Read Navajo I KINGS 7 Bible Online

I KINGS 7 - Navajo bible

I KINGS 7

¹Nidi Sálaman t'áá bí bikin ííléehgo táá'ts'áadah nááhaijį' ts'ídá ałtso áyiilaa.

²Lébanan kéyahdę́ę́' dilk'is dantsaazii bee kin ályaa: náásee t'ááłáhídi neeznádiindóó ba'aan ashdladiindi ké silá áníłnééz, tsosts'idiindóó ba'aan ashdladi ké silá áníłtéél, índa dego dízdiindóó ba'aan ashdladi ké silá ánízah; táa'go hadiit'i'go dilk'is hasht'e'nibída'atsélígíí áyah danii'áago áádóó t'áá éí dilk'is bee áah sitáán áyiilaa.

³Áyah danii'áhígíí dízdiindóó ba'aan ashdla'go éí t'ááł á'í hadiit'i'go adaaz'áhígíí ashdla'áadahgo adaaz'áago bikáa'gi dilk'is hasht'e'nibída'atsélígíí shizhoozh.

⁴Ahíłk'ą́ąhgo yah ada'deezdíin doogo ałts'ą́ą́hjí táa'go hadiit'i'go ályaa.

⁵Áko dáádílkał áádóó bá adaaz'áhígíí índa yah ahool'áago yah ada'deezdínígíí t'áá ałtso dadik'ą́; yah ada'deezdínígíí éí ałts'ą́ą́hjí táa'go hadiit'i'.

⁶Áko kin bidáahjigo haz'ánígíí bíyah danii'áa dooígíí ályaa; éí náásee tsosts'idiindóó ba'aan ashdladi ké silá áhoníłnééz índa dízdiindóó ba'aan ashdladi ké silá áhoníłtéél; éí bidáahjigo chaha'ohígíí bíyah danii'á; éí bidáahjigo bikáá' dilk'is nitsaazígíí béétséelgo ha'naa naní'á.

⁷Nít'éé' bikáá'dóó hoot'áałii bikáá'dóó ánihodii'aah doo biniyé ánihodiyiit'aah bá haz'ą́ą dooígíí áyiilaa; biyi'dę́ę́' t'áá át'é dilk'is tsin neheeshjíí' shizhoozhgo ályaa.

⁸Chaha'oh bich'ijígo haz'ánígi kin yii' bighan dooleełii t'áá bikáá'dóó hoot'áałii áyiilaa yę́ęgi át'éego áyiilaa. Áádóó Féro bitsi' éí Sálaman be'asdzą́ą dooleełgo néidiiłtínígíí yá kin áyiilaa; t'áá chaha'oh ályaa yę́ęgi át'éego kin áyiilaa.

⁹Díí kin ádaalyaaígíí t'áá át'é éí tł'óó'dę́ę́' áádóó biyi'dę́ę́' t'áá bitł'ááh nástł'indóó dego bikáá' naanídaaz'áajį' áádóó níléí tł'óo'jigo ayóó áníłtso haz'ánígíí bich'į'góó tsé ílíinii bída'néél'ąądígíí bik'ehgo hasht'e'nibída'astséelii bee ni'iich'iishí bee nidahaashch'iizh.

¹⁰Atł'ááh nástł'inii éí tsé ílíinii ayóó ádaníłtsogo, ła' ashdla'áadahdi, ła' éí naakits'áadahdi ké naazlá ádaníłtsogo ádaalyaa.

¹¹Áádóó éí bikáa'di tsé ílíinii bída'néél'ąądígíí bik'ehgo hasht'e'nibída' astsélígíí ahidaneeznil índa éí bikáá' dilk'is bídáátsélígíí ha'naa nidaaz'ą́.

¹²Hótsaago ahééhool'áhígíí tsé hasht'e'nibída'astséelii táá' ałk'i yítł'ingo bikáa'gi dilk'is bídáátsélígíí bik'i daní'áago ahééhool'á; éí Bóhólníihii bikin bii' sohodizingi nááda'iiłniihii bá haz'ánígi át'éego índa yah a'atiindę́ę́' chaha'oh ályaaígi át'éego áhoolaa.

¹³Áádóó aláahgo naat'áanii Sálaman i'ííł'a'go Táir kin haal'áádę́ę́' Háíram yił nídaaskai.

¹⁴Áko Háíram éí Náftalai dine'é bits'ą́ą́dóó asdzání bąąh áhásdįįdii biyáázh jílį́ índa hazhé'é yę́ę éí Táir kin haal'áádóó diné nilį́į́ nít'éé'; éí béésh łitsoii yinaalnishii nilį́į́ nít'éé'. Háíram éí béésh łitsoii bina'anishjí t'áá ałtso jiichįįh áádóó bee hódzáanii índa ak'idi'yiitįįhii hwii' hólǫ́. Áko aláahgo naat'áanii Sálaman baazhníyáago díí t'áá ałtso bá binjishnish.

¹⁵Béésh łitsoii doolyį́į'go naaki íí'áa dooleełígíí áyiilaa. T'áá áłah dego naadiin tsosts'idi ké silá áníłnééz índa tseebííts'áadahdi ké silá bíighahgo níyiz.

¹⁶Béésh łitsoii íí'áa dooígíí ał'ąą bílátah dah doo'nil biniyé béésh łitsoii doolyį́į'go naaki nímazgo áyiilaa: nímazígíí ła' dego tsosts'idóó ałníí' ké silá áníłtso; náánáła'ígíí dego t'áá ákónááníłtso.

¹⁷Béésh łitsoii naneesdizígíí áádóó da'ahólzha'go náhineests'ee'go éí béésh łitsoii íí'áa dooígíí bílátah dah doo'niłígíí biniyé áyiilaa; éí dah doo'niłígíí yá tsosts'idgo, náánáła'ígíí ałdó' yá tsosts'idgo áyiilaa.

¹⁸Áko béésh łitsoii íí'áa dooígíí áyiilaa, áádóó bílátah dah doo'niłígíí bá naneesdizígíí bąąh pámgrenit aneest'ą' béé'ályaago yił yik'ídeisti'; łahjí dah si'ą́ą dooígíí ałdó' ákót'éego yá ádayiilaa.

¹⁹Áko béésh łitsoii íí'áa dooígíí bílátah dah doo'niłígíí éí yah a'atiindę́ę'go hastą́ą́h ké silá áníłtsogo ch'ilátah hózhóón lílii wolyéii nahalin.

²⁰Béésh łitsoii naakigo íí'áa dooígíí bílátah dah doo'niłígíí binahjį' naneesdizígíí níyizgo ahééní'áhígíí pámgrenit wolyéii naakidi neeznádiingo naakigo ahéénít'i'go bik'i sinilgo áyiilaa; bílátah dah doo'niłígíí náánáła'ígíí ałdó' t'áá ákónáánát'é.

²¹Kin bii' sohodizin yah a'atiinídę́ę́' béésh łitsoii íí'áa dooleełígíí ayíítsih: nish'náájí ayíítsiígíí éí Jéíkin yee yiyíízhi', nishtł'ají ayíítsiígíí éí Bó'az yee yiyíízhi'.

²²Áko béésh łitsoii yaa'áhígíí bílátahgi ch'ilátah hózhóón lílii wolyéhígíí be'elyaago áyiilaa; kót'éego béésh łitsoii íí'áhígíí ałtso bina'azhnish.

²³Áádóó bii' tá'ádígisí nitsaaígíí béésh łitsoii doolyį́į'go bee ályaa, éí názbąsgo ha'naa ashdla'áadahdi ké silá áhonízah áádóó dego tsosts'idóó ná'áłníí' ké silá ánízah índa bidáá' gónaa dízdiindóó ba'aan ashdladi ké silá ahééhool'á.

²⁴Bidáá' gónaa biyaadóogo t'ááłá'ídóó ná'áłníí' ké naazlá ádanízahgo neeznáá adee' bééda'alyaago béésh łitsoii doolyį́į'go naaki ałk'inít'i'go bídadiilyį́į'go ahééhool'á.

²⁵Béésh łitsoii bee dóola ályaaígíí naakits'áadahgo naazį́, táa'go náhookǫsjigo dadéez'į́į́', táa'go e'e'aahjigo dadéez'į́į́', táa'go shádi'áahjigo dadéez'į́į́' índa táa'go ha'a'aahjigo dadéez'į́į́'; dabitł'aa' ahidadii'áago bikáa'gi bii' tá'ádígisí nitsaaígíí dah yist'ą́.

²⁶Dį́į́' bik'ehgo íídéetą́ą́', áádóó bidáá' gónaa éí bee adlání bidáá' gónaaígíí nahalingo ch'ilátah hózhóón lílii wolyéii bee naashch'ąą'; t'ááłáhídi neeznádiindóó ba'aan náhást'édiin tóshjeeh bíighahgo bee tó siką́.

²⁷Áádóó bii' tá'ádígisí bá si'ą́ą dooleełígíí neeznáá béésh łitsoii yee áyiilaa; t'ááłá'í ní'ánígo éí hastą́ądi ké naazlá ádaníłnééz áádóó hastą́ądi ké naazlá ádaníłtéél índa dego dį́į́'dóó ná'áłníí' ké naazlá ádanízah.

²⁸Kót'éego ádaalyaa: bii' tá'ádígisí bá naaznil dooleełígíí dadeekį́į́góó nihidadii'áhígíí éí bita' gónaa dah naazkaadígíí biih daaz'á,

²⁹áko náshdóítsoh bitsiijį' daditł'ooígíí áádóó dóola índa diyingo nidaal'a'í chérabim wolyéii bida'alyaa; bikáá' gónaa áádóó biyaa gónaa béésh łitsoii ałk'ídaasgizgo bee bik'i nidaashch'ąą'.

³⁰Bii' tá'ádígisí bá naaz'ą́ą dooleełígíí t'ááłá'í ní'ánígo tsinaabąąs bijáád nahalingo áádóó bita' nidaaz'áhígíí éí t'áá áłah béésh łitsoii bee ádaalyaa; t'áá dį́į'go naanídaaz'áhígóó bii' tá'ádígisí bee niłdzil dooígíí naashch'ąą'go bídadiilyį́į́'.

³¹Ch'ah biih hodzánígíí nahalingo názbąs, áko éí dego t'ááłá'ídóó ná'áłníí' ké silá ánízah; bii' tá'ádígisí bá naaznilii biih dahasdzą́ągo ályaaígi át'éego názbąsgo ahénálch'ahgo ályaa, áádóó naakidi ké naazláádóó táá' dah alzhin bíighahgo yaago biih hool'á; biih hoodzánígíí bíighahgóó dah naazkaadígíí éí nidaask'ęę'go nidaashch'ąą' áádóó éí doo nídaazbąs da, nidi dadik'ą́.

³²Bii' tá'ádígisí bá naaz'ą́ą dooleełígíí éí tsinaabąąs bijáád bá nidaaz'áhígíí bitł'ááhdóó bídiilyį́į́'; bijáád éí dį́į'go biyaadóó bąąh dah naaznilgo dego naakidi ké naazláádóó táá' dah alzhin ádanízah.

³³Tsinaabąąs bijáád naakiígíí bijáád ádaalyaaígi át'éego dabijáád bita' nidaaz'áhígíí áádóó binídaaz'áhígíí áádóó binídaneeskálígíí índa bitsiits'iin éí t'áá át'é ahídahidiilyį́į́'.

³⁴Bii' tá'ádígisí bá si'ą́ą dooleełígíí dį́į'go naanídaaz'áhígóó bee niłdzil dooleełii éí dį́į́', éí bii' tá'ádígisí bá si'ą́ą dooleełígíí bił t'áá ła' bizhi'eego ályaa.

³⁵Áádóó bii' tá'ádígisí bá si'ą́ą dooleełígíí bikáa'gi dego náhást'éí dah alzhin ánízahgo ahénálch'ah; éí bii' tá'ádígisí bá si'ą́ą dooleełígíí bibąąhgóó ahéédaaz'áhígíí índa bita' góne' naaztánígíí t'áá ła' bizhi'ee ahídadiilyį́į́'.

³⁶Bii' tá'ádígisí bá si'ą́ą dooleełígíí bibąąhgóó ahéédaaz'áhígíí índa bita' góne' naaztánígíí binahjį' diyingo nidaal'a'í chérabim wolyéii áádóó náshdóítsoh bitsiijį' ditł'ooígíí índa tsin sikaadii páam wolyéii t'áá ádaníłtsooígíí bik'ehgo nidaask'ęę'go nidaashch'ąą'.

³⁷Ákót'éego bii' tá'ádígisí bá naaznilígíí neeznáá áyiilaa; éí t'áá ałtso aheedaníłtsogo índa ahedaałt'éego ahídahidiilyį́į́'.

³⁸Náá'áłdó' béésh łitsoii bii' tá'ádazdigisí neeznáá sinilgo áyiilaa; t'ááłá'í bii' tá'ádígisí éí hastą́ą́h tóshjeeh bíighahgo bee tó naazką́; bii' tá'ádígisí éí hastą́ądi ké naazlá ádaníłtéél; bii' tá'ádígisí bá naaz'ą́ą dooígíí éí t'ááłá'í ní'ánígo bii' tá'ádígisí t'ááłá'í bik'eh ní'ą́.

³⁹Áádóó bii' tá'ádígisí bá naaz'ą́ą dooígíí kin bii' sohodizin si'ą́ą́dóó nishtł'ajígo ashdla' niinínil, nish'náájígo ałdó' ashdla' niinínil, áádóó kin bii' sohodizin si'ánígíí ha'a'aahjígo shádi'ááhjí bii' tá'ádígisí nitsaaígíí niiní'ą́.

⁴⁰Áko Háíram éí bii' tá'ádazdigisí áádóó łeeshch'iih bee hadahakaahí índa łeets'aa'da áyiilaa. Áko Háíram éí díí t'áá ałtso yinaashnishgo aláahgo naat'áanii Sálaman yá ííléehgo Bóhólníihii bikin bii' sohodizin hadidzaa:

⁴¹naaki íí'áa dooígíí áádóó łeets'aa' nímazí nahalingo bílátah dah doo'niłígíí naaki íí'áii bílátahdi dah sinilgo áyiilaa índa naaki ałnánaneesdizgo yistł'ǫ́ǫgo ályaaígíí éí łeets'aa' nímazí nahalingo naaki ályaaígíí yik'íísti'go neizhch'ąą';

⁴²naaki ałnánaneesdizgo yistł'ónígíí bá dį́įdi neeznádiin pámgrenit aneest'ą' béé'ályaago neizhch'ąą', éí naaki íí'áhígíí t'áá áłah bílátahgi łeets'aa' nímazí nahalingo ályaaígíí béésh łitsoii ahidiníłnádaozt'i'go t'áá ał'ąą pámgrenit ahąąh ahéénít'i'go binázt'i'go áyiilaa;

⁴³bii' tá'ádazdigisí éí neeznáá áádóó bá naaz'ánígíí ałdó' neeznáá;

⁴⁴bii' tá'ádígisí nitsaaígíí índa biyaadóó dóola naakits'áadah naazį́įgo áyiilaa.

⁴⁵Áko ásaa' áádóó łeeshch'iih bee hadahakaahí índa łeets'aa'da éí Bóhólníihii bikin bii' sohodizin góne' chodao'ínígíí t'áá ałtso Háíram éí aláahgo naat'áanii Sálaman yá áyiilaaígíí béésh łitsoii bídazdilidgo áyiilaa.

⁴⁶Jórdan tooh bíighahgi halgai hóteelgi aláahgo naat'áanii bíniik'ehgo Sákath haz'ání áádóó Zárthan haz'ání bita'gi bis hólónígi béésh łitsoii doolyį́į'go chodao'íinii áyiilaa.

⁴⁷Sálaman éí łeets'aa' chodao'ínígíí t'áá át'é t'áadoo dah deidiyiilo' da, háálá ts'ídá t'áá íiyisí t'óó ahayóí; béésh łitsoii doolyį́į'goígíí dah hidédlo' ánéelą́ą́' t'áadoo bééhoozin da.

⁴⁸Áko Sálaman bíniik'ehgo Bóhólníihii bikin bii' sohodizin biyi' góne' łeets'aa' chodao'ínígíí t'áá át'é ályaa; óola bee bikáá' náá'iiniihí ályaa áádóó óola bee bikáá' adání ályaago Diyin God bich'į' bááh nááhániihii niná'niłgo ályaa;

⁴⁹bee dahool'iní bá yadaa'áa dooígíí óola t'áá bízhání bee ádaalyaa; agháago hodiyingo haz'ánígíí bidááhjí bíighahgi nish'náájígo ashdla' sinil áádóó nishtł'ajígo ashdla' sinil; ch'ilátah hózhóón áádóó tókǫ'í índa tsííd bee náhádláhí óola bee ádaalyaa,

⁵⁰łeets'aa' danímazí, kǫ' bee nídahiniltsésí, bii' tá'ádazdigisí, adee' índa tsííd bee nidaakáhí éí óola t'áá bízhání bee ádaalyaa; náwóne'ídi ts'ídá agháago hodiyingo haz'ánígíí bidáádílkał áádóó kin bii' sohodizin bidáádílkał ąą ánát'įįh dooleełígíí t'áá áłah óola bee ádaalyaa.

⁵¹Kót'éego aláahgo naat'áanii Sálaman naashnishgo Bóhólníihii bikin bii' sohodizin ałtso áyiilaa. Áádóó Sálaman éí bizhé'é David yę́ę diyingo niidiní'ánígíí, éí béésh łigaii áádóó óola índa łeets'aa'da Bóhólníihii bikin bii' sohodizin bíighahgi yódí bá hooghan góne' hasht'e'niyiiznil.