Read Navajo II KINGS 21 Bible Online

II KINGS 21 - Navajo bible

II KINGS 21

¹Manáseh naakits'áadah binááhaigo aláahgo nant'á silį́į́', áko Jerúsalemgi nant'áago ashdladiindóó ba'aan ashdla' nááhai. Bimá éí Héfzibah wolyé.

²Bóhólníihii éí Ízrel dine'é bitahdóó ał'ąą dine'é doo daaldinii yaa naakaigo ch'íniiníłkaadii t'áá éí bik'ehgo Bóhólníihii binááł doo yá'ádaashóonii yaa naayá.

³Áko hazhé'é Heziikáíyah yę́ę ninádahałaah doo biniyé wódah nahaz'ą́ągo ádaalyaii niyiishchxǫ'ígíí áńdajiidlaago Ízrel dine'é aláahgo binanit'a'í Éíhab áát'įįdígi át'éego Béíyal bá bikáá' náá'iiniihí áádóó asdzání be'elyaii ájiilaa, índa yót'ááh hiníláii yich'į' nahałáago yaa naagháá nít'éé'.

⁴Áádóó Bóhólníihii éí, Jerúsalemgi shízhi' bohoolyée dooleeł, níí nít'éé' yę́ęgi Bóhólníihii bikin bii' sohodizin góne' bikáá' nááda'iiniihí ádayiilaa.

⁵Áko Bóhólníihii bikin bii' sohodizindóó tł'óo'di naakigo haz'ánígíí bii' yádiłhił bii' dahiníláii t'áá ałtso bikáá' nááda'iiniihí yá ádayiilaa.

⁶Índa haye' didlidgo náájiisnii' áádóó álíleego bee ééhózingo bee nahagháii áádóó da'diłgąshii áádóó ch'į́įdii yádabiiłti'ii índa ihwiinidzin chodayooł'į́, áko t'áá íiyisí doo yá'ádaashóonii Bóhólníihii binááł yaa naagháago yee yáhóółchįįd.

⁷Áádóó Bóhólníihii éí David yę́ę áádóó biye' Sálaman yę́ę áyidííniid, Díí kin bii' sohodizingi áádóó Jerúsalem kin haal'áagi Ízrel dine'é t'áá ałtso bitahdóó náhodii'ánígi shízhi' bee wójíigo ahóyéel'áa doo, nínígíí ákwii asdzání be'elyaii áyiilaago éí kin bii' sohodizin góne' yiyiisį'.

⁸Áádóó Bóhólníihii ádííniid, Bee hoséł'áanii t'áá át'é áádóó bee haz'áanii t'áá át'é éí shá naal'a'í Mózes hach'į' yee haadzí'ígíí bik'eh dahojíł'į́įgo dahazhé'é yę́ę kéyah baa diní'áanii bits'ą́ą́dóó doo nahjį' kónááhodeeshdlíił da.

⁹Nít'éé' doo da'íists'ą́ą' da, áko Bóhólníihii éí Ízrel dine'é bits'ą́ą́dóó ał'ąą dine'é íísdįįdígíí ádáát'įįdii t'ah biláhídi át'éego Manáseh éí doo yá'ádaashóonii yiih hóó'eezhgo éí baa nidziskai.

¹⁰Áko Bóhólníihii bá nidaal'a'í bá dahalne'ii yee hahaasdzíi'go ání,

¹¹Júdah dine'é aláahgo binanit'a'í Manáseh éí díí doo daaldinii yaa naayá, áádóó Ámor dine'é hátséedi ádáát'įįdii t'áá át'é biláahgo doo yá'áshóonii yaa naayá, índa Júdah dine'é ałdó' eda'alyaii yee nida'iisííh yiih yiyíínil.

¹²Éí bąą Ízrel biDiyin God Bóhólníihii kóní, Jó, Jerúsalemgi dine'é áádóó Júdah dine'é bik'ijį' doo yá'ádaashóonii ádaat'éhígíí kóshłééh, áko t'áá háiida yaa dahodiizts'ą́'ígíí bik'ee t'áá ałch'ijí bijeeh dahosiilts'įįh doo.

¹³Áádóó Samériya kin haal'áagi tł'óół bee í'neel'ąąhí índa Éíhab ba'áłchíní náás ahoolchíiłii k'éhézdon tł'óół náát'i'ígíí éí Jerúsalem kin haal'áii bee bídadí'néesh'ąął, áádóó diné éí łeets'aa' yit'oodgo yaa nii'áhígi át'éego Jerúsalem t'áá át'é bii' hahodeesht'oł.

¹⁴Áko dine'é shíí' nilį́įgo yidziihígíí yóó'adideesh'áałgo hoda'ana'í baa hodideesh'ááł; hoda'ana'í t'áá ałtso hadahontáa doo áádóó bąąh oogą́ą'ii dajílį́į doo.

¹⁵Háálá dahazhé'é yę́ę Ííjipdę́ę́' ch'ínínáádóó díí jį́įjį' doo yá'ádaashóonii shinááł baa nidziskaigo bee shá dahojííłchįįd.

¹⁶Júdah dine'é nida'iisíihgo ájiilaa yę́ę Bóhólníihii binááł doo yá'áshóonii yaa naaskaígíí t'ah biláhídi át'éego Manáseh éí ba'át'e' ádaadinii t'óó ahayóigo neistseedgo bidił dadeezna'; Jerúsalem kin haal'áagi t'áá nidahonees'ą́ąjį' daneeznánígíí nihidíbéezhgo áyiilaa.

¹⁷Manáseh łahjį' ádzaii áádóó yaa naayáhígíí t'áá át'é índa bee ádił nidziisíhígíí éí Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

¹⁸Áko Manáseh éí dabizhé'é yę́ę da'iiłhaazhígi át'éego ajiiłhaazh, áádóó t'áá hó haghandóó bighą́ąhjį' dah náháltsogi Ázza wolyéii bikéyahgi yóó'áho'diilyaa, áádóó haye' Éíman hatsásk'ehgi aláahgo naat'áanii silį́į́'.

¹⁹Éíman naadiin naaki binááhaigo aláahgo nant'á silį́į́'; Jerúsalem kin haal'áagi aláahgo naat'áanii nilį́įgo naaki nááhai. Bimá éí Miishóliimeth wolyé; éí Játbahdóó diné Héíraz yitsi' nilį́į́ nít'éé'.

²⁰Áádóó hazhé'é yę́ę Manáseh áát'įįdígi át'éego Bóhólníihii binááł doo yá'ádaashóonii baa nijigháá nít'éé'.

²¹Áko hazhé'é yę́ę yaa naagháago bíyoołkááł nít'é'ígíí éí t'áá át'é bik'ehgo joogááł nít'éé' áádóó eda'alyaii hazhé'é yę́ę yich'į' nahałá nít'é'ígíí bich'į' nahojiłáá nít'éé'.

²²Dahazhé'é yę́ę biDiyin God Bóhólníihii yóó'azhdíí'ą́; Bóhólníihii t'áadoo yik'ehgo naayáa da.

²³Nít'éé' aláahgo naat'áanii Éíman há nidaal'a'í hodahodeez'ą́ągo t'áá hó haghan góne' dahwiisxį́.

²⁴Áko kéyahdóó dine'é éí aláahgo naat'áanii Éíman yindahaz'ánígíí ałtso nideistseed, áádóó kéyahdóó dine'é éí Éíman biye' Josáíyah hatsásk'ehgi aláahgo naat'áanii ádayiilaa.

²⁵Éíman łahjį' ádzaii éí yaa naayáhígíí Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

²⁶Áko Ázza bikéyah dah náháltsogi ákwii t'áá hó hatséní'ootséél góne' yóó'áho'diilyaa, áádóó haye' Josáíyah hatsásk'ehgi aláahgo naat'áanii silį́į́'.