Read Navajo I KINGS 9 Bible Online

I KINGS 9 - Navajo bible

I KINGS 9

¹Nít'éé' Sálaman éí Bóhólníihii bikin bii' sohodizin áádóó aláahgo naat'áanii bighan índa ádeeshłííł nízinígíí t'áá ałtso bił hóshǫ́ǫgo ííléehgo ałtso áyiilaago,

²Gíbiyandi Bóhólníihii éí Sálaman yich'į' yit'íní í'diilyaa yę́ęgi át'éego yich'į' yit'íní ínáá'diilyaa.

³Áko Bóhólníihii ábíłní, Shich'į' sodíínílzinígíí áádóó ná'iisíníkanígíí diséts'ą́ą́': díí kin hool'áágóó shízhi' bee wójíii íinilaaígíí diyingo íishłaa; t'áá áłahjį' haasíid doo índa shijéí t'áá át'é bee ákwii honishłǫ́ǫ doo.

⁴Áádóó t'áá nizhé'é David yę́ę shinááł naayáhígi át'éego nijéí doo bina'adlo'góó áádóó t'áá ákóne' ánít'éego shinááł yínáałgo áádóó bee nich'į' haasdzí'ígíí bik'eh honíł'į́įgo ááníiłgo índa bee nihoní'áanii áádóó bee nihodiish'aahii baa honíyáago

⁵Ízrel dine'é bá hoot'áałii hool'áágóó bikáá'dóó nanít'áii niłdzilgo ádeeshłííł, t'áá nizhé'é David yę́ę baa diní'ánígi át'éego kódíshníigo, Na'áłchíní náás ahoolchíiłii ninahjį' doo Ízrel bá bikáá'dóó nahat'áii yi'oh dínóol'ąął da.

⁶Nidi ni, doodaii' na'áłchíní shikéé' deínóhkáhígíí bits'ą́ąjigo dah doohkaigo shibik'eh ó'oo'níiłii índa bee nihoní'áanii nihidáahgi nihá niníláhígíí doo bik'eh dahonoł'į́į́góó áádóó diyin dabidi'níinii ła' bá nidaał'a'go índa bich'į' nidahołáago,

⁷áko Ízrel dine'é kéyah baa diní'ánígíí bits'ą́ąjį' kóhodeeshłííł, áádóó shízhi' baa ha'niih doo biniyé díí kin diyingo áshłaaígíí ch'íhideeshxą́ąłgo doo nááyideestséeł da, índa dadine'é t'áá át'é bitahgóó Ízrel dine'é há nidahat'i'go áádóó haa niyá'áho'diti'ii dajílį́įgo áhodeeshłííł,

⁸áádóó díí kin éí aláahdi át'éhígíí yíighah dah hidikáhígíí t'óó bił adahayóigo, Tłehee yéi', daaníi doo, áádóó kódaaníi doo, Haa léit'éego Bóhólníihii díí kéyah áádóó díí kin kóyiilaa lá?

⁹Áko ádadidooniił, Bóhólníihii haDiyin God éí Ííjip kéyahdę́ę́' dahazhé'é yę́ę ch'íiní'eezhígíí baa dajiyooznah, áko diyin dabidi'níinii dajiiłtsoodgo bich'į' nidahojiłá índa bá nidajil'a'; éí biniinaa Bóhólníihii éí díí doo yá'áshóonii t'áá át'é hak'ijį' kóyiilaa.

¹⁰Áko Sálaman naadiin nááhaijį' kin naakigo éí Bóhólníihii bikin bii' sohodizin áádóó aláahgo naat'áanii bighan ałdó' ałtso áyiilaago,

¹¹(nít'éé' Táirdóó aláahgo naat'áanii Háíram éí Sálaman dilk'is tsin áádóó tsin sáípres wolyéhígíí índa óola t'áá yinízinígi ánéelą́ą'go yąąh niyiizyį́,) áko Sálaman éí Gálilii kéyahdi naadiingo kin haal'áii Háíram yeidiní'ą́.

¹²Áko Háíram éí kin hadaas'áii Sálaman haa yidiní'ánígíí jidínóoł'įįłgo Táirdę́ę́' jiníyá; nít'éé' doo hoł yá'íít'éeh da.

¹³Áko ání, Díísh ha'át'íí kin hadaas'áii shį́į́ át'éego shaa dííní'ą́, shik'is? Áádóó éí kéyahígíí Kéíbul yee yiyíízhi'go díí jį́įjį' ákót'éego wójí.

¹⁴Íídą́ą́' Háíram éí aláahgo naat'áanii óola t'ááłáhídi neeznádiindóó ba'aan naadiin tálent bíighahgo yich'į' áyiilaa.

¹⁵Aláahgo naat'áanii Sálaman éí Bóhólníihii bikin bii' sohodizin áádóó t'áá bí bighan áádóó Míllo hoolyéii áádóó Jerúsalem ditą́ągo binaa ahéé'ítł'inígíí áádóó Héízar áádóó Megído índa Gíízer kin hadaas'áii ádadoolnííł biniyé naanish bí'nílchéehii yihodeez'ą́.

¹⁶Háálá bítséédą́ą́' Ííjip dine'é aláahgo binanit'a'í Féro éí Gíízer kin haal'áii yisnáago yidííłid áádóó Kéínan dine'é ákwii kéédahat'ínígíí neistseedgo kin haal'áhígíí a'ílyé biniyé bitsi' Sálaman be'asdzą́ą́ yeidiní'ą́.

¹⁷Sálaman éí Gíízer kin haal'áii áádóó Beth-hóran wóyahdi kin haal'áii náhóółbį'.

¹⁸Júdah kéyahgi halgaidi Béíyalath índa Tádmor kin haal'áii ałdó' áyiilaa,

¹⁹áádóó Sálaman éí kin hadaas'áhígíí bii' nooh nída'achíhígíí índa tsindaabąąs bijáád naakiígíí biih nídaabąsígíí áádóó łį́į́' bee nida'abaahii dabighan índa Jerúsalemgi áádóó Lébanangi índa kéyah bee hóhólníhígíí t'áá jinízingóó ákǫ́ǫ́ yá dahasbį'.

²⁰Áko Ámor dine'é áádóó Het dine'é áádóó Píírez dine'é áádóó Háíva dine'é índa Jííbas dine'é t'áá ałtso daadzí'ígíí doo Ízrel dine'é danilį́į dago

²¹éí bada'áłchíní díí kéyah biyi' daadzí'ígíí ałtso Ízrel dine'é nidabidoołtsiłgi t'áadoo yídanéés'ąąd daígíí Sálaman hanaalte' danilį́į dooleełgo ádá nízhdiinil, áádóó díí jį́į́góó ákót'é.

²²Áko Sálaman éí Ízrel dine'é t'áadoo binaalte' áyiilaa da, nidi diné nidaabaahii áádóó bá nidaal'a'í, naat'áanii, siláo yindanit'a'í índa tsindaabąąs bijáád naakiígíí áádóó łį́į́' yee nidaabaahii yee bídahólníihii danilį́įgo niinínil.

²³Díí Sálaman binaanish naat'i'gi aląąjį' naazį́įgo bídahólnííh nít'éé'; éí ashdladi neeznádiindóó ba'aan ashdladiin ánéelą́ą'go diné nidaalnishígíí yindant'áá nít'éé'.

²⁴Féro bitsi' éí David bikin haal'áádę́ę́' níyáago Sálaman kin há áyiilaii biih jíínáádóó bik'ijį' índa Míllo hoolyéii áyiilaa.

²⁵Áádóó Sálaman éí Bóhólníihii bich'į' bikáá' náá'iiniihí ájiilaaígi bikáá'dóó didlidgo nááhániihii áádóó hózhǫ́ǫ́jí nááhániihii táadi náájiilnih t'ááłá'í nínáhahjį' áádóó Bóhólníihii binááł bikáá' náá'iiniihí bikáá' didlidgo łikání halchin nízhdíłi'. Kót'éego kin ałtso ájiilaa.

²⁶Íídam kéyahdi Tónteel Łichíí' bibąąhgóó Íílath bíighahgi Ííziyan-gííbergi aláahgo naat'áanii Sálaman éí tsinaa'eeł lą'í ádayiilaa.

²⁷Áádóó Háíram bá nidaal'a'í éí tónteel bikáá' na'al'eeł bił béédahózinígíí éí Sálaman bá nidaal'a'í yił táłkáá'góó tsinaa'eeł biyi' nidaalnish doo biniyé dayííł'aad.

²⁸Áko éí Ófer hoolyéedi bił da'ní'éél, áádóó óola dį́įdi neeznádiindóó ba'aan naadiin tálent bíighahgo shódajost'e', índa éí aláahgo naat'áanii Sálaman baa dadziizyį́.