyá? Áko ání, Hózhǫ́ǫgo níyá.

¹⁴Nít'éé' ání, T'áadoo le'é nidideeshniił. Áko ábijiní, Hágoónee', bee shił hólne'.

¹⁵Áádóó Adonáíjah ání, Nił bééhózingo aláahgo bee íhólníihgo bił haz'áanii éí shí nít'éé', índa shí éí nanisht'áa doogo Ízrel dine'é t'áá át'é shich'į' dadéez'į́į́' nít'éé', ákondi aláahgo bee íhólníihgo bee shił haz'ą́ yę́ę shits'ą́ąjį' kólyaago shik'is bíí' silį́į́', háálá Bóhólníihii t'áá hó haidiní'ą́.

¹⁶Áko k'ad t'ááłáhígo ní'íídéeshkił, dooda, éí doo shididííniił da. Áádóó ábijiní, Bee handziih.

¹⁷Áádóó Adonáíjah ání, Nánooshkąąh, aláahgo naat'áanii Sálaman bich'į' hadíídzih, (háálá, dooda, doo nididooniił da,) jó, éí Shúnem dine'é asdzání nilíinii Ábishag sheidoołtéełgo she'asdzą́ą́ dooleeł.

¹⁸Áádóó Bath-shííba ání, Lą́'ąą, aláahgo naat'áanii ná ábidideeshniił.

¹⁹Nít'éé' Bath-shííba éí aláahgo naat'áanii Sálaman bich'į' yah ajííyá, Adonáíjah bá hazdoodzih biniyé. Áádóó aláahgo naat'áanii nídii'na'go hach'į' niníyá, áko bimá yich'į' yaa ádzaa áádóó bikáá'dóó nahat'áii yikáá' dah neezdá, índa aláahgo naat'áanii éí hamá yik'i dah dínóodaałii ła' yá nideiz'ą́, áko honish'náájígo dah neezdá.

²⁰Áko nít'éé' ájíní, T'áá áhoołts'íísígo baa nániideeshkąąłii laanaa nisin; nánooshkąąh, dooda, doo shididííniił da. Áádóó aláahgo naat'áanii áhodííniid, Yíníkeed, shimá; jó, dooda, doo nidideeshniił da.

²¹Áádóó Bath-shííba ání, Bíni'dii Shúnem dine'é asdzání Ábishag wolyéii éí nik'is Adonáíjah baa dooltéełgo be'asdzą́ą dooleeł.

²²Áko aláahgo naat'áanii Sálaman bimá yich'į' haadzíi'go ání, Ha'át'éegoshą' Shúnem dine'é asdzání Ábishag éí Adonáíjah bá yíníkeed? Da' hoot'ááłísh ałdó' bá yíníkeed, háálá shínaaí nilį́, áko bí bá, áádóó náá'iiłniihii Abáíyathar bá, índa Zerowáíyah biyáázh Jó'ab bá ádíníigo át'é?

²³Ákohgo aláahgo naat'áanii Sálaman éí Bóhólníihii yee ádee hadoodzíi'go ádííniid, Shígoyee' Diyin God atíshidoolííł áádóó t'ah náábíláahgo shidiyoołhééł; Adonáíjah doo t'áá bí be'iina' yik'ijį' haadzíí'góó ákóshidoolííł.

²⁴Éí bąą k'ad ts'ídá t'áá aaníí Bóhólníihii hiná; ákót'éego ts'ídá t'áá aaníí Adonáíjah t'áá díí jį́ t'óó hodi'yoolyééł. Bóhólníihii shohoníłdzilgo áshiilaa, áádóó David shizhé'é bibikáá'dóó nahat'áii yikáá' dashineesdá, índa ahii' háá'ahiyoolchííłgóó aláahgo naat'áanii nidahaleeh dooleełii shá yee haadzí'ígíí bik'ehgo shá áyiilaa.

²⁵Áádóó aláahgo naat'áanii Sálaman éí Jiihóíyada biye' Biinéíyah ákǫ́ǫ́ ayííł'a', áko yił íídéelgo yiyiisxį́.

²⁶Nít'éé' aláahgo naat'áanii éí náá'iiłniihii Abáíyathar ííłní, Nílááh, ni Ánathath kin haal'áágóó dínááh, t'áá ni nikéyahjį', háálá dadíítsaał bą́ą́h anílį́, nidi t'áá k'ad éí doo nidiyeeshxéeł da, háálá biniinaanii éí Bóhólníihii Diyin God bitsits'aa' dólzinii shizhé'é David yę́ę binááł nisíní'ą́, áádóó ałdó' nich'į' nahwiisnáá', t'áá shizhé'é yę́ę t'áá át'é bee bich'į' nahwiisnáá nít'éé' yę́ęgi át'éego.

²⁷Kót'éego Sálaman éí Abáíyathar joolyéii Bóhólníihii bich'į' doo náá'iiłniihii náájídlį́į da doogo t'óó nahjį' hahóółt'e'. Éí Bóhólníihii t'áá bí bizaad bohodoolníiłgo Sháíloh haz'ánídi Íílai ba'áłchíní ahoolchíiłii bídéét'i'go yee haadzíí' nít'éé'.

²⁸Jó'ab hane' baa yit'ą́; jó, Jó'ab éí Adonáíjah bikéé' nizhníyáá nít'éé', nidi Ábsalam éí doo bikéé' nizhníyáa da, áko Jó'ab éí Bóhólníihii biníbaal bii' hodílzinii bich'į' azhnííchą́ą́', áádóó bikáá' náá'iiniihí adee' bits'ádaaz'áhígíí jisił.

²⁹Nít'éé' aláahgo naat'áanii Sálaman bił hóóne'go Jó'ab éí Bóhólníihii biníbaal bii' hodílzinii yich'į' anííchą́ą́', áádóó, shoo, bikáá' náá'iiniihí yíighahgi sizį́. Nít'éé' Sálaman éí Jiihóíyada biye' Biinéíyah ákǫ́ǫ́ ayííł'a'go ííłní, Nílááh, bił andeełgo síłhé.

³⁰Áko Biinéíyah éí Bóhólníihii biníbaal bii' hodílzindi jiníyáago Jó'ab ábijiní, Aláahgo naat'áanii kóní, Wóshdę́ę́' ch'ínínááh. Áko ání, Dooda, t'áá kwe'é yee' dadeestsaał. Áádóó Biinéíyah éí aláahgo naat'áanii díí saadígíí yił náhoolne'go ání, Jó'ab kóníigo shich'į' haadzíí'.

³¹Áádóó aláahgo naat'áanii áháłní, T'áá ánínígi át'éego ánílééh; bił andeełgo síłhé áádóó yóó'ádíílííł; kót'éego Jó'ab t'áadoo biniinaanígóó diné nidzistseedígíí bidił doo bee nihidahodidoot'ih da biniyé shí áádóó shizhé'é yę́ę ba'áłchíní ahoolchíiłii bił doo nihihodiit'i'góó ádíílííł.

³²Jó, Bóhólníihii atíhodoolíiłgo hadił hak'ijį' nídoodleeł; t'áá hó diné nidilt'éego haláahgo t'áá ákogi át'éii áádóó yá'át'éehii nilį́įgo diltłish bee nidzistseed, áko shizhé'é David t'áadoo bił bééhóziní. Ízrel dine'é bisiláo dah deínéehii yinanit'a'í nilíinii Ner biye' Ábner áádóó Júdah dine'é bisiláo dah deínéehii yinanit'a'í nilíinii Jííther biye' Améísa ákójííł'įįd lá.

³³Áko díí diné bidił yę́ę bee Jó'ab bihodiit'i' doo áádóó ha'áłchíní ahoolchíłígíí ałdó' bihodiit'i'go ahool'áa doo, nidi David áádóó ba'áłchíní áádóó ba'áłchíní náás ahoolchíiłii índa bibikáá'dóó nahat'áii éí Bóhólníihii bits'ą́ą́dę́ę́' bee ach'į' hózhǫ́ náhásdlį́į'go ahóyéel'áa doo.

³⁴Áko Jiihóíyada biye' Biinéíyah ákóde haayáago yił íídéelgo yiyiisxį́, áádóó t'áá bí bighandi honoojíidi yóó'ájiilaa.

³⁵Áádóó aláahgo naat'áanii éí Jiihóíyada biye' Biinéíyah joolyéii siláo dah deínéehii binanit'a'í jílį́į doo biniyé Jó'ab yitsásk'eh góne' ahóółt'e', áádóó aláahgo naat'áanii éí Zéídak náá'iiłniihii nilį́į doo biniyé Abáíyathar bitsásk'eh góne' ayííłt'e'.

³⁶Áko aláahgo naat'áanii i'ííł'a'go Shímiyai hágo yidííniidgo ííłní, Jerúsalem kin haal'áadi hooghan ádá ánílééh índa t'áá ákwe'é kééhonít'į́įgo t'áadoo háájída nanináhí doo.

³⁷Áko nílááhgóó ch' ííníyá bijį́ Kídran tó nílínígíí ha'naa nííníyáago díí ts'ídá nił bééhodoozįįł: t'áá aaníí dadíítsaałígíí t'áá ni nidił bee nináhodiit'i'go dadíítsaał.

³⁸Áádóó Shímiyai éí aláahgo naat'áanii ííłní, Ádínínígíí yá'át'ééh; bóhonishníihii aláahgo naat'áanii t' áá ádííníniidígi át'éego ná naal'a'í nishłíinii ákódeeshnííł. Áko Shímiyai éí Jerúsalemgi haghango t'óó ahayóí yiską́.

³⁹Nít'éé' táá' nááhaijį' nihoolzhiizhgo Shímiyai bá naalte' nidilt'éego Gath kin haal'áádóó aláahgo naat'áanii Méíyakah biye' Éíkish yich'į' yóó'ahi'noolchą́ą́'. Áko éí Shímiyai yił dahoolne'go ádaaní, Shoo, ná naalte' Gathdi naa'aash.

⁴⁰Áko Shímiyai nídii'na'go bitélii yik'i dah aznilgo há naalte' hazhdínóotaał biniyé Gath kin haal'áágóó Éíkish bich'į' jiníyá; nít'éé' Shímiyai éí Gathgóó nijiyáago áádę́ę́' há naalte' názhní'eezh.

⁴¹Áádóó Sálaman bił hóóne', Shímiyai éí Jerúsalemdóó Gathgóó naayá, áádóó áádę́ę́' nínáánádzá.

⁴²Áko aláahgo naat'áanii éí Shímiyai yíká i'ííł'a'go hágo yidííniidgo ííłní, Da' doósh Bóhólníihii bee ádee haniyííłdzíi' go ándííniid da? Díí ts'ídá nił bééhodoozįįł: nílááhgóó ch'ííníyá bijį́ índa háájída nisíníyáago t'áá aaníí dadíítsaał. Áko áshidííníniid ni', Diséts'ą́'ígíí éí yá'át'ééh.

⁴³Ákoshą' ha'át'éego Bóhólníihii bee ádee hadíínídzí'ígíí, áádóó shí nich'į' bee haasdzíi'go bee ándííniidígíí t'áadoo bik'eh íinidzaa da?

⁴⁴Aláahgo naat'áanii éí Shímiyai náá'áłdó' ánéidoo'niid, Doo yá'áshǫ́ǫ́góó nitsáhákees t'áá át'é nijéí bii' ádaa ákonínízin; shizhé'é David yę́ę bide íinínízingo nabí'si'ní'įįd; éí bąą Bóhólníihii éí doo yá'áshǫ́ǫ́góó na'í'si'ní'įįdígíí nik'ijį' násdlį́į́' íidoolííł,

⁴⁵nidi aláahgo naat'áanii Sálaman bik'ihojidlíi doo, índa David bibikáá'dóó nahat'áii chánah íidoolíiłgo Bóhólníihii binááł ákót'éego ahool'áa doo.

⁴⁶Áko aláahgo naat'áanii éí Jiihóíyada biye' Biinéíyah yiyííł'aad, áádóó éí ch'íníyáago Shímiyai yił íídéelgo yiyiisxį́. Kót'éego Sálaman bibee óhólníihgo bił haz'áanii chánahgo bidziil silį́į́'.