Read Navajo II KINGS 13 Bible Online

II KINGS 13 - Navajo bible

II KINGS 13

¹Júdah dine'é aláahgo binanit'a'í Éíhazáíyah biye' Jó'ash nant'áago naadiin táá' náhááh binih Jííhu biye' Jiihó'ahaz éí Samériya kin haal'áagi Ízrel dine'é aláahgo yinanit'a'í silį́į́'; aláahgo naat'áanii nilį́įgo tsosts'idts'áadah nááhai.

²Áko Bóhólníihii binááł doo yá'áshóonii yaa naayá, Nííbat biye' Jerobówam yee ni'iisí'ígíí, éí bee Ízrel dine'é nida'iisíihgo áyiilaii yik'ehgóó níyáago t'áadoo yóó'iidíí'ą́ą da.

³Bóhólníihii éí Ízrel dine'é yich'į' báhóóchįįdgo Síriya dine'é aláahgo binanit'a'í Házeiyel índa biye' Ben-héídad yaa náhodi'áahgo hoolzhiizh.

⁴Síriya dine'é aláahgo binanit'a'í éí Ízrel dine'é yide áhósingo Ízrel dine'é bich'į' nidahwii'ná; éí bąą Jiihó'ahaz éí Bóhólníihii baa níjooskango hodiizts'ą́ą́'.

⁵(Áko Bóhólníihii éí Ízrel dine'é yisdábidooniłii yeidiní' ą́, ákót'éego Síriya dine'é biyaadóó hajookai, áko índa Ízrel dine'é átséédą́ą́' dabighan yii' kéédahat'į́į́ nít'é'ígi át'éego ninákai.

⁶Kót'ée nidi Jerobówam bits'ą́ą́dóó oochíłígíí éí yee nida'iisí'ígíí, éí bee Ízrel dine'é nida'iisíihgo áyiilaii yik'ehgo deíkáahgo t'áadoo yóó'adeidíí'ą́ą da, áádóó Samériya kin haal'áagi ałdó' asdzání bida'alyaii t'ah hólǫ́.)

⁷Ben-héídad éí Jiihó'ahaz ashdladiin łį́į́' yee nidaabaahígíí áádóó tsindaabąąs bijáád naakiígíí neeznáá índa siláo neeznáadi míilgo t'éiyá niinínil, háálá Síriya dine'é aláahgo binanit'a'í łahjį' diné ałtso íísdįįdgo łeezh dibahí nahalingo áyiilaa.

⁸Nít'éé' Jiihó'ahaz łahjį' ádzaaígíí áádóó yaa naayáii t'áá ałtso índa yee ayóó át'éé nít'éé' yę́ę éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁹Áko Jiihó'ahaz éí dahazhé'é yę́ę da'iiłhaazhígi át'éego ajiiłhaazh, áádóó Samériya kin haal'áagi yóó'ádahojiilaa, áko haye' Jó'ash hatsásk'ehgi aláahgo naat'áanii náánásdlį́į́'.

¹⁰Júdah dine'é aláahgo binanit'a'í Jó'ash nant'áago tádiindóó ba'aan tsosts'id náhááh góne', Jiihó'ahaz biye' Jiihó'ash Samériyagi Ízrel dine'é aláahgo yinanit'a'í silį́į́', áko nant'áago hastą́'áadah nááhai.

¹¹Jiihó'ash éí Bóhólníihii binááł doo yá'ádaashóonii yaa naayáago Nííbat biye' Jerobówam yee ni'iisí'ígíí t'áá át'é éí bee Ízrel dine'é nida'iisíihgo áyiilaii t'áadoo yóó'iidíí'ą́ą da, nidi éí yik'ehgo naayá.

¹²Áádóó Jó'ash łahjį' ádzaaígíí áádóó yaa naayáii éí t'áá át'é índa yee ayóó át'éii bee Júdah dine'é aláahgo binanit'a'í Amazáíyah yik'ijį' naazbaa'ígíí éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹³Áko Jó'ash éí dahazhé'é yę́ę da'iiłhaazhígi át'éego ajiiłhaazh, áádóó Ízrel dine'é aláahgo bindanit'a'í yę́ę Samériya kin haal'áagi yóó'ádaalyaagi yóó'áho'diilyaa, áko Jerobówam éí habikáá'dóó nahat'áii yikáá' dah neezdá.

¹⁴Áko Iiláísha éí bitah honiigaii t'áá éí yits'ą́ą́dóó dadootsaał yę́ędą́ą́', Ízrel dine'é aláahgo binanit'a'í Jó'ash éí haa níyáago hak'ijį' sitį́įgo yichago ání, Shizhé'é, shizhé'é, tsinaabąąs bijáád naakiígíí Ízrel dine'é bee bich'ą́ą́h na'abaahii índa łį́į́' yee nida'ałbąąsii!

¹⁵Nít'éé' Iiláísha áháłní, Ałtį́į́' áádóó k'aa' nídiinííł. Áko ałtį́į́' k'aa' biłgo nízhdiinil.

¹⁶Áko Ízrel dine'é aláahgo binanit'a'í ábijiní, Níla' bee ałtį́į́' yiiłtsóód. Áko jiiłtsoodgo Iiláísha bíla' yee aláahgo naat'áanii bíla' yikáá' dah deesnii'.

¹⁷Nít'éé' ání, Ha'a'aahjigo tsésǫ' ąą ánílééh. Áko ąą ájiilaa. Nít'éé' Iiláísha ání, Adzíłt'óóh. Áko iijííłt'oh. Áádóó ání, Bóhólníihii bik'aa' bee hodínóonééł; t'áá éí Síriya dine'é bee baa hodínóonééł; jó, Éífekdi Síriya dine'é ałtso ásíníłdįįdjį' nidííłtsił.

¹⁸Áko áháłní, K' aa' nídiinííł. Áko nízhdiinil. Áádóó Ízrel dine'é aláahgo binanit'a'í ábijiní, Ni'jį' bee adzíłt'óóh. Táadi bee iijííłt'oh áádóó t'áá ákódí.

¹⁹Nít'éé' Diyin God yá naal'a'í hach'į' báhóóchįįdgo ání, Ashdladi, doodaii' hastą́ądi iizdííłt'oh nít'éé', ákohgo Síriya dine'é ałtso ádííłdįįłjį' atídíílííł nít'éé', nidi k'ad Síriya dine'é t'áá tá'ídi atídíílííł.

²⁰Áádóó Iiláísha daaztsą́ągo yóó'ádajiilaa. Íídą́ą́' náhááh góne' Mó'ab dine'é ła' kéyahjį' anájahgo t'áadoo le'é ghadayii'nííł.

²¹Ákódzaadóó diné léi' yóó'ádajiléehgo, shoo, diné ła' t'áá na'níle'dii yijahgo dadziiłtsą́ągo diné yóó'ádajiléhígíí Iiláísha bitséní'ootséél góne' adadziisxan, áádóó diné bits'íís éí Iiláísha yę́ę bits'in bíhidéé'náa'go náhoo'nii'go yiizį'.

²²Jiihó'ahaz bíyoołkááł yę́ędą́ą́' Síriya dine'é aláahgo binanit'a'í Házeiyel éí Ízrel dine'é yide áhósin nít'éé'.

²³Áko Bóhólníihii haa jooba' áádóó haa a'ááh nízingo hodiizts'ą́ą́' índa Éíbraham áádóó Áízak índa Jéíkab yił ahada'deest'ánígíí biniinaa doo ałtso áhodoołdįįł da, nidi díí jį́įjį' hólónídóó doo áts'ą́ąjį' kóháléeh da.

²⁴Síriya dine'é aláahgo binanit'a'í Házeiyel daaztsą́ągo haye' Ben-héídad éí hatsásk'ehgi aláahgo naat'áanii silį́į́'.

²⁵Áko Jiihó'ahaz biye' Jiihó'ash éí Házeiyel biye' Ben-héídad éí kin hadaas'á hazhé'é Jiihó'ahaz anaa' bee yílák'eedóó hayíínilígíí bílák'ee háájoo'nil. Jó'ash táadi hak'eh nídeesdlį́į'go Ízrel dine'é bikin hadaas'áhígíí nínázhdii'nil.