Read Navajo II KINGS 10 Bible Online

II KINGS 10 - Navajo bible

II KINGS 10

¹Samériya kin haal'áadi Éíhab éí biye'ké tsosts'idiin nít'éé'. Áko Jííhu éí naaltsoos ádayiilaago Samériyagóó bá eejaa' éí Jézriyel kin haal'áádóó naat'áanii danilíinii áádóó hastóí aląąjį' naazíinii índa Éíhab ba'áłchíní yaa ádahalyą́ą́ nít'é'ígíí kwííł ní,

²T'áá naaltsoos nídadoołtsoozí bídahwíínółníihii yę́ę biye'ké nihił dahólǫ́ǫgo áádóó tsindaabąąs bijáád naakiígíí índa łį́į́'da, kin haal'á ditą́ągo binaa ahéé'ítł'inígíí áádóó bee na'abaahii nihee dahólǫ́ǫgo,

³k'ad bídahwíínółníihii yę́ę biye' ła' bíiyisii áádóó baa dzólníinii éí nídadoołteehgo bizhé'é yę́ę bibikáá'dóó nahat'áii bikáá' dah binołdaah índa bídahwíínółníihii yę́ę ba'áłchíní bá nidaohbaah doo.

⁴Nidi t'áá íiyisí nídaasdzíidgo ádaaní, Jó, aláahgo naat'áanii nidilt'éego nidi doo hóneel'ą́ą da, áko nihíshą' hait'éego hódadíníil'ąął?

⁵Aláahgo naat'áanii bikin yaa áhályánígíí áádóó kin haal'áii yaa áhályánígíí áádóó hastóí aląąjį' naazíinii índa Éíhab ba'áłchíní yaa ádahalyánígíí éí Jííhu yich'į' ada'as'a'go ádaaní, Nihí ná naal'a'í daniidlį́įgo bich'į' nihíł'áhígíí t'áá ałtso bida'diilnííł; doo ła' aláahgo naat'áanii ádadiilníił da; t'áá ni nił yá'át'éhígi át'éego ánínééh.

⁶Áádóó Jííhu éí naaltsoos ánááyiidlaago ání, Shich'ijí danohłį́į́ ládą́ą́' áádóó shik'eh dahonoł'į́įgo Jézriyel kin haal'áagi yiską́ągo kóhoodzaago bídahwíínółníihii yę́ę biye'ké bitsiits'iin deínóhjáahgo shaa doohkah. Íídą́ą́' aláahgo naat'áanii yę́ę biye'ké tsosts'idiin yilt'éego kin haal'áádóó hastóí aląąjį' naazíinii baa ádahalyą́ą́ nít'éé'.

⁷Naaltsoos haa náánálwodgo aláahgo naat'áanii yę́ę biye'ké tsosts'idiin yilt'éego dadzisiłgo nidadzistseed áádóó dabitsiits'iinígíí ts'iizis biih dadziiznilgo Jézriyelgóó aheeshjaa'.

⁸Naal'a'í ła' Jííhu yaa níyáago yił hoolne'go ání, Aláahgo naat'áanii yę́ę biye'kéhę́ę dabitsiits'iin deizhjaa' lá. Áko ííłní, Hoos'įįdjį' yah a'atiingi naakigo ał'ąą ałk'i yanáa'áago ádaohłééh.

⁹Nít'éé' hoos'įįdgo áajį' ch'íníyáago yiizį'go diné t'áá ałtso yich'į' haadzíí', Doo nihada'át'e'í da; jó, shinanit'a'í bik'ijį' sélį́į'go séłhį́, nidi háísh díí t'áá ałtso neistseed?

¹⁰K'ad díí nihił béédahózingo Bóhólníihii yee haadzí'ígíí éí Éíhab ba'áłchíní náás ahoolchíiłii bídéét'i'go Bóhólníihii yá naal'a'í Iiláíjah haadzíi'go ánínígíí bik'ehgo doo ła' ch'ééh ádool'įįł da.

¹¹Kót'éego Jííhu éí Jézriyelgi Éíhab ba'áłchíní daadziihígíí índa bidiné ayóó ádaat'éii áádóó bik'is danilíinii índa binááda'iiłniihii ałtso neistseedgo wónáásdóó t'áadoo ła' yidzíi' da.

¹²Áádóó dashdiiyáago Samériya kin haal'áágóó joogáałgo táńda'digish biniyé kin si'ánígi jiníyáago,

¹³Jííhu éí Júdah dine'é aláahgo binanit'a'í Eihazáíyah yę́ę bik'isóó ła' bidááshníyáago ájíní, Háísh ádaaht'į́? Áko hadaasdzíi'go ádaaní, Eihazáíyah bik'isóó ádeit'į́; nihí aláahgo naat'áanii bada'áłchíní índa asdzą́ą́ naat'ááh bada'áłchíní bich'į' deekai.

¹⁴Áádóó ájíní, T'áá dahináago daołtsóód. Áko t'áá dahináago deisiłgo táńda'digish biniyé kin si'ání bíighahgi a'ánígi dízdiindóó ba'aan naaki diné nideistseed; t'áadoo ła' yidzíi' da.

¹⁵Jííhu dah náázdiidzáago Rííhab biye' Jiihónadab hach'į' yigáałgo bił ałdááh jít'áázh; éí k'é bizhdííniidgo ábijiní, Nijéísh t'áá ákogi át'é, t'áá shijéí ni nijéígi át'éego? Jiihónadab haadzíi'go ání, Aoo', ákót'é. Jííhu ání, Ákót'éé ládą́ą́' shich'į' dah didiilnííh. Áádóó Jííhu bich'į' dashdiilnii'go tsinaabąąs bijáád naakiígíí yiih hóółt'e'.

¹⁶Áádóó Jííhu áháłní, Tį', shił yí'ash, áko Bóhólníihii bá bíneeshdlínígíí yiidííłtsééł. Áko tsinaabąąs bijáád naakiígíí bee bił dashdiikai.

¹⁷Nít'éé' Samériya kin haal'áagi jiníyáago Bóhólníihii éí Iiláíjah yee yich'į' haadzí'ígíí bik'ehgo ákwii Éíhab yę́ę ba'áłchíní daadziihígíí ałtso nijistseed.

¹⁸Jííhu éí diné t'áá ałtso áłah áyiilaago ííłní, Éíhab yę́ę t'áá áłts'ísígo Béíyal yich'į' nahałáá nít'éé', nidi Jííhu éí t'ah aláhígo Béíyal yich'į' nahałáa doo.

¹⁹Éí bąą k'ad, bíni'dii Béíyal bá dahalne'ii áádóó bá nidaal'a'í índa bá nááda'iiłniihii t'áadoo ła' doodaí shá hágo dabidohní, háálá ayóó át'éego didlidgo nááhániihii Béíyal bich'į' náádiyeeshnih; t'áá háiida dooda nízinígíí éí doo jiináa da doo. Áko Jííhu hanahagiz bee Béíyal yich'į' nidahałáii ádeeshdįįł jinízingo ájít'į́.

²⁰Jííhu ání, Béíyal bá ho'dílzingo ahí'iildééh baa dahodoołnih. Ákót'éego baa nidahodzisne'.

²¹Áádóó Jííhu éí Ízrel dine'é t'áá át'é bitahgóó i'iis'a'; Béíyal yich'į' nidahałáii t'áá ałtso nidahaaskai, áko t'áadoo ła' doodaí diné t'áá ałtso neheeskai. Nít'éé' Béíyal bá kin si'ání góne' áłah dzizlį́į'go kin góne' ałtso hazhdéébįįd.

²²Áko éénééz yaa áhályánígíí ábijiní, Aadę́ę́' Béíyal yich'į' nidahałáii bá éénééz ch'íníjááh. Áádóó éénééz ch'ízhníjaa'.

²³Nít'éé' Jííhu dah diiyá, áádóó Rííkab biye' Jiihónadab ałdó' Béíyal bá kin góne' yah ajíí'áazhgo Béíyal yich'į' nidahałáii ííłní, Bóhólníihii yá nidaal'a'í hádadóh'į́į́', doo daats'í ła' nihitah da, Béíyal yich'į' nidahałáii daats'í t'éiyá ádaat'į́.

²⁴Áádóó didlidgo nááhániihii náádahizhdoołnih biniyé yah ajookaigo Jííhu éí tł'óó'dę́ę́' diné tseebídiingo niinínilgo ání, Díí diné nihaa diní'ánígíí ła' t'óó bi'noołnii'go t'áá nihí bá ninádoohtłish.

²⁵Ákódzaago didlidgo nááhániihii ałtso ájiilaago Jííhu éí aa ádahalyáanii índa siláo bindanit'a'í ííłní, Nílááh, yah oohkáahgo nidaałtseed; t'ááká ła' ch'óoya' lágo. Áádóó diltłish yee nideistseed, índa aa ádahalyáanii áádóó siláo bindanit'a'í éí nidaaztseedii ch'ídayiistł'íidgo Béíyal bá kin náwóne'í góne' ajookai.

²⁶Béíyal bá kindę́ę́' eda'alyaii ch'ídajiizhjaa'go dazhdííłid.

²⁷Áádóó Béíyal be'elyaii naa'adayiisxango Béíyal bikin t'áá yił nidayiisne', áko díí jį́įjį' kin bii' nii'oh nída'aldahgo ádayiilaa.

²⁸Kót'éego Jííhu éí Béíyal bich'į' nahadlá Ízrel kéyahdóó nahjį' kóyiilaa.

²⁹Nidi Jííhu éí Nííbat biye' Jerobówam yee ni'iisí'ígíí bee Ízrel dine'é da'asiihgo áyiilaii t'áá éí Béthel kin haal'áagi áádóó Dan kin haal'áagi béégashii yáázh óola bee ályaago bich'į' nahadláhígíí t'áadoo yóó'azhdíí'ą́ą da.

³⁰Nít'éé' Bóhólníihii éí Jííhu ííłní, Shinááł t'áá ákogi át'éii bi'iinilaa áádóó shijéí bee íinisinígíí t'áá ałtso bik'ehgo Éíhab ba'áłchíní atíinilaa; éí bąą na'áłchíní dį́įdi ałk'i ná'ázhchį́į́góó Ízrel dine'é bibikáá'dóó nahat'áii yikáá' ałkéé' dah náhidinoobįįł doo.

³¹Nidi Jííhu éí Bóhólníihii Ízrel dine'é biDiyin God bibee haz'áanii doo yik'eh hół'į́į́góó yigááł nít'éé'; jó, Jerobówam yee ni'iisí'ígíí éí bee Ízrel dine'é da'asiihgo áyiilaii t'áadoo yóó'iidíí'ą́ą da.

³²Íídą́ą́' Bóhólníihii éí Ízrel dine'é bikéyah ha'oh áyoolíiłgo hodideeshzhiizh, áádóó Házeiyel éí Ízrel dine'é bikéyah nidanees'ą́ą́góó kéédahat'ínígíí t'áá ałtso atíyoolííł nít'éé'.

³³Jórdan toohdóó ha'a'aahjigo kéyah Gíliyad hoolyéegi t'áá át'é, Géed dine'é áádóó Rúben dine'é índa Manáseh dine'é dabikéyah tooh Árnan bibąąhgóó Aró'er kin haal'áádóó t'áá Gíliyad kéyah áádóó Béíshan kin haal'áajį' aghaideet'ą́.

³⁴Áko Jííhu łahjį' áát'įįdígíí áádóó yaa naayáhígíí t'áá ałtso índa yee ayóó át'éé nít'é'ígíí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

³⁵Áko Jííhu éí dahazhé'é yę́ę da'iiłhaazhígi át'éego ajiiłhaazh, áádóó Samériya kin haal'áagi yóó'áho'diilyaa. Nít'éé' haye' Jiihó'ahaz hatsásk'ehgi aláahgo naat'áanii náánásdlį́į́'.

³⁶Samériyagi Jííhu éí Ízrel dine'é yinant'áago naadiin tseebíí nááhai.