Read Navajo II KINGS 1 Bible Online

II KINGS 1 - Navajo bible

II KINGS 1

¹Nít'éé' Éíhab daaztsą́ą́dóó bik'ijį' Mó'ab dine'é éí Ízrel dine'é yich'į' nidaastee'.

²Áko Eihazáíyah éí Samériyadi adeídi haghangi tsin yistł'ǫ́ǫgo tsésǫ'gi dáádiníbaalígíí bigházhnítłizh, áko bits'ą́ą́dóó hatah doo hóóts'íid da, áádóó hane' yił nidaal'a'íii ajííł'a'go ábijiní, Nílááh, Ékran kin haal'áagi diyin Béíyalzííbab shá nidabídółkid, Díí naałniih daats'í bits'ą́ą́dóó náádideeshdááł, dooda daats'í.

³Áádóó Bóhólníihii bidiyingo naal'a'í éí Tíshbeh dine'é Iiláíjah ííłní, Nídiidááh; nílááh, Samériyadóó aláahgo naat'áanii bá nidaal'a'í bidááhgóó dínáahgo ábidiní, Da' Ízrel dine'é bitahdiísh Diyin God ádingo biniinaa Ékran kin haal'áagi diyin bidi'níinii Béíyalzííbab nidabídídóołkił biniyé wohkah?

⁴Díí bąą k'ad Bóhólníihii kóní, Tsásk'eh bikáá' sínítínídóó doo nídidíí'nah da, nidi t'áá aaníí dadíítsaał. Áko Iiláíjah dah nídiidzá.

⁵Áádóó nidaal'a'í éí Eihazáíyah yaa nákai, áko ííłní, Haash yit'éego t'óó nánoohkai?

⁶Áko ádahałní, Diné léi' nihidááh níyáago ánihiłní, Nílááh, aláahgo naat'áanii nanihił'a'ígíí bich'į' nídóhkáahgo ádabidohní, Bóhólníihii kóní, Da' Ízrel dine'é bitahdiísh Diyin God ádingo biniinaa Ékran kin haal'áagi diyin bidi'níinii Béíyalzííbab nabídídííłkił biniyé bich'į' i'ííníł'a'? Díí bąą tsásk'eh bikáá' sínítínídóó doo nídidíí'nah da, nidi t'áá aaníí dadíítsaał.

⁷Eihazáíyah áháłní, Diné haashą' yit'éé léi' nihidááh níyáago díí saad yee nihił hoolne'?

⁸Áko hach'į' hádaasdzíí', Diné ditł'oii léi' akałsis biníí' gónaa yee ákászaaz. Áko Eihazáíyah ání, Éí lá Tíshbeh dine'é Iiláíjah át'į́ ni.

⁹Nít'éé' aláahgo naat'áanii éí siláo yinanit'a'í nilíinii bisiláo ashdladiingo yił hach'į' ayííł'a'. Áko ákóde hach'į' haayá; jó, wók'ą́ągi dah dzizdá. Áko hach'į' haadzíi'go ání, Diyin God yá naal'a'í nílíinii, aláahgo naat'áanii ání, Wóshdę́ę́', hadaninááh, niłní.

¹⁰Áádóó Iiláíjah éí ashdladiin siláo yinanit'a'í yich'į' haadzíi'go ííłní, Diyin God yá naal'a'í nishłį́į́ ládą́ą́' bíni' yá'ąąshdę́ę́' kǫ' hadadidoonołgo ni áádóó ashdladiingo nisiláo ánihidoołdįįł. Áko yá'ąąshdę́ę́' kǫ' hadadíínóodgo hó áádóó ashdladiin siláo hoł naakaígíí bił áho'disdįįd.

¹¹Náá'áłdó' siláo yinanit'a'í ła' ashdladiingo bisiláo yił hach'į' anáábi'diis'a'. Áko hach'į' hanáánáádzíi'go áháłní, Diyin God yá naal'a'í nílíinii, aláahgo naat'áanii kóní, Tsį́įłgo wóshdę́ę́', hadanináá, niłní.

¹²Áádóó Iiláíjah hanáánáádzíi'go áháłní, Diyin God yá naal'a'í nishłį́į́ ládą́ą́' bíni' yá'ąąshdę́ę́' kǫ' hadadidoonołgo ni áádóó ashdladiin nisiláo ánihidoołdįįł. Áko yá'ąąshdę́ę́' kǫ' hadadíínóodgo hó áádóó ashdladiin siláo hoł naakaígíí bił áho'disdįįd.

¹³Áko táadi azlį́į́' góne' siláo yinanit'a'í nilíinii ashdladiingo bisiláo yił anáábi'diis'a'. Áko díí ashdladiin siláo binanit'a'í ákóde haayáago Iiláíjah bidáahjį' nitsizhdinígo'go níjookąąhgo ábijiní, Diyin God yá naal'a'í nílíinii, nánooshkąąh, bíni'dii she'iina' índa díí ashdladiingo siláo bida'iina' ná nidaal'a'í nił nilį́į le'.

¹⁴Jó, yá'ąąshdę́ę́' kǫ' bidadíínóodgo áłtséédą́ą́' naakigo ashdladiin siláo dah yikah áádóó binanit'a'í t'áá ał'ąą bóltą'go iidííłk'ą́ą́'; éí bąą k'ad bíni' she'iina' nił nilį́į le'.

¹⁵Áko Bóhólníihii bidiyingo naal'a'í Iiláíjah ííłní, Nílááh, ákóyaa bił dí'aash; t'áadoo bináníldzidí. Áádóó nízhdii'na'go ákóyaa aláahgo naat'áanii bich'į' jíkai.

¹⁶Nít'éé' Eihazáíyah ábijiní, Bóhólníihii kóní, Ékran kin haal'áagi diyin bidi'níinii Béíyalzííbab nabídídííłkiłgo bich'į' nisí'níł'a'; da' Ízrel dine'é bitahdiísh Diyin God nabídídííłkiłígíí ádingo ánít'į́? Díí kwíinidzaa bąą, tsásk'eh bikáá' sínítínídóó doo nídidíí'nah da, nidi t'áá aaníí dadíítsaał.

¹⁷Kót'éego Bóhólníihii bizaad Iiláíjah yee haadzí'ígíí bik'ehgo Eihazáíyah daaztsą́. Áko Júdah dine'é yá aláahgo naat'áanii Jiiháshafat biye' Jiihóram naat'áanii nilį́įgo naaki náhááh binih Jiihóram hatsásk'eh góne' aláahgo naat'áanii silį́į́', háálá Eihazáíyah biye' doo ła' hólǫ́ǫ da.

¹⁸K'ad łahjį' Eihazáíyah ádzaaígíí áádóó yaa naayáhígíí éí Ízrel dine'é yá aláahgo naat'áanii danilį́į́ nít'éé' yę́ę binaaltsoos Kránikals wolyéii bik'inídaháasdzo.