Read Navajo II KINGS 14 Bible Online

II KINGS 14 - Navajo bible

II KINGS 14

¹Ízrel dine'é aláahgo binanit'a'í Jiihó'ahaz yę́ę biye' Jó'ash nant'áago naaki náhááh góne' Júdah dine'é aláahgo binanit'a'í Jó'ash yę́ę biye' Amazáíyah aláahgo nant'á silį́į́'.

²Éí naadiin ashdla' binááhaigo aláahgo naat'áanii nilį́įgo hahoolzhiizh, áádóó naadiin náhást'éí nááhaijį' Jerúsalem kin haal'áagi nant'áá nít'éé'. Áko bimá éí Jerúsalemdóó naagháago Jiihó'adan wolyéé nít'éé'.

³Áádóó Bóhólníihii binááł t'áá ákogi ádaat'éii yaa naayá, nidi doo bizhé'é David yę́ęgi át'éego naayáa da, áko bizhé'é Jó'ash t'áá ałtso yaa naayáhígíí bik'ehgo yaa naayá.

⁴Nidi dah daask'id bighą́ą'di ádaalyaaígíí doo nahjį' kólnééhgóó ákwe'é tsin bijeeh dilidgo łikání halchinii diné t'ah náádayiiłniih nít'éé'.

⁵Kódzaago bee óhólnííh haa deet'ą́ągo t'áá áko há naal'a'í nidilt'éego hazhé'é aláahgo naat'áanii yiyiisxínígíí nidzistseed.

⁶Nidi hazhé'é yiyiisxínígíí ba'áłchíní éí t'áadoo nidzistseed da; Mózes binaaltsoos biyi' bee haz'áanii t'áá bee ak'e'ashchínígíí biyi' Bóhólníihii haadzíí' kóníigo, Azhé'é danilíinii áłchíní biniinaa doo nidootsił da, doodaii' áłchíní bizhé'é biniinaa doo nidootsił da, nidi diné t'ááłá'í jinítínígo ádił nidadziisíhígíí biniinaa nidaho'ditseed doo.

⁷Áádóó Áshįįh Bił Honíts'aa' hoolyéé góyaa Íídam dine'é bisiláo neeznáadi míilgo nidzistseed, índa Síílah kin haal'áii anaa' bee dzisná, áádóó díí jį́įjį' Jákthiyel bee hojíízhi'.

⁸Nít'éé' Amazáíyah éí Jííhu binálí Jiihó'ahaz biye' Ízrel dine'é aláahgo binanit'a'í Jiihó'ash yich'į' hane' yił nidaal'a'í ayííł'a'go ííłní, Hágo, anaa' biniyé ahididiit'ashgo ahidiigą́ą́ł.

⁹Áko Ízrel dine'é aláahgo binanit'a'í Jiihó'ash éí Júdah dine'é aláahgo binanit'a'í Amazáíyah yich'į' i'ííł'a'go ííłní, Lébanan kéyahdóó ch'il deeníní éí Lébanandóó gad sikaadii yich'į' i'ííł'a'go kóní, Nitsi' shiye' yił ahaa doot'ash biniyé baa dííłtééł; nít'éé' Lébanangi naaldlooshii ałchinii naagháago éí ch'il deeníní łeeh yí'ííł'eez.

¹⁰Íídam dine'é bisiláo t'áá aaníí nisíníłtseedgo éí bee ádaa hosíní'nih; bee ádaa ho'niihígíí hazhó'ó nighangi bił ánít'é. Ha'át'íísh biniyé ni áádóó Júdah dine'é t'áá bił nihik'eh didoodleełgo atínihidoolíiłii baa nánít'į́?

¹¹Nidi Amazáíyah doo íists'ą́ą' da. Éí bąą Ízrel dine'é aláahgo binanit'a'í Jiihó'ash éí Júdah dine'é aláahgo binanit'a'í Amazáíyah yich'į' ákóde ííyáago éí Júdah kéyahgi Beth-shíímesh kin shijaa'di ałch'į' nizhní'áázh.

¹²Áádóó Ízrel dine' é éí Júdah dine'é yik'eh dadeesdlį́į'go diné t'ááłá'í nítínígo dabighangóó anídahineezhchą́ą́'.

¹³Áko Ízrel dine'é aláahgo binanit'a'í Jiihó'ash éí Júdah dine'é aláahgo binanit'a'í Amazáíyah éí Eihazáíyah binálí Jiihó'ash biye' nilį́įgo Beth-shíímeshgi yisná áádóó Jerúsalemjį' níyáago Jerúsalem ditą́ągo binaa ahéé'ítł'inígíí Íífreiyim yah a'atiinídóó bee nástł'ahgi aań'dítį́híjį', éí hastą́ądi neeznádiin adées'eez bíighahjį' naa adeineeskaad.

¹⁴Áko Bóhólníihii bikin bii' sohodizin góne' óola áádóó béésh łigaii índa łeets'aa' bik'ídajiiskaígíí índa aláahgo naat'áanii bighandóó naalye'é nídayiizlá'ígíí áádóó diné dadzisnánígíí bił Samériya kin haal'áágóó t'ą́ą́' aníjookai.

¹⁵Áko Jiihó'ash łahjį' ádzaaígíí éí yaa naayáhígíí índa yee ayóó át'éé nít'é'ígíí áádóó Júdah dine'é aláahgo binanit'a'í Amazáíyah yił anaa' ahił'į́į́ nít'é'ígíí éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹⁶Nít'éé' Jiihó'ash éí dabizhé'é yę́ę da'iiłhaazhígi át'éego ajiiłhaazhgo Samériyagi Ízrel dine'é aláahgo binanit'a'í danilį́į́ nít'éé' yę́ę yóó'ádaalyaaígi yóó'áho'diilyaa, áádóó haye' Jerobówam hatsásk'ehgi aláahgo naat'áanii nant'á silį́į́'.

¹⁷Ízrel dine'é aláahgo binanit'a'í Jiihó'ahaz biye' Jiihó'ash daaztsą́ą́dóó bik'ijį' Júdah dine'é aláahgo binanit'a'í Jó'ash biye' Amazáíyah hináago ashdla'áadah nínáánááhai.

¹⁸Áádóó Amazáíyah łahjį' ádzaaígíí éí Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹⁹Áko Jerúsalemgi hondahaz'ą́ągo Léíkish kin haal'áágóó azhnííchą́ą́', nidi ákǫ́ǫ́ hakéé' ada'as'a'go áadi dahwiisxį́.

²⁰Áádóó łį́į́' yee nídahastį́įgo Jerúsalem éí David yę́ę bikin haal'áhígi dahazhé'é yę́ę yóó'ádaalyaagi yóó'ádahojiilaa.

²¹Áádóó Júdah dine'é t'áá ałtso éí Azaráíyah hastą́'áadah binááhaigo hazhé'é Amazáíyah yę́ę bitsásk'ehgi aláahgo naat'áanii nilį́įgo ádahoolaa.

²²Aláahgo naat'áanii Amazáíyah éí dabizhé'é yę́ę da'iiłhaazhígi át'éego ajiiłhaazhdóó bik'ijį' Azaráíyah éí Íílath kin haal'áii hasht'ééyiidlaago Júdah dine'é yaa néidiní'ą́.

²³Júdah dine'é aláahgo binanit'a'í Jó'ash yę́ę biye' Amazáíyah nant'áago ashdla'áadah náhááh góne' Ízrel dine'é aláahgo binanit'a'í Jó'ash yę́ę biye' Jerobówam éí Samériya kin haal'áagi aláahgo nant'á silį́į́' áádóó nant'áago dízdiindóó ba'aan t'ááłá'í nááhai.

²⁴Áádóó Bóhólníihii binááł doo yá'ádaashóonii yaa naayáago Nííbat biye' Jerobówam yee ni'iisí'ígíí t'áá át'é éí bee Ízrel dine'é nida'iisíihgo áyiilaii t'áadoo yóó'iidíí'ą́ą da.

²⁵Gath-híífer kin shijaa'dóó Diyin God yá halne'ii Amítai biye' Jónah éí Bóhólníihii Ízrel biDiyin God yá naal'a'í yee yich'į' haadzí'ígíí bik'ehgo Jerobówam éí Héímath kin haal'áádóó, dzígai Árabah hoolyéedi tónteel siyíníjį', éí kéyah t'áá nidanees'áníjį' shónáyoost'e'.

²⁶Áko Ízrel dine'é t'áá íiyisí bik'e'ashch'íi'go bich'į' nidahwii'náá lágo Bóhólníihii yiyiiłtsą́; jó, Ízrel dine'é naalte', doodaii' doo naalte' nilíinii bíká adoolwołígíí doo ła' daadzíi' da.

²⁷Nidi, Bóhólníihii éí yá'ąąsh biyaadóó Ízrel dine'é bízhi' nahjį' kódeesh łííł, doo dííniid da, nidi Jó'ash biye' Jerobówam yee yisdáhóónil.

²⁸Áko Jerobówam łahjį' ádzaaígíí áádóó yaa naayáhígíí t'áá át'é índa yee ayóó át'éé nít'éé' yę́ę áádóó naazbaa'go Damáskas kin haal'áii índa Héímath kin haal'áii éí Júdah dine'é bí nít'é'ígíí Ízrel dine'é yá shónáyoost'e'ígíí éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²⁹Áádóó Jerobówam éí dahazhé'é yę́ę t'áá éí Ízrel dine'é aláahgo bindanit'a'í da'iiłhaazhígi át'éego ajiiłhaazh, áko haye' Zakaráíyah hatsásk'ehgi aláahgo nant'á silį́į́'.