Read Navajo II KINGS 11 Bible Online

II KINGS 11 - Navajo bible

II KINGS 11

¹Áko Eihazáíyah bimá Athaláíyah biyáázh daaztsą́ągo yaa ákoniizį́į'go dah diiyá, áko aláahgo naat'áanii biye'ké ałtso íísdįįd.

²Nidi aláahgo naat'áanii Jóram yę́ę bitsi' Jiihósheba wolyéii Eihazáíyah bideezhí éí Eihazáíyah biye' Jó'ash aláahgo naat'áanii yę́ę biye'ké nidadootsiłii bitahdóó yił dah dii'áazhgo bí áádóó asdzání baa áhályánígíí nida'iilkáhí góne' Athaláíyah yits'ąą náhodees'į́į́', áko t'áadoo ho'diisyį́į da.

³Áko Bóhólníihii bikin bii' sohodizin góne' Jó'ash éí asdzání baa áhályánígíí bił naho'dinil'ingo hastą́ą́h nááhai. Áádóó Athaláíyah éí kéyah yii' kéédahat'íinii yinant'áá nít'éé'.

⁴Áádóó tsosts'id nááhaigo Jiihóíyada i'iis'a'go neeznádiin siláo áádóó siláo aa ádahalyáanii yinant'áhígíí hágo yidííniidgo Bóhólníihii bikin bii' sohodizinjį' baa daho'diisht'eezh, áádóó bee aha'deet'áanii bił ádajiilaago Bóhólníihii bikin bii' sohodizin góne' ádee hadahididziihgo ájiilaa, áko aláahgo naat'áanii biye' ííshjání ájiilaa.

⁵Áádóó áłah áyiilaaígíí yich'į' haadzíi'go ííłní, Díí kódadoohnííł; táa'go dah wohnéłígíí bitahdóó t'ááłá'ígo dah wohnéłígíí éí háá'áyį́į́h jį́į́ góne' nidaołnishígíí aláahgo naat'áanii bikin baa ádahołyą́ą doo;

⁶t'ááłá'ígo dah náánááh'néłígíí Ser yah a'atiingi baa ádahołyą́ą doo, índa t'ááłá'ígo dah náánáoh'néłígíí aa ádahalyánígíí bine'jígo yah a'atiinígíí baa ádahołyą́ą doo; kót'éego aláahgo naat'áanii bikin baa ádahołyą́ągo doo ahiih nídoołdas da.

⁷Nihí naakigo dah wohnéłígíí háá'áyį́į́h jį́į́ góne' doo nidaołnishígíí Bóhólníihii bikin bii' sohodizin góne' aláahgo naat'áanii baa ádahołyą́ą doo.

⁸Áádóó t'ááłá'í nohtínígo nihideezlaa' dah deínóhjáahgo aláahgo naat'áanii binídooht'ih; t'áá háiida nihíighah deeyáhígíí hodi'yoolyééł; aláahgo naat'áanii ch'ínádááhdóó yah anáhádáahgo baa ádahołyą́ą doo.

⁹Áko neeznádiingo siláo bindanit'a'í t'ááłá'í jinítínígo náá'iiłniihii Jiihóíyada yee ho'níłnii'ígíí t'áá ałtso bik'ehgo ádadziidzaago hasiláo háá'áyį́į́h jį́į́ góne' dadeeshnishígíí áádóó nidahashnishígíí éí t'áá yił náá'iiłniihii Jiihóíyada yaa yíkai.

¹⁰Áádóó aláahgo naat'áanii David yę́ę tsiidétáán áádóó naagé bee hólǫ́ǫ́ nít'éé' yę́ę Bóhólníihii bikin bii' sohodizin góne' sinilígíí náá'iiłniihii éí neeznádiingo siláo bindanit'a'í yeinínil.

¹¹Áko siláo t'ááłá'í nítínígo bideezla' dah deíjáahgo aláahgo naat'áanii binaagóó kin bii' sohodizin bíighahgi nish'náádóó nishtł'ajígo nineel'áníjį' bikáá' náá'iiniihí yíighahgi naazį́.

¹²Áádóó aláahgo naat'áanii biye' bił ch'ízhní'áazhgo naat'á ch'ah bik'izhdíí'ą́ągo bee ak'e'ashchíinii bee bééhániihii baazhníłtsooz, áádóó ak'ah yik'i yadeiyiiziidgo dayíísį́į'go aláahgo naat'áanii ádahoolaa, áko ahídaakadgo ádaaní, Aláahgo naat'áanii as'ahgóó hináa le'.

¹³Nít'éé' Athaláíyah éí aa áhályáanii índa diné hahóół'áago yidiizts'ą́ą'go Bóhólníihii bikin bii' sohodizin góne' diné yich'į' yah ííyá.

¹⁴Áko déé'į́į́' nít'éé', shoo, t'áá bee é'él'į' bik'ehgo aláahgo naat'áanii éí kin bíyah nii'áii yíighahdóó sizį́, naat'áanii áádóó béésh dilní bee í'dílzoołí yee ádaanínígíí aláahgo naat'áanii yíighahdóó naazį́, índa kéyahdóó diné t'áá át'é bił dahózhǫ́ǫgo béésh dilní bee í'dílzoołí yee ádaaní, áádóó Athaláíyah ak'i na'ooldláadgo hadoolghaazhgo ání, Shiya'iidlo'go shighahodeet'ą́!

¹⁵Nidi náá'iiłniihii Jiihóíyada éí neeznádiingo siláo dah yikahii yindanit'a'í éí dah oonééł yaa ádahalyáanii áyidííniid, Siláo bita' góne' bił oohkááh, áko t'áá háiida yikéé' góne' eelwodígíí diltłish bee bidi'yoolyééł. Háálá náá'iiłniihii ádííniid, Bóhólníihii bikin bii' sohodizin góne' éí doo hodi'yoolyéeł da, ní.

¹⁶Áádóó Athaláíyah deisiłgo aláahgo naat'áanii bighan bich'į'go łį́į́' bee yah aná'áldahí góne' ch'élwodgo ákwe'é bi'diisyį́.

¹⁷Áko Jiihóíyada éí Bóhólníihii áádóó aláahgo naat'áanii bidine'é t'áá bił Bóhólníihii bidine'é dajílį́į doo biniyé ahadazdeest'ą́; aláahgo naat'áanii áádóó bidine'é ałdó' yił ahadadeest'ą́.

¹⁸Nít'éé' kéyahgi dine'é kéédahat'íinii t'áá ałtso éí diyin bidi'níinii Béíyal bá kin góne' yah eekaigo nidayiizti', áádóó bibikáá' nááda'iiniihí índa bida'alyaiida t'áá íiyisí ałtso nidayiizti'go deidííséiigo Béíyal bináá'iiłniihii Mátan éí bikáá' nááda'iiniihí bidááhdóó dayiisxį́. Nít'éé' náá'iiłniihii éí Bóhólníihii bikin bii' sohodizin yaa ádahalyą́ą doo biniyé naanish bee bídahólníihii niinínil.

¹⁹Siláo neeznádiingo bindanit'a'í áádóó siláo dah deínéehii bindanit'a'í índa siláo aa ádahalyánígíí áádóó kéyahgi dine'é kéédahat'íinii t'áá ałtso aláahgo naat'áanii éí Bóhólníihii bikin bii' sohodizindę́ę́' yił adadaaskaigo siláo aa ádahalyáanii bich'é'étiin góne' aláahgo naat'áanii bikinjį' yił yíkai. Áádóó aláahgo naat'áanii nídaadleełii bibikáá' nahat'áii yikáá' dah neezdá.

²⁰Nít'éé' éí kéyahgi dine'é kéédahat'íinii t'áá ałtso bił dahózhǫ́, áádóó aláahgo naat'áanii bikin bíighahgi Athaláíyah diltłish yee dayiisxį́į́dóó bik'ijį' kin haal'áhígi hodiiyeel.

²¹Jiihó'ash tsosts'id binááhaigo aláahgo naat'áanii silį́į́'.