Read Navajo II KINGS 25 Bible Online

II KINGS 25 - Navajo bible

II KINGS 25

¹Áko índa Zedekáíyah aláahgo nant'áago náhást'éí náhááh góne' neeznáá nídízííd binih neeznáá jį́į́ góne' Bábilan dine'é aláahgo binanit'a'í Nébukadnézzar níná; bisiláo dah deínéehii t'áá ałtso yił Jerúsalem deidoołnééł yiniyé yinaagóó nidahaazná, áko yinaagóó ahéé'ítł'inígíí bíilk'idgo ádayiilaa.

²Zedekáíyah aláahgo naat'áanii nilį́įgo ła'ts' áadah náháahjį' kin haal'áhígíí biná'áshzhiizh.

³Dį́į́' nídízííd binih náhást'éí jį́į́ góne' kin haal'áagi ayóó át'éego hodííchįįd, áko kéyahgi diné ch'iyáán bits'ą́ą́' ádaasdįįd.

⁴Nít'éé' kin haal'áii éí tsé ahénátł'inígíí tł'óó'dę́ę'go yigháda'aznil, áko aláahgo naat'áanii índa siláo t'áá ałtso éí aláahgo naat'áanii bidá'ák'ehgóó naakigo tsé yítł'inígíí bita' ch'íhonít'i' góne' tł'ée'go ch'ídahizhneezhchą́ą́'; azhą́ Kaldíya dine'é bisiláo éí kin haal'áii yinaadę́ę́' hééshjée' nidi, aláahgo naat' áanii éí Árabah dzígai bich'į'go anííchą́ą́'.

⁵Áko Kaldíya dine'é bisiláo éí aláahgo naat'áanii baa dadeeyáago Jériko dzígaidi yíníjéé', áko hasiláo t'áá át'é hats'ąą taozhjéé'.

⁶Kót'éego Zedekáíyah deisnáago Ríblah kin haal'áadi Bábilan dine'é aláahgo binanit'a'í yił yaa daaskai, áko há nihoot'ą́.

⁷Áádóó Zedekáíyah haye'ké t'áá hanááł nideistseedgo hó éí hanáá' hadeiznilgo béésh łitsoii da'ahólzha'í yee hoda'aztł'ǫ́ǫgo Bábilangóó hoł daaskai.

⁸Nébukadnézzar éí Bábilan dine'é aláahgo yinanit'a'í nilį́įgo náhást'éíts'áadah náhááh góne' ashdla' nídízííd binih tsosts'id jį́į́ góne' aláahgo naat'áanii yá naal'a'í léi' éí siláo yinanit'a'í nilíinii Nébuzar'éídan Jerúsalemjį' níná.

⁹Áko Bóhólníihii bikin bii' sohodizin áádóó aláahgo naat'áanii bighan índa Jerúsalemgi daakinígíí t'áá át'é, t'áá éí kin aláahdi ádaat'éhígíí t'áá át'é iidiyiisk'ą́ą́'.

¹⁰Áádóó Kaldíya dine'é bisiláo t'áá át'é éí siláo yinanit'a'í yił naakaígíí Jerúsalem ditą́ągo binaagóó ahéé'ítł'inígíí naa'adeiniiskaad.

¹¹Áádóó kin haal'áagi diné daadziihígíí índa Bábilan dine'é aláahgo binanit'a'í yaa dahineezhchą́'ígíí t'áá bił ahóltą'go t'óó ahojíyóigo éí siláo binanit'a'í Nébuzar'éídan ahwiizh'eezh.

¹²Nidi siláo binanit'a'í éí kéyahgi diné badahojoobá'ígíí ch'il na'atł'o'ii yaa ádahalyą́ą dooleeł áádóó dá'ák'eh yindaalnish doo biniyé éí t'áá ákǫ́ǫ́ kéédahojit'į́įgo áhoolaa.

¹³Áádóó Bóhólníihii bikin bii' sohodizin bidáahgi naaki íí'áhígíí béésh łitsoii bee ályaii áádóó béésh łitsoii bii' tá'ádígisí bá si'ánígíí éí Bóhólníihii bikin bii' sohodizin dabiyi'ígíí Kaldíya dine'é nidayiizti'go éí béésh łitsoii Bábilangóó adayiizyį́.

¹⁴Índa ásaa' nitsaaígíí áádóó łeeshch'iih bee hahakaahí áádóó kǫ' bee daniłtsésí áádóó łeets'aa' nímazí índa t'áadoo le'é béésh łitsoii bee ádaalyaii chodajooł'į́į́ nít'éé' yę́ę Bábilangóó adayiizyį́.

¹⁵Áádóó tsííd bee nidaakáhí áádóó łeets'aa'da índa t'áadoo le'é óola áádóó béésh łigaii bee ádaalyaii éí siláo binanit'a'í ayiizyį́.

¹⁶Áádóó naakigo íí'áhígíí áádóó bii' tá'ádígisí nitsaaígíí índa bii' tá'ádígisí bá naaznilígíí éí Sálaman wolyéii Bóhólníihii bikin bii' sohodizin yá áyiilaa yę́ę áádóó ha'át'íhída béésh łitsoii bee ádaalyaii éí t'áá át'é doo dah hizhdoolehígi ánéelą́ą́'.

¹⁷Naaki íí'áhígíí ła' dego naadiin tsosts'id ké silá áníłnééz áádóó bílátah dah si'ánígíí béésh łitsoii bee ályaaígíí éí dego dį́į́'dóó ałníí' ké silá ánízah; béésh łitsoii ałnádaozt'i' áádóó éí bílátah dah si'ánígíí pámgrenit aneest'ą' nahalingo binázt'i'go ályaa; łahjí ałdó' t'áá ákót'éego béésh łitsoii ałnádaozt'i'ígíí biłgo ályaa.

¹⁸Siláo binanit'a'í éí alą́ąjį' náá'iiłniihii Siiréíyah áádóó bikéé' góne' náá' iiłniihii Zefanáíyah áádóó diné táa'go dáádílkał yaa ádahalyánígíí dah yidii'eezh.

¹⁹Áádóó diné nidaabaahii yinanit'a'í ábi'diilyaa yę́ę índa diné ashdla'go éí aláahgo naat'áanii yíighah naazį́į́ nít'éé' yę́ę kin haal'áagi yik'ídaaskaigo áádóó siláo dah deínéehii binaaltsoos ííł'íní éí kéyahdóó dine'é áłah áyiilaaígíí áádóó kéyahdóó diné hastą́diingo kin haal'áagi yik'ídaaskaígíí dah yidii'eezh.

²⁰Áko éidí siláo yinanit'a'í Nébuzar'éídan éí Ríblahjį' Bábilan dine'é aláahgo binanit'a'í yich'į' yiní'eezh.

²¹Áádóó Bábilan dine'é aláahgo binanit'a'í éí Héímath kéyahgi Ríblah kin haal'áadi nahastseed. Kót'éego Júdah dine'é dahakéyahdóó ch'ídaho'diisht'eezh.

²²Áko Bábilan dine'é aláahgo binanit'a'í Nébukadnézzar éí Júdah kéyahgi dine'é t'áá ákǫ́ǫ́ dahojílǫ́ǫgo áhoolaaígíí Shéífan binálí Gedaláíyah éí Aháíkam biye' honanit'a'í áyiilaa.

²³Nít'éé' siláo yinanit'a'í danilínígíí t'áá ałtso índa dabisiláo yił éí Bábilan dine'é aláahgo binanit'a'í éí Gedaláíyah naat' áanii áyiilaago dayíínii', áko Nethanáíyah biye' Íshmeiyel áádóó Karíyah biye' Johéínan áádóó Niitófah kin shijaa'dóó Tanhúmeth biye' Siiréíyah índa Méíyakah dine'é ła' biye' Jeiyazanáíyah, éí áádóó bidine'é yił Mízpah kin haal'áadi Gedaláíyah yaa yíkai.

²⁴Áko hó áádóó diné dah deí'éshígíí t'áá bił Gedaláíyah éí hach'į' ádee hadoodzíi'go áháłní, Kaldíya dine'é bídahólníhígíí t'áadoo bik'ee nihił daayé'í; kéyahgi kéédahoht'į́įgo Bábilan dine'é aláahgo binanit'a'í bá nidaał'a'go nihá yá'át'éeh doo.

²⁵Nidi tsosts'id nídízííd binih aláahgo naat'áanii ahoolchííł nilíinii Iilíshama biye' éí Nethanáíyah biye' Íshmeiyel wolyéii diné neeznált'éego yił yíkaigo Gedaláíyah dayiisxį́ índa Jew dine'é áádóó Kaldíya dine'é Mízpahgi hoł dah yikahígíí ałdó' nideistseed.

²⁶Áádóó diné t'áá ałtso a'ohgo áádóó ayóó ádaat'éii índa siláo dah deínéehii yinanit'a'í danilíinii dah diináago Ííjip kéyahgóó adahazná, háálá Kaldíya dine'é béédadzisdzííd.

²⁷Nít'éé' Júdah dine'é aláahgo binanit'a'í Jehóíyakin yisná nilį́įgo tádiindóó ba'aan tsosts'id náhááh góne' naakits'áadah nídízííd binih naadiin tsosts'id jį́į́ góne' Íívil-meródak éí Bábilan dine'é aláahgo yinanit'a'í silį́į'go Júdah dine'é aláahgo binanit'a'í Jehóíyakin awáalyaadę́ę́' ch'éiníłt'e'.

²⁸Áko bá'áhwiinít'į́įgo hach'į' yáłti'go Bábilan kin haal'áagi aláahgo naat'áanii bił dajílínígíí t'ah bitisígo ił jílį́.

²⁹Áádóó awáalyaají é'ígíí háázhdii' nilgo ahóyííłką́ąjį' t'áá ákwíí jį́ aláahgo naat'áanii ná'ádį́hígi níjídį́į́h nít'éé'.

³⁰Áko ahóyííłką́ąjį' ła'a jį́ bijíłkiin dooígíí t'áá ákwíí jį́ aláahgo naat'áanii haa néidi'ááh nít'éé'.