Read Navajo II KINGS 3 Bible Online

II KINGS 3 - Navajo bible

II KINGS 3

¹K'ad Júdah dine'é yá Jiiháshafat aláahgo naat'áanii nilį́įgo tseebííts'áadah náhááh góne' Éíhab biye' Jiihóram Samériyagi Ízrel dine'é yinant'áago naakits'áadah nááhai.

²Áko Bóhólníihii binááł doo yá'áshóonii yaa naayá, nidi doo bizhé'é índa bimá át'éé nít'é'ígi ádzaa da, háálá Béíyal be'elyaago hazhé'é áyiilaii nahjį' kójiilaa.

³Ákót'ée nidi Nííbat biye' Jerobówam yee ni'iisíi'ii t'ahdii yótą'; éí Ízrel dine'é ádił nida'iisíihgo áyiilaaígíí t'áadoo yits'áníyáa da.

⁴Mó'ab dine'é yá aláahgo naat'áanii Míísha wolyéii éí dibé neiniłt'ą'ii nilį́įgo dibé yázhí t'ááłáhídi neeznádiindi míilgo índa deenásts'aa' t'ááłáhídi neeznádiindi míilgo bighaa' t'áá biłgo Ízrel dine'é yá aláahgo naat'áanii yich'į' niyiiléé nít'éé'.

⁵Nidi íídą́ą́' Éíhab daaztsą́ą́dóó bik'ijį' Mó'ab dine'é yá aláahgo naat'áanii éí Ízrel dine'é yá aláahgo naat'áanii yich'į' nidaastee'.

⁶Ts'ídá ákóne' nahalzhiishgo aláahgo naat'áanii Jiihóram éí Samériya kin haal'áádóó ch'íníyáago Ízrel dine'é t'áá ałtso áłah áyiilaa.

⁷Áádóó dah diiyáago Júdah dine'é yá aláahgo naat'áanii Jiiháshafat yich'į' i'ííł'a'go ání, Mó'ab dine'é yá aláahgo naat'áanii shich'į' nídiiltee'; Mó'ab dine'é bik'ijį' nidiibah biniyé ákǫ́ǫ́sh shił díí'ash? Áko ání, Ákóde deeshááł; shí t'áá nigi ánísht'é, shidine'é t'áá nidine'égi ádaat'é, shilį́į́' t'áá ni danilį́'ígi ádaat'é.

⁸Áko ání, Háádóoshą' ákóde hadiikah? T'ą́ą́' hanáádzíi'go ání, Íídam kéyah honoojítah góne'é lą́ą.

⁹Nít'éé' Ízrel dine'é yá aláahgo naat'áanii áádóó Júdah dine'é yá aláahgo naat'áanii índa Íídam dine'é yá aláahgo naat'áanii dah diikai, áko tsosts'id jį́ oodááł ahééhonízhahgo ahénákai índa hakéé' oonéłígíí áádóó béégashii hakéé' yikahígíí tó bá ádin.

¹⁰Áko Ízrel dine'é yá aláahgo naat'áanii ání, Héi'! Bóhólníihii díí aláahgo naat'áanii tált'éego éí Mó'ab dine'é yaa nihididoo'ááł biniyé ahínihiinil lá!

¹¹Nidi Jiiháshafat ání, Kwe'ésh doo Bóhólníihii yá halne'ii ła' naagháa da? Éí hwee Bóhólníihii nidabídídíilkił? Nít'éé' Ízrel dine'é yá aláahgo naat'áanii bá naal'a'í ła' haadzíi'go ání, Shéífat biye' Iiláísha éí Iiláíjah bíla' tó yik'i yááyiidzi' nít'é'ígíí kwe'é naaghá.

¹²Áko Jiiháshafat ání, Éí Bóhólníihii bizaad bił hólǫ́. Kót'éego Ízrel dine'é yá aláahgo naat'áanii áádóó Jiiháshafat índa Íídam dine'é yá aláahgo naat'áanii ákóyaa Iiláísha yich'į' yíkai.

¹³Nít'éé' Iiláísha éí Ízrel dine'é yá aláahgo naat'áanii ííłní, Haash nideeshłííł? Nílááh, nizhé'é yę́ę áádóó nimá yę́ę yá dahalne'ii bich'į' dínááh. Áko Ízrel dine'é yá aláahgo naat'áanii áhodííniid, Dooda, háálá díí aláahgo naat'áanii tániilt'éego Mó'ab dine'é yaa nihidoonił biniyé ahínihiinilígíí éí Bóhólníihii át'į́.

¹⁴Áko Iiláísha ání, T'áá a łtsoní bee Bóhólníihii éí bidááhdóó sézínígíí ts'ídá t'áá aaníí hiná; ákót'éego Júdah dine'é yá aláahgo naat'áanii Jiiháshafat kwe'é sizínígíí doo baa tsídíkéézgóogo ts'ídá t'áá aaníí doo nich'į'go didéesh'įįł da, doo nidi t'áá k'ad ninééł'į́į' da doo nít'éé'.

¹⁵Nidi k'ad nílááhdę́ę́' tsin tł'óół bąąh daneelzhee'ígíí yee naanéhígíí shá shódaołt'eeh. Nít'éé' éí yee naanéego Bóhólníihii bibee adziil hak'i hoole'.

¹⁶Áádóó ání, Bóhólníihii kóní, Díí honíts'aa' góyaa t'áá át'éé nít'éé' deíldzisgo ánílééh.

¹⁷Háálá Bóhólníihii kóní, Níyol doo yidííłtséeł da, nahałtin nidi dooda; ákondi eii honíts'aa' góyaa tó bii' hadidoobį́įłgo nihí da'doohdlį́į́ł, áádóó nihilį́į́' índa nihilį́į́' hééł nihá nideiyéii da'doodlį́į́ł.

¹⁸Nidi díí éí t'óó Bóhólníihii binááł t'įįhdígo át'éii át'é; bí éí Mó'ab dine'é ałdó' nihaididoo'ááł.

¹⁹Áko kin hadaas'áágóó ditą́ągo binaa ahééda'astł'inii t'áá ałtso, áádóó kin haal'á alááh ádaat'éhígíí t'áá ałtso, áádóó tsin yá'ádaat'éehii t'áá ałtso naa'adahidoołkał, áádóó tó hadahadleeh t'áá át'é tsé bee hadahodidoołbį́į́ł, índa kéyah yá'ádahoot'éhígóó t'áá át'é tsé bee nidahidoołchǫǫł.

²⁰Nít'éé' abínígo atsį' nááhániihígíí baa hoolzhiizhgo, jó, Íídam kéyahdę́ę'go tó nína'go kéyah t'áá át'éé nít'éé' tó nihinéést'e'.

²¹Áko Mó'ab dine'é t'áá ałtso éí aláahgo naat'áanii danilíinii hak'iidoojah yiniyé neheeskai, ha'níigo deidiizts'ą́ą́', áko ániid nidaakaígíí áádóó náás daazlį́'ígíí béésh éé' yiih dadookah yídaneel'ánígíí t'áá ałtso éí áłah ádaalyaago kéyah bibąąhdóó dabi'diilzį'.

²²Áádóó t'ah abíínídą́ą́' nídahidiijéé', áko jį́honaa'éí tó yik'i'diiłdíingo éí Mó'ab dine'é náwónanídę́ę́' tó diłgi át'éego łichíi'go dayiiłtsą́.

²³Áko ádaaní, Díí dił át'é; aláahgo naat'áanii danilíinii t'áá aaníí nabi'diztseed; t'áá bí nida'ahistseed lá; éí bąą k'ad, Mó'ab dine'é danohłíinii, bindaalye'é nídahidiidlah.

²⁴Nít'éé' Ízrel bisiláo dah deínéehgi jíkaigo Ízrel dine'é nídiijée'go Mó'ab dine'é yik'iijée'go halą́ąjį' danéechééh, áádóó Mó'ab dine'é t'áá níléí bikéyahjį' nidi nidajiłtseedgo bikéé' joojah.

²⁵Áko kin hadaas'á nidayiiskaad índa kéyah yá'ádahoot'éhígóó diné t'ááłá'í nítínígo tsé adayiiłtł'iidgo hadeidééłbįįd, áádóó tó hadahadleehgóó hadahodeesbįįd, índa tsin yá'ádaat'éehii nidayíítséél; kin haal'á Ker-háraseth hoolyéhígi t'éiyá t'áadoo tadayooskaad da, nidi diné da'ditł'į́hígíí yináshzhiizhgo tsé yee dayíítł'in.

²⁶Nít'éé' Mó'ab dine'é yá aláahgo naat'áanii da'ahijigánígíí bá doo asohodéébéézhgóó yiyiiłtsą́ągo da'ahijigánígíí bita' góne' Íídam dine'é yá aláahgo naat'áanii baazhdookah biniyé tsosts'idi neeznádiin diné diltłish yee da'diłkahígíí yił dah diikai, nidi ch'ééh ádajíít'įįd.

²⁷Áko haye' alą́ąjį'ígíí hatsásk'eh góne' aláahgo naat'áanii náádoodleełígíí éí bił nízhdiit'áazhgo tsé ahéénátł'inígíí bikáá'dóó didlidgo náájiisnii'. Ízrel dine'é t'áá íiyisí bádahazhchįįdgo hats' ą́ą́' dah diikaigo t'áá bí dabikéyahgóó anáákai.