Read Navajo II KINGS 4 Bible Online

II KINGS 4 - Navajo bible

II KINGS 4

¹Nít'éé' Diyin God yá dahalne'ii bídahooł'aahígíí ła' be'asdzą́ą́ léi' Iiláísha yich'į' yéego haadzíi'go ání, Shahastiin ná naal'a'í daaztsą́; éí Bóhólníihii yidósin nít'ée'go nił bééhózin. Nidi k'ad bąąh hayííł'áhígíí shiyáázh nidilt'éego binaalte' nilį́į dooleeł yiniyé níyá.

²Iiláísha áháłní, Ha'át'íísh ná baa nideeshaał? Shił hólne', ha'át'íísh nighan góne' hólǫ́? Áko ájíní, Asdzání ná naal'a'í nishłíinii shighan bii' ha'át'íhída doo shee hólǫ́ǫ da nidi ak'ah t'éiyá tóshjeeh yázhí bee si'ą́.

³Nít'éé' ání, Nílááh, bił kééhót'íinii t'áá ałtso dabighandę́ę́' dabitóshjeeh t'áágééd naaznilígíí t'óó ahayóigo nada'ónííł.

⁴Áko yah ííníyáago ni áádóó niyáázh nidilt'éego ádá da'didoołkał áádóó tóshjeeh t'áá ałtso ak'ah biih dahidííził; hadadéébįįdígíí éí nahjį' nihidíínił.

⁵Kót'éego Iiláísha bits'ą́ą́dóó dashdiiyáago hó áádóó hayáázh nidilt'éego ádá da'dazdeeskaal; éí tóshjeeh yázhí há nináyiizhjaa'go ak'ah bii' yadajiiziid.

⁶Nít' éé' tóshjeeh yázhí hadadéébįįdgo hayáázh ábijiní, Tóshjeeh yázhí ła' shaa náání'ah. Áko áháłní, Doo ła' náánást'ą́ą da. Áko ak'ah yadajiyiizídígíí ááhoost'įįd.

⁷Áádóó Diyin God yá naal'a'í baazhníyáago bił hojoolne'. Áko ání, Nílááh, ak'ah naa nahóniihgo nąąh háá'áhígíí niná'ayídlé, áádóó ni áádóó na'áłchíní ak'ah yidziihígíí bee ákidaahdlá.

⁸Łah jį́įgo Iiláísha éí Shúnem kin haal'á bíighahgóó ch'ízhníyá, nít'éé' ákwii asdzání ayóó at'į́į́ léi' bááh dííyį́į́ł hałníigo yaa náhookąąh. Áko t'áá ákǫ́ǫ́ nízhdídááh bik'eh ákwii níjídáahgo bááh níjídį́į́h.

⁹Áádóó hahastiin ábijiní, Shoo, diné t'áá áłahjį' nihighan bíighahgóó ałnánádáhígíí éí Diyin God bits'ą́ą́dę́ę́' naagháago shił bééhoozin.

¹⁰Haa'íshą' nihikin bighą́ą́'dóó kin t'áá áłts'ísígo bá nidiit'áałgo tsásk'eh áádóó bikáá' adání áádóó bik'i dah asdáhí índa bee hool'iní ałdó' bá nidii'nił, áko nihaa nádáahgo ákwii nábiilkáah doo.

¹¹Łah jį́įgo ákwii níyáago kin bá ályaaígi yah ííyáago neeztį́įgo hanáályį́į́'.

¹²Nít'éé' bá naal'a'í Giihéízai ííłní, Díí Shúnemdóó asdzání hágo bidiní. Hágo bizhdííniidgo hadááhdę́ę́' niníyá.

¹³Áko Giihéízai ábijiní, K'ad kóbidiní, Shoo, nizhónígo nihá hasht'ehwiinilaa, áko ha'át'íí lá ná ádoolnííł? Aláahgo naat'áanii daats'í, doodaii' siláo dah yinéełii binanit'a'í daats'í ná bich'į' ha'doodzih? Áádóó hajoodzíi'go ájíní, T'áá shí shidine'é bitahgi kééhasht'į́.

¹⁴Iiláísha ání, Ákoshą' ha'át'íí bá ádoolnííł? Giihéízai hanáánáádzíi'go ání, T'áá aaníí ba'áłchíní ádin índa bahastiin éí haastih.

¹⁵Áko Iiláísha ání, Hágo bidiní. Hágo bizhdííniidgo ch'é'étiindę́ę́' yiizį'.

¹⁶Áádóó ání, Kónáhoot'éhí kojį' anáhoolzhiizhgo niyáázh adíidííltsoł. Áko ájíní, Dooda, shinanit'a'í, Diyin God yá naal'a'í nílíinii, asdzání ná naal'a'í nishłíinii doo shidíníí'ah da.

¹⁷Nidi asdzání i'niiltsąąd áádóó Iiláísha t'áá áhodííniidígíí bik'ehgo nááhaigo t'áá áajį' anáhoolzhiizhgo hayáázh hazlį́į́'.

¹⁸Áádóó hayáázh dínéesą́ągo ła'a jį́ bizhé'é éí da'ayizhii yił da'ayizhgo ákǫ́ǫ́ yich'į' ííyá.

¹⁹Nít'éé' bizhé'é ííłní, Shitsiits'iin neezgai, shitsiits'iin neezgai! Áko há naal'a'í ábijiní, Bimá bich'į' nídíłteeh.

²⁰Áádóó dah yidiiłtį́įgo bimá yaa néiníłtį́įgo hatsásk'eegi sidáago ałní'ní'ą́, nít'éé' daaztsą́.

²¹Áko dashdiiłtį́įgo Diyin God yá naal'a'í bitsásk'eh bikáá' nizhníłtį́, áádóó bidázhdi'ní łkaalgo dashdiiyá.

²²Áko hahastiin hágo bizhdííniidgo ájíní, Diyin God yá naal'a'í bich'į' télii tsį́įłgo shił dooldlosh áádóó nídeeshdááł biniyé ná naal'a'í ła' télii sheidoolóós.

²³Áko ání, Ha'át'íísh biniyé díí jį́ bich'į' deeshááł nínízin? T'ah doo dah yiitįįh da, doo nidi háá'áyį́į́h jį́ aleeh da. Nidi ájíní, T'áá áko.

²⁴Nít'éé' télii yik'i dah aznilgo bá naal'a'í ííłní, Tsxį́įłgo shilą́ąjį' yílwoł; shiniinaa t'áadoo honiitłóhí yílwoł, át'ahálo nidishníigo t'éiyá.

²⁵Ákohgo dashdiiyáago Dził Kármeldi Diyin God yá naal'a'í bich'į' joogááł nít'éé'. Nízaadę́ę́' joogáałgo hoołtsą́ągo bá naal'a'í Giihéízai ííłní, Shoo, níléídę́ę́' Shúnemdóó asdzání yigááł;

²⁶bidááhgóó nídiilyeedgo ábidiní, Nitahásh yá'áhoot'ééh? Nahastiinísh bitah yá'áhoot'ééh? Ashkiishą' bitahásh yá'áhoot'ééh? Áko ájíní, T'áá yá'át'ééh.

²⁷Nít'éé' dziłghą́ą'di Diyin God yá naal'a'í baazhníyáago bikee' dziiłtsood, áádóó Giihéízai nahjį' ahodoodzį́į́s biniyé áajį' niníyá. Nidi Diyin God yá naal'a'í ání, T'áadoo baa nánít'íní, háálá bii' sizíinii bide áhoot'é; éí Bóhólníihii shits'ąą neinił'ingo doo yee shił hoolne' da.

²⁸Áko ájíní, Da' shinanit'a'íísh shiyáázh hodooleełgo bííkeed? Doo shidíníí'ah da, doósh dííniid da?

²⁹Nít'éé' Iiláísha éí Giihéízai ííłní, Ni'éé' nitsiist'ah gónaa náníyishgo shigish nídiitįįhgo nílááh nídiilyeed; diné ła' nidááh níyáá ládą́ą́' yá'át'ééh doo bididííniił da, índa ła'da yá'át'ééh niłníí ládą́ą́' doo bich'į' hadíídzih da, áádóó shigish éí ashkii binii' bikáá' nidíítį́į́ł.

³⁰Áádóó ashkii bimá ání, Ts'ídá t'áá aaníí Bóhólníihii hiná índa hiníná; ákót'éego ts'ídá t'áá aaníí doo nits'ádeesháał da. Áádóó Iiláísha nídii'na'go hakéé' dah diiyá.

³¹Giihéízai éí halą́ąjį' ííyáago ashkii binii' bikáa'gi gish niinítą́, nidi t'áadoo hadoo'ni' da áádóó t'áadoo íists'ą'í da. Éí bąą Iiláísha bidááh níjílwodgo ábijiní, Ashkii t'áadoo nídeesgal da.

³²Iiláísha éí kin góne' yah ííyáago, jó, ashkii daaztsą́ągo hatsásk'eh bikáa'gi sitį́įgo dziiłtsą́.

³³Áádóó ashkii sitíní góne' yah ajííyáago ádázhdeelkaalgo Bóhólníihii bich'į' sozdoolzin.

³⁴Áko tsásk'eh bikáá' hajiyáago ashkii bikáá' tsé'yaa dzineeztį́įgo hazéé' bee bizéé' bizhdíníit'ą́, índa hanáá' bee bináá' bizhdíníit'ą́, hála' bee bíla' bikáá' nizhdeelnii', áádóó bikáá' k'í'ázhdeests'ǫ́ǫdgo ashkii bits'íís nániidoi.

³⁵Nít'éé' nízhdii'na'go kin bii' a łnáájídááh, áádóó ashkii bikáá' k'ínáá'ízdeests'ǫ́ǫdgo ashkii tsosts'idi háts'íyaa nídoo'niidgo deezghal.

³⁶Áádóó Iiláísha éí Giihéízai hágo yidííniidgo ání, Shúnemdóó asdzání, Hágo, bidiní. Áko hágo bizhdííniid. Nít'éé' haa níyáago, Niyáázh nídiiłteeh, bijiní.

³⁷Áko asdzání yah ííyáago hakee'jį' nitsidinígo'go ni'jį' neeshjool, áádóó hayáázh nízhdiiłtį́įgo bił ch'ééjít'áázh.

³⁸Áádóó Iiláísha éí Gílgal haz'ánígi náánádzá; nít'éé' ákwii kéyahgi hodííchįįd lá, áko Diyin God yá dahalne'ii bídahooł'aahígíí hadááhdóó naháaztą́ągo há naal'a'í ábijiní, Ásaa' nitsaaígíí bii' ása'íníiłgo Diyin God yá dahalne'ii bídahooł'aahígíí bá niłbéézh.

³⁹Nít'éé' ła' ch'il jidoonishgo biniyé halgaigóó ajííyáago ch'il t'áá bíni'dii da'ítł'óhígíí bik'ízhníyá; éí bąąhdóó nidilkal yiyííbį́į'go bi'éénééz hadeezbingo néiníłtsoozgo abézhígíí yiih yiyííłgizh, nidi éí ádaat'éhígíí doo hoł béédahózin da.

⁴⁰Áko éí diné deidooyį́į́ł biniyé bá hadajiizką́. Ákódzaago azhbézhígíí deiyą́ągo, hadadeeshghaazhgo ádaaní, Diyin God yá naal'a'í nílíinii, díí bee abézhí biyi' aniné hólǫ́ǫ́ lá. Éí bąą doo dajóyą́ą́' át'ée da.

⁴¹Áádóó ájíní, Aadę́ę́' ak'áán ła' nídoohjááh. Áko ak'áán azhbézhígíí biih jííłkaadgo diné bá hadahohkaah, jiní; bíni' deiyą́, jó, azhbézhígíí t'áadoo ba'át'e'í da.

⁴²Nít'éé' Béíyal-shálisha haz'ánídę́ę́' diné léi' éí áłtsé neest'áanii tł'oh naadą́ą́' bidee'í bee bááh naadiingo ályaago índa ániid neest'ánígíí t'ah doo habé'él'éésgóó Diyin God yá naal'a'í yaa yiníjaa'. Áko Iiláísha ání, Diné deidooyį́į́ł biniyé baa nohjááh.

⁴³Áko há naal'a'í ání, Ha'át'íísh ááhdiní? Da' díísh neeznádiin dinéhígíí bidáahgi ninishjááh? Áádóó ánáábizhdi'ní, Diné baa níjááh, bíni' deiyą́, háálá Bóhólníihii kóní, Éí da'dooyį́įłgo ła' t'áá ch'ídahidínóołnah.

⁴⁴Áádóó ch'iyáán haa yíjaa'ígíí diné bidáahgi nizhníjaa'go dayííyą́ą́' áádóó Bóhólníihii t'áá ádííniidígíí bik'ehgo ła' ch'ídahineesna'.