Read Navajo II KINGS 22 Bible Online

II KINGS 22 - Navajo bible

II KINGS 22

¹Josáíyah éí tseebíí binááhaigo aláahgo naat'áanii silį́į́', áádóó Jerúsalemgi aláahgo naat'áanii nilį́įgo tádiindóó ba'aan t'ááłá'í nááhai. Bimá éí Jedáídah wolyé, éí Báskathdóó diné Adéíyah yitsi' nilį́.

²Bóhólníihii binááł t'áá ákogi át'éego ááníiłgo bizhé'é David yę́ę níyá nít'é'ígi át' éego naayá; nish'náajigo, doodaii' nishtł'ajigoda t'áadoo nahjį' hááyáa da.

³Áádóó Josáíyah aláahgo naat'áanii nilį́įgo tseebííts'áadah nááhaigo naaltsoos ííł'íní Miishálam binálí, éí Azaláíyah biye' Shéífan éí Bóhólníihii bikin bii' sohodizingóó ayííł'a' go ííłní,

⁴Nílááh, aláahgo náá'iiłniihii Hilkáíyah bich'į' góde dínááh, áko éí Bóhólníihii bikin bii' sohodizin góne' béeso yah aajaa'ígíí, yah e'etiin yaa ádahalyáanii éí dine'é bits'ą́ą́dóó áłah ádayiilaaígíí yíídóołtah.

⁵Áko bíni' Bóhólníihii bikin bii' sohodizingi diné bá nida'anishígíí yaa deidoonił; éí Bóhólníihii bikin bii' sohodizin dááchxǫ'góó hasht'éédeidléehgo yindaalnishígíí yich'į' nideidiyoolééł,

⁶éí tsin nidayiich'iishígíí áádóó kin ádeiléhígíí índa tsé deitł'inígíí yich'į' nideidiyoolééł áádóó tsin neheeshjíí' índa tsé hasht'edaalyaaígíí bee kin bii' sohodizin hasht'éédoolnííł biniyé nidahizhdoołnih.

⁷Áko béeso haa daas'nilígíí doo baa ch'ínídahojiit'aah da, háálá hada'ahódlíigo chodajooł'į́į́ nít'éé'.

⁸Aláahgo náá'iiłniihii Hilkáíyah éí naaltsoos ííł'íní Shéífan ííłní, Bóhólníihii bikin bii' sohodizin góne' bee haz'áanii naaltsoos bee si'ánígíí bik'íníyá. Áko Hilkáíyah éí naaltsoos Shéífan yeiní'ą́ągo yiyííłta'.

⁹Áádóó naaltsoos ííł'íní Shéífan éí aláahgo naat'áanii yaa níyáago yił nahasne'go ání, Ná nidaal'a'í éí Bóhólníihii bikin bii' sohodizin góne' béeso yik'ídaaskaígíí áłah ádayiilaago ákwe'é bá nida'anishígíí yaa deiznil.

¹⁰Nít'éé' naaltsoos ííł'íní Shéífan éí aláahgo naat'áanii yił hoolne'go ání, Alą́ąjį' náá'iiłniihii Hilkáíyah éí naaltsoos léi' sheiní'ą́. Áádóó Shéífan éí aláahgo naat'áanii yich'į' yiyííłta'.

¹¹Áko aláahgo naat'áanii éí bee haz'áanii naaltsoos bee si'ánígíí yidiizts'ą́ą'go ák'ina'ooldláád.

¹²Áádóó aláahgo naat'áanii bá naal'a'í Eisaháíyah áádóó náá'iiłniihii Hilkáíyah áádóó Shéífan biye' Aháíkam áádóó Maikéíyah biye' Ákbor índa naaltsoos ííł'íní Shéífan éí aláahgo naat'áanii hach'į' haadzíi'go ádahodííniid,

¹³Nílááh, díí naaltsoos nídiit'ánígíí biyi'dóó ánínígíí dine'é áádóó Júdah dine'é t'áá ałtso índa shí ałdó' nihá Bóhólníihii nidabídółkid, háálá danihizhé'é yę́ę díí naaltsoos nihídéét'i'go bik'ináháasdzooígíí t'áá át'é doo dayíists'ą́ą́'góó índa doo yik'eh dahół'į́į́góó t'áadoo yik'ehgo ádaadzaaígíí biniinaa Bóhólníihii t'óó báhádzidgo nihich'į' báhóóchįįd.

¹⁴Kót'éego náá'iiłniihii Hilkáíyah áádóó Aháíkam áádóó Ákbor áádóó Shéífan índa Eisaháíyah, éí éé' ninádaa'nił yaa áhályáanii Hárhas binálí, Tíkvah biye' Shálam be'asdzą́ą́ Húldah wolyéii, éí Diyin God yá halne'ii nilíinii yich'į' eekaigo bił ahił nidahodzisne', (áko díí asdzání éí Jerúsalemgi ná'áyaaígi kin yíl'áhídi kééhat'į́).

¹⁵Húldah áháłní, Ízrel biDiyin God Bóhólníihii kóní, Diné shich'į' nihííł'aadígíí éí bił hólne',

¹⁶Bóhólníihii kóní, Jó, t'áá Júdah dine'é aláahgo binanit'a'í éí naaltsoos biyi'dóó yaa ííłta'ígíí t'áá át'é ánínígi át'éego díí kéyah nahós'a'gi índa ákwii kéédahat'ínígíí bik'ijį' doo yá'át'éehii bi'deeshnih,

¹⁷háálá t'áá bí ádayiilaii t'áá át'é yee shá dahodoołchįįłgo yiniyé yóó'adashideez'ą́ągo diyin dabidi'níinii bich'į' tsin bijeeh dilidgo łikání halchinii nááhániihii deidiłid; éí bąą díí kéyah nahós'a'gi kéédahat'ínígíí bich'į' hashké niisdzį́'ígíí doo dínóoltsis da.

¹⁸Nidi Júdah dine'é aláahgo binanit'a'í éí Bóhólníihii nidabídídóołkiłgo yich'į' nihííł'aadígíí éí kódabidohní, Hada'iisdzíi'go baa hosidíníts'ą́'ígíí éí bídadéét'i'gi Ízrel biDiyin God Bóhólníihii kóní,

¹⁹Díí kéyah nahós'a'gi índa yikáá' kéédahat'ínígíí yóó'aho'doot'ą́ągo házhi'ígíí yee diné nida'ódziih dooleełgo bik'ijį' hahásdzí'ígíí disíníts'ą́ą'go, ni'éé' ak'i néíníldláadgo nijéí jooba'go Bóhólníihii binááł a'ohgo ádi'nilyaago shidááhdę́ę́' yíníchago, éí biniinaa shí ałdó' nidiséts'ą́ą́', ní Bóhólníihii.

²⁰Éí bąą jó, danizhé'é yę́ę bił áłah ánándeeshdlííł, áádóó hasht'edíínít'éego yóó'ándi'doolnííł; díí kéyahgi kéédahat'ínígíí bik'ijį' doo yá'ádaat'éehii t'áá át'é bi'deeshnihígíí éí doo yidííłtséeł da. Áko aláahgo naat'áanii hane' baa nídadziz'ą́.