Read Navajo II KINGS 5 Bible Online

II KINGS 5 - Navajo bible

II KINGS 5

¹K'ad Síriya dine'é aláahgo binanit'a'í bisiláo dah deínéehii binanit'a'í Néíyaman éí bóhojíłníihii bich'į'go diné ayóó át'éii índa diné ílíinii jílį́, háálá hó hwee Bóhólníihii éí Síriya dine'é yisdáyíínil; diné bíiyisii bidziilii ałdó' jílį́, nidi łóód ats'íís yiyáanii naałdzidii bee hąąh dah haz'ą́.

²Síriyadóó siláo dah naazhjaa'go ch'ídahaazná yę́ędą́ą́' Ízrel dine'é bikéyahdóó at'ééd yázhí léi' deisnáago yił nídaaskaigo éí Néíyaman be'asdzą́ą́ yá naal'a'.

³Áko at'ééd éí yá naal'a'í ííłní, Dooládó' shinanit'a'í Samériyadi Diyin God yá halne'ii naagháhígíí yił naa'aash laanaa nisin! Háálá éí łóód ats'íís yiyáanii naałdzidii bee hąąh dah haz'ánígíí há néidoołdzih.

⁴Nít'éé' ła' yah ajííyáago honanit'a'í bił hojoolne'go ábijiní, Ízrel dine'é bikéyahdę́ę́' at'ééd naagháhígíí kóníigo ga' haadzíí'.

⁵Áádóó Síriya dine'é aláahgo binanit'a'í ání, K'ad ákǫ́ǫ́ dínááh, áko Ízrel dine'é aláahgo binanit'a'í éí bich'į' naaltsoos ádeeshłííł. Áko neeznáago béésh łigaii tálent wolyéii, áádóó hastą́ądi mííl óola shékel wolyéii índa éé' neeznáá ałnááhoo'nił bíighahgo nízhdiinilgo ákǫ́ǫ́ dashdiiyá.

⁶Áko Ízrel dine'é aláahgo binanit'a'í naaltsoos baazhníłtsoozígíí bii'dóó kóní, K'ad díí naaltsoos neíltsoozgo, jó, shá naal'a'í Néíyaman éí łóód ats'íís yiyáanii naałdzidii bee bąąh dahaz'ánígíí nídííłdzih biniyé bił naa níł'a'.

⁷Nít'éé' Ízrel dine'é aláahgo binanit'a'í naaltsoos yiyííłta'go, bi'éé' ádąąh nayooldláadgo ání, Da' shíísh Diyin God nishłį́įgo adiyeeshxééł índa iináago áńdeeshdlíiłgo díí diné léi' łóód ats'íís yiyáanii naałdzidii bee bąąh dahaz'áanii hadaałt'é áńdeeshdlííł biniyé shich'į' ayííł'a' lá? Shoo, baa nitsídaahkees, eii shinídidooltłiłígíí yiniyé shíka'iiłhil.

⁸Áádóó Diyin God yá naal'a'í Iiláísha éí Ízrel dine'é aláahgo binanit'a'í bi'éé' ák'iyooldláadgo yaa hodiizts'ą́ą'go aláahgo naat'áanii yich'į' i'ííł'a'go ání, Ha'át'íí lá biniyé ni'éé' ák'inéíníldláád? K'ad bíni'dii shaa yíghááh, áko Ízrel dine' é bikéyahgi Diyin God yá halne'ii hólǫ́ǫgo hoł bééhodoozįįł.

⁹Kót'éego Néíyaman bilį́į́' áádóó tsinaabąąs bijáád naakiígíí yee níyáago Iiláísha bighan bich'éédą́ą́'dóó sizį́.

¹⁰Áádóó Iiláísha éí hane' yił naal'a'í hach'į' ayííł'a'go ání, Nílááh, Jórdan tooh bii' tsosts'idi ninádííbeełgo nitsį' nąąh náhodoodleełgo doo ánít'éhí da nídíídleeł.

¹¹Nidi Néíyaman báhóóchįįdgo dah nídiidzáago ání, Shą́ą́' hanii shich'į' ch'ízhdoogáałgo shidááhdóó yizdoozįįłgo Bóhólníihii haDiyin God yízhdóozhiiłgo hála' bee shikáá' tázhdidoolnihgo shilóód nízhdoołdzih nisin nít'éé'.

¹²Damáskas kéyahdi Abána áádóó Fárpar tooh nílínígíí éí Ízrel dine'é bikéyahgi tooh danílígíí t'áá ałtso biláahdi yá'át'ééh. Éí bii' tá'ádísgizgoósh doo nídeesdzih da? Áádóó t'áá íiyisí báháchį'go dah nídiidzá.

¹³Nidi há nidaal'a'í hwíighahjį' niikaigo hach'į' hadaasdzíi'go ádaaní, Nihizhé'é nílíinii, Diyin God yá halne'ii t'áadoo le'é ayóó át'éii ádíílííł niłníigoósh doo ádíílíił da? Tá'ádidíígisgo nídíídzih, niłnínígíí yee' doo nantł'a da.

¹⁴Áádóó ákóyaa dah diiyáago Diyin God yá naal'a'í ádííniidígíí bik'ehgo Jórdan tooh bii' tsosts'idi ninázbį́į́', áádóó halóód náádzíi'go áłchíní bits'ísígi át'éego hats'íís náhásdlį́į́' índa ho'déédee'.

¹⁵Áádóó bił nijikaígíí bił nát'ą́ą́' níjíkaigo Diyin God yá naal'a'í baazhníyáago bidááhdę́ę́' dziizį'go ájíní, Jó, Ízrel dine'é bikéyahgi Diyin God hólónígi át'éego nihokáá'góó t'áá át'éé nít'éé' doo ła' hólǫ́ǫ dago shił bééhoozin; éí bąą k'ad, ná naal'a'í neidooléłígíí nídiilé, baa nánooshkąąh.

¹⁶Nidi Iiláísha ání, Bóhólníihii bidááhdóó sézínígíí ts'ídá t'áá aaníí hiná; ákót'éego ts'ídá t'áá aaníí doo ła' nídideeshłéeł da. Nidi nízhdidoolééł biniyé ch'ééh yíhoniyodgo doo íiznízin da.

¹⁷Áádóó Néíyaman ání, Éí doodago bíni'dii dzaanééz naaki hééł yooyééł bíighahgo ná naal'a'í bá łeezh hééł ádoolnííł, baa nánooshkąąh? Háálá ná naal'a'í kodóó doo diyin dabidi'níinii yich'į' didlidgo nínáádi'yoołnih da, nidi Bóhólníihii bich'į'go t'éiyá.

¹⁸Díí kósdzaaígíí bee Bóhólníihii éí ná naal'a'í yaa jooba' le', jó, shinanit'a'í bidiyin Ríman yich'į' nahodoołaał biniyé bikin góne' shigaan yótą'go bił yah anásht'ashgo áádóó Ríman bikin góne' yaa ánásht'įįhgo díí kósdzaaígíí Bóhólníihii ná naal'a'í yá yóó'anéididoo'ááł.

¹⁹Iiláísha áháłní, Nich'į' hózhǫ́ǫgo náádáał le'. Nít'éé' bits'ą́ą́' dah nízhdiidzáago t'áá áhą́díjį' nizhníyáago

²⁰Diyin God yá naal'a'í Iiláísha bá naal'a'í Giihéízai ání, Shoo, shinanit'a'í díí Síriya diné Néíyaman yiníjaa'ígíí t'áadoo bá nízhdiinilgóó bá baa hą́ą́s niizį́į'go t'óó bił béézhníłnii'; ts'ídá t'áá aaníí Bóhólníihii hiná; ákót'éego ts'ídá t'áá aaníí éí diné bikéé' nídideeshwołgo t'áadoo le'é sheidoolééł.

²¹Áko Giihéízai éí Néíyaman bikéé' jiníyá. Áádóó Néíyaman bikéé' joolwołgo hoołtsą́ índa bitsinaabąąs bijáád naakiígíí yii'dę́ę́' hadááyáago hadááh níyáago ání, Yá'ádahoot'ééhésh?

²²Áádóó ájíní, Aoo', yá'ádahoot'ééh. Shinanit'a'í shííł'aadgo ání, Jó, áníídíyee' Íífreiyim kéyah daadziłdę́ę́' Diyin God yá dahalne'ii bídahooł'aahígíí ła' dinééh nidilt'éego shaa ní'áázh; béésh łigaii tálent wolyéii áádóó éé' naaki ałnááhoo'nił bíighahgo baa díínił, baa nánooshkąąh, niłní.

²³Áádóó Néíyaman ání, Tálent wolyéii naakigo nídiiníiłgo nił sih le'. Áko bízhníyodgo béésh łigaii tálent wolyéii naaki azis bee índa éé' naaki ałnááhoo'nił bíighahgo ałch'į' be'estł'ǫ́ǫgo há naal'a'í naakigo éí biné'ézhdéenilgo Giihéízai yilą́ąjį' dah yidiiłjid.

²⁴Nít'éé' yílk'id léi'gi jíkaigo bílák'ee hajíínilgo kin góne' yah ajííjaa', áádóó diné béézhníłnii'go dah nídiit'áázh.

²⁵Áko yah ajííyáago hananit'a'í bidááhdóó nizhníyá. Áádóó Iiláísha áháłní, Giihéízai, háádę́ę'go lá yínááł? Áko ájíní, Ná naal'a'í doo háájída naayáa da.

²⁶Nidi ábijiní, Éí diné bitsinaabąąs bijáád naakiígíí yii'dę́ę́' hadááyáago nidááh níyáádą́ą́' da' doósh shiníłch'i nił hólǫ́ǫ da nít'éé'? Da' béeso áádóó éé' áádóó áliv yíl'áhígíí áádóó ch'il na'atł'o'ii yíl'áhígíí áádóó dibé áádóó béégashiida áádóó diné nidaal'a'í índa asdzání nidaal'a'í nídidoolyééłísh baa hoolzhiizh?

²⁷Éí bąą Néíyaman éí łóód at'íís yiyáanii naałdzidii bee bąąh dah haz'ánígíí nididoolnah k'ad áádóó na'áłchíní náás ahoolchíiłii ałdó' hool'áágóó bitah yiłnih doo. Índa yasgi át'éego łigaigo łóód ats'íís yiyáanii naałdzidii hodoolna'go Iiláísha bits'ą́ąjį' dashdiiyá.