Read Navajo II KINGS 15 Bible Online

II KINGS 15 - Navajo bible

II KINGS 15

¹Ízrel dine'é aláahgo binanit'a'í Jerobówam nant'áago naadiin tsosts'id náhááh góne' Júdah dine'é aláahgo binanit'a'í Amazáíyah yę́ę biye' Azaráíyah aláahgo nant'á silį́į́'.

²Éí hastą́'áadah binááhaigo aláahgo nant'á silį́į́'. Jerúsalem kin haal'áagi nant'áago ashdladiindóó ba'aan naaki nááhai. Bimá éí Jerúsalemdóó naagháago Jekoláíyah wolyé.

³Áádóó hazhé'é Amazáíyah áát'įįdígíí t'áá át'é bik'ehgo éí Bóhólníihii binááł t'áá ákogi ádaat'éii baa nijiyá.

⁴T'áá hazhó'ó ninádahałaah doo biniyé wódah nahaz'ą́ągo ádaalyaaígíí t'áadoo nahjį' kólyaa da; ákwe'é t'ahdii didlidgo nááhániihii índa tsin bijeeh dilidgo łikání halchinii nááhániihii náádajiiłniih.

⁵Nít'éé' aláahgo naat'áanii éí łóód ats'íís yiyáanii naałdzidii yee Bóhólníihii atíbiilaago daaztsą́ bijį́įjį' t'áá sahdii bighan nít'éé'. Aláahgo naat'áanii biye' Jótham haghan bee bóhólníihgo kéyahgi kéédahat'ínígíí yinant'áá nít'éé'.

⁶Azaráíyah łahjį' ádzaaígíí áádóó yaa naayáhígíí t'áá át'é Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁷Áko Azaráíyah éí dahazhé'é da'iiłhaazhígi át'éego ajiiłhaazh, áádóó David yę́ę bikin haal'áagi dahazhé'é yę́ę yóó'ádabi'diilyaaígi yóó'áho'diilyaa, áádóó haye' Jótham hatsásk'ehgi aláahgo naat'áanii silį́į́'.

⁸Azaráíyah éí Júdah dine'é aláahgo yinanit'a'í nilį́įgo tádiindóó ba'aan tseebíí náhááh góne' Jerobówam yę́ę biye' Zakaráíyah éí Samériya kin haal'áagi Ízrel dine'é yinant'áago hastą́ą́h nídeezid.

⁹Dahazhé'é ádáát'įįdígíí bik'ehgo Bóhólníihii binááł doo yá'ádaashóonii baa nijiyá; Nííbat biye' Jerobówam yee ni'iisí'ígíí éí bee Ízrel dine'é nida'iisíihgo áyiilaii éí t'áadoo yóó'iidíí'ą́ą da.

¹⁰Jéíbesh biye' Shálam honahaz'ą́ągo dine'é yinááł atíhoolaago hwiisxį́ áádóó hatsásk'ehgi aláahgo nant'á silį́į́'.

¹¹Zakaráíyah łahjį' ádzaaígíí éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹²Bóhólníihii éí Jííhu díí yee yich'į' haadzíi'go ádííniid, Na'áłchíní náás ahoolchíiłii dį́įdi ałk'i ná'ázhchį́į́góó Ízrel dine'é bibikáá'dóó nahat'áii yikáá' dah náhidinoobįįł dooleeł. Ákót'éego bohoolyaa.

¹³Azáíyah éí Júdah dine'é aláahgo yinanit'a'í nilį́įgo tádiindóó ba'aan náhást'éí náhááh góne' Jéíbesh yę́ę biye' Shálam aláahgo nant'á silį́į́', áko Samériya kin haal'áagi nant'áago t'ááłá'í nídeezid.

¹⁴Nít'éé' Géídai biye' Ménahem éí Térzah kin haal'áádóó Samériyajį' níyá, áádóó ákwii Jéíbesh biye' Shálam atíyiilaago yiyiisxį́, áko éí bitsásk'ehgi aláahgo naat'áanii silį́į́'.

¹⁵Shálam łahjį' ádzaaígíí áádóó inahaz'ánígíí éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹⁶Nít'éé' Ménahem éí Tífsah kin haal'áii áádóó ákwii diné kéédahat'ínígíí t'áá ałtso índa Térzah kin haal'áádóó kéyah t'áá át'é yik'ijį' naazbaa'go yik'eh deesdlį́į́'; yah a'atiin doo há ąą ádahalééhgóó biniinaa yik'ijį' naazbaa'go asdzání daaltsánígíí t'áá ałtso bibid ąą deidiyiizǫ́ǫ́z.

¹⁷Azaráíyah éí Júdah dine'é aláahgo yinanit'a'í nilį́įgo tádiindóó ba'aan náhást'éí náhááh góne' Géídai biye' Ménahem éí Ízrel dine'é aláahgo yinanit'a'í silį́į́', áko Samériyagi aláahgo nant'áago neeznáá nááhai.

¹⁸Áko Bóhólníihii binááł doo yá'ádaashóonii yaa naayáago Nííbat biye' Jerobówam yee ni'iisí'ígíí éí bee Ízrel dine'é nida'iisíihgo áyiilaii éí hóyoołkááł bijį́įjį' t'áadoo yits'áníyáa da.

¹⁹Áádóó Asíriya dine'é aláahgo binanit' a'í Pul éí Ízrel dine'é yich'į' anaa' hasłį́į́', áko Ménahem bee óhólnííh bidziilgo jótą' doo biniyé Pul háká adoolwołgo béésh łigaii tálent wolyéhígíí t'ááłáhídi míilgo baazhnínil.

²⁰Áko Ménahem éí béésh łigaii shékel wolyéii Asíriya dine'é aláahgo binanit'a'í baa doo'nił biniyé Ízrel dine'é da'at'íinii t'áá ałtso bits'ą́ą́dóó t'ááłá'í nítínígo shékel ashdladiingo nideidiyooléełgo bee hojiił'a', áádóó anáádzáago doo t'áá kéyahgi naagháa da nít'éé'.

²¹Ménahem łahjį' ádzaaígíí áádóó yaa naayáhígíí t'áá ałtso éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²²Áko Ménahem éí dahazhé'é yę́ę da'iiłhaazhígi át'éego ajiiłhaazh áádóó haye' Pekaháíyah hatsásk'ehgi aláahgo nant'á silį́į́'.

²³Azaráíyah éí Júdah dine'é aláahgo yinanit'a'í nilį́įgo ashdladiin náhááh góne' Ménahem biye' Pekaháíyah éí Samériyagi Ízrel dine'é aláahgo yinanit'a'í silį́į́', áádóó nant'áago naaki nááhai.

²⁴Áádóó Bóhólníihii binááł doo yá'ádaashóonii yaa naayáago Nííbat biye' Jerobówam yee ni'iisí'ígíí éí bee Ízrel dine'é nida'iisíihgo áyiilaii t'áadoo yits'áníyáa da.

²⁵Nidi hasiláo yinanit'a'í nilíinii Remaláíyah biye' Pííkah éí Gíliyadóó diné ashdladiingo yił honahaz'ą́ągo Samériyadi aláahgo naat'áanii bikin náwóne'édi Árgab áádóó Aráíyeh t'áá yił nahastseed, áko hatsásk'ehgi aláahgo naat'áanii silį́į́'.

²⁶Pekaháíyah łahjį' ádzaaígíí áádóó yaa naayáii t'áá át'é Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²⁷Azaráíyah éí Júdah dine'é aláahgo yinanit'a'í nilį́įgo ashdladiindóó ba'aan naaki náhááh góne' Remaláíyah biye' Pííkah éí Samériyagi Ízrel dine'é aláahgo yinant'á silį́į́'; ákwii nant'áago naadiin nááhai.

²⁸Áádóó Bóhólníihii binááł doo yá'ádaashóonii yaa naayá; Nííbat biye' Jerobówam yee ni'iisí'ígíí éí bee Ízrel dine'é nida'iisíihgo áyiilaii t'áadoo yits'áníyáa da.

²⁹Ízrel dine'é aláahgo binanit'a'í Pííkah bíyoołkááł yę́ędą́ą́' Asíriya dine'é aláahgo binanit'a'í éí kin hadaas'á Áíjan, Éíbel-beth-méíyakah, Janówah, Kíídesh índa Héízar áádóó Gíliyad, Gálilii índa Náftalai kéyah t'áá át'éé nít'éé' yisná, áádóó diné deisnánígíí Asíriyagóó ayiizh'eezh.

³⁰Áko Azáíyah biye' Jótham aláahgo naat'áanii nilį́įgo naadiin náhááh góne' Íílah biye' Hoshíya éí Remaláíyah biye' Pííkah yinahaz'ą́ągo atíyiilaago yiyiisxį́ áádóó éí bitsásk'ehgi aláahgo naat'áanii silį́į́'.

³¹Pííkah łahjį' ádzaaígíí áádóó yaa naayáii t'áá át'é éí Ízrel dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

³²Remaláíyah biye' Pííkah éí Ízrel dine'é aláahgo yinanit'a'í nilį́įgo naaki náhááh góne' Júdah dine'é aláahgo binanit'a'í Azáíyah biye' Jótham aláahgo naat'áanii silį́į́'.

³³Naadiin ashdla' binááhaigo aláahgo naat'áanii silį́į́', áko Jerúsalemgi nant'áago hastą́'áadah nááhai. Bimá éí Zéídak yitsi' nilį́įgo Jiirúsha wolyé.

³⁴Áko hazhé'é Azáíyah yę́ę áát'įįdígíí bik'ehgo Bóhólníihii binááł t'áá ákogi ájít'į́į́ nít'éé'.

³⁵Ákondi ninádahałaah doo biniyé wódah nahaz'ą́ągo ádaalyaaígíí éí t'áadoo nahjį' kólyaa da, nidi ákwe'é diné éí t'ah didlidgo nááhániihii índa tsin bijeeh dilidgo łikání halchinii nááhániihii náádayiiłniih. Bóhólníihii bikin bii' sohodizingi wódahgo yah a'atiinígíí áńjiidlaa.

³⁶Jótham łahjį' áát'įįdígíí áádóó yaa naayáii t'áá át'é éí Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

³⁷Éí yoołkááł yę́ędą́ą́' Bóhólníihii éí Síriya dine'é aláahgo binanit'a'í Ríízin áádóó Remaláíyah biye' Pííkah éí Júdah dine'é yich'į' yił'áago hahoolzhiizh.

³⁸Jótham éí dahazhé'é yę́ę da'iiłhaazhígi át'éego ajiiłhaazh, áádóó hazhé'é David yę́ę bikin haal'áhígi dahazhé'é yę́ę yóó'ádabi'diilyaaígi yóó'áho'diilyaa, áko haye' Éíhaz hatsásk'ehgi aláahgo naat'áanii silį́į́'.