Read Navajo II KINGS 19 Bible Online

II KINGS 19 - Navajo bible

II KINGS 19

¹Nít'éé' aláahgo naat'áanii Heziikáíyah éí yidiizts'ą́ą'go bi'éé' ák'inayooldláadgo tł'oh yishbizh ák'íísti'go Bóhólníihii bikin bii' sohodizin góne' yah ííyá.

²Áádóó haghan yinanit'a'í nilíinii Iiláíyakim áádóó naaltsoos ííł'íní Shébna índa alą́ąjį' nááda'iiłniihii éí tł'oh yishbizh bik'ídaasti'go Éímaz biye' Aizéíyah Diyin God yá halne'ii nilíinii bich'į' ajiis'a'.

³Áko ádahałní, Heziikáíyah kóní, Díí jį́ éí ach'į' nahwii'náajį' ayííłką́, aditeeh áádóó baa'ihgo ha'oodzíí' bainíłką́, háálá áłchíní bida'niichį́įgo bi'niiłchíinii be'adziilii bee ádaadin.

⁴Bóhólníihii niDiyin God daats'í Rábshakeh bizaad t'áá át'é yididoots'į́į́ł; éí binanit'a'í Asíriya dine'é aláahgo binant'á bííł'aadgo Diyin God hináanii yá nahast'i', áko Bóhólníihii niDiyin God éí saad yidiizts'ą́'ígíí biniinaa yididooteh; éí bąą Ízrel dine'é daadziihígíí bá sodílzin.

⁵Kót'éego aláahgo naat'áanii Heziikáíyah bá nidaal'a'í Aizéíyah yaa yíkai.

⁶Áko Aizéíyah áhodííniid, Nihinanit'a'í kódabididoohniił, Bóhólníihii kóní, Asíriya dine'é aláahgo binanit'a'í bá nidaal'a'í baa'ihgo shá hadaasdzíi'go disíníts'ą́'ígíí t'áadoo bik'ee nił yé'í.

⁷Jó, níłch'i hwiih deesh'aałgo aseezį́ yididoots'į́įłgo t'áá bí bikéyahgóó dah nídidoodááł, áádóó t'áá bí bikéyahdi diltłish bee bidi'yoolyééł.

⁸Áko Rábshakeh t'ą́ą́' nádzáago Asíriya dine'é aláahgo binanit'a'í Líbnah kin haal'áii yik'ijį' naabaah lá; jó, aláahgo naat'áanii Léíkish kin haal'áádóó dah nídiidzáago jíínii'.

⁹Nít'éé' Iithiyópiya dine'é aláahgo binanit'a'í Túrhakah baa hane'go yidiizts'ą́ą'go, Jó, nik'ijį' nidoobah biniyé yigááł, ha'níigo baa hojíínii'go Heziikáíyah yich'į' anáá'ííł'a' kóníigo,

¹⁰Júdah dine'é aláahgo binanit'a'í Heziikáíyah bich'į' hadíídzih kóbidiníigo, NiDiyin God baadzíínílíhígíí t'ááká ni'dóleeh lágo, kóníigo, Asíriya dine'é aláahgo binanit'a'í éí Jerúsalem kin haal'áii doo baa didoot'áał da.

¹¹Jó, Asíriya dine'é aláahgo binanit'a'í danilíinii kéyah t'áá át'é ádayííł'įįdígíí índa ałtso dahóółchxǫ'ígíí baa hodisíníts'ą́ą́'; ákoósh yisdáshidi'dooltéé ł nínízin?

¹²Da' shizhé'é yę́ę ał'ąą dine'é bidiyin danilíinii ádeisdįįdígíí, éí Gózan áádóó Héíran índa Ríízef kin hadaas'áhígíí áádóó Ííden dine'é éí Thiiléísergi kéédahat'į́į́ nít'ée'ii bidiyin danilíiniísh yisdádahwiiznil?

¹³Héímath kin haal'áádóó aláahgo naat'áaniishą', Árpad kin haal'áádóó aláahgo naat'áaniishą', Séfarvéíyim kin haal'áádóó aláahgo naat'áanii áádóó Híína kin haal'áádóó índa Áívah kin haal'áádóó aláahgo naat'áaniishą', éísh daaháájí?

¹⁴Heziikáíyah éí hane' nidei'áhí naaltsoos haa deistsoozgo jííłta', áádóó Heziikáíyah éí Bóhólníihii bikin bii' sohodizin góde hajiyáago Bóhólníihii bidááhdóó nizhníłtsooz.

¹⁵Áko Heziikáíyah éí Bóhólníihii yich'į' kóníigo sodoolzin, Ízrel biDiyin God Bóhólníihii nílíinii, diyingo naal'a'í chérabim bita'gi honílóonii, t'áá ni t'éiyá nihokáá'góó bee ídahólníihii t'áá ałtso biDiyin God nílį́; yádiłhił índa nahasdzáán íinilaa.

¹⁶Bóhólníihii, shich'į' dah díníit'aahgo shíísíníłts'ą́ą́', Bóhólníihii nílíinii, díghaałgo díní'į́į́' áádóó Senákerib saad yee hahaasdzíi'ii diits'į́į́h; éí yiyííł'aadgo Diyin God hináanii yá nahast'i'.

¹⁷Bóhólníihii nílíinii, Asíriya dine'é aláahgo binanit'a'í danilíinii t'áá aaníí ał'ąą dine'é íísdįįd áádóó bikéyah dayííłchxǫ',

¹⁸áádóó bidiyin dabidi'níinii adeideesk'ą́ą́'; jó, éí doo diyin da nít'éé', nidi tsé índa tsin ádaat'éego diné ádabiilaa; éí bąą ádeisdįįd.

¹⁹Éí bąą k'ad, Bóhólníihii nihiDiyin God nílíinii, nánooshkąąh, nihokáá'góó bee ídahólníihii éí t'áá ni t'éiyá Bóhólníihii Diyin God nílį́įgo bił béédahodoozįįł biniyé éí bits'ą́ąjį' yisdánihínííł.

²⁰Áko Éímaz biye' Aizéíyah éí Heziikáíyah yich'į' i'ííł'a' kóníigo, Ízrel dine'é biDiyin God Bóhólníihii nilíinii ání, Asíriya dine'é aláahgo binanit'a'í Senákerib bik'ijį' sodíínílzinii éí diséts'ą́ą́'.

²¹Díí saad éí hodéét'i'go Bóhólníihii yee haadzíí', Ch'ikę́ę́h Záíyan bich'é'é nilíinii niz'įįdgo áádóó neiidlohgo ná nahast'i'; Jerúsalem bich'é'é nilíinii nich'į' bitsiits'iin yiyíígháád.

²²Háísh baa'ihgo bá nahółt'i'go yínídzíí'? Háíyee' bich'į' t'áá na'níle'dii háínídzíí'? Háíyee' bich'į' ádaa dzíínídlíigo háíníghal? Ízrel dine'é biDiyin nilíinii bich'į' lą́ą.

²³Hane' ná nidei'áhí bee Bóhólníihii bá nahosíníłt'i'go ádííníniid, Shitsindaabąąs bijáád naakiígíí t'óó ahayóigo bee dził aghádaaz'áá góde áádóó Dził Lébanan bíniinahjį' hadeesháałgo gad naazkaadii ayóó ádaníłnézígíí áádóó ch'ó ayóó ádanoolninii deestsił áádóó kéyah nidanees'ą́ą́góó dahooghangóó yah ahideeshááł índa Dził Kármel bitsin yíl'áhígíí bitahgi nideeshááł.

²⁴Tó hadahánil áádóó dé'éyóní dabito' yishdlą́ą́'; Ííjip kéyahgi tooh danílínígóó tádííyáago ałtso néíłtsei.

²⁵Da' doósh ałk'idą́ą́' baa niséyáhígíí baa hosidíníts'ą́ą' da? Ałk'idą́ą́' binahosí'áanii éí bohoolyaago áshłaa. Kót'éego kin hadaas'á ditą́ągo binaa ahééda'astł'inígóó ałtso dááchxǫ'go yáádaa'áago íinilaa.

²⁶Éí bąą ákwii kéédahat'į́į́ nít'é'ígíí bibee adziilii ádaadin nít'éé', áko nitseekaigo t'óó bił dahóóląąd; halgaidóó ch'ilígíí áádóó ch'il dit'ódí áádóó kin bighą́ą́'dóó ch'il hadaneesánígíí índa tł'oh naadą́ą́' t'ah doo díníséégóó t'áá áajį' ásdįįdígíí nidahalin nít'éé'.

²⁷Nidi kééhót'į́įgi áádóó ch'éénídáahgi índa yah anánídáahgi áádóó shich'į' náháchį'ígíí shił bééhózin.

²⁸Shich'į' náháchį'ígíí áádóó yéego náháchį'go diséts'ą́'ígíí biniinaa shibéésh názhahígíí níchį́į́h bighá deestsih índa she'azáát'i'í nizadeesht'ih áádóó yíníyáhádę́ę́' ákǫ́ǫ́ t'ą́ą́' kónándeeshdlííł.

²⁹Áko díí nich'į' bee ééhózin doo: Díí yihahígíí nanise' t'áá bí hadahineesáanii éí niyą́ą doo áádóó naaki náhááh góne' t'áá ákót'éego hadaneesánígíí bąąh náá'ídą́ą doo áádóó táá' náhááh góne' k'idi'díílééł áádóó adííyish índa ch'il na'atł'o'ii k'ididííléełgo bineest'ą' niyą́ą doo.

³⁰Áádóó Júdah dine'é daadziihígíí éí yóó'adahineezhchą́'ígíí behétł'óól łeeh dadínóoséełgo áádóó dego dadínóoséełgo bineest'ą' dahodooleeł.

³¹Jó, daadziihígíí Jerúsalem kin haal'áádóó ch'ídookah; t'áá éí Dził Záíyandóó yisdádahineezhchą́'ígíí t'áá ałtsoní bee Bóhólníihii hóneedlį́įgo haa hą́ą́h nízingo ákódoonííł.

³²Éí bąą Bóhólníihii éí Asíriya dine'é aláahgo binanit'a'í bídéét'i'go haadzíi'go ání, Díí kin haal'áajį' doo yah adoogáał da áádóó bik'aa' doo áajį' yee azdoołt'oh da índa naagé doo bidáahjį' yił nidoogáał da; tsé ahénátł'inígíí doo bíilk'idgo íidoolíił da.

³³Bóhólníihii haadzíi'go ání, Jiníyáhádę́ę́' ákǫ́ǫ́ t'ą́ą́' nihéézhdoodááł; díí kin haal'áajį' doo yah azhdoogáał da.

³⁴Háálá díí kin haal'áhígíí shá doodzih áádóó shá naal'a'í yę́ę David bá doodzih biniyé bich'ą́ą́h naasháa doo.

³⁵Nít'éé' t'áá éí bitł'éé' Bóhólníihii bidiyingo naal'a'í honíle'go Asíriya dine'é bisiláo dah yinéłígi t'ááłáhídi neeznádiindóó ba' aan tseebídiindóó ba'aan ashdladi mííl siláo neistseed, áko hoos'įįdgo nízhdiijée'go, shoo, éí t'áá ałtso daneeznáá lá!

³⁶Áko Asíriya dine'é aláahgo binanit'a'í Senákerib dah diiyáago bighangóó t'ą́ą́' anáádzáago Nínevehgi kin haal'áagi kééhat'į́į́ nít'éé'.

³⁷Ákódzaago bidiyin Nísrak wolyéii bikin góne' yich'į' nahałáago haye'ké Adrámalek áádóó Sharíízer diltłish yee hwiisxį́įgo Armíniya kéyahgóó yóó'ahi'noolchą́ą́'. Áko haye' Íísar-hádan hatsásk'ehgi aláahgo nant'á silį́į́'.