Read Navajo I KINGS 20 Bible Online

I KINGS 20 - Navajo bible

I KINGS 20

¹Nít'éé' Síriya dine'é yá aláahgo naat'áanii Ben-héídad éí bisiláo t'áá át'é áłah áyiilaa; tádiindóó ba'aan naaki aláahgo naat'áanii danilíinii bił áádóó łį́į'da índa tsindaabąąs bijáád naakiígíida bee dashdiiná; éí bee Samériya kin haal'áhígíí yizéénáshzhiizh áádóó yik'ijį' anaa' dahasłį́į́'.

²Áádóó kintahjį' Ízrel dine'é yá aláahgo naat'áanii Éíhab bich'į' hane' nidei'áhígíí ayííł'a'go ííłní, Ben-héídad kóní,

³Nibéésh łigaii áádóó ni'óola éí shí; neda'asdzą́ą́ áádóó na'áłchíní t'áá íiyisí danizhónígíí ałdó' shí.

⁴Áko Ízrel dine'é yá aláahgo naat'áanii haadzíi'go ání, Shinanit'a'í, aláahgo naat'áanii nílíinii, t'áá ádínínígíí bik'ehgo shí áádóó shee hólónígíí t'áá ałtso ni.

⁵Nít'éé' hane' nidei'áhígíí náánákaigo ádaaní, Ben-héídad kót'éego haadzíi'go ání, Nich'į' niséł'a'go ádííniid, Nibéésh łigaii áádóó ni'óola, índa neda'asdzą́ą́ áádóó nada'áłchínída shaa díínił,

⁶ákondi yiską́ągo kwe'é nahalzhiishgo shá nidaal'a'í nich'į' deesh'aałgo nighan góne' índa ná nidaal'a'í dabighan góne' nida'dooch'ił, áko kót'ée doo, t'áá ha'át'íí shį́į́ ílį́įgo síníłnilígíí éí nits'ą́ą́' nídeididooniłgo adeidoojih.

⁷Nít'éé' Ízrel dine'é yá aláahgo naat'áanii éí kéyahdóó hastóí aląąjį' naazíinii t'áá ałtso hágo yidííniidgo ání, Shoo, nídanihooshkąąh, daah'į́įgo díí diné é'éts'ih yíkantá, háálá sheda'asdzą́ą́ áádóó shada'áłchínída índa shibéésh łigaiida, shi'óolada yíká shich'į' na'as'a'go, áko t'áadoo dooda bidííniid da.

⁸Áko hastóí aląąjį' naazíinii áádóó diné t'áá ałtso ádahałní, T'áadoo yíísíníłts'ą́'í, doo nidi lą́ adííłeeł da.

⁹Éí bąą Ben-héídad bá hane' nidei'áhígíí ábijiní, Shinanit'a'í, aláahgo naat'áanii bił dahołne', Áłtséédą́ą́' ná naal'a'í biniyé bich'į' nisíníł'a' yę́ę éí t' áá át'é ádeeshnííł, nidi díí éí doo ádeeshníił da. Áko hane' nidei'áhígíí dah nídiikaigo Ben-héídad hane' yaa nídeiz'ą́.

¹⁰Áádóó Ben-héídad hach'į' anáá'ííł'a'go ání, Samériyadóó łeezh yílá hadeezbingo éí diné shikéé' yikahígíí t'áá ałtso bá dabíighah ládą́ą́' shí ałdó' t'ah yówehgo shidiyin danilíinii ákódashidoolííł.

¹¹Áko Ízrel dine'é aláahgo binanit'a'í haadzíi'go ání, Bił dahołne', T'áá háiida béésh éé' háidii'nilígíí ádaa has'nihígi át'éego éí béésh éé' biishdoogáłígíí ádaa hojó'niih lágo.

¹²Nít'éé' Ben-héídad chaha'oh góne' aláahgo naat'áanii danilíinii yił da'adlą́ągo díí hane' yidiizts'ą́ą́', áko bá nidaal'a'í ííłní, Bich'į' ni'ahi'doohnííł. Áko kin haal'á yik'ijį' ni'ahi'dee'nil.

¹³Áádóó shoo, Diyin God yá halne'ii léi' Ízrel dine'é yá aláahgo naat' áanii Éíhab yaa níyáago ání, Bóhólníihii kóní, Díí t'óó ahayóí dah oonéłígíísh t'áá át'é yiniłtsą́? Jó, díí jį́ naa dideesh'ááł, áko shí Bóhólníihii ásht'į́įgo nił bééhodoozįįł.

¹⁴Nít'éé' Éíhab ání, Háishą' bee? Áko ání, Bóhólníihii kóní, T'áá kodóó aláahgo naat'áanii bitsíłkéí siláo danilíinii lą́ą. Nít'éé' ání, Háishą' anaa' yich'į' adooł'aał? Áádóó bich'į' háádzoodzíi'go ájíní, Ni lą́ą.

¹⁵Nít'éé' aláahgo naat'áanii bitsíłkéí siláo danilíinii jííłta'go naakidi neeznádiindóó ba'aan tádiindóó ba'aan naaki lá, áádóó bik'ijį' diné t'áá ałtso t'áá Ízrel dine'é nidi t'áá ałtso jííłta'go tsosts'idi míilgo ánéelą́ą́'.

¹⁶Áádóó ałní'ní'ą́ągo ch'ékai. Nidi Ben-héídad áádóó aláahgo naat'áanii tádiindóó ba'aan naaki háká ííjé'ígíí bił chaha'oh góne' da'jidlą́ągo nídazdí'néesdlą́ą́'.

¹⁷Áko aláahgo naat'áanii bitsíłkéí siláo danilíinii áłtsé ch'ékai, áádóó Ben-héídad ch'í'níł'a', nít'éé' bił dahoolne'go ádaaní, Samériya kin haal'áádę́ę́' diné ła' ch'ékai.

¹⁸Áádóó ání, K'égo yikah ládą́ą́' yah adadoohnił; anaa' biniyé yikah ládą́ą́' yah adadoohnił.

¹⁹Kót'éego díí aláahgo naat'áanii bitsíłkéí siláo danilíinii áádóó siláo t'áá bikéé' yinéełgo kin haal'áádę́ę́' ch'íníná.

²⁰Áko t'áá ałtso t'áá bí diné nideideez'ánígíí nideistseed, áádóó Síriya dine'é adahineezhchą́ą'go Ízrel dine'é akéé' nídiijéé' nít'éé'; Síriya dine'é yá aláahgo naat'áanii Ben-héídad éí siláo danilíinii łį́į́' yee nidaabaahígíí yił łį́į́' ayaa bił háájéé'.

²¹Áádóó Ízrel dine'é yá aláahgo naat'áanii ch'íníyáago łį́į́' áádóó tsindaabąąs bijáád naakiígíí yee nidaabaahígíí yił ał k'iijée'go Síriya dine'é t'óó ahayóigo nideistseed.

²²Diyin God yá halne'ii éí Ízrel dine'é yá aláahgo naat'áanii yaa níyáago ííłní, Nílááh, nidziilgo í'dílnééh, áádóó hazhó'ó baa nidíínaałígíí hazhó'ó baa nanítá, háálá nááhaigo Síriya dine'é yá aláahgo naat'áanii nich'į' nídidoobah.

²³Síriya dine'é yá aláahgo naat'áanii bá nidaal'a'í ádabiłní, Dawók'ą́ą́góó diyinígíí éí dabidiyin; éí bąą bí danihiláahgo dabidziil, nidi bíni'dii halgaidi bił ałk'iidiijah, áko t'áá aaníí nihí haláahgo danihidziil doo.

²⁴Áko kódíínííł, Aláahgo naat'áanii danilíinii bá nahaz'ánídóó t'ááłá'í nítínígo nahjį' hahidíínił áádóó dabitsásk'eh góne' siláo binanit'a'í danilíinii ahidíínił,

²⁵áádóó siláo yóó'íínínil yę́ę bíighahgo ánánéelą́ą'go índa łį́į́' bik'eh nánítį́įgo tsinaabąąs bijáád naakiígíí bik'eh nání'ą́ągo ahíidíínił, áko halgaidi bik'iidiijah; t'áá aaníí nihí dahaláahgo danihidziil doo. Áko ádaanínígíí bá jidiizts'ą́ą'go bi'jiilaa.

²⁶Nít'éé' nááhaigo Ben-héídad éí Síriya dine'é ahíyiinilgo Éífek kin haal'á góde Ízrel dine'é yik'iidoojah biniyé haazná.

²⁷Áko Ízrel dine'é ahídabidii'nilgo bikiin dooleełii bitaa dadeest'ą́ągo yich'į' nídii'ná; Ízrel dine'é éí tł'ízí yázhí naakigo ał'ąą dah noolkałígíí nahalingo hanááł niníná, nidi Síriya dine'é éí kéyah t'áá át'éé nít'éé' nihinéést'e'.

²⁸Nít'éé' Diyin God bá halne'ii léi' níyáago Ízrel dine'é yá aláahgo naat'áanii yich'į' haadzíi'go ání, Bóhólníihii kóní, Síriya dine'é ádaaní, Bóhólníihii éí deílk'idgóó bidiyin jílį́, nidi honíts'aa'góó éí doo bidiyin jílį́į da, daaní; éí bąą díí ayóó ánéelą́ą'go dah oonéłígíí t'áá át'é naa dideesh'ááł, áko shí éí Bóhólníihii ásht'į́įgo nił bééhodoozįįł.

²⁹Áko tsosts'id yiską́ąjį' ahíłnaashiijí nidahaazná. Áádóó tsosts'id yiską́ągo ałk'iijée'go Ízrel dine'é éí Síriya dine'é t'áá ni' naajeehígíí t'ááłáhídi míilgo t'áá ła'a jį́ nideistseed.

³⁰Nidi łahjį' éí Éífek kin haal'áágóó adaneezhchą́ą́'; ákwii naadiin tsosts'idi míilgo diné ch'éékaígíí éí kin haal'áii ditą́ągo binaa ahéé'ítł'inígíí bik'iiłdááz. Áko Ben-héídad éí kin haal'áajį' náwóne' góne' anííchą́ą́'.

³¹Áko bá nidaal'a'í ádabiłní, Jó k'ad, Ízrel dine'é yá aláahgo naat'áanii danilíinii dajooba'go baa dahosidiits'ą́ą́'; nánooshkąąh, nihíni'dii tł'oh yishbizh nihiníí' gónaa bik'ídadiiltih, índa tł'óół nihitsii' binídadiilt'ihgo Ízrel dine'é yá aláahgo naat'áanii bich'į' diikah; néididoochiłgo da'át'é.

³²Kót'éego tł'oh yishbizh biníí' gónaa yik'ídeisti', índa tł'óół bitsii' yinídeist'i'go Ízrel dine'é yá aláahgo naat'áanii yaa yíkaigo ádaaní, Ná naal'a'í Ben-héídad kóní, Nánooshkąąh, shíni'dii hinishná. Áko ájíní, Da' t'ahdiísh hiná? Éí lá shik'is át'é ni.

³³Ákohgo diné t'áá ha'át'éegoda í'jiilaaígíí bee bééhodoozįįł danízingo ts'ídá hazhó'ó haa háashjéé'; éí yaa ákodaniizį́į'go ádaaní, Nik'is Ben-héídad. Nít'éé' ájíní, Nílááh, bił de'nohkááh. Áádóó Ben-héídad hach'į' niníyáago tsinaabąąs bijáád naakiígíí biih ninááh bizhdííniidgo yiih yíyá.

³⁴Áko Ben-héídad áháłní, Shizhé'é éí kin hadaas'á nizhé'é yighaiideet'ánígíí naa nídideesh'áałgo Samériyagi shizhé'é kintah da'nítiingo áyiilaaígi át'éego Damáskasgi kintah da'nítiingo ádíílííł. Nít'éé' Éíhab ání, Díí aha'deet'ą́ bił dah nándideesh'aał. Kót'éego bił ahazhdeet'ą́ągo dah náhodiił'a'.

³⁵Diyin God yá dahalne'ii bídahooł'aahígíí ła' éí Bóhólníihii bizaad k'ehgo yił kééhat'íinii ííłní, Nánooshkąąh, náshidiiłhaał. Áko éí diné doo íiniizį́į' da.

³⁶Nít'éé' ábijiní, Bóhólníihii ánínígíí doo bik'eh hwííníł'įįdígíí biniinaa, jó, t'áá shits'ą́ąjį' dah diniyáhí, náshdóítsoh bitsiijį' ditł'ooígíí nidiyoołhééł. Áko bits'ą́ą́' dashdiiyáago t'áá áko náshdóítsoh bitsiijį' ditł'ooígíí hak'íníyáago hwiisxį́.

³⁷Nít'éé' diné ła' bik'ínáádzídzáago ábijiní, Nánooshkąąh, náshidiiłhaał. Áko náhodííłhaalgo éí yee atíhoolaa.

³⁸Kót'éego Diyin God yá halne'ii dah diiyáago doo béého'dílzin da doo biniyé bitsii' yik'ídeezdizgo binák' ee na'níłbaalgo atiingi aláahgo naat'áanii yiba' sidá.

³⁹Áko aláahgo naat'áanii kǫ́ǫ́ yigáałgo yéego bich'į' ázhdííniidgo ájíní, Ná naal'a'í éí da'ahijigą́ ałníí' góne' ííyáá nít'éé'; shoo, diné léi' nahjį' hááyáago diné ła' yił shaa ní'áazhgo ání, Díí diné baa áhólyą́; t'áá haa dayit'éego bóhoohya' ládą́ą́', éí t'áá ni bá ninádíítłish, éí doodago béésh łigaii tálent wolyéii ninádíídlééł.

⁴⁰Ná naal'a'í nishłíinii kǫ́ǫ́ áádóó nahgóó tádíshníishgo háájí shį́į́ ííyáá lá. Áádóó Ízrel dine'é yá aláahgo naat'áanii áháłní, Ákót'éego ná nihodoot'ááł; t'áá ni ádá nihwíínít'ą́.

⁴¹Áádóó hatsii' bik'ídeesdizgo hanák'ee naníbaalígíí tsį́įłgo denizhníłts'ǫ́ǫ́d, áko Ízrel dine'é yá aláahgo naat'áanii éí Diyin God yá halne'ii ájít'į́į́ lágo hwééhoosįįd.

⁴²Áko ábijiní, Bóhólníihii kóní, Diné ła' ałtso ádííłdįįł nidííniidígíí béédííníchidgo biniinaa be'iina' bá ninádíítłish, áádóó nidine'é éí bí bidine'é yá ninádínóodah.

⁴³Áádóó Ízrel dine'é yá aláahgo naat'áanii éí t'áá íiyisí bíni' yii'a'go bik'ee doo bił haldingóó Samériyadi bighango ákǫ́ǫ́ anáádzá.