Read Navajo II KINGS 24 Bible Online

II KINGS 24 - Navajo bible

II KINGS 24

¹Jiihóíyakim bíyoołkááł yę́ędą́ą́' Bábilan dine'é aláahgo binanit'a'í Nébukadnézzar haa níná, áko táá' nááhaijį' bá nijis'a', áko nít'éé' yits'ą́ąjį' silį́į'go yich'į' nídiiltee'.

²Áádóó Bóhólníihii éí Kaldíya dine'é ła' dah yikah, Síriya dine'é ła' dah yikah, Mó'ab dine'é ła' dah yikah áádóó Áman dine'é ła' dah yikah; éí Júdah dine'é dayóbáahgo ádeidoołdįįł biniyé Bóhólníihii yee haadzíi'go Diyin God yá dahalne'go nidaal'a'ígíí yaa dahoolne'ígíí bik'ehgo hak'ijį' ye'iisnii'.

³Manáseh ni'iisíihgo yaa naayáhígíí t'áá át'é biniinaa Bóhólníihii éí Júdah dine'é nahjį' kóyiilaa; t'áá yee haadzí'ígíí bik'ehgo t'áá aaníí bohoolyaa.

⁴Áádóó ba'át'e' ádaadinii neistseedgo bidił dadeezna'go ałdó' biniinaa, háálá Jerúsalem kin haal'áii t'áá nidahonees'ą́ąjį' ba'át'e' ádaadinii bidił nidaashchxii'go áyiilaa, éí Bóhólníihii doo há yóó'iididoo'áał da.

⁵Áko Jiihóíyakim łahjį' ádzaii áádóó yaa naayáhígíí t'áá át'é éí Júdah dine'é aláahgo binanit'a'í danilį́į́ nít'éé' yę́ę binaaltsoos Kránikals wolyéii bik'inídaháasdzo.

⁶Jiihóíyakim éí dahazhé'é yę́ę da'iiłhaazhígi át'éego ajiiłhaazh, áko hatsásk'ehgi haye' Jehóíyakin aláahgo nant'á silį́į́'.

⁷Nidi Ííjip dine'é aláahgo binanit'a'í bikéyahdóó t'áadoo ch'ínáánádzáa da, háálá Ííjip dine'é aláahgo binanit'a'í éí Ííjip kéyahgi tooh nílínídóó Yufréítiiz tooh nílíníjį' bídéét'i' nít'éé' yę́ę ałtso Bábilan dine'é aláahgo binanit'a'í bíí' silį́į́'.

⁸Jehóíyakin tseebííts'áadah binááhaigo aláahgo naat'áanii silį́į́' áádóó táá' nídeezidjį' Jerúsalemgi nant'áá nít'éé'. Bimá éí Niihúshta wolyéego Jerúsalemdóó Elnéíthan yitsi' nilį́.

⁹Áko Bóhólníihii binááł t'áá hazhé'é yę́ę áát'įįdígíí bik'ehgo doo yá'áshóonii baa nijiyá.

¹⁰Íídą́ą́' Bábilan dine'é aláahgo binanit'a'í Nébukadnézzar bá nidaal'a'í Jerúsalem yich'į' nídadiibaa'go kin haal'áhígíí yináshzhiizh.

¹¹Bábilan dine'é aláahgo binanit'a'í Nébukadnézzar bá nidaal'a'í éí kin haal'áhígíí yináshzhiizhgo yaatįįh yíná.

¹²Áádóó Júdah dine'é aláahgo binanit'a'í Jehóíyakin éí Bábilan dine'é aláahgo binanit'a'í yich'į' ch'íníyá; bí áádóó bimá índa bá nidaal'a'í áádóó naat'áanii danilíinii índa bikéé'dóó bídahólníhígíí ch'ékai. Bábilan dine'é aláahgo binanit'a'í éí aláahgo naat'áanii nilį́įgo tseebíí náhááh góne' Jehóíyakin yiyiiłtsood.

¹³Áko Bóhólníihii t'áá yee haadzí'ígi át'éego aláahgo naat'áanii éí Bóhólníihii bikin bii' sohodizin biyi'dóó t'áadoo le'é da'ílíinii áádóó aláahgo naat'áanii bighandóó da'ílíinii ch'íyiizhjaa', índa óola bee ádaalyaii Ízrel dine'é aláahgo binanit'a'í Sálaman áyiilaa yę́ę Bóhólníihii bikin bii' sohodizin góne' sinilígíí ałtso ałts'áyiizti'.

¹⁴Áádóó Jerúsalemgi dine'é t'áá át'é, naat'áanii danilíinii áádóó diné doo nídanilyéesii áádóó t'áadoo le'é dayiichįįhii índa da'atsidii éí t'áá neeznáadi míilgo deisnáago ayiizh'eezh; doo ła' t'áá ákǫ́ǫ́ nidaakai da, t'áá hazhó'ó éí kéyahdóó a'ohgo ádaat'éii t'éiyá t'áá da'ákǫ́ǫ́.

¹⁵Áko Jerúsalemdóó díí yisná éí aláahgo naat'áanii Jehóíyakin áádóó bimá áádóó aláahgo naat'áanii bida'asdzą́ą́ áádóó bikéé'dóó bídahólníhígíí índa kéyahdóó diné alááh dahideezíinii Jerúsalemdóó yisnááh danilį́įgo Bábilangóó ayiizh'eezh.

¹⁶Áádóó diné doo nídanilyéesii tsosts'idi míilgo índa diné t'áadoo le'é dayiichįįhii áádóó da'atsidii t'áá biłgo t'ááłáhídi míilgo éí t'áá ałtso anaa' yídaneel'ánígíí Bábilan dine'é aláahgo binanit'a'í yisnánígíí Bábilanjį' ayíí'eezh.

¹⁷Nít'éé' Bábilan dine'é aláahgo binanit'a'í éí Jiihóíyachin bizhé'é yázhí Matanáíyah hatsásk'ehgi aláahgo naat'áanii nilį́įgo áyiilaa, áko bízhi' łahgo át'éego áyiilaago Zedekáíyah yee yiyíízhi'.

¹⁸Zedekáíyah éí naadiin ła' binááhaigo aláahgo naat'áanii silį́į́' áádóó Jerúsalemgi ła'ts'áadah nááhaijį' aláahgo naat'áanii nilį́į́ nít'éé'. Bimá éí Hamútal wolyéego Líbnahdóó Jeremáíyah yitsi' nilį́.

¹⁹Áádóó Bóhólníihii binááł t'áá Jiihóíyakim áát'įįdígíí bik'ehgo doo yá'áshóonii baa nijiyá.

²⁰Áko Bóhólníihii báhóóchįįdígíí yee Jerúsalem dine'é áádóó Júdah dine'é hólónídóó áts'ą́ąjį' nahjį' kóhoolaajį' ákóhóót'įįd; nít'éé' Zedekáíyah éí Bábilan dine'é aláahgo binanit'a'í yich'į' naastee'.