Read Navajo I KINGS 22 Bible Online

I KINGS 22 - Navajo bible

I KINGS 22

¹Áko Síriya dine'é áádóó Ízrel dine'é bita'gi doo anaa' hólǫ́ǫ́góó táá' nááhai.

²Nít'éé' táá' náhááh binih Júdah dine'é yá aláahgo naat'áanii Jiiháshafat éí Ízrel dine'é yá aláahgo naat'áanii yich'į' níyá.

³Áádóó Ízrel dine'é yá aláahgo naat'áanii bá nidaal'a'í ííłní, Gíliyad kéyahdi Réímath kin haal'áhígíí éí nihígo t'óó ádahodíníilzéé', doo nidi Síriya dine'é yá aláahgo naat'áanii bighadadiniit'aah da. Da' éísh nihił béédahózin?

⁴Áko Jiiháshafat ííłní, Réímath-gíliyad kin haal'áágóó anaa' biniyé daats'í shił díí'ash? Áádóó Jiiháshafat éí Ízrel dine'é yá aláahgo naat'áanii ííłní, Shí t'áá nigi ánísht'é; shidine'é éí nidine'égi ádaat'é; dashilį́į́' ninilį́'ígi ádaat'é.

⁵Áádóó Jiiháshafat éí Ízrel dine'é aláahgo binanit'a'í ííłní, Nánooshkąąh, áłtsé díí jį́ Bóhólníihii bínabídíłkid.

⁶Nít'éé' Ízrel dine'é aláahgo binanit'a'í éí náásgóó áhodooníłígíí yaa dahalne'ii dį́įdi neeznádiingo diné áłah áyiilaago ííłní, Réímath-gíliyad daats'í bich'į' dishbááh, doodaii' ááhodeesht'įįł daats'í? Áko ádaaní, Ákóde dínááh, háálá Bóhólníihii éí aláahgo naat'áanii yeididoo'ááł.

⁷Áko Jiiháshafat ání, Díí kǫ́ǫ́ dahalne'ígíísh binaashiijí Bóhólníihii yá halne'ii nabídídíilkiłígíí doo ła' naagháa da?

⁸Áádóó Ízrel dine'é aláahgo binanit'a'í éí Jiiháshafat ííłní, Diné ła' t'ah yidziih, éí Ímlah biye' Maikéíyah; éí shį́į́ hwee Bóhólníihii nabídídíilkił, nidi éí jooshłá, háálá yá'át'éehii doo shídéét'i'góó t'éí shaa halne', nidi doo yá'áshóonii t'éiyá yee shaa halne'. Nít'éé' Jiiháshafat ání, Aláahgo naat'áanii nílíinii, t'áadoo ádíníní.

⁹Nít'éé' Ízrel dine'é yá aláahgo naat'áanii éí siláo binanit'a'í ła' hágo yidííniidgo ííłní, Tsxį́įłgo, Ímlah biye' Maikéíyah kwe'é bił nánít'aash.

¹⁰Áko Ízrel dine'é aláahgo binanit'a'í índa Júdah dine'é aláahgo binanit'a'í Jiiháshafat éí bi'éénééz yiih yí'áazhgo Samériya kin haal'á bidáń'dítį́įhgi t'áá bíni' haz'ą́ą́ léi'gi t'áá ał'ąą bibikáá'dóó nahat'áii yikáá' dah siké, áko náás áhodooníiłii yaa dahalne'ii t'áá ałtso hadááhdóó dahoolne'.

¹¹Áádóó Kiinéíyanah biye' Zedekáíyah éí béésh yee adee' áyiilaago ání, Bóhólníihii kóní, Díí bee Síriya dine'é ałtso asíníłdįįdjį' bighá da'dííshish.

¹²Nít'éé' dahalne'ii t'áá ałtso t'áá ákót'éego náás áhodoonííł yaa dahoolne'go ádaaní, Nílááh, Réímath-gíliyad góde dínáahgo ła' nilééh, háálá Bóhólníihii éí aláahgo naat'áanii yílák'eididoo'ááł.

¹³Áko hane' bił eel'a'go Maikéíyah hágo bidiní bi'doo'niidígíí hach'į' haadzíi'go ání, Jó, k'ad dahalne'ii t'áá ła' saad yá'át'éehii yee aláahgo naat'áanii yich'į' hadaasdzíí'; bíni'dii nizaad t'áá éí dabizaadígi át'ée doo; yá'át'éehii t'éiyá bee hadíídzihgo baa nánooshkąąh.

¹⁴Nidi Maikéíyah ání, Ts'ídá t'áá aaníí Bóhólníihii hiná; ákót'éego ts'ídá t'áá aaníí Bóhólníihii yee shich'į' haadzí'ígíí t'éí bee hadeesdzih.

¹⁵Kót'éego aláahgo naat'áanii baazhníyá. Áko aláahgo naat'áanii áháłní, Maikéíyah nílíinii, Réímath-gíliyadgóó daats'í dadiibah, doodaii' daats'í áádahodiit'įįł? Áko ábijiní, Nílááh, ła' daałééh, háálá Bóhólníihii éí aláahgo naat'áanii yílák'eididoo'ááł.

¹⁶Nít'éé' aláahgo naat'áanii áháłní, Haa lá néelą́ą'di bee nich'į' háádeesdzih? Shą́ą́', t'áadoo ha'át'íhída bee shił hólne'í, nidi Bóhólníihii bízhi' t'éí bee t'áá aaníinii bee shił hólne', nidishníi ni'.

¹⁷Áádóó ání, Dibé yaa áhályáanii ádin nahalingo Ízrel dine'é ałtso wók'ą́ą́góó taozhjée'go yiiłtsą́, áko Bóhólníihii ání, Díí yídahółníihii ádin; bíni' diné t'áá ałtso bił dahodéezyéelgo dabighangóó anáhákáah le'.

¹⁸Áko Ízrel dine'é aláahgo binanit'a'í éí Jiiháshafat ííłní, Da' doósh nił hweeshne' da; eii yá'át'éehii doo yee shá haadziih da, nidi doo yá'áshóonii t'éiyá?

¹⁹Nít'éé' Maikéíyah ání, Éí bąą Bóhólníihii ánínígíí diits'į́į́h; Bóhólníihii bibikáá'dóó nahat'áii yikáá' dah sidáago yá'ąąshdi dah deínéehii t'áá át'é binish'náájí áádóó binishtł'ají bíighah naazį́įgo yiiłtsą́.

²⁰Áádóó Bóhólníihii ání, Háishą' Éíhab yíni' yá'áhodoolíiłgo Réímath-gíliyadgóó doogááł, áko bik'eh hodidoodleeł? Áádóó ła' kót'éego ní, náánáła' kót'éego náádí'ní.

²¹Nít' éé' níłch'i léi' ch'íníyáago Bóhólníihii yidááhdóó yiizį'go ání, Shí lá bíni' áhodeeshłíił ni.

²²Áko Bóhólníihii ábíłní, Ha'át'íishą' bee dooleeł? Áko ání, Ákǫ́ǫ́ deeshááł, áádóó bá dahalne'ii t'áá ałtso dabizéé' góne' níłch'i biyooch'íidii nishłį́į doo. Áko ání, Ni lą́ą bíni' áhodíílíiłgo ak'eh didíídleeł; nílááh, dínáahgo ákónínééh.

²³Éí bąą k'ad, Bóhólníihii éí níłch'i biyooch'íidii díí ná dahalne'ii t'áá ałtso dabizéé' góne' ayiis'a'; jó, Bóhólníihii doo yá'áshóonii yee ná haadzíí'.

²⁴Nidi Kiinéíyanah biye' Zedekáíyah áyídíjį' niníyáago Maikéíyah biniitsį' néidííkaadgo ání, Shits'ą́ą́dóó lá háajigo Bóhólníihii biNíłch'i dahodiile'go nich'į' haadzíí'?

²⁵Áádóó Maikéíyah ání, Jó, náwóne'í góne' nídidíít'į́į́ł biniyé ííníyáago éí bijį́ yidííłtsééł.

²⁶Áko Ízrel dine'é aláahgo binanit'a'í ání, Maikéíyah daosiłgo kin haal'áádóó naat'áanii Éíman áádóó aláahgo naat'áanii biye' Jó'ash bich'į' bił dadohkááh;

²⁷ábidohní, Aláahgo naat'áanii kóní, Hodiiyeelgo nánísdzáajį' díí diné awáalyaadi yah adaałt'e'go t'áá ach'į' nahwii'nánígo bááh éí tó bił banída'ołtso'.

²⁸Áko Maikéíyah ání, Hodiiyeelgo néínídzáá ládą́ą́' Bóhólníihii doo shee haadzíi' da doo. Áádóó ání, Dine'é nohłíinii, łá'í nootínígo da'íísółts'ą́ą́'.

²⁹Kót'éego Ízrel dine'é yá aláahgo naat'áanii índa Júdah dine'é aláahgo binanit'a'í Jiiháshafat éí Réímath-gíliyad góde ííná.

³⁰Áko Ízrel dine'é aláahgo binanit'a'í éí Jiiháshafat ííłní, Łahgo áneeshningo adi'deeshníiłgo atah deeshbah, nidi ni éí ni'éénééz biih ninááh. Áádóó Ízrel dine'é aláahgo binanit'a'í łahgo ánoolningo í'diilyaago atah ííbaa'.

³¹Nidi Síriya dine'é aláahgo binanit'a'í éí tádiindóó ba'aan naaki siláo binanit'a'í danilíinii éí hatsindaabąąs bijáád naakiígíí bee bídahólníihii yich'į' haadzíi'go ání, Ádaałts'ísígíí, doodaii' ayóó ádaat'éhígíí t'áadoo bił da'ahohgání, nidi Ízrel dine'é yá aláahgo naat'áanii t'éiyá.

³²Nít'éé' tsindaabąąs bijáád naakiígíí bindanit'a'í éí Jiiháshafat dayiiłtsą́ągo ádaaní, T'áá aaníí Ízrel dine'é yá aláahgo naat'áanii át'į́. Áko yił da'ahidoogą́ą́ł biniyé naanáskaigo Jiiháshafat hadoolghaazh.

³³Áko nít'éé' tsindaabąąs bijáád naakiígíí bindanit'a'í doo Ízrel dine'é aláahgo binanit'a'í át'į́į dago yaa ákodaniizį́į'go baa da'ígháhígíí t'óó t'ą́ą́' hanáákai.

³⁴Nít'éé' diné léi' t'óó dzólníí góne' be'ełtį́į́' yił k'ídeeshchidgo Ízrel dine'é aláahgo binanit'a'í bibéésh éé' ahidadii'á bita' góne' yiskah; éí bąą Éíhab hatsinaabąąs bijáád naakiígíí neilo'ígíí ábijiní, Hashi'doolk'ehéii; naa'í'íléehgo nahjį' shił ha'íłbąąs.

³⁵Íídą́ą́' éí bijį́ t'óó yówehda ałk'i jiijéé', áko aláahgo naat'áanii bitsinaabąąs bijáád naakiígíí biyi'dóó Síriya dine'é bich'į'go de ádahojósin, áádóó i'íí'ą́ągo dadziztsą́, índa haho'doolk'eh yę́ędę́ę́' tsinaabąąs bijáád naakiígíí bii'jį' dił háálį́.

³⁶Áko i'íí'ą́ągo siláo dah deínéehii bitahgóó hane' dideezdláadgo áhá' ní, Diné t'áá ałtso danihikin hadaas'áágóó índa danihikéyahgóó nídadohkááh.

³⁷Ákohgo aláahgo naat'áanii daaztsą́ągo Samériya kin haal'áagi nábi'deeltį́, áádóó Samériyagi aláahgo naat'áanii yóó'ádayiilaa.

³⁸Áko Samériya tó sikánígi t'áá éí ałjiłnii yii' ninádaabeehígi tsinaabąąs bijáád naakiígíí táádeizgiz; éí Bóhólníihii t'áá yee haadzí'ígíí bik'ehgo łééchąą'í hadił dayííłch'al.

³⁹K'ad łahjį' Éíhab ádzaaígíí índa yaa naayáhígíí t'áá át'é áádóó áívori wolyéii yee kin áyiilaii, índa kin hadaas'áago t'áá át'é ádayiilaii éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁴⁰Kót'éego Éíhab éí dabizhé'é yę́ę da'iiłhaazhígi át'éego i'ííłhaazh, áko haye' Eihazáíyah hatsásk'ehgi aláahgo naat'áanii náánásdlį́į́'.

⁴¹Áko Éíhab éí Ízrel dine'é yá aláahgo naat'áanii nilį́įgo dį́į́' náhááh binih Éísa biye' Jiiháshafat Júdah dine'é yinanit'a'í silį́į́'.

⁴²Jiiháshafat éí tádiindóó ba'aan ashdla' binááhaigo aláahgo naat'áanii silį́į́', áádóó Jerúsalem kin haal'áagi nant'áago naadiin ashdla' nááhai. Bimá éí Sháílhai bitsi' Azúbah wolyé.

⁴³Áko Éísa hazhé'é yę́ę yaa naayáhígíí t'áá át'é yik'ehgo jiníyá; Bóhólníihii binááł t'áá ákogi ádaat'éii yaa naayáhígíí t'áadoo bits'ázhníyáa da; azhą́ ákót'ée nidi ninádahałaah doo biniyé wódah nahaz'ą́ągo ádaalyaaígíí t'áadoo nahjį' ályaa da; jó, diné t'ahdii ninádahałaah doo biniyé wódah nahaz'ą́ągo ádayiilaadi tsin bijeeh dilidgo łikání halchinii nínáádayiilnih.

⁴⁴Áádóó Jiiháshafat éí Ízrel dine'é yá aláahgo naat'áanii yił k'é ahidoo'niid.

⁴⁵K'ad łahjį' Jiiháshafat ádzaaígíí áádóó yee ayóó át'éego áát'įįdígíí índa haash yit'éego naazbaa'ígíí éí Júdah dine'é yá aláahgo naat'áanii danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁴⁶Áádóó hazhé'é Éísa yę́ę bíyoołkááł yę́ędą́ą́' diné ahaa ninádaaldeehii daadziihígíí éí kéyahdóó nahjį' kóyiilaa.

⁴⁷Íídą́ą́' Íídam kéyahgi aláahgo naat'áanii doo hólǫ́ǫ da, nidi ła' nibi'deeltíinii aláahgo naat'áanii nilį́.

⁴⁸Jiiháshafat éí Ófer kéyahgóó óola bíká dazhdooł'oł biniyé Társhishdóó tsinaa'eeł ál'ínígi át'éego ádajiilaa, nidi t'áadoo ákǫ́ǫ́ dah dazhdiił'éel da, háálá t'áá Ííziyan-gííber kin haal'á binaashiidi tsinaa'eeł hats'ą́ą́' nidahaastǫ'.

⁴⁹Nít'éé' Éíhab yę́ę biye' Eihazáíyah éí Jiiháshafat ííłní, Bíni'dii shá nidaal'a'í éí ná nidaal'a'í yił tsinaa'eeł yee dookah. Nidi Jiiháshafat doo íinízin da.

⁵⁰Áádóó Jiiháshafat éí dabizhé'é yę́ę da'iiłhaazhígi át'éego i'ííłhaazhgo hazhé'é David yę́ę bikin haal'áagi dahazhé' é yę́ę yóó'ádaalyaa yę́ęgi yóó'áho'diilyaa, áko haye' Jiihóram hatsásk'eh góne' aláahgo naat'áanii náánásdlį́į́'.

⁵¹Áádóó Jiiháshafat éí Júdah dine'é yá aláahgo naat'áanii nilį́įgo tsosts'idts'áadah náhááh binih Éíhab biye' Eihazáíyah Samériya kin haal'áagi Ízrel dine'é yinanit'a'í silį́į́' áádóó yinant'áago naaki nááhai.

⁵²Eihazáíyah éí Bóhólníihii binááł doo yá'áshóonii baa nijiyá, índa hazhé'é áádóó hamá bik'ehgo jiníyá, áádóó Nííbat biye' Jerobówam éí Ízrel dine' é nida'iisíihgo áyiilaaígíí bik'ehgo jiníyá,

⁵³háálá Béíyal bá nijil'a' áádóó bich'į' nahojiłá; hazhé'é áát'įįdígíí t'áá át'é bik'ehgo éí bee Bóhólníihii Ízrel biDiyin God bá hojííłchįįd.