Read Navajo II KINGS 2 Bible Online

II KINGS 2 - Navajo bible

II KINGS 2

¹Nít'éé' Bóhólníihii nááts'ó'oołdísii bee Iiláíjah yá'ąąshgóó yił dah didoo'ashjį' ahoolzhiizh, áko Gílgal kin shijaa'dóó Iiláíjah éí Iiláísha yił dah dii'áázh.

²Áko Iiláíjah éí Iiláísha ííłní, T'áá kwe'é sínídá, baa nánooshkąąh, háálá Bóhólníihii Béthel kin haal'áágóó shííł'aad. Nít'éé' Iiláísha áháłní, Ts'ídá t'áá aaníí Bóhólníihii hiná índa hiníná; ákót'éego ts'ídá t'áá aaníí doo nits'ádeesháał da. Áko Béthel góyaa jiní'áázh.

³Nít'éé' Diyin God yá dahalne'ii bídahooł'aahígíí éí Béthelgi Iiláísha yaa yíkaigo ádeiłní, Bóhólníihii díí jį́ bóhoníłníihii nits'ą́ą́' néididoołtéełgoósh nił bééhózin? Aoo', shił bééhózin; t'áadoo ádadohníní.

⁴Áko Iiláíjah áháłní, Iiláísha, t'áá kǫ́ǫ́ sínídá, baa nánooshkąąh, háálá Bóhólníihii Jériko kin haal'áágóó shííł'aad. Áko ání, Ts'ídá t'áá aaníí Bóhólníihii hiná índa hiníná; ákót'éego ts'ídá t'áá aaníí doo nits'ádeesháał da. Áko Jérikogóó jiní'áázh.

⁵Nít'éé' Diyin God yá dahalne'ii bídahooł'aahígíí éí Jérikogi Iiláísha yaa yíkaigo ádeiłní, Bóhólníihii díí jį́ bóhoníłníihii nits'ą́ą́' néididoołtéełgoósh nił bééhózin? Áko hadzoodzíi'go ájíní, Aoo', shił bééhózin; t'áadoo ádadohníní.

⁶Áádóó Iiláíjah áháłní, T'áá kǫ́ǫ́ sínídá, baa nánooshkąąh, háálá Bóhólníihii éí Jórdan toohgóó shííł'aad. Áko ání, Ts'ídá t'áá aaníí Bóhólníihii hiná índa hiníná; ákót'éego ts'ídá t'áá aaníí doo nits'ádeesháał da. Áádóó t'áá ájíłah náás dashdii'áázh.

⁷Áko t'áá ájíłah Jórdan tooh bibąąhdóó dzizį́įgo Diyin God yá dahalne'ii bídahooł'aahígíí éí ashdladiingo ákǫ́ǫ́ yíkaigo t'áá nízaadę́ę́' dadéez'į́į́'.

⁸Áko Iiláíjah bibeeldládí éé' ádeidiiltsoozgo yizdisgo yee tooh néidíí'ahgo tó ałts'áálk'ol, áko t'áá ájíłah hóółtseigóó ha'naa nizhní'áázh.

⁹Nít'éé' ákódzaa ha'naa nizhní'áazhgo Iiláíjah éí Iiláísha ííłní, T'ah doo nits'ą́ą́' náshi'diilteehdą́ą́' ha'át'íishą' ná ádeeshłííł éí yíníkeed. Áko Iiláísha ání, Bíni' niníłch'i naakidi ahą́ą́h náneel'ą́ągo shik'iidooldoh, baa nánooshkąąh.

¹⁰Áádóó ání, Nantł'ago la' í'dííníkeed, ákót'ée nidi, ííshją́ą́ nits'ą́ą́' náshi'diiltį́įgo shiiniłtsą́ą́ ládą́ą́' t'áá ná ákódoonííł, nidi dooda ládą́ą́', éí doo ákódooníił da.

¹¹T'áá yájíłti'go t'áá náás joo'ashgo, jó, tsinaabąąs bijáád naakiígíí kǫ'go índa łį́į́' daakǫ'go jiiłtsą́; éí ałts'á honínil, áko Iiláíjah yá'ąąsh góde nááts'ó'oołdísii yee ííyá.

¹²Áko Iiláísha éí yiyiiłtsą́ągo hadoolghaazh, Shizhé'é, shizhé'é, tsinaabąąs bijáád naakiígíí Ízrel dine'é bee bich'ą́ą́h na'abaahii índa łį́į́' yee nida'ałbąąsii! Áádóó t'áadoo náádziiłtsą́ą da. Áko t'áá hó ha'éé' dziiłtsoodgo ałts'á dzíízǫ́ǫ́z.

¹³Áádóó Iiláíjah bibeeldládí éé' bidáána'ígíí ałdó' nízhdiiłtsoozgo nát'ą́ą́' níjídzáago Jórdan tooh bibąąhdóó jiizį',

¹⁴áko Iiláíjah bibeeldládí éé' bidáána'go nízhdiiłtsoozígíí bee tooh nízhdíí'ahgo ájíní, Iiláíjah biBóhólníihii Diyin Godshą' háájí? Áko hó ałdó' tooh nízhdíí'ahgo tó ałts'áálk'ol, áko Iiláísha ha'naa nizhníyá.

¹⁵Nít'éé' Diyin God yá dahalne'ii bídahooł'aahígíí éí Jérikodę́ę́' dadéez'į́'ígíí ádaaní, Iiláíjah biníłch'i Iiláísha bik'i hoole' lá. Áko ákǫ́ǫ́ hadááh yíkaigo ni'jį' hach'į' yaa ádaadzaa.

¹⁶Áko ádahałní, Shoo, k'ad ná nidaal'a'í ashdladiin diné dahayóígíí yił naakai; bíni' ákǫ́ǫ́ dookah, baa nídaniikąąh, áko bóhoníłníihii hadeidínóotaał; Bóhólníihii biníłch'i dego abííłtį́įgo haa'í shį́į́ daadził bikáa'jį', doodaii' deildzis góyaa abiyííłhan dó'óshłí. Áko Iiláísha ání, Doo ákǫ́ǫ́ ada'dooł'aał da.

¹⁷Nít'éé' yídahoniyodgo wónáásdóó baa yázniizį́į'go ájíní, Da'doł'á. Éí bąą diné ashdladiingo adeis'a'go, ch'ééh hadeintáago táá' yiską́, nidi t'áadoo yik'ídaneeztą́ą' da.

¹⁸Áádóó haa nínáánákai, áko Jériko kin haal'áagi nijighá, áko ádabizhdííniid, Da' doósh t'áá íídą́ą́' ánihidííniid da, Doo ákǫ́ǫ́ dohkah da?

¹⁹Nít'éé' kin haal'áádóó hastóí éí Iiláísha ádeiłní, Nánooshkąąh, shinanit'a'í nílíinii, jó, yíní'į́įgo díí yá'áhoot'éehgi kin haal'á, nidi tó éí t'óó baa'ih áádóó náhodiniichii'go haz'ą́.

²⁰Áko ání, Ásaayáázh ániidíígíí áshįįh biih daahjáahgo shá nídoh'aah. Áko bá nídadziz'ą́.

²¹Áádóó tó háálį́į́góó ííyáago áadi áshįįh yiih yiyííłkaadgo ání, Bóhólníihii kóní, Díí tó hadaazlínígíí doo bąąhígóó ánáshdlaa; éí bits'ą́ą́dóó aniné doo nááhódlǫ́ǫ da doo, índa kéyah doo nínáhodiniichii' da doo.

²²Kót'éego Iiláísha haadzí'ígíí bik'ehgo díísh jį́įjį' tó doo bąąhígóó ánályaa.

²³Áádóó Béthel kin haal'áá góde dah náázhdiidzá; ákǫ́ǫ́ joogááł nít'éé' kin haal'áádę́ę́' tsíłkéí ch'éheezhjée'go há nidahałt'i'go ádahałní, Tsiit'ádii, dego dínááh; tsiit'ádii, dego dínááh.

²⁴Áko Iiláísha naanásdzáago yiníł'į́įgo Bóhólníihii bízhi' bee atídadoolníiłgo yich'į' haadzíí'. Nít'éé' tsintahdę́ę́' shash bi'áadii naakigo ch'íní'áazhgo tsíłkéí dízdiindóó ba'aan naakigo tídeidiilaa.

²⁵Áádóó Dził Kármelgóó dah náázdiidzá áádóó índa Samériya kin haal'áágóó níjídzá.