Read Navajo I KINGS 4 Bible Online

I KINGS 4 - Navajo bible

I KINGS 4

¹Áko aláahgo naat'áanii Sálaman éí Ízrel dine'é t'áá át'é binanit'a'í jílį́.

²Díí naat'áanii danilį́įgo dah joo'ishígíí éí náá'iiłniihii Zéídak biye' Azaráíyah lá,

³áádóó Sháísha biye'ké Elihóref áádóó Aháíjah éí naaltsoos ííł' íní nilį́, áádóó Aháílad biye' Jiiháshafat éí naat'áaniishchíín nilį́,

⁴áádóó Jiihóíyada biye' Biinéíyah éí siláo dah deínéehii yinanit'a'í nilį́, índa Zéídak áádóó Abáíyathar éí náá'iiłniihii nilį́,

⁵áádóó Néíthan biye' Azaráíyah éí naat'áanii danilíinii yilą́ąjį' sizį́, índa Néíthan biye' Zábad éí agháago naat'áanii nilį́įgo aláahgo naat'áanii yik'is nilį́,

⁶áádóó Aháíshar éí hooghan haz'ą́ągi hólónígíí ts'ídá t'áá ałtso bee hóhólnííh, áádóó Ábda biye' Adonáíram éí naanish bí'nílchééh bee hóhólnííh.

⁷Sálaman éí naakits'áadahgo naat'áanii danilíinii Ízrel dine'é t'áá ałtso yindant'áago ájiilaa; éí aláahgo naat'áanii índa bighandóó danilíinii t'áá ałtso bá ch'iyáán áłah ádadzósin: t'ááłá'í jinítínígo nínáhahjį' t'ááłá'í nínádízi'jį' ch'iyáán nishódajiyoołt'eehgo ałkéé' dziznil.

⁸Díí éí dabízhi': Her biye' éí Dził Íífreiyimdę́ę́' ch'iyáán nináyiijááh.

⁹Dííkar biye' éí Méíkaz kin shijaa'dę́ę́', Sheiyálbim kin shijaa'dę́ę́', Beth-shíímesh kin shijaa'dę́ę́' índa Íílan-beth-héínan kin shijaa'dę́ę́' ch'iyáán nináyiijááh.

¹⁰Híísed biye' éí Arábath nahós'a'dę́ę́', t'áá éí Sókoh kin haal'á bídéét'i'go áádóó Híífer kéyah t'áá át'é bits'ą́ą́dę́ę́' ch'iyáán nináyiijááh.

¹¹Abínadab biye' éí Dor kéyah t'áá át'é bits'ą́ą́dę́ę́' ch'iyáán ninááyiijááh; Sálaman bitsi' Téífath éí hwe'asdzą́ą́;

¹²Aháílad biye' Béíyana éí Téíyanak kin haal'áádę́ę́' áádóó Megído kin haal'áádę́ę́' índa Beth-shíyan nahós'a' t'áá át'é bits'ą́ą́dóó éí Jézriyel kin haal'á biyeigóó Zartéínah haz'ání bíighahgóó nahós'a'ígíí índa Beth-shíyan kin haal'áádóó Éíbel-miihólah kin shijaa'jį' éí Jákniyam kin shijaa' bilááhdę́ę́' ch'iyáán nináyiijááh.

¹³Gííber biye' éí Réímath-gíliyad kin haal'áádę́ę́' áádóó Manáseh biye' Jéíyer bikin dah naazhjaa'ígíí, t'áá éí Gíliyad kéyahgi nahós'a'dóó áádóó Béíshan kéyahgi Árgab nahós'a'gi hastą́diingo kin hadaas'á ditą́ągo binaa ahééda'astł'inii áádóó béésh łitsoii bee dáń'da'dilkałgo ádaalyaaídę́ę́' ch'iyáán nináyiijááh.

¹⁴Ído biye' Ahínadab éí Méíhanéíyim kin shijaa'dę́ę́' ch'iyáán nináyiijááh.

¹⁵Ahímeiyaz éí Náftalaidę́ę́' ch'iyáán nináyiijááh; Sálaman bitsi' Básmath hwe'asdzą́ą́.

¹⁶Húshai biye' Béíyanah éí Ásher dine'é bikéyahdę́ę́' áádóó Éílath nahós'a'dę́ę́' ch'iyáán nináyiijááh.

¹⁷Parúwah biye' Jiiháshafat éí Ísakar dine'é bikéyahdę́ę́' ch'iyáán nináyiijááh.

¹⁸Íílah biye' Shímiyai éí Bénjamin dine'é bikéyahdę́ę́' ch'iyáán nináyiijááh.

¹⁹Yúrai biye' Gííber éí Gíliyad kéyahgi Ámor dine'é aláahgo binanit'a'í Sáíhan yę́ę bikéyah nít'éé' yę́ędę́ę́' áádóó Béíshan dine'é aláahgo binanit'a'í Ag yę́ę bikéyah nít'éé' yę́ędę́ę́' ch'iyáán nináyiijááh; t'áá bí t'éiyá díí kéyahgi ch'iyáán yinanit'a'í nilį́.

²⁰Júdah dine'é áádóó Ízrel dine'é éí tónteel bibąąhgóó séigi ánéelą́ą'go t'óó ahóóyóí; éí da'ayą́ągo áádóó da'adlą́ągo bił nidahoozhǫǫh.

²¹Sálaman yinant'áii éí Yufréítiiz toohdóó Filístiya dine'é bikéyahjį' índa Ííjip dine'é bihoodzodóó aláahgo bee ídahólníihgo bił nidahaz'áanii t'áá át'é yee bóhólnííh, áko aa dadoolyéełii Sálaman bich'į' adajiijáahgo Sálaman ni'níłdįįd bijį́įjį' bá nidajil'a' nít'éé'.

²²Sálaman bighan haz'ą́ą́dóó éí ła'a jį́ ak'áán kor wolyéhígíí tádiin bíighahgo dabich'iyą', índa tł'oh naadą́ą́' bidee'í ak'áán kor wolyéhígíí hastą́diin bíighahgo dabich'iyą',

²³áádóó béégashii daneesk'ahígíí neeznáá áádóó dahootsogóó béégashii danilk'ahígíí naadiingo áádóó dibé neeznádiingo áádóó bįįhką' daalchí'ígíí áádóó jádí áádóó jádítsoh índa naat'a'ii daneesk'ahígíí ałdó' dabich'iyą'.

²⁴Jó, Yufréítiiz tooh e'e'aahjigo Tífsah kin shijaa'dóó níléí Géíza kin haal'áajį' díí kéyah t'áá náhwiist'ą́ą́ nít'éé'; ákǫ́ǫ́ aláahgo naat'áanii dajílínígíí t'áá ádzíłtso hwee ádíhólnííh, áko hakéyah t'áá níłtéél nít'éé' binaagóó diné bił dahodéezyéelgo kééhojit'į́.

²⁵Áádóó Júdah dine'é áádóó Ízrel dine'é doo ách'į' nida'jódlíígóó kéédahojit'į́įgo t'ááłá'í jinítínígo Dan kin haal'áádóó Bíyer-shííba kin shijaa'jį' hach'il na'atł'o'ii áádóó hatsin fig sikaadii bee dahozdíltsíidgo Sálaman abíyííłką́.

²⁶Áko Sálaman ałdó' tsindaabąąs bijáád naakiígíí łį́į́' bighą́ą́h nídadi'niłígíí dízdiindi mííl índa siláo éí łį́į́' yee nidaabaahígíí naakits'áadahdi mííl bee hólǫ́.

²⁷Sálaman yidooyį́įłii índa ná'ádį́įhgi ákwii diné nida'adį́hígíí t'áá ałtso bá ch'iyáán binanit'a'í ádaho'diilyaaígíí hatah hoolzhishgo nínádízi'jį' ch'iyáán nidajiiyeeh nít'éé'; t'áadoo bídin hóyé'égóó ádajósin nít'éé'.

²⁸Łį́į́' áádóó łį́į́' nida'ayéhígíí deidoołchoshii nidahidoohééł dahodoo'niid yę́ęjį' t'ááłá'í jinítínígo tł'oh naadą́ą́' bidee'í índa tł'oh naadą́ą́' bitsǫz ákwii nidajiiyeeh nít'éé'.

²⁹Diyin God éí Sálaman ayóó át'éego yee hodooyąąłii áádóó agháago ak'idi'dootį́įłii índa hótsaago ił ééhodoozįįł yeidiní'ą́; t'áá tónteel bibąąhgóó séí ánéelą́'ígíigi ánéelą́ą'go hódzą́ yeidiní'ą́.

³⁰Áko Sálaman habee hódzáanii ts'ídá agháago ayóó át'é; ha'a'aahjigo kéyahgóó kéédahat'ínígíí t'áá át'é bibee hódzáanii áádóó Ííjip dine'é t'áá át'é bibee hódzáanii éí bilááh át'é.

³¹Jó, diné t'áá ałtso biláahgo hojíyą́; Ézrah dine'é Ííthan joolyéii áádóó Hííman joolyéii, Kálkal joolyéii, Dárda joolyéii, éí Méíhal biye'ké dajílíinii biláahgo hojíyą́, áko hanaagóó ał'ąą dine'é bitahgóó t'áá át'é hwéého'dílzin.

³²Áko Sálaman éí saad bee hodoodząąłii táadi míilgo yee yáłti' nít'éé', áádóó biyiin éí miildóó ba'aan ashdla' ánéelą́ą́' nít'éé'.

³³Tsin yíl'áhígíí yaa yáłti'ii éí gad naazkaadii Lébanan kéyahgi deíl'áhígíí níléí hísap kódaníshéhígo ał'ąą ádaat'éii tsé yítł'in biták'izdę́ę́' hadaneesánígíí yaa yáłti'go hahaasdzíí'; nidaaldlooshii ałdó', nidaat'a'ii, nidaa'na'ii índa łóó' yaa yáłti'go hahaasdzíí'.

³⁴Áko ał'ąą ana'í t'áá át'é bitahdę́ę́' ła' nidahaaskaigo Sálaman bibee hódzáanii deidiizts'ą́ą́'; nahasdzáán bikáá'dóó aláahgo naat'áanii t'áá ałtso Sálaman bibee hódzáanii yaa dahodiizts'ą́'ígíí nida'iis'a'.