Read Navajo I KINGS 21 Bible Online

I KINGS 21 - Navajo bible

I KINGS 21

¹Kódahóót'įįdóó bik'ijį' Jézriyel kin haal'áádóó diné nilíinii Néíbath éí Jézriyelgi Samériya kéyahdóó aláahgo naat'áanii Éíhab bikin bíighahgóó hach'il na'atł'o'ii yíl'á.

²Áko Éíhab éí Néíbath yich'į' haadzíi'go ání, Ch'il daadáanii k'éédíshdléeh doo biniyé nich'il na'atł'o'ii yíl'áhígíí shaa diní'aah, háálá éí shighanjį' t'áá áyídí; ch'il na'a'tł'o'ii k'éédílyééh bá yá'áhoot'éhígi bideená naa hodideesh'ááł; éí doodaii', nił yá'át'ééh ládą́ą́' t'áá béeso bą́ą́h ílį́į́ góne' bik'é naa deeshnił.

³Áádóó Néíbath éí Éíhab ííłní, Dooda lą́ą, dashizhé'é yę́ę daabíí' nít'é'ígíí doo naa dideesh'áał da. Bóhólníihii dooda shó'ní.

⁴Jézriyeldóó diné nilíinii Néíbath hach'į' yee haadzíí', Dashizhé'é yę́ę daabíí' nít'é'ígíí doo naa dideesh'áał da, hodííniidii bik'ee Éíhab bíni' si'ą́ągo doo bił haldingóó bikin góne' yah anáádzá. Áko Éíhab bitsásk'eh yikáá' neeztį́įgo níwehjigo náshjizhgo doo t'áá k'ad ííyą́ą' da.

⁵Nidi hwe'asdzą́ą́ Jézebel haa níyáago áháłní, Ha' át'íísh bąąh níni'go doo íyą́ą da?

⁶Áko be'asdzą́ą́ ííłní, Jézriyeldóó diné nilíinii Néíbath bich'į' haasdzíi'go ábidishní, Nich'il na'atł'o'ii yíl'áhígíí béeso bideená shaa diní'aah; doodaii', nił yá'át'ééh ládą́ą́' ch'il na'a'tł'o'ii yíl'áhígíí náánáła' bideená naa dideesh'ááł; nít'éé' haadzíi'go ání, Shich'il na'atł'o'ii yíl'áhígíí doo naa dideesh'áał da, shidííniid.

⁷Nít'éé' hwe'asdzą́ą́ Jézebel áhodííniid, K'ad Ízrel dine'é bibee óhólníihii binanít'á; nídiidáahgo íyą́, índa nijéí bił hózhǫ́ǫ le'; shí Jézriyeldóó diné nilíinii Néíbath bich'il na'atł'o'ii yíl'áhígíí naa dideesh'ááł.

⁸Áko nít'éé' Jézebel éí naaltsoos Éíhab bízhi' dabikáa'go índa biyoostsah bee bik'i nida'iist'ą́ągo áádóó t'áá éí bee bidáda'deeshjée'go hastóí aląąjį' naazíinii índa aghá dahideezíinii kin haal'áagi Néíbath yił kéédahat'ínígíí yich'į' ádayiilaa.

⁹Nít'éé' naaltsoos ádayiilaaígíí éí bii' kóníigo dabikáá', Doo adánígíí daoł'aah, áádóó Néíbath éí diné bitahgi alą́ąjį' dah bidínóołdaał,

¹⁰áádóó diné doo yá'áshóonii naakigo bidááhdóó dah bidínóołkeeł, éí hak'ijį' nahodoolnih kóníigo, Diyin God áádóó aláahgo naat'áanii baa'ihgo bá háínídzíí' yididooniił. Áádóó tł'óó'góó ch'ídadoołtéełgo bił nidazdoołniił.

¹¹Áko hastóí aląąjį' naazíinii índa aghá dahideezíinii hakin haal'áagi kéédahat'ínígíí éí naaltsoos bii' ak'e'ashchį́įgo Jézebel hach'į' ádayiilaaígíí bik'ehgo ádadziidzaa.

¹²Áádóó doo adą́ą da daaníigo yee dahooł'a'go Néíbath éí diné bitahdóó alą́ąjį' dah deineesdá.

¹³Nít'éé' ákwii diné doo yá'áshóonii naaki yah íí'áázh, éí hadááhdę́ę́' dah neezkéego hak'ijį' nahasne'; t'áá Néíbath bik'ijį' diné t'áá dabinááł kóníigo, Néíbath éí Diyin God áádóó aláahgo naat'áanii baa'ihgo yá haadzíí'. Nít'éé' kin haal'áádóó ch'ídahastį́įgo hoł nidadzisne'.

¹⁴Áko nít'éé' Jézebel yich'į' ada'as'a' go ádaaní, Néíbath yę́ę bił nidzílne'.

¹⁵Kódahóót'įįdgo Jézebel éí Néíbath yę́ę bił nidzílne'ígíí yaa hodiizts'ą́ą'go Éíhab ííłní, Nídiidááh, Jézriyeldóó diné nilíinii Néíbath yę́ę bich'il na'atł'o'ii yíl'áhígíí éí béeso bik'é baa níníiłgo doo íinízin da yę́ę ádaa dinít'aah; jó, Néíbath éí doo hináa da, nidi daaztsą́.

¹⁶Ákót'éego Éíhab éí Néíbath daaztsánígíí yaa hodiizts'ą́ą'go, nídii'na'go Jézriyeldóó diné nilíinii Néíbath yę́ę bich'il na'atł'o'ii yíl'áhígíí ádeididoot'ááł biniyé ákóyaa níyá.

¹⁷Áádóó Bóhólníihii éí Tíshbeh diné nilíinii Iiláíjah yich'į' haadzíi'go ání,

¹⁸Nídiidáahgo, Ízrel dine'é yá aláahgo naat'áanii Éíhab bidááh díínááł biniyé Samériya góyaa dínááh; éí áadi naaghá; jó, Néíbath yę́ę bich'il na'atł'o'ii yíl'áhígíí ádeididoot'ááł biniyé ákóyaa ííyá.

¹⁹Áko bich'į' hadíídzihgo kóbididííniił, Bóhólníihii kóní, Da' asíníłhį́įgoósh, áádóó ałdó' nídi'nilá? Áádóó bich'į' hadíídzihgo kóbididííniił, Bóhólníihii kóní, Łééchąą'í éí Néíbath yę́ę bidił dayííłch'alígi ákwe'é łééchąą'í t'áá ni nidił deidoołch' ał.

²⁰Nít'éé' Éíhab éí Iiláíjah ííłní, Shi'ana'í nílíinii, da' shik'ííníyáásh? Áko bich'į' hadzoodzíí', Nik'íníyáá lą́ą, háálá Bóhólníihii binááł t'áá ni doo yá'áshóonii bindíílnishgo niná'ádíínít'ą́.

²¹Jó, doo yá'áshóonii nik'ijį' kódeeshłííł áádóó nits' ą́ą́dóó diné deíchíhígíí t'áá éí Ízrel kéyahdóó diné daadziihígíí ałtso Éíhab bits'ą́ą́dóó áhodeeshdįįł,

²²áádóó Nííbat biye' Jerobówam índa Aháíjah biye' Béíyasha bada'áłchíní náás ahoolchíiłii áshłaaígi át'éego na'áłchíní náás ahoolchíiłii ákót'éego ádeeshł ííł, háálá bee áhodoolchįįłii bee shá hwííníłchįįdgo Ízrel dine'é ádił nida'iisíihgo íinilaa.

²³Áádóó Bóhólníihii ałdó' Jézebel yaa haadzíi'go ání, Jézriyel kin haal'áii binaa ahéé'ítł'in bíighahgi łééchąą'í éí Jézebel deidoolghał.

²⁴T'áá háiida Éíhab bits'ą́ą́dóó dahodzizlį́'ígíí kin haal'áagi dazhninéhígíí łééchąą'í dahodoolghał, índa t'áá háiida dadzígaidi dadziztsánígíí naat'agii dahodooyį́į́ł.

²⁵Nidi Éíhab hwe'asdzą́ą́ Jézebel hodiyiisnáa'go Bóhólníihii binááł doo yá'áshóonii binizhdoolnishgo biniyé niná'ázhdeet'ánígíí éí diné doo ła' ákót'ée da nít'éé'.

²⁶Áko Bóhólníihii éí Ízrel dine'é bits'ą́ą́dóó Ámor dine'é ch'íininíłkaadígíí éí yaa naaskaii t'áá át'é bik'ehgo bida'alyaii bich'į' nahojiłáago bee t'áá íiyisí doo yildinii baa nijiyá.

²⁷Nít'éé' Éíhab díí saad yidiizts'ą́ą'go bi'éé' ák'iniyiisdláadgo tł'oh yishbizh ák'íísti'go t'áadoo ayání tł'oh yishbizh yii' sitį́, áádóó doo ha'atahaa nijigháá nít'éé'.

²⁸Áko Bóhólníihii éí Tíshbeh diné nilíinii Iiláíjah yich'į' haadzíi'go ání,

²⁹Shoo, Éíhab shinááł ayáhígo í'diilyaaígíísh yiniłtsą́? Shinááł ayáhígo ázhdiilyaaígíí biniinaa hwíyoołkááł biyi' doo yá'áshóonii doo hak'ijį' bi'deeshnih da, nidi haye' bíyoołkááł biyi' doo yá'áshóonii ha'áłchíní náás ahoolchíłígíí bik'ijį' bi'deeshnih.