Read Navajo II KINGS 6 Bible Online

II KINGS 6 - Navajo bible

II KINGS 6

¹Áko Diyin God yá dahalne'ii bídahooł'aahígíí éí Iiláísha ádeiłní, Shoo, díí nił kééhwiit'ínígi t'áá íiyisí doo nihihóoghah da.

²Haa'íyee', baa nániikąąh, Jórdan toohgóó diikahgo diné t'ááłá'í nítínígo tsin bik'eh nítą́ągo ákǫ́ǫ́ deidoojih; éí bee áadi hooghan ádadiilníiłgo ákwii kééhwiit'į́į doo. Áko, Nihílááh dohkááh, bizhdííniid.

³Nít'éé' ła' áháłní, Nił t'áá ákogo ná nidaal'a'í bił díkááh, baa nánooshkąąh. Áko hadzoodzíi'go ájíní, Deeshááł lą́ą.

⁴Áko bił dashdiikaigo Jórdan toohgi jíkaigo ákwii tsin dadzitseeł.

⁵Nidi ła' tsin k'íjíłne' nít'éé' tsénił bitsiits'iin hats'ą́ą́' baa diilts'idgo taah yilts'id, áko hazhdoolghaazhgo ájíní, Héi', bóhonishníihii, tsénił t'óó sha'ít'ą́ą́ nít'éé'.

⁶Áko Diyin God yá naal'a'í ání, Háá góyaashą' eelts'id? Kóyaa eelts'id, bijiní. Iiláísha tsints'ósí ła' k'íinígizhgo ákóyaa ayiyííłhango tsénił táłkáá' haaz'éél.

⁷Nídii'aah, hozhdííniidgo bíká azhdoolnii'go nízhdii'ą́.

⁸Nít'éé' Síriya dine'é aláahgo binanit'a'í éí Ízrel dine'é yich'į' anaa' dahasłį́į́', áko bá nidaal'a'í yił yaa nídaast'įįdgo ání, Ts'ídá ákwe'é haz'ą́ą́ léi'gi nideeshnééł.

⁹Áádóó Diyin God yá naal'a'í éí Ízrel dine'é aláahgo binanit'a'í yich'į' i'ííł'a'go ání, T'ááká ákǫ́ǫ́ dóónééł yíila', háálá Síriya dine'é ákóyaa deezná.

¹⁰Áko Ízrel dine'é aláahgo binanit'a'í éí Diyin God yá naal'a'í éí nahós'a'ígi yee hoł hoolne'ígóó i'jííł'a'. Ákót'éego doo t'ááłáhídi, doodaii' doo naakidi hoł náhóóni'go biniit'aa yisdánídzoodzá, nidi díkwíidi shį́į́ yisdájííyá.

¹¹Díí biniinaa Síriya dine'é aláahgo binanit'a'í t'áá íiyisí bi'diił'áago bá nidaal' a'í hágo yidííniidgo ííłní, Nihitahdóoshą' háí Ízrel dine'é aláahgo binanit'a'í yich'ijí nilínígíísh doo bee shił dahołne' da?

¹²Áko há nidaal'a'í ła' ání, Ádin, doo ła' da, shinanit'a'í aláahgo naat'áanii nílíinii, nidi Ízrel dine'é bitahgi Diyin God yá halne'ii Iiláísha éí nítéhí góne' bee hahídziihígíí Ízrel dine'é aláahgo binanit'a'í yee yił halne'.

¹³Áádóó ájíní, Nílááh, sidáhígi hada'doohsił, áko ákǫ́ǫ́ adeesh'aałgo hwiideestsoł. Nít'éé', jó, Dóthan kin haal'áadi naaghá, daaníigo hoł dahoolne'.

¹⁴Áko siláo dah deínéehii t'óó ahayóí éí łį́į́' áádóó tsindaabąąs bijáád naakiígíí yee yinéełgo ákǫ́ǫ́ ayiis'a', áádóó tł'ée'go áá nínáago kin haal'á yináshzhiizh.

¹⁵Diyin God yá naal'a'í bá naal'a'í t'ah abíínídą́ą́' nídii'na'go ch'íníyá, nít'éé', shoo, siláo t'óó ahayóí áádóó łį́į́' índa tsindaabąąs bijáád naakiígíí éí kin haal'á yinás'áago yiyiiłtsą́. Áko naal'a'í áháłní, Héii', bóhonishníihii, haashą' dii'nííł?

¹⁶Áádóó hadzoodzíí', T'áadoo nił yé'í, háálá nihí nihich'ijí danilínígíí áájí yich'ijí danilínígíí yiláahgo ánéelą́ą́'.

¹⁷Áko Iiláísha sodoolzingo ání, Bóhólníihii, baa nánooshkąąh, díí dinééh iidoołtsééł biniyé bináá' ąą ánílééh. Nít'éé' Bóhólníihii dinééh bináá' ąą áyiilaago, shoo, dził bąąh łį́į́' áádóó tsindaabąąs bijáád naakiígíí daakǫ'go yíl'áago Iiláísha yinás'áago yiyiiłtsą́.

¹⁸Áádóó Síriya diné hach'į' hadaakaigo Iiláísha éí Bóhólníihii yich'į' sodoolzingo ání, Díí diné doo da'oo'į́į́góó ádanile' baa nánooshkąąh. Áko Iiláísha sodoolzinígíí bik'ehgo diné doo da'oo'į́į da daazlį́į́'.

¹⁹Áádóó Iiláísha áháłní, Kojigo dooda, doo nidi kwe'é kin haal'áhígíí át'ée da; wóshdę́ę́' shikéé' wohkahgo diné hadanohtáhígíí baa nihideesh'ish. Nidi Samériya kin haal'áágóoda bił jíkai.

²⁰Áko Samériya kin haal'áagi yah ajookaigo Iiláísha ání, Bóhólníihii, díí diné da'oo'į́ áńdandle', áko da'oo'į́į doo. Nít'éé' Bóhólníihii éí da'joo'į́ áńdahoodlaago, shoo, Samériya kin haal'á ałníi'gi ádajit'į́į́ lágo baa ákodazniizį́į́'.

²¹Áádóó Ízrel dine'é aláahgo binanit'a'í éí yiyiiłtsą́ągo Iiláísha ííłní, Shizhé'é, da' díí siláo naastseedísh? Naastseedísh?

²²Áko hadzoodzíi'go ájíní, Doo nidííłtsił da. Da' nidiltłish áádóó ne'ełtį́į́' bee yisnááh íinilaaígíísh nidííłtsił? Da'dooyį́į́ł áádóó da'doodlį́į́ł biniyé bidáahgi tó áádóó bááh niníkaah, áko yídahółníihii yich'į' nídookah.

²³Nít'éé' bá áda'jíísįįd, áádóó da'ííyą́ą́' índa da'oodlą́ą'go yídahółníihii yich'į' nídookah biniyé aníjiis'a'. Kót'éego Síriya dine'é éí Ízrel dine'é bikéyahgi t'áadoo náánákai da.

²⁴Kódzaadóó bik'ijį' Síriya dine'é aláahgo binanit'a'í Ben-héídad éí siláo dah deínéehii t'áá ałtso áłah áyiilaago Samériya kin haal'áá góde nínáago yizénáshzhiizh.

²⁵Áko Samériya biníjíshzhiizhgo t'áá íiyisí hodichin hazlį́į'go wónáásdóó télii bitsiits'iin éí tseebídiin béésh łigaii shékel wolyéhígíí bą́ą́h ílį́įgo áádóó hasbídí bichaan bee adlání naakidi haaką́ bíighahgo éí ashdla' shékel wolyéii bą́ą́h ílį́įgo nidajiiłniih.

²⁶Nít'éé' Ízrel dine'é aláahgo binanit'a'í éí tsé ahénátł'inígíí yikáa'di yigáałgo asdzání léi' hach'į' hadoolghaazhgo ání, Aláahgo naat'áanii nílíinii, shinanit'a'í, shíká anilyeed.

²⁷Áko ájíní, Bóhólníihii doo níká iilyeedgóogo, haash yit'éego níká adeeshwoł? Hada'iil'ésídóó daats'í, doodaii' ch'il na'atł'o'ii yiljizhídóó daats'í níká i'doolwoł.

²⁸Áádóó aláahgo naat'áanii áháłní, Haa lá yinidzaa? Áko asdzání hadzoodzíi'go ájíní, Díí asdzání áshidííniid, Díí jį́ niyáázh diidį́į́ł biniyé ninádiní'aah, áádóó yiską́ągo shiyáázh diidį́į́ł, níí nít'éé'.

²⁹Áko shiyáázh shiiłbéezhgo yiidą́ą́', áádóó biiskání áhodííniid, Niyáázh diidį́į́ ł biniyé ninádiní'aah, nidi biyáázh néidees'į́į́' lá.

³⁰Nít'éé' aláahgo naat'áanii éí asdzání haadzí'ígíí yidiizts'ą́ą'go ak'ina'ooldláadgo tsé ahénátł'in bikáa'di joogáałgo diné dadéez'į́į́' nít'éé', jó, tł'oh yishbizh ayaadi bii' dziztį́.

³¹Áko ájíní, Díí jį́ Shéífat biye' Iiláísha t'ahdii bitsiits'iin hólǫ́ǫ́ ládą́ą́' Bóhólníihii t'ah yówehgo t'óó tsé'édinda atíshidoolííł.

³²Nít'éé' Iiláísha haghan góne' hastóí aląąjį' naazíinii bił nidzíiztą́; íídą́ą́' aláahgo naat'áanii halne' yił naal'a'í hach'į' ayííł'a', áko naal'a'í t'ah doo haa yíghááhgóó hastóí ábijiní, Díí na'ałtseedii biyáázh shitsiits'iin nahgóó k'íidoołniił yiniyé shich'į' yiyííł'aad lá! Shoo, níyáago bidádi'doołkałgo bidáádadínóozį́į doo; honanit'a'í éí hakéédę́ę́' bikédil diits'a'.

³³Nít'éé' hastóí t'ah bich'į' yájíłti'go aláahgo naat'áanii haa níyáago ání, Díí doo yá'áshóonii éí Bóhólníihii bits'ą́ą́dę́ę́' át'é. Ha'át'íísh biniyé Bóhólníihii t'ahdii náásgóó biba' ánísht'ée doo?